កាលពីចុងឆ្នាំ២០១៣កន្លងមក លោក អ៊ូ វីរៈ ដែលមានតួនាទីជាប្រធានមជ្ឈមណ្ឌលសិទ្ធិមនុស្សកម្ពុជា (CCHR)នាពេលនោះ បានថ្លែងរិះគន់មេដឹកនាំគណបក្សសង្គ្រោះជាតិ លោក សម រង្ស៊ី ដែលបានប្រើពាក្យ«យួន»នៅក្នុងសារនយោបាយរបស់គាត់។ សកម្មជនការពារសិទ្ធិមនុស្សរូបនេះ ចាត់ទុកការប្រើពាក្យ«យួន»ជាភាសារើសអើងពូជសាសន៍ប្រឆាំងនឹងជនជាតិវៀតណាម។
ជាង ៩ឆ្នាំក្រោយមក រូបថតមួយសន្លឹកដែលបង្ហាញលោក អ៊ូ វីរៈ ធ្វើយុទ្ធនាការតាមអនឡាញទាមទារឱ្យបញ្ឈប់ការប្រើពាក្យ«យួន» ត្រូវបានបង្ហោះនៅលើបណ្ដាញសង្គមហ្វេសប៊ុក។ ទោះជាយ៉ាងណា ការផ្ទៀងផ្ទាត់របស់យើង បានរកឃើញថា រូបថតមួយសន្លឹកនេះ ត្រូវបានកាត់ត។
ការអះអាងលើបណ្ដាញសង្គម
គណនីអ្នកប្រើប្រាស់ហ្វេសប៊ុកមួយឈ្មោះ Damarin Phlong បានបង្ហោះរូបថតមួយសន្លឹក ដែលរូបថតនោះបង្ហាញលោក អ៊ូ វីរៈ ប្រធានវេទិកាអនាគត (Future Forum) កាន់ក្រដាសមួយសន្លឹកដែលសរសេរថា «កុំប្រើពាក្យយួន វាជាការរើសអើងពូជសាសន៍»។
រូបថតនេះ ត្រូវបានបង្ហោះលើបណ្ដាញសង្គមហ្វេសប៊ុកតាំងពីឆ្នាំ២០២០កន្លងមក ហើយវាបានបង្ហាញលើបណ្ដាញសង្គមជាថ្មីនៅរយៈពេល ២ឆ្នាំក្រោយមក។
លោក អ៊ូ វីរៈ គឺជាអតីតនាយកប្រតិបត្តិមជ្ឈមណ្ឌលសិទ្ធិមនុស្សកម្ពុជា (CCHR) និងជាសកម្មជនការពារសិទ្ធិមនុស្សឈានមុខផងដែរនៅពេលលោកកាន់តំណែងមួយនេះ។
ខាងក្រោមនេះ គឺជារូបភាពផ្ដាមចេញពីប៉ុស្តិ៍របស់អ្នកប្រើប្រាស់ហ្វេសប៊ុក ដែលបានបង្ហោះរូបភាពនេះកាលពីថ្ងៃទី៩ ខែកុម្ភៈ ឆ្នាំ២០២០កន្លងមក។
ការត្រួតពិនិត្យការពិត
Fact Crescendo Cambodia បានចាប់ផ្ដើមផ្ទៀងផ្ទាត់ទៅលើរូបថតនេះតាមរយៈការដំណើរការ reverse-search image ដែលនាំឱ្យយើងបានរកឃើញរូបថតច្បាប់ដើម និងខ្លឹមសារនៃរូបថតនេះ។
រូបថតច្បាប់ដើម ត្រូវបានរកឃើញបង្ហោះនៅក្នុងទំព័រហ្វេសប៊ុករបស់មជ្ឈមណ្ឌលសិទ្ធិមនុស្ស កាលពីថ្ងៃទី២៨ ខែមិថុនា ឆ្នាំ២០១៣កន្លងមក ពោលគឺនៅពេលលោក អ៊ូ វីរៈ នៅដឹកនាំអង្គការសិទ្ធិមនុស្សមួយនេះ។
រូបថតដែលបង្ហោះនៅលើទំព័រហ្វេសប៊ុករបស់អង្គការសិទ្ធិមនុស្សមួយនេះ បង្ហាញលោក អ៊ូ វីរៈ កាន់ក្រដាសមួយសន្លឹកដែលមានសំណេរថា «ដោះលែង យ៉ោម បុប្ផា FREE YORM BOPHA»។
បើតាមទំព័រហ្វេសប៊ុកដដែលនេះ លោក អ៊ូ វីរៈ ប្រធានមជ្ឈមណ្ឌលសិទ្ធិមនុស្សកម្ពុជា (ម.ស.ម.ក.)នាពេលនោះ បានចូលរួមយុទ្ធនាការតាមអនឡាញ ដែលទាមទារឱ្យដោះលែងសកម្មជនដីធ្លី អ្នកស្រី យ៉ោម បុប្ផា ដែលត្រូវបានអាជ្ញាធរចាប់ដាក់ឃុំក្នុងពន្ធនាគារអស់រយៈពេល ៣០៣ថ្ងៃហើយនាពេលនោះ។
ខាងក្រោមនេះ គឺជារូបភាពផ្ដាមចេញពីប៉ុស្តិ៍របស់ទំព័រហ្វេសប៊ុកមជ្ឈមណ្ឌលសិទ្ធិមនុស្សកម្ពុជា ដែលសរសេររៀបរាប់ថា «មកដល់ថ្ងៃនេះ គឺជាថ្ងៃទី៣០៣ ដែលអ្នកស្រី យ៉ោម បុប្ផា ត្រូវបានឃុំឃាំងក្នុងពន្ធនាគារ។ លោក អ៊ូ វីរៈ ប្រធាន ម.ស.ម.ក ចូលរួមយុទ្ធនាការគាំទ្រការដោះលែងអ្នកស្រី យ៉ោម បុប្ផា»។
CCHR’s Facebook Page | Archived Link
កាលពីខែធ្នូ ឆ្នាំ២០១៣កន្លងមក លោក អ៊ូ វីរៈ បានថ្លែងរិះគន់មេដឹកនាំគណបក្សសង្គ្រោះជាតិ លោក សម រង្ស៊ី នាពេលនោះ ដែលបានប្រើពាក្យ«យួន»នៅក្នុងសារនយោបាយ។ សកម្មជនសិទ្ធិមនុស្សរូបនេះ ចាត់ទុកការប្រើពាក្យ«យួន»នៅក្នុងសារនយោបាយរបស់មេដឹកនាំបក្សប្រឆាំងថា ជាភាសារើសអើងពូជសាសន៍វៀតណាម។ ប៉ុន្មានថ្ងៃក្រោយមក លោក អ៊ូ វីរៈ បានប្រាប់វិទ្យុអាស៊ីសេរីថា លោកនៅតែរក្សាការរិះគន់របស់លោកទៅលើមេដឹកនាំបក្សប្រឆាំងដដែល។
ខាងក្រោមនេះ គឺជារូបភាពផ្ដាមចេញពីសេចក្ដីរាយការណ៍របស់វិទ្យុអាស៊ីសេរីចុះផ្សាយថ្ងៃទី១៨ ខែធ្នូ ឆ្នាំ២០១៣ ដែលរាយការណ៍អំពីជំហររបស់លោក អ៊ូ វីរៈ ដែលរិះគន់ទៅលើមេដឹកនាំបក្សប្រឆាំង លោក សម រង្ស៊ី ជុំវិញការប្រើពាក្យ«យួន»នៅក្នុងសារនយោបាយ។
សន្និដ្ឋាន
Fact Crescendo Cambodia បានរកឃើញថា រូបថតដូចដែលរៀបរាប់ខាងលើនេះ គឺជារូបភាពកាត់ត។ អតីតប្រធានមជ្ឈមណ្ឌលសិទ្ធិមនុស្សកម្ពុជា (CCHR) លោក អ៊ូ វីរៈ មិនបានធ្វើយុទ្ធនាការគាំទ្រឱ្យបញ្ឈប់ការប្រើពាក្យ«យួន»នោះឡើយ។ រូបថតច្បាប់ដើម បង្ហាញលោក អ៊ូ វីរៈ ចូលរួមធ្វើយុទ្ធនាការតាមអនឡាញកាលពីឆ្នាំ២០១៣ ដែលទាមទារឱ្យដោះលែងសកម្មជនដីធ្លី អ្នកស្រី យ៉ោម បុប្ផា ដែលត្រូវបានចាប់ដាក់ឃុំឃាំងពាក់ព័ន្ធនឹងជម្លោះដីធ្លីនៅតំបន់បឹងកក់។
Title:តើលោក អ៊ូ វីរៈ ធ្វើយុទ្ធានាការតាមអនឡាញទាមទារឱ្យបញ្ឈប់ប្រើពាក្យ«យួន»មែនឬទេ?
Fact Check By: Jay UdomResult: Altered
