ឃ្លីបវីដេអូមួយដែលបង្ហាញហេតុការណ៍បាញ់ប្រហារមួយ ត្រូវបានគេបង្ហោះនៅលើបណ្ដាញសង្គមដោយភ្ជាប់ជាមួយសំណេរក្នុងន័យថា វាជាអំពើឃាតកម្មកើតឡើងនៅក្នុងប្រទេសកម្ពុជា។ ឃ្លីបវីដេអូភ្ជាប់មកជាមួយសំណេរបែបនេះ ត្រូវបានចែករំលែកព្រោងព្រាតលើបណ្ដាញសង្គម ដែលនាំឱ្យមានការចោទអំពីទីតាំងនៃហេតុការណ៍បាញ់ប្រហារនោះ។ ទោះជាយ៉ាងណា ការផ្ទៀងផ្ទាត់រកឃើញថា ការអះអាងនេះ មិនត្រឹមត្រូវនោះឡើយ។
ការអះអាងលើបណ្ដាញសង្គម
ឃ្លីបវីដេអូកាមេរ៉ាសុវត្ថិភាពមួយដែលថតបានបុរសម្នាក់បាញ់ប្រហារទៅលើបុរសម្នាក់ទៀត ត្រូវបានគេបង្ហោះនៅលើបណ្ដាញសង្គមកាលពីថ្ងៃម្សិលមិញនេះជាមួយសំណេររៀបរាប់ក្នុងន័យថា ករណីបាញ់ប្រហារនេះកើតឡើងនៅក្នុងប្រទេសកម្ពុជា។
ឃ្លីបវីដេអូជាមួយសំណេរបែបនេះ ត្រូវបានចែករំលែកព្រោងព្រាតនៅលើបណ្ដាញសង្គមហ្វេសប៊ុកពីសំណាក់អ្នកប្រើប្រាស់ហ្វេសប៊ុកកម្ពុជា ដែលបានបញ្ចេញប្រតិកម្មចម្រុះបែប និងមតិយោបល់ផ្សេងៗ ក្នុងនោះមានការចោទសួរថា តើករណីបាញ់ប្រហារនេះកើតឡើងនៅទីណាពិតប្រាកដ។
ខាងក្រោមនេះ គឺជាឃ្លីបវីដេអូទាំងស្រុងដែលត្រូវបានបង្ហោះនៅលើបណ្ដាញសង្គមកាលពីថ្ងៃទី០៤ ខែកុម្ភៈ ឆ្នាំ២០២៥ ជាមួយសំណេររៀបរាប់ថា “អរគុណសន្តិផេះ ជីវិតមនុស្សមិនស្មើឆ្កែមួយក្បាល”។
ការត្រួតពិនិត្យការពិត
Fact Crescendo បានត្រួតពិនិត្យ និងផ្ទៀងផ្ទាត់ទៅលើការអះអាងដូចដែលត្រូវបានរៀបរាប់ខាងលើនេះតាមរយៈការដំណើរការ Google Reverse Image Search ដែលនាំឱ្យយើងរកឃើញការពិតដូចខាងក្រោមនេះ។
តាមរយៈដំណើរការ Google Reverse Image Search យើងបានរកឃើញថា ឃ្លីបវីដេអូនៃហេតុការណ៍បាញ់ប្រហារនេះ ត្រូវបានបង្ហោះព្រោងព្រាតនៅលើបណ្ដាញអ៊ិនធឹណិត ហើយក៏ផ្ដល់ព័ត៌មានលម្អិតអំពីហេតុការណ៍បាញ់ប្រហារនេះផងដែរ។
សេចក្ដីរាយការណ៍របស់សារព័ត៌មានហ្វីលីពីន GMA News Online កាលពីថ្ងៃចន្ទកន្លងមកនេះ បានឱ្យដឹងថា ករណីបាញ់ប្រហារនេះ បានកើតឡើងនៅទីក្រុង Antipolo ស្ថិតនៅភាគខាងរដ្ឋធានីម៉ានីល ប្រទេសហ្វីលីពីន។
សារព័ត៌មានដដែលនេះ បានរាយការណ៍បន្តថា បុរសជាសន្តិសុខម្នាក់បានបាញ់សម្លាប់អ្នករួមការងារជាមួយគ្នាដោយសារតែជនរងគ្រោះមកធ្វើការយឺតយ៉ាវរហូតដល់ ៣០នាទីស្ទើតែរៀងរាល់ថ្ងៃ និងដោយសារជនរងគ្រោះគំរាមកំហែងដល់ក្រុមគ្រួសាររបស់ខ្មាន់កាំភ្លើង។
ខាងក្រោមនេះ គឺជារូបភាពផ្ដាមចេញពីសេចក្ដីរាយការណ៍របស់ប្រព័ន្ធផ្សព្វផ្សាយហ្វីលីពីន GMA News Online កាលពីថ្ងៃទី០៣ ខែកុម្ភៈ ឆ្នាំ២០២៥។
GMA News Online | Archived Link
ខាងក្រោមនេះ គឺជាវីដេអូសេចក្ដីរាយការណ៍ព័ត៌មានអំពីហេតុការណ៍បាញ់ប្រហារនេះ ដែលផ្សាយដោយសារព័ត៌មាន GMA News នៅបណ្ដាញ YouTube របស់ខ្លួនកាលពីថ្ងៃទី០៣ ខែកុម្ភៈ ឆ្នាំ២០២៥។
GMA News’s YouTube | Archived Link
បន្ទាប់ឃ្លីបវីដេអូបាញ់ប្រហារនេះ ត្រូវបានបង្ហោះនៅលើបណ្ដាញសង្គមជាមួយសំណេរក្នុងន័យថា វាជាហេតុការណ៍កើតឡើងនៅកម្ពុជានោះ អ្នកនាំពាក្យរដ្ឋាភិបាលកម្ពុជាក៏បានច្រានចោលព័ត៌មាននេះផងដែរ ដោយអះអាងថា វាព័ត៌មាន “ភាន់ច្រឡំ” និងបានអំពាវនាវទៅមហាជនឱ្យបញ្ឈប់ការចែកចាយវីដេអូនេះនៅលើបណ្ដាញសង្គម។
ខាងក្រោមនេះ គឺជារូបភាពផ្ដាមចេញពីការបញ្ជាក់របស់លេខាធិការដ្ឋានគណៈកម្មាធិការជាតិសម្របសម្រួលកិច្ចការព័ត៌មាន និងសាធារណមតិ ដែលត្រូវបានបង្ហោះនៅលើបណ្ដាញសង្គមហ្វេសប៊ុករបស់អង្គភាពអ្នកនាំពាក្យរាជរដ្ឋាភិបាលកម្ពុជាកាលពីថ្ងៃទី០៣ ខែកុម្ភៈ ឆ្នាំ២០២៥។
សន្និដ្ឋាន
Fact Crescendo រកឃើញថា ការអះអាងដូចដែលត្រូវបានរៀបរាប់ខាងលើនេះ មិនត្រឹមត្រូវនោះឡើយ។ វីដេអូនៃហេតុការណ៍បាញ់ប្រហារនេះ មិនមែនជាករណីបាញ់ប្រហារកើតឡើងនៅក្នុងប្រទេសកម្ពុជានោះឡើយ។ វាជាហេតុការណ៍បាញ់ប្រហារកើតឡើងនៅក្នុងទីក្រុង Antipolo ប្រទេសហ្វីលីពីន កាលពីថ្ងៃទី០៣ ខែកុម្ភៈ ឆ្នាំ២០២៥។
Title:វីដេអូឃាតកម្មនៅហ្វីលីពីនត្រូវបានគេអះអាងថាជាការបាញ់សម្លាប់កើតឡើងនៅកម្ពុជា
Written By: Jay UdomResult: False
