កាលពីសប្ដាហ៍មុន សំណុំរឿងរបស់ឧកញ៉ាម្នាក់ដែលត្រូវបានចោទថា បានប៉ុនប៉ងរំលោភលើតារាម៉ូឌែល និងពិធីការិនីទូរទស្សន៍នោះ បានគ្របដណ្ដប់ទៅលើព័ត៌មានដទៃនៅលើបណ្ដាញសង្គម។ ទន្ទឹមគ្នានេះ រូបថតយុវតីម្នាក់ជាមួយសំណេរលើរូបថតថា យុវតីរូបនោះត្រូវបានសមត្ថកិច្ចចាប់ខ្លួន ហើយបញ្ជូនទៅតុលាការ បន្ទាប់ពីនាងបដិសេធការចូលស្ដីដណ្ដឹងសុំរៀបការនោះ ត្រូវបានបង្ហោះលើបណ្ដាញសង្គម និងត្រូវបានចែករំលែកតៗគ្នាយ៉ាងព្រោងព្រាតផងដែរ។ ទោះជាយ៉ាងណា ការត្រួតពិនិត្យការពិត បង្ហាញថា សំណេរលើរូបថតនោះ មិនត្រឹមត្រូវនោះឡើយ ហើយយុវតីរូបនោះ មិនត្រូវបានសមត្ថកិច្ចឃាត់ខ្លួនដូចការអះអាងនោះទេ។
ការអះអាងលើបណ្ដាញសង្គម
កាលពីថ្ងៃទី១៣ ខែឧសភា ឆ្នាំ២០២១ រូបថតយុវតីម្នាក់ឈរអមសងខាងដោយមន្ត្រីនគរបាលពីររូប ត្រូវបានបង្ហោះលើបណ្ដាញសង្គមជាមួយសំណេរលើរូបថតនោះថា យុវតីម្នាក់នោះ ត្រូវបានសមត្ថកិច្ចចាប់ខ្លួន និងបញ្ជូនទៅតុលាការ បន្ទាប់ពីនាងបដិសេធការចូលស្ដីដណ្ដឹង ឬបដិសេធរៀបការនោះ។
រូបថតជាមួយសំណេរបែបនេះ ត្រូវបានអ្នកប្រើហ្វេសប៊ុកនិយាយភាសាខ្មែរបញ្ចេញប្រតិកម្ម និងមតិចម្រុះបែប ហើយក៏ត្រូវបានចែករំលែកតៗគ្នាដល់ទៅរាប់រយដង។ រូបថតជាមួយសំណេរនេះ ក៏ត្រូវបានចែករំលែកបន្តទៅកាន់គ្រុបហ្វេសប៊ុកមួយដែលមានសមាជិកដល់ទៅរាប់សែនគណនីហ្វេសប៊ុក។
សំណេរនៅលើរូបថតរបស់យុវតីនោះ រៀបរាប់ថា«នារីវ័យក្មេងម្នាក់ គេចូលដណ្ដឹងប្រកែកមិនព្រមយកប្ដី ត្រូវបានសមត្ថកិច្ចឃាត់ខ្លួនបញ្ជូនទៅតុលាការសួរចម្លើយ»។
រូបថតរបស់យុវតីម្នាក់ជាមួយសំណេរបែបនេះ ក៏ត្រូវបានបង្ហោះឡើងវិញដោយអ្នកប្រើហ្វេសប៊ុកម្នាក់ទៀត ហើយទទួលបានការចុចចែករំលែកបន្តដល់ទៅរាប់រយដងពីសំណាក់អ្នកប្រើហ្វេសប៊ុកនិយាយភាសាខ្មែរផងដែរ។
ការពិនិត្យការពិត
Fact Crescendo Cambodia ចាប់ផ្ដើមផ្ទៀងផ្ទាត់ការពិតជុំវិញរូបថត និងព័ត៌មានលម្អិតនៃរូបថតនេះតាមរយៈកម្មវិធីស្វែងរករូបថតរបស់ Google ដែលនាំឱ្យជើងបានជួបរូបថតដូចគ្នាទាំងស្រុង និងព័ត៌មានលម្អិតនៃរូបថតនេះ។
តាមរយៈកម្មវិធីស្វែងរករូបថតរបស់ Google យើងបានរកឃើញអត្ថបទព័ត៌មានចេញផ្សាយដោយគេហទំព័រសារព័ត៌មាន Khmer Breaking News (KBN) កាលពីចុងខែមករា ឆ្នាំ២០២០កន្លងមក។ ខ្លឹមសារនៃអត្ថបទសារព័ត៌មាននេះ បានផ្សាយថា យុវតី កាន់ សុភ័ក្រ អាយុ ១៩ឆ្នាំ ដែលជាម្ចាស់គណនីហ្វេសប៊ុកមួយ ត្រូវបាននគរបាលខេត្តសៀមរាបឃាត់ខ្លួនសួរនាំជុំវិញការបង្ហោះការអះអាងពាក់ព័ន្ធនឹងមេរោគកូរ៉ូណា។
ការអះអាងមួយដែលត្រូវចុះផ្សាយភ្ជាប់ជាមួយអត្ថបទសារព័ត៌មាននោះ ត្រូវបានសរសេរថា «កុំចាកចេញពីផ្ទះចាប់ពីម៉ោង ៤ព្រឹក ដល់ម៉ោង ៧:៣០ព្រឹកថ្ងៃស្អែកនេះ ព្រោះរដ្ឋាភិបាលទូទាំងប្រទេសបានចាក់ទឹកសម្លាប់មេរោគលើយន្តហោះ។ សូមចែករំលែកគ្នាទៅវិញទៅមកដើម្បីជូនដំណឹងដល់គ្នា»។
យុវតីរូបនេះ បានសន្យានៅចំពោះមុខសមត្ថកិច្ចថា នាងទទួលស្គាល់កំហុស ក្រោយពីបានចែករំលែកការអះអាងខាងលើដោយមិនបានដឹងថាជាព័ត៌មានមិនពិត។
នៅក្នុងកិច្ចសម្ភាសតាមទូរស័ព្ទជាមួយ Fact Crescendo Cambodia នៅថ្ងៃទី១៨ ខែឧសភា ឆ្នាំ២០២១ យុវតី កាន់ សុភ័ក្រ ដែលសព្វថ្ងៃនេះមានអាយុ ២០ឆ្នាំហើយនោះ បានប្រាប់ថា នាងបានច្រានចោលនូវការអះអាងនៅលើបណ្ដាញសង្គម ដោយនាងចាត់ទុកថា បានធ្វើឱ្យប៉ះពាល់ដល់កិត្តិយស និងសេចក្ដីថ្លៃថ្នូររបស់នាង។
យុវតីរូបនេះ ប្រាប់ថា នាងជ្រើសរើសមិនបញ្ចេញការឆ្លើយតបអ្វីទាំងអស់ទៅនឹងសំណេរលើរូបថតរបស់នាង ដោយរំពឹងថា អ្វីៗនឹងរសាត់បាត់ទៅតាមពេលវេលា។
សន្និដ្ឋាន
Fact Crescendo Cambodia រកឃើញថា សំណេរលើរូបថតដូចបានរៀបរាប់ខាងលើនេះ មិនត្រឹមត្រូវនោះឡើយ។ យុវតីអាយុ ១៩ឆ្នាំម្នាក់ មិនមែនត្រូវបានសមត្ថកិច្ចចាប់ខ្លួនដោយសារតែនាងបដិសេធការចូលស្ដីដណ្ដឹងពីបុរសណាម្នាក់ និងបដិសេធការរៀបអាពាហិ៍ពិពាហិ៍នោះឡើយ។ យុវតីរូបនេះ ត្រូវបានសមត្ថកិច្ចហៅទៅសាកសួរជុំវិញការបង្ហោះសារនៅលើហ្វេសប៊ុកពាក់ព័ន្ធនឹងមេរោគកូរ៉ូណាកាលពីចុងខែមករា ឆ្នាំ២០២០។
Title:តើយុវតីម្នាក់ត្រូវសមត្ថកិច្ចចាប់ខ្លួនដោយសារបដិសេធការចូលស្ដីដណ្ដឹងមែនឬទេ??
Fact Check By: Jay UdomResult: False
