តើគុណភាពខ្យល់នៅរាជធានីភ្នំពេញស្ថិតនៅក្នុងកម្រិតបែបណា?

នៅសប្ដាហ៍នេះ គុណភាពខ្យល់នៅរាជធានីភ្នំពេញ បានក្លាយជាប្រធានបទនៃការជជែកយ៉ាងផុសផុលរបស់មហាជន បន្ទាប់ពីក្រសួងបរិស្ថានអះអាងថា គុណភាពខ្យល់នៅទីក្រុងមួយនេះនៅល្អនៅឡើយ ប៉ុន្តែ មហាជននៅលើបណ្ដាញសង្គម បានបង្ហាញមតិមិនយល់ស្របនោះឡើយ។ តើគុណភាពខ្យល់នៅរាជធានីភ្នំពេញស្ថិតនៅកម្រិតណា?

ព័ត៌មានខាងលើ ត្រូវបានចែករំលែកយ៉ាងព្រោងព្រាតពីសំណាក់អ្នកប្រើប្រាស់ហ្វេសប៊ុកនិយាយភាសាខ្មែរ ព្រមទាំងការបញ្ចេញប្រតិកម្មចម្រុះបែប និងមតិយោបល់ដ៏ច្រើន អំពីបញ្ហាមួយនេះនៅលើបណ្ដាញសង្គម។

ខាងក្រោមនេះ គឺជារូបភាពផ្ដាមចេញពីទំព័រហ្វេសប៊ុកមួយ ដែលបានសរសេររៀបរាប់ថា «តើជាអ័ព្ទ ឬជាខ្យល់ពុលនៃធូលីម៉ដ្ឋល្អិតដូចនៅប្រទេសថៃ? សូម្បីតែជូនដំណឹងឲ្យរាស្រ្តប្រុងប្រយ័ត្ន និងពាក់ម៉ាស់ក៍ មិនទាន់លឺស្ថាប័នណាបន្លឺវាចារមួយម៉ាត់ផង»។

Facebook Post | Archived Link

អ្នកប្រើប្រាស់ហ្វេសប៊ុកដទៃទៀត ក៏បានធ្វើការចោទសួរអំពីមូលហេតុ និងដើមចមនៃការមានកំហាប់ខ្យល់ពុលនៅក្នុងទីក្រុងភ្នំពេញ ដោយអាចជាការរងឥទ្ធិពល ពិការឆេះព្រៃនៅរដ្ឋ California សហរដ្ឋអាមេរិក កាលពីថ្មីៗនេះ។

Facebook Post | Archived Link

ថ្មីៗនេះ អ្នកប្រើប្រាស់បណ្ដាញសង្គមម្នាក់ ក៏បានបញ្ជាក់ផងដែរថា បរិមាណខ្យល់ពុលនៅក្នុងទីក្រុងភ្នំពេញ គឺមានកម្រិតបំពុលខ្ពស់ជាងទីក្រុងបាងកក ប្រទេសថៃទៅទៀត ដោយតម្រូវឱ្យប្រជាពលរដ្ឋទូទៅមានការពាក់ម៉ាស់ និងជាពិសេសសម្រាប់អ្នកដែលមានបញ្ហាខាងផ្លូវដកដង្ហើម។

Facebook Post | Archived Link

ក្រុមការងាររបស់ Fact Crescendo បានរកឃើញថា កាលពីម្សិលមិញ ថ្ងៃទី២៣ ខែមករា ឆ្នាំ២០២៥នេះ អ្នកនាំពាក្យក្រសួងបរិស្ថាន លោក ខ្វៃ អាទិត្យា អះអាងថា ស្ថានភាពខ្យល់នៅកម្ពុជាមិនទាន់ឈានដល់កម្រិតគ្រោះថ្នាក់នៅឡើយទេ ដោយលោកបញ្ជាក់ផងដែរថា បាតុភូតចុះអ័ព្ទ និងគុណភាពខ្យល់ជារឿងពីរដាច់ដោយឡែកពីគ្នា។

អ្នកនាំពាក្យរូបនេះ ក៏បានឆ្លើយតបថា កំហាប់ជាតិពុលក្នុងខ្យល់នៅកម្ពុជាពិតជាកើនឡើងមែន ប៉ុន្តែមិនទាន់ដល់កម្រិតបង្កហានិភ័យណាមួយដែលទាមទារការប្រុងប្រយ័ត្ននោះទេ ខណៈពេលដែលប្រទេសកម្ពុជាយើង បានកំណត់ការវាស់កម្រិតភាគល្អិតនៃការបំពុលខ្យល់ ត្រឹម៥០មីក្រូក្រាម ក្នុងមួយម៉ែត្រគូប ជាកម្រិតប្រកាសអាសន្ន។

ខាងក្រោមនេះ គឺជាវីដេអូឃ្លីបបកស្រាយ និងពន្យល់ទាំងស្រុងពីសំណាក់ អ្នកនាំពាក្យនៃក្រសួងបរិស្ថានកម្ពុជា។

Ministry of Environment | Archived Link

តាមរយៈការផ្សព្វផ្សាយដោយ Clean Air Cambodia Project កាលពីថ្ងៃទី២៣ ខែមករា ឆ្នាំ២០២៥ម្សិលមិញនេះ ឧបករណ៍ចាប់ភាគល្អិតនិចលទំហំ ២.៥មីក្រូម៉ែត្រ (PM2.5) បានបង្ហាញឲ្យឃើញថា កំហាប់ភាគល្អិត PM2.5 នៅរាជធានីភ្នំពេញ មានកម្រិតអត្រាខ្ពស់លើសពីធម្មតា ចន្លោះពី 70 µg/m³ ទៅ 105 µg/m³។

Clean Air Cambodia Project | Archived Link

ទោះជាយ៉ាងណាក្ដី កាលពីព្រឹកថ្ងៃទី២៤ ខែមករា ឆ្នាំ២០២៥នេះ ក្រសួងបរិស្ថាន ក៏បានចេញការជូនដំណឹងទាក់ទងទៅនឹងស្ថានភាពគុណភាពខ្យល់ នៅតាមបណ្ដាខេត្តនានានៅក្នុងប្រទេសកម្ពុជាផងដែរ ដោយបានបង្ហាញខេត្តសំខាន់ៗដូចជា ខេត្តបន្ទាយមានជ័យ ខេត្តកោះកុង ខេត្តសៀមរាប និងរាជធានីភ្នំពេញ មានស្ថានភាពកំហាប់នៅក្នុងខ្យល់កម្រិតខ្ពស់ ឬមានការបំពុលខ្លាំង (២០១-៣០០)។

Ministry of Environment | Archived Link

ដូចគ្នានេះ តាមរយៈគេហទំព័រឃ្លាំមើលខ្យល់ IQAir ដែលជាគេហទំព័រសន្ទស្សន៍គុណភាពខ្យល់មួយដ៏ល្បី បានបង្ហាញទីក្រុងភ្នំពេញ ស្ថិតនៅលំដាប់ទី៥ ជាទីក្រុងដែលមានខ្យល់បំពុល ឬគុណភាពខ្យល់មិនល្អនៅលើសកលលោក ដោយទីក្រុងដាកា (Dhaka) ប្រទេសបង់ក្លាដេស ស្ថិតនៅលំដាប់ទី១។

សន្ទស្សន៍គុណភាពខ្យល់ (AQI) គឺជាសន្ទស្សន៍មួយ ដែលអាចប្រាប់អំពីគុណភាពនៃខ្យល់នៅជុំវិញយើងបាន។ AQI កាន់តែខ្ពស់មានន័យថា ការបំពុលខ្យល់ គឺមានកាន់តែខ្លាំង។

តារាងសន្ទស្សន៍ខាងក្រោមនេះ បានបង្ហាញទីក្រុងភ្នំពេញ ដែលមានកម្រិតកំហាប់គុណភាពខ្យល់រហូតទៅដល់១៨៩ (ខ្យល់បំពុលខ្លាំង)។

ខាងក្រោមនេះ គឺជាតារាងសន្ទស្សន៍គុណភាពខ្យល់នៅក្នុងរាជធានីភ្នំពេញ ប្រទេសកម្ពុជា នៅអំឡុង៧ថ្ងៃខាងមុខ។

IQAir Link | Archived Link

នៅថ្ងៃនេះ ក្រសួងសុខាភិបាលបានចេញណែនាំទៅកាន់មហាជនឱ្យយកចិត្តទុកដាក់ចំពោះការប្រែប្រួលនៃគុណភាពខ្យល់នៅទូទាំងប្រទេស ដោយបានណែនាំដូចខាងក្រោមនេះ៖

តាមដានព័ត៌មានស្ដីពីស្ថានភាពគុណភាពខ្យល់ដែលចេញផ្សាយដោយប្រព័ន្ធផ្សព្វផ្សាយ និងក្រសួងបរិស្ថាន
ស្នាក់នៅក្នុងផ្ទះអំឡុងពេលកម្រិតសារធាតុបំពុលខ្យល់កើនឡើងខ្ពស់ចាប់ពីសញ្ញាពណ៌ក្រហមរហូតដល់ពណ៌ស្វាយ
បិទទ្វារ និងបង្អួចដើម្បីបង្ការខ្យល់មិនល្អពីខាងក្រៅចូលក្នុងផ្ទះ
កាត់បន្ថយសកម្មភាពខាងក្រៅផ្ទះ ឬនៅទីវាលអំឡុងពេលកម្រិតសារធាតុបំពុលខ្យល់កើនឡើងខ្ពស់
ត្រូវយកចិត្តទុកដាក់ការពារសុខភាពទារក កុមារ ស្ត្រីមានផ្ទៃពោះ មនុស្សចាស់ជរា អ្នកមានជំងឺសួត អ្នកមានជំងឺសរសៃឈាម និងជំងឺរ៉ាំរ៉ៃ និង
ប្រសិនបើមានរោគសញ្ញាផ្លូវដង្ហើម ដូចជា ពិបាកដកដង្ហើម ក្អក ហត់ ត្រូវធ្វើដំណើរទៅពិគ្រោះពិភាក្សាជាមួយគ្រូពេទ្យ។