- >>
- FALSE
តើនារីស្លៀកប៊ីគីនីគឺជាតួសម្ដែងរឿង Karate Kid នាពេលសព្វថ្ងៃនេះមែនឬទេ?
ភាពយន្តរឿង Karate Kid ត្រូវបានផលិតឡើង និងចាក់បញ្ចាំងតាំងពីជាង ១០ឆ្នាំមុនមកម៉្លេះ ហើយតួសម្ដែងក្នុងរឿងនេះ ដែលនៅវ័យកុមារនៅឡើយនោះ ក៏បានធំធាត់ពេញរូបរាងអស់ទៅហើយ។ កាលពីចុងឆ្នាំកន្លងមកនេះ រូបថតពួកគេ ត្រូវបានបង្ហោះនៅលើបណ្ដាញសង្គម ក្នុងនោះមាននារីម្នាក់ស្លៀកឈុតប៊ីគីនី ដែលត្រូវបានគេអះអាងថាជានាង Wenwen Han តួសម្ដែងក្មេងស្រីក្នុងរឿង Karate Kid នោះ។ ការអះអាងទៅលើរូបថតនេះ ត្រូវបានចែករំលែកព្រោងព្រាតលើបណ្ដាញសង្គម។ ទោះជាយ៉ាងណា យើងរកឃើញថា ការអះអាងនេះ មិនត្រឹមត្រូវនោះឡើយ។
ការអះអាងលើបណ្ដាញសង្គម
កម្រងរូបថត ៤សន្លឹក ត្រូវបានបង្ហោះនៅលើបណ្ដាញសង្គមហ្វេសប៊ុកកាលពីចុងឆ្នាំ២០២៣កន្លងមកនេះ ដោយត្រូវបានគេអះអាងថា ជារូបថតរបស់ Wenwen Han និង Jaden Smith តារាងសម្ដែងនៅក្នុងភាពយន្តរឿង Karate Kid កាលពីជាង ១០ឆ្នាំមុន និងរូបថតរបស់ពួកគេនៅឆ្នាំ២០២៣។
រូបថតមួយសន្លឹកក្នុងចំណោមនោះ ដែលបង្ហាញនារីម្នាក់ស្លៀកពាក់ស៊ិចស៊ី និងមានដើមទ្រូងធំ ត្រូវបានគេអះអាងថា ជានាង Wenwen Han នាពេលសព្វថ្ងៃនេះ។
ការអះអាងនេះ ត្រូវបានចែករំលែកយ៉ាងផុលផុសនៅលើបណ្ដាញសង្គម ហើយក៏ទទួលបានប្រតិកម្ម និងមតិយោបល់ចម្រុះបែបពីអ្នកប្រើប្រាស់បណ្ដាញសង្គមផងដែរ។
ខាងក្រោមនេះ គឺជារូបភាពផ្ដាមចេញពីការអះអាងលើបណ្ដាញសង្គមកាលពីថ្ងៃទី៣១ ខែធ្នូ ឆ្នាំ២០២៣ ដែលរៀបរាប់ថា « Wenwen Han & Jaden Smith The Karate Kids (2010-2023)» ឬមានន័យថា «Wenwen Han និង Jaden Smith ខ្សែភាពយន្ត The Karate Kid (2010-2023)»។
យុវតីជនជាតិចិនឈ្មោះ Wenwen Han និងកុមារាជនជាតិអាមេរិក Jaden Smith សុទ្ធតែជាតួសម្ដែងនៅក្នុងខ្សែភាពយន្ត Karate Kid ដែលសម្ដែងដោយតារាភាពយន្តដ៏ល្បីឈ្មោះ Jackie Chan ឬលោក ឈិន ឡុង។ នៅពេលពួកគេចូលរួមសម្ដែងក្នុងខ្សែភាពយន្តនោះនៅក្នុងឆ្នាំ២០០៩ យុវតី Wenwen Han ទើបតែមានអាយុ ១៤ឆ្នាំ ហើយ Jaden Smith ទើបតែមានអាយុ ១២ឆ្នាំនៅឡើយ។
ការអះអាងដូចគ្នានេះ ក៏ត្រូវបានបង្ហោះនៅលើបណ្ដាញសង្គមហ្វេសប៊ុកដោយអ្នកប្រើប្រាស់ហ្វេសប៊ុកដទៃទៀតផងដែរ។ ខាងក្រោមនេះ គឺជាទំព័រហ្វេសប៊ុកមួយដែលបានបង្ហោះកម្រិតរូបថតនោះដោយចម្លងពីទំព័រហ្វេសប៊ុក Film Legend។
ទំព័រហ្វេសប៊ុកមួយទៀត ក៏បានបង្ហោះរូបថតតារាសម្ដែងទាំងពីររូបនេះផងដែរជាមួយនឹងសំណេររៀបរាប់ថា រូបនារីដ៏ស៊ិចស៊ីនោះ គឺជានាង Wenwen Han នាពេលសព្វថ្ងៃនេះ។
ការអះអាងដូចគ្នានេះក៏ត្រូវបានបង្ហោះនៅលើបណ្ដាញសង្គម Twitter ផងដែរ ហើយក៏ត្រូវបានចែករំលែកបន្តយ៉ាងច្រើនផុសផុល និងមតិយោបល់ចម្រុះផងដែរ។
ខាងក្រោមនេះ គឺជារូបភាពផ្ដាមចេញពីការបង្ហោះការអះអាងនេះដោយអ្នកប្រើប្រាស់ Twitter មួយកាលពីថ្ងៃទី៣១ ខែធ្នូ ឆ្នាំ២០២៣ ដែលរៀបរាប់ថា «Jaden Smith And WenWen Han The Karate Kids (2010-2023)»។
រត្រួតពិនិត្យការពិត
Fact Crescendo Cambodia បានចាប់ផ្ដើមត្រួតពិនិត្យ និងផ្ទៀងផ្ទាត់ទៅលើការអះអាងខាងលើនេះតាមរយៈការដំណើរការកម្មវិធី Image Reverse Search ដែលនាំឱ្យយើងរកឃើញការពិតដូចខាងក្រោមនេះ។
តាមរយៈ Google Reverse Image Search យើងបានរកឃើញថា រូបថតតារាសម្ដែង Jaden Smith នាពេលសព្វថ្ងៃ ពិតជាដូចទៅនឹងរូបថតដែលត្រូវបានគេបង្ហោះនៅលើបណ្ដាញសង្គមពិតមែន។
នៅក្នុងគេហទំព័រ Alamy ដែលជាវេបសាយផ្គត់ផ្គង់រូបថត និងវីដេអូដ៏ធំមួយនៅលើពិភពលោក យើងបានរកឃើញរូបថតរបស់ Jaden Smith ដែលពាក់ខ្សែកធំពណ៌មាស នៅឯកម្មវិធីមួយនៅទីក្រុង Los Angeles កាលពីថ្ងៃទី១៣ ខែធ្នូ ឆ្នាំ២០១៧កន្លងមក។
តាមរយៈ Google Reverse Image Search ដដែល យើងបានរកឃើញថា រូបថតនារីម្នាក់ស្លៀកពាក់ឈុតប៊ីគីនីពណ៌ខៀវនោះ មិនមែនជានាង Wenwen Han ក្មេងស្រីជនជាតិចិនដែលជាតួសម្ដែងម្នាក់នៅក្នុងរឿង Karate Kids នោះឡើយ។
យើងបានរកឃើញបន្ថែមថា នារីស្លៀកឈុតប៊ីគីនីដែលគេអះអាងថាជានាង Wenwen Han នោះ ការពិតគឺជាតារាម៉ូឌែលស៊ិចស៊ីជនជាតិជប៉ុន នាង Nonami Takizawa អាយុ ៣៨ឆ្នាំមកដល់ដើមឆ្នាំ២០២៤នេះ។
ខាងក្រោមនេះ គឺជារូបថតរបស់នាង Nonami Takizawa ដែលត្រូវបានផ្ដាមចេញពីវេបសាយ Eyval ដែលបានបង្ហោះរូបថតជាច្រើនរបស់តារាម៉ូឌែលជប៉ុនរូបនេះស្ថិតក្នុងឈុតប៊ីគីនីពណ៌ខៀវ កាលពីថ្ងៃទី២៥ ខែកុម្ភៈ ឆ្នាំ២០២០។
តារាសម្ដែងជនជាតិចិន នាង Wenwen Han កើតនៅក្នុងឆ្នាំ១៩៩៥ សព្វថ្ងៃនេះមានវ័យ ២៨ឆ្នាំហើយគិតត្រឹមដើមឆ្នាំ២០២៤នេះ ហើយនាងបានចូលរួមសម្ដែងជាតួអង្គឈ្មោះ Mei Ying នៅក្នុងភាពយន្ត Karate Kids ដែលចាក់បញ្ចាំងនៅឆ្នាំ២០១០។
យោងតាមការចុះផ្សាយរបស់សារព័ត៌មាន Byliner របស់សហរដ្ឋអាមេរិក យើងបានដឹងថា តារាសម្ដែងជនជាតិចិន នាង Wenwen Han ដែលមានជំនាញលេងវីយូឡុង និងរាំផងនោះ បានសម្រាកពីការងារសម្ដែងមួយរយៈធំ បន្ទាប់ពីការចូលរួមសម្ដែងក្នុងភាពយន្ត Karate Kids។
សារព័ត៌មានដដែលនេះ បានរៀបរាប់ថា តារាសម្ដែងចិនរូបនេះកម្របង្ហាញមុខជាសាធារណៈណាស់ ហើយនាងរស់នៅក្នុងភាពស្ងប់ស្ងាត់ និងមិនបានបង្ហាញវត្តមាននៅក្នុងគម្រោងផលិតភាពយន្តថ្មីៗនោះឡើយ។ សូមអានលម្អិតនៅទីនេះ(Archived)
បើតាមសារព័ត៌មាន Byliner ដដែល ជារឿយៗ តារាសម្ដែងចិនរូបនេះ តែងតែត្រូវបានអ្នកប្រើប្រាស់បណ្ដាញសង្គម និងអ៊ិនធឹណិត យល់ច្រឡំជាមួយតារាសម្ដែងចិនម្នាក់ទៀតឈ្មោះ Wenwen Han ដែលមានអាយុ ៤២ឆ្នាំហើយ និងបានរៀបការជាមួយតារាងចម្រៀងតៃវ៉ាន់ Ken Chu ដែលជាតួសម្ដែងនៅក្នុងរឿង F4។
សារព័ត៌មាន Byliner បានរៀបរាប់ថា តារាសម្ដែង នាង Wenwen Han បានផ្លាស់ប្ដូរឈ្មោះទៅជា Vivien Han វិញ ដើម្បីកុំឱ្យមហាជនយល់ច្រឡំរវាងនាង និងតារាសម្ដែងនាង Wenwen Han នៅក្នុងភាពយន្ត Karate Kids។
សន្និដ្ឋានFact Crescendo Cambodia
បានរកឃើញថា ការអះអាងដូចរៀបរាប់ខាងលើនេះ មិនត្រឹមត្រូវនោះឡើយ។ រូបថតនារីម្នាក់ស្ថិតក្នុងឈុតប៊ីគីនីពណ៌ខៀវនោះ មិនមែនជារូបថតបច្ចុប្បន្នរបស់នាង Wenwen Han តារាសម្ដែងនៅក្នុងភាពយន្ត Karate Kid នោះឡើយ។ រូបថតនោះ គឺជានាង Nonami Takizawa ដែលជាអតីតតារាម៉ូឌែលស៊ិចស៊ីជនជាតិជប៉ុន។
Title:តើនារីម្នាក់ស្លៀកឈុតប៊ីគីនី គឺជាតួសម្ដែងក្នុងរឿង Karate Kid នាពេលសព្វថ្ងៃនេះមែនឬទេ?
Written By: Jay UdomResult: False
