ស្របពេលខេត្តតាកែវកំពុងតែល្បីរឿងគប់កញ្ចប់រថយន្តអ្នកដំណើរនោះ រូបថតមួយសន្លឹកដែលបង្ហាញពូថៅមួយជាប់នឹងកញ្ចក់រថយន្តមួយគ្រឿង ត្រូវបានបង្ហោះនៅលើបណ្ដាញសង្គមជាមួយការអះអាងថា ករណីហិង្សាមួយនេះ បានកើតឡើងនៅម្ដុំផ្សារសំរោងយ៉ោង ខេត្តតាកែវ។ ការលើកឡើងបែបនេះ ទទួលបានការចែកចាយ និងប្រតិកម្មជាច្រើននៅលើបណ្ដាញសង្គមនាពេលថ្មីៗនេះ។ ទោះជាយ៉ាងណា ការត្រួតពិនិត្យការពិតរបស់ Fact Crescendo Cambodia បានរកឃើញថា រូបថតភ្ជាប់ដោយសំណេរខាងលើ មិនត្រឹមត្រូវនោះឡើយ។
ការអះអាងលើបណ្តាញសង្គម
កាលពីថ្ងៃទី១៤ ខែមីនា ឆ្នាំ២០២៣កន្លងទៅថ្មីៗនេះ អ្នកប្រើប្រាស់ហ្វេសប៊ុកម្នាក់ បានបង្ហោះរូបថតមួយសន្លឹក បង្ហាញទិដ្ឋភាពនៃការគប់ពូថៅ ជាប់ទៅនឹងកញ្ចក់រថយន្តមួយគ្រឿង។ ហេតុការណ៍នេះ ត្រូវបានភ្ជាប់នឹងសំណេរអះអាងថា បានកើតឡើងនៅម្ដុំផ្សារសំរោងយ៉ោង ខេត្ដតាកែវ កាលពីថ្ងៃទី១៤ ខែមីនា ឆ្នាំ២០២៣។
ការបង្ហោះរូបថតខាងលើនេះ ត្រូវបានអ្នកប្រើប្រាស់បណ្ដាញសង្គមចែករំលែកជាច្រើនដង រួមជាមួយការបញ្ចេញមតិ និងប្រតិកម្មចម្រុះបែបផងដែរ។
ខាងក្រោមនេះ គឺជារូបភាពផ្ដាមទាំងស្រុងចេញពីប៉ុស្ដិ៍របស់ទំព័រហ្វេសប៊ុកខាងលើ ដែលបានអះអាងថា «ម្ដុំផ្សារសំរោងយ៉ោង ខេត្តតាកែវ ១៤/០៣/២០២៣»។
ការត្រួតពិនិត្យការពិត
Fact Crescendo Cambodia ចាប់ផ្ដើមត្រួតពិនិត្យទៅលើរូបភាពផ្ដាម និងការអះអាងខាងលើនេះ តាមរយៈ Google Reverse Image Search ដែលនាំឱ្យយើងរកឃើញការពិតដូចខាងក្រោមនេះ។
រូបថតមួយសន្លឹក ដែលមានទម្រង់ និងសណ្ឋានដូចគ្នាទាំងស្រុង គឺត្រូវបានរកឃើញនៅលើគណនីហ្វេសប៊ុករបស់អ្នកប្រើប្រាស់ម្នាក់ ដែលមានឈ្មោះថា «Sok Chanveasna» ផ្សព្វផ្សាយ និងបង្ហោះឡើង តាំងពីថ្ងៃទី១០ ខែវិច្ឆិកា ឆ្នាំ២០២២កន្លងមកម្ល៉េះ។
អ្នកប្រើប្រាស់បណ្ដាញសង្គមដដែលនេះ បានបញ្ជាក់នៅក្នុងសំណេររបស់ខ្លួនថា ហេតុការណ៍នៃការគប់ពូថៅ ជាប់នឹងកញ្ចក់រថយន្តរបស់ខ្លួននេះ គឺបានកើតឡើងនៅម្ដុំភ្នំសំពៅ ស្ថិតក្នុងស្រុកបាណន់ ខេត្តបាត់ដំបង។
ខាងក្រោមនេះ គឺជារូបភាពផ្ដាមចេញពីប៉ុស្ដិ៍របស់អ្នកប្រើប្រាស់ខាងលើ បានរៀបរាប់ថា «សូមសំណូមពរលោកស្នងការខេត្តបាត់ដំបង ជួយពិនិត្យមើលក្មេងទំនើង ដែលតែងតែគប់កញ្ចក់ឡាន នៅភ្នំសំពៅ មួយម៉ោងមុននេះ គេបានគប់កញ្ចក់ឡានរបស់ខ្ញុំ»។
ករណីខាងលើនេះ ក៏ត្រូវបានរកឃើញនៅលើគេហទំព័រមន្ទីរព័ត៌មានខេត្តបាត់ដំបង ផ្សព្វផ្សាយកាលពីថ្ងៃទី១៤ ខែមីនា ឆ្នាំ២០២២កន្លងទៅនេះផងដែរ ដោយបានបង្ហាញរូបថតពូថៅជាប់នឹងកញ្ចក់រថយន្តមួយគ្រឿង ដែលដូចទៅនឹងរូបថតរបស់អ្នកប្រើប្រាស់បង្ហោះខាងលើ។
ហេតុការណ៍នេះ ត្រូវបានបញ្ជាក់ និងកើតឡើងនៅក្នុងភូមិសាស្ត្រឃុំភ្នំសំពៅ ស្រុកបាណន់ ខេត្តបាត់ដំបង កាលពីម៉ោង ៩យប់ ថ្ងៃទី១០ ខែវិច្ឆិកា ឆ្នាំ២០២២កន្លងទៅ។
PDI Battambang Link | Archived Link
ដើម្បីស្វែងរកព័ត៌មានពិត សូមតាមដានការផ្សាយរបស់យើងតាមរយៈប្រព័ន្ធដូចខាងក្រោម៖
Facebook Twitter Telegram Google News TikTok
សន្និដ្ឋាន
Fact Crescendo Cambodia បានរកឃើញថារូបថតភ្ជាប់ដោយសំណេរខាងលើ គឺធ្វើឲ្យមានការយល់ច្រឡំ។ ការពិតរូបថតបង្ហាញទិដ្ឋភាពពូថៅ គប់ជាប់នឹងកញ្ចក់រថយន្តមួយគ្រឿង គឺបានកើតឡើងនៅក្នុងភូមិសាស្ដ្រឃុំភ្នំសំពៅ ស្រុកបាណន់ ខេត្តបាត់ដំបង កាលពីថ្ងៃទី១០ ខែវិច្ឆិកា ឆ្នាំ២០២២កន្លងទៅ ដែលនេះមិនមែនជាទិដ្ឋភាព កើតឡើងក្នុងភូមិសាស្ត្រខេត្តតាកែវ នាពេលថ្មីៗនោះឡើយ។
Title:ករណីហិង្សានៅខេត្តបាត់ដំបង ត្រូវបានអះអាងថាកើតនៅខេត្តតាកែវ
Fact Check By: Kakada SimResult: Misleading
