ចំពេលដែលតុលាការកម្ពុជាសម្រេចកាត់ទោសមេដឹកនាំបក្សប្រឆាំង លោក កឹម សុខា ឱ្យជាប់ទោស ២៧ឆ្នាំក្រោមការចោទប្រកាន់ពីបទ«ក្បត់ជាតិ»នោះ ការអះអាងមួយនៅលើបណ្ដាញសង្គម បាននិយាយថា អ្នកនយោបាយបក្សប្រឆាំងមួយរូប និងបុរសជនជាតិអាមេរិកម្នាក់ ជាភ្នាក់ងារសម្ងាត់របស់ CIA ត្រូវបានបញ្ជូនមកបំផ្លាញកម្ពុជា។ ការអះអាងនេះ ត្រូវបានគេចំលែកយ៉ាងច្រើនលើបណ្ដាញសង្គម ហើយត្រូវបានសារព័ត៌មានមួយចំនួនចុះផ្សាយបន្តផងដែរ។ ទោះជាយ៉ាងណា ការផ្ទៀងផ្ទាត់របស់យើងរកឃើញថា ការអះអាងនេះ មិនត្រឹមត្រូវនោះឡើយ។
ការអះអាងលើបណ្ដាញសង្គម
ទំព័រហ្វេសប៊ុកមួយឈ្មោះថា ខ្ញុំ ជា សម រង្ស៊ី បានអះអាងកាលពីដើមខែនេះ លោក មាជ សុវណ្ណារ៉ា និងលោក Mark Gibbel គឺជាភ្នាក់ងារសម្ងាត់របស់ទីភ្នាក់ងារស៊ើបការណ៍សម្ងាត់អាមេរិក (CIA)។
ទំព័រហ្វេសប៊ុកដដែលនេះ ក៏បានជំរុញទៅអាជ្ញាធរកម្ពុជាឱ្យប្រុងប្រយ័ត្នចំពោះបុគ្គលទាំងពីររូបនេះផងដែរ ដោយថា ពួកគេមាន«ឧបាយកលពិសពុលខ្លាំងណាស់»។
ការអះអាងនេះ ទទួលបានការចែករំលែកដល់ទៅជាង ១០០ដង ខណៈអ្នកប្រើប្រាស់បណ្ដាញសង្គមជាច្រើន បានបញ្ចេញមតិចម្រុះបែប និងប្រតិកម្មផ្សេងទៅនឹងការអះអាងនេះ។
ខាងក្រោមនេះ គឺជារូបភាពផ្ដាមចេញពីការអះអាងដែលបង្ហោះលើបណ្ដាញសង្គមកាលពីថ្ងៃទី០១ ខែមីនា ដែលរៀបរាប់ថា «ដំណឹងពីបរទេស!
ក្នុងពេលនេះ ជនមុខសញ្ញាភ្នាក់ងារសម្ងាត់ CIA ពីររូប គឺលោក មាជ សុវណ្ណារ៉ា និងលោក Mark Gibbel ដែលជ្រកក្រោមផ្លាកវិទ្យាស្ថានស្រាវជ្រាវនយោបាយ (POLICY RESEARCH INSTITUTE)ស្ថិតនៅទីក្រុងឡុងបិច (Long Beach) ដែលកន្លងមកបានធ្វើកិច្ចការសម្ងាត់ជាមួយគ្នាតាំងពីឆ្នាំ២០១៣ដើម្បីជួយគណបក្សសង្គ្រោះជាតិក្នុងការផ្ដួលរំលំរដ្ឋាភិបាល បានកំពុងមានវត្តមាននៅទីក្រុងភ្នំពេញ គ្រោងនឹងរៀបចំផែនការបង្កចលាចលនៅពេលប្រកាសសាលក្រមលោក កឹម សុខា នៅថ្ងៃទី៣០ ខែមីនា ឆ្នាំ២០២៣ខាងមុខនេះ។
មុនពេលចេញដំណើរទៅកម្ពុជា លោក សុវណ្ណារ៉ា មាជ បានអួតប្រាប់មិត្តភក្តិឱ្យដឹងថា គឺត្រូវតែមកដឹកនាំកម្លាំងប្រឆាំងសាលក្រមរបស់តុលាការភ្នំពេញ ដែលប្រកាសកាត់ទោសលោក កឹម សុខា ព្រោះគេមានបណ្ដាញច្រើននៅប្រទេសកម្ពុជា។ គួរតែអាជ្ញាធរក្រុងភ្នំពេញមានការប្រុងប្រយ័ត្នឱ្យមែនទែន ព្រោះជនដែលជាភ្នាក់ងារសម្ងាត់ពីរនាក់ខាងលើនេះមានឧបាយកាលពិសពុលខ្លាំងណាស់»។
មួយថ្ងៃក្រោយមក សារព័ត៌មាន Fresh News ដែលស្និទ្ធនឹងរដ្ឋាភិបាលដឹកនាំដោយលោកនាយករដ្ឋមន្ត្រី ហ៊ុន សែន បានចុះផ្សាយការអះអាងនេះ ហើយក៏បានចែករំលែកនៅលើបណ្ដាញសង្គមផងដែរ។ សូមអានអត្ថបទព័ត៌មាន Fresh News នៅទីនេះ ឬតាមរយៈតំណភ្ជាប់ដែលត្រូវបានរក្សាទុកនៅទីនេះ។
ខាងក្រោមនេះ គឺជារូបភាពផ្ដាមចេញពីទំព័រហ្វេសប៊ុកសារព័ត៌មាន Fresh News ដែលបានចែករំលែកអត្ថបទព័ត៌មាននៅលើបណ្ដាញសង្គមជាមួយសំណេររៀបរាប់ថា «មន្ត្រីនគរបាលជាន់ខ្ពស់៖ជនមុខសញ្ញាភ្នាក់ងារសម្ងាត់ CIA ពីររូបពិតជាមានវត្តមាននៅរាជធានីភ្នំពេញ កម្លាំងសមត្ថកិច្ចនឹងបើកការស៊ើបអង្កេតលើករណីនេះ ទោះបី មាជ សុវណ្ណារ៉ា ខំបកស្រាយយ៉ាងណាក៏ដោយ សមត្ថកិច្ចមានភស្តុតាងជាច្រើនទៀតបង្ហាញពីសកម្មភាពរបស់លោក»។
ការអះអាងដដែលនេះ ត្រូវបានចុះផ្សាយដោយសារគេហទំព័រព័ត៌មានមួយទៀត ហើយក៏បានចែករំលែកនៅលើបណ្ដាញសង្គមផងដែរ។ សូមអានខ្លឹមសារទាំងស្រុងនៅទីនេះ ឬតាមរយៈតំណភ្ជាប់ដែលត្រូវបានរក្សាទុកនៅទីនេះ។
ការត្រួតពិនិត្យការពិត
Fact Crescendo Cambodia បានត្រួតពិនិត្យ និងផ្ទៀងផ្ទាត់ទៅលើការអះអាងនេះតាមរយៈការសម្ភាសជាមួយប្រភពដែលត្រូវបានលើកឡើងនៅក្នុងការអះអាងនេះ។ ជាលទ្ធផល យើងបានរកឃើញការពិតដូចខាងក្រោមនេះ។
Fact Crescendo Cambodia បានស្នើសុំការបកស្រាយពន្យល់ពីលោក មាជ សុវណ្ណារ៉ា តាមរយៈការជជែកតាមបណ្ដាញតេឡេក្រាម ជុំវិញការអះអាងថា លោកជាភ្នាក់ងារសម្ងាត់របស់ទីភ្នាក់ងារចារកម្មអាមេរិក (CIA) ប៉ុន្តែ បញ្ជាក់ថា លោកបានបកស្រាយរួចហើយទាំងនៅលើបណ្ដាញសង្គម និងសារព័ត៌មាន។
នៅក្នុងវីដេអូមានរយៈពេលជិត ៧នាទីដែលត្រូវបានបង្ហោះនៅលើទំព័រហ្វេសប៊ុករបស់លោកកាលពីថ្ងៃទី០៣ ខែមីនានោះ លោក មាជ សុវណ្ណារ៉ា បានច្រានចោលការចុះផ្សាយរបស់សារព័ត៌មាន Fresh News ដោយចាត់ទុកការចុះផ្សាយនោះថាជា«ព័ត៌មានមិនពិត»។
លោក មាជ សុវណ្ណារ៉ា ក៏បានបកស្រាយនៅក្នុងកម្មវិធី Idea Talk របស់សារព័ត៌មាន The Cambodia Daily Khmer ផងដែរកាលពីថ្ងៃទី០២ ខែមីនា មួយថ្ងៃបន្ទាប់ពីការចុះផ្សាយរបស់សារព័ត៌មាន Fresh News។ សូមស្ដាប់ការបកស្រាយទាំងស្រុងរបស់លោកនៅទីនេះ។
វិទ្យុបារាំងអន្តរជាផ្សាយជាភាសាខ្មែរ RFI ក៏បានចុះផ្សាយនូវសេចក្ដីរាយការណ៍មួយផងដែរកាលពីថ្ងៃទី០២ ខែមីនា ដោយបានដកស្រង់សម្ដីលោក មាជ សុវណ្ណារ៉ា ដែលច្រានចោលការចុះផ្សាយរបស់សារព័ត៌មាន Fresh News ទៅតាមសំណេរនៅលើទំព័រហ្វេសប៊ុកមួយឈ្មោះ «ខ្ញុំជា សម រង្ស៊ី»។ សូមអានខ្លឹមសារទាំងស្រុងនៅទីនេះ។
ចំពោះលោក Mark Gibbel វិញ យើងបានរកឃើញសេចក្ដីរាយការណ៍មួយរបស់វិទ្យុអាស៊ីសេរី (Radio Free Asia) កាលពីថ្ងៃទី០៦ ខែមីនា ដែលបានឱ្យដឹងថា បុរសអាមេរិករូបនេះ បានធ្វើដំណើរមកកាន់កម្ពុជា ដើម្បីមកសួរសុខទុក្ខគូដណ្ដឹងរបស់លោកជាជនជាតិខ្មែរ។
បើតាមការចុះផ្សាយរបស់វិទ្យុអាស៊ីសេរី លោក Mark Gibbel គឺជាវិស្វករមួយរូបរបស់ទីភ្នាក់ងារអវកាសអាមេរិក NASA ហើយលោកបានចូលនិវត្តន៍ហើយ។
នៅក្នុងសេចក្ដីរាយការណ៍ចុះផ្សាយដោយវិទ្យុអាស៊ីសេរី លោក Mark Gibbel ចាត់ទុកការចុះផ្សាយរបស់សារព័ត៌មាន Fresh News ថា ជាការចោទប្រកាន់គួរឱ្យអស់សំណើច ហើយលោកថា លោកបានដឹងព័ត៌មាននេះ បន្ទាប់ពីលោកធ្វើដំណើរចាកចេញពីកម្ពុជាទៅដល់ប្រទេសថៃហើយ។
ជាងនេះទៅទៀត លោក Mark Gibbel បានឱ្យដឹងថា លោក និងលោក មាជ សុវណ្ណារ៉ា បានរួមគ្នាបង្កើតអង្គការសប្បុរសធម៌មួយឈ្មោះ Policy Research Institute (វិទ្យាស្ថានស្រាវជ្រាវគោលនយោបាយ) ដែលលោកអះអាងថា អង្គការនេះស្ថិតនៅជាអព្យាក្រឹត្យ ដើម្បីផ្ដល់សម្ភារៈសិក្សាដល់យុវជននៅតំបន់អាស៊ីអាគ្នេយ៍។
លោក Mark Gibbel បានឱ្យដឹងបន្ថែមថា លោកមានមិត្តភក្តិជាសមាជិកគណបក្សប្រជាជនកម្ពុជានៅសហរដ្ឋអាមេរិក និងធ្លាប់គិតថា នឹងព្យាយាមជួបជាមួយលោក ហ៊ុន ម៉ាណែត ដែលជាកូនប្រុសច្បងរបស់លោកនាយករដ្ឋមន្ត្រី ហ៊ុន សែន ទៀតផង។
សន្និដ្ឋាន
Fact Crescendo Cambodia បានរកឃើញថា ការអះអាងដូចដែលត្រូវបានរៀបរាប់ខាងលើនេះ មិនត្រឹមត្រូវនោះឡើយ។ គ្មានភស្តុតាងរឹងមាំណាបញ្ជាក់ថា លោក Mark Gibbel និងលោក មាជ សុវណ្ណារ៉ា ជាភ្នាក់ងាររបស់ទីភ្នាក់ងារចារកម្មអាមេរិក CIA ដែលត្រូវបានបញ្ជូនឱ្យមកបង្កភាពវឹកវរនៅកម្ពុជានោះឡើយ។ លោក Mark Gibbel បញ្ជាក់ថា ការចុះផ្សាយរបស់ Fresh News ជារឿងមិនអាចទទួលយកបាននោះឡើយ ហើយលោក មាជ សុវណ្ណារ៉ា បានចាត់ទុកសេចក្ដីរាយការណ៍នេះជាព័ត៌មានក្លែងក្លាយ។
Title:ការអះអាងមិនត្រឹមត្រូវមួយ ចោទបុរសសញ្ជាតិអាមេរិក ២នាក់ជាភ្នាក់ងារស៊ើបការណ៍សម្ងាត់
Fact Check By: Jay UdomResult: Misleading
