- >>
- FALSE
ក្រុមបោកបញ្ឆោតអនឡាញផ្សព្វផ្សាយថា Apple លក់បញ្ចុះតម្លៃដ៏ធំសម្រាប់កាសស្ដាប់
ខណៈដែលបណ្ដាញសង្គមបានក្លាយជាកន្លែងផ្សព្វផ្សាយពាណិជ្ជកម្មទំនើបនោះ ទំព័រហ្វេសប៊ុកមួយចំនួន បានផ្សព្វផ្សាយថា ក្រុមហ៊ុន Apple បានដាក់លក់បញ្ចុះតម្លៃដ៏ច្រើនសម្រាប់ផលិតផលមួយចំនួនក្នុងឱកាសខួប ៥០ឆ្នាំរបស់ក្រុមហ៊ុន។ ការផ្សព្វផ្សាយបែបនេះ ត្រូវបានចែករំលែកព្រោងព្រាតលើបណ្ដាញសង្គម។ ទោះជាយ៉ាងណា យើងរកឃើញថា ការផ្សព្វផ្សាយលក់បញ្ចុះតម្លៃនោះ មិនមែនជាការពិតនោះឡើយ។
ការអះអាងលើបណ្ដាញសង្គម
ទំព័រហ្វេសប៊ុកមួយឈ្មោះ Apple Cambodia បានផ្សព្វផ្សាយថា កាសត្រចៀករបស់ Apple ត្រូវបានដាក់លក់បញ្ចុះតម្លៃរហូតដល់ទៅ ៧០ភាគរយនៅក្នុងឱកាសខួប ៥០ឆ្នាំរបស់ក្រុមហ៊ុនបច្ចេកវិទ្យាអាមេរិកមួយនេះ ដោយគ្រាន់តែចុះទៅលើតំណភ្ជាប់មកជាមួយស្រាប់។
ការផ្សព្វផ្សាយលក់បញ្ចុះតម្លៃដោយទំព័រហ្វេសប៊ុកមួយនេះ ត្រូវបានចែករំលែកបន្តជាច្រើនដង និងប្រតិកម្មចម្រុះបែបពីសំណាក់អ្នកប្រើប្រាស់ហ្វេសប៊ុកនៅក្នុងរយៈពេលប៉ុន្មានថ្ងៃមកនេះ។
ខាងក្រោមនេះ គឺជារូបភាពផ្ដាមចេញពីការផ្សព្វផ្សាយលក់បញ្ចុះតម្លៃដោយទំព័រហ្វេសប៊ុក Apple Cambodia នៅលើបណ្ដាញសង្គមហ្វេសប៊ុកនៅថ្ងៃទី០៥ ខែមិថុនា ឆ្នាំ២០២៤ ដែលសរសេររៀបរាប់ថា “សូមអញ្ចើញមកទទួលយកការផ្ដល់ជូនដ៏ធំបំផុតប្រចាំឆ្នាំរបស់ Apple រហូតដល់ 70% ក្នុងឱកាសគម្រប់ខួបលើកទី៥០របស់ក្រុមហ៊ុន Apple។ ក្រុមហ៊ុន Apple មានការបញ្ចុះតម្លៃរហូតដល់ 70% ទៅលើ AirPods Pro Gen 2 ដើម្បីថ្លែងអំណរគុណដល់អតិថិជនដែលតែងតែអមដំណើរ និងគាំទ្រដល់ការអភិវឌ្ឍន៍ដែលកំពុងរីកចម្រើនរបស់ Apple។ សូមចូលទៅកាន់គេហទំព័ររបស់យើង និងចូលរួមព្រឹត្តិការណ៍នេះឱ្យបានលឿន! ការផ្ដល់ជូនមានកំណត់ត្រឹមតែ ៣ថ្ងៃប៉ុណ្ណោះ។ T&C ត្រូវបានអនុវត្ត កម្មវិធីនេះត្រូវបានអនុវត្តទាំងស្រុងដោយ Apple Cambodia មិនមែនតាមរយៈភាគីទីបីណាមួយឡើយ។ បញ្ជាទិញតាមរយៈគេហទំព័រផ្លូវការរបស់ Apple Cambodia: https://www.applestore-official.com/airpods-pro-gen2”។
កាលពីខែឧសភាកន្លងមកនេះ ទំព័រហ្វេសប៊ុកមួយទៀតឈ្មោះ Apple Cambodia ដូចគ្នា ក៏បានផ្សាយលក់ផងដែរនូវកាស AirPods Pro បញ្ចុះតម្លៃរហូតដល់ ៨០ភាគរយ ដោយថា ការលក់បញ្ចុះតម្លៃនេះ ត្រូវបានធ្វើឡើងសម្រាប់ខួប ៤៨ឆ្នាំនៃការបង្កើតក្រុមហ៊ុន Apple។
ការផ្សព្វផ្សាយលក់នេះ ត្រូវបានចែករំលែកបន្តរហូតដល់ ៦២ដង និងទទួលបានការបញ្ចេញមតិយោបល់ និងប្រតិកម្មចម្រុះបែបពីសំណាក់អ្នកប្រើប្រាស់ហ្វេសប៊ុកនិយាយភាសាខ្មែរ។
ខាងក្រោមនេះ គឺជារូបភាពផ្ដាមចេញពីការផ្សាយលក់លើបណ្ដាញសង្គមដោយទំព័រហ្វេសប៊ុក Apple Cambodia កាលពីថ្ងៃទី២០ ខែឧសភា ឆ្នាំ២០២៤ ដែលសរសេររៀបរាប់ជាភាសាអង់គ្លេស និងភាសាខ្មែរដូចខាងក្រោម៖
“On the occasion of the 48th anniversary of the establishment of the Apple brand 1976 - 2024, we would like to sincerely thank everyone who has supported us during the past time with a lucky draw program with the opportunity to receive discount vouchers of up to 78% for the best-selling headphone product line of 2023 - AirPods Pro Gen 2. Thank you customers for always accompanying us in using Apple products over the past time. AirPods Pro Gen 2: https://www.appleasia.website/airpods-pro-2nd-generation Wish you have great experiences at Apple Cambodia. Note: The program applies for 10 days. After 10 days the discount code will expire.
ក្នុងឱកាសគម្រប់ខួប 48 ឆ្នាំនៃការបង្កើតម៉ាក Apple 1976 - 2024 យើងខ្ញុំសូមថ្លែងអំណរគុណយ៉ាងជ្រាលជ្រៅចំពោះអ្នកទាំងអស់ដែលបានគាំទ្រយើងខ្ញុំនាពេលកន្លងមកជាមួយនឹងកម្មវិធីចាប់ឆ្នោតផ្សងសំណាង មានឱកាសទទួលបានប័ណ្ណបញ្ចុះតម្លៃរហូតដល់ 78% សម្រាប់ខ្សែផលិតផលកាសដែលលក់ដាច់បំផុតឆ្នាំ 2023 - AirPods Pro Gen 2។ សូមអរគុណអតិថិជនដែលតែងតែអមដំណើរយើងក្នុងការប្រើប្រាស់ផលិតផល Apple ក្នុងរយៈពេលកន្លងមក។ AirPods Pro Gen 2៖ https://www.appleasia.website/airpods-pro-2nd-generation សូមជូនពរអ្នកទទួលបានបទពិសោធន៍ល្អៗនៅ Apple Cambodia។ បញ្ជាក់៖ កម្មវិធីនេះមានរយៈពេល 10 ថ្ងៃ។ បន្ទាប់ពី 10ថ្ងៃ លេខកូដបញ្ចុះតម្លៃនឹងផុតកំណត់”។
ការលក់បញ្ចុះតម្លៃផលិតផល Apple បែបនេះ ក៏ត្រូវបានផ្សព្វផ្សាយដោយទំព័រហ្វេសប៊ុកមួយទៀតឈ្មោះ SORYA Center Point ជាឈ្មោះដូចទៅនឹងផ្សារទំនើបមួយនៅជិតផ្សារធំថ្មី កណ្ដាលទីក្រុងភ្នំពេញ។ ការផ្សព្វផ្សាយលក់បញ្ចុះតម្លៃផលិតផល Apple នេះ ក៏ត្រូវបានចែករំលែកបន្តជាច្រើនដងផងដែរ។
ខាងក្រោមនេះ គឺជារូបភាពផ្ដាមចេញការបង្ហោះព័ត៌មាននៅលើបណ្ដាញសង្គមហ្វេសប៊ុកកាលពីថ្ងៃទី០៣ ខែមិថុនា ឆ្នាំ២០២៤ ដែលសរសេររៀបរាប់ថា “កាដូមហាសាលពី Apple Cambodia ដើម្បីអបអរខួបលើកទី៤៨របស់ Apple ខាងមុខនេះ Apple មានការបញ្ចុះតម្លៃយ៉ាងសន្ធឹកសន្ធាប់រហូតដល់ ៧០% សម្រាប់ផលិតផល AirPods Gen 2 ជាមួយនឹងកាដូដ៏ទាក់ទាញបំផុតសម្រាប់អតិថិជនជាទីគោរពពីគ្រប់សាខា SORYA Center Point នៅចាំអីទៀត? តើត្រូវចំណាយពេលប៉ុន្មានដើម្បីទិញឧបករណ៍អេឡិចត្រូនិចថ្មី!!!…នាំមកជូនអ្នកនូវសំណាង និងបទពិសោធន៍ថ្មីៗដ៏គួរឱ្យរំភើប។ Order By Website: https://www.applecambodia.shop/airpodspro2_kh ការផ្ដល់ជូនមានរយៈពេលត្រឹមតែ ៣ថ្ងៃប៉ុណ្ណោះ T&C បានអនុវត្ត”។
ការផ្សព្វផ្សាយលក់បញ្ចុះតម្លៃផលិតផល Apple បែបនេះ ក៏ត្រូវបានធ្វើឡើងដោយទំព័រហ្វេសប៊ុកឈ្មោះ Chip Mong 271 Megal Mall ដែលយកឈ្មោះតាមផ្សារទំនើបមួយនៅស្ថិតនៅភាគខាងត្បូងរាជធានីភ្នំពេញ។ ការផ្សព្វផ្សាយនេះ ត្រូវបានចែករំលែកបន្តជាច្រើនដង។
ខាងក្រោមនេះ គឺជារូបភាពផ្ដាមចេញពីទំព័រហ្វេសប៊ុក Chip Mong 271 Mega Mall នៅថ្ងៃទី០៧ ខែមិថុនា ឆ្នាំ២០២៤ ដែលរៀបរាប់ដូចខាងក្រោម៖
“អំណោយដ៏អស្ចារ្យពី Apple សម្រាប់អ្នក។ នៅខែមិថុនា Apple Store ដំបូងគេក្នុងប្រទេសកម្ពុជានឹងបើកនៅ Chip Mong 271 Megal Mall ដើម្បីអបអរព្រឹត្តិការណ៍ដ៏ពិសេសនេះ និងធ្វើឱ្យអតិថិជនភ្ញាក់ផ្អើល Apple កំពុងធ្វើការបញ្ចុះតម្លៃ ៦០% ដែលមិនធ្លាប់មានពីមុនមកសម្រាប់ Airpod pro ជំនាន់ទី២ នៅលើគេហទំព័ររបស់ខ្លួន”។
ការផ្សព្វផ្សាយលក់ផលិតផល Apple បញ្ចុះតម្លៃបែបនេះ ក៏ត្រូវបានធ្វើឡើងដោយទំព័រហ្វេសប៊ុកផ្សេងទៀតផងដែរ។ សូមមើលការផ្សព្វផ្សាយទាំងនោះតាមរយៈតំណភ្ជាប់នៅទីនេះ ១ (archived), ២ (archived), ៣ (archived), និង ៤ (archived)។
ការត្រួតពិនិត្យការពិត
Fact Crescendo Cambodia បានចាប់ផ្ដើមត្រួតពិនិត្យទៅលើការអះអាងខាងលើនេះតាមរយៈការស្វែងរកការបញ្ជាក់ពីក្រុមហ៊ុនដែលទទួលបានសិទ្ធិចែកចាយផលិតផល Apple នៅកម្ពុជា ដែលនាំឱ្យយើងរកឃើញការពិតដូចខាងក្រោមនេះ។
ជាដំបូង យើងបានព្យាយាមចុចទៅលើតំណភ្ជាប់ដែលភ្ជាប់មកជាមួយនឹងសារនៅលើហ្វេសប៊ុក ប៉ុន្តែ កម្មវិធីទប់ស្កាត់មេរោគកុំព្យូទ័រ បានបង្ហាញថា តំណភ្ជាប់នោះគ្មានសុវត្ថិភាពនោះឡើយ។ នេះបញ្ជាក់ថា តំណភ្ចាប់នេះជាវិធីបោកបញ្ឆោតតាមអនឡាញតែប៉ុណ្ណោះ។
សេចក្ដីរាយការណ៍របស់សារព័ត៌មាន Kiripost កាលពីខែកក្កដាឆ្នាំមុន បានឱ្យដឹងថា ក្រុមហ៊ុនបច្ចេកវិទ្យាអាមេរិក Apple គ្មានហាងលក់រាយទូរស័ព្ទនៅក្នុងប្រទេសកម្ពុជានោះឡើយ ប៉ុន្តែ ការលក់ទូរស័ព្ទ និងផលិតផលដទៃទៀតរបស់ក្រុមហ៊ុនមួយនេះ ត្រូវបានប្រគល់សិទ្ធិទៅក្រុមហ៊ុនចំនួន ៣ មានក្រុមហ៊ុន iOne ក្រុមហ៊ុន Cactus Cambodia និងក្រុមហ៊ុន Digibox។
ឆ្លើយតបនឹង Fact Crescendo Cambodia តាមរយៈអ៊ីម៉ែល តំណាងក្រុមហ៊ុន Cactus Cambodia បានបញ្ជាក់ថា ក្រុមហ៊ុនលក់រាយមួយនេះ មិនបានដំណើរការផ្សព្វផ្សាយលក់បញ្ចុះតម្លៃផលិតផល Apple នោះឡើយ ហើយប្រាប់ថា ក្រុមហ៊ុនមានតែទំព័រហ្វេសប៊ុកផ្លូវការតែមួយប៉ុណ្ណោះ។
ក្រុមហ៊ុន Cactus Cambodia បានបញ្ជាក់ផងដែរថា ក្រុមហ៊ុន Apple គ្មានហាងលក់រាយ (Apple Store) នៅកម្ពុជានោះឡើយ ប៉ុន្តែ មានក្រុមហ៊ុនទទួលបានសិទ្ធិចែកចាយ និងលក់បន្តនូវផលិតផលក្រុមហ៊ុនបច្ចេកវិទ្យាអាមេរិកមួយនេះ។
Fact Crescendo Cambodia ក៏បានស្នើសុំការបញ្ជាក់ពីក្រុមហ៊ុន iOne ផងដែរតាមរយៈអ៊ីម៉ែល និងបណ្ដាញសង្គម។
ឆ្លើយតបមកកាន់ Fact Crescendo Cambodia តាមរយៈប្រព័ន្ធផ្ញើសារលើបណ្ដាញសង្គម (Messenger) ក្រុមហ៊ុន iOne បានបញ្ជាក់ថា ក្រុមហ៊ុនមិនពាក់ព័ន្ធនឹងការផ្សព្វផ្សាយលក់បញ្ចុះតម្លៃដ៏ធំដែលធ្វើឡើងដោយទំព័រហ្វេសប៊ុកមួយចំនួននោះឡើយ។
ក្រុមហ៊ុន iOne បានបញ្ជាក់ទៀតថា ការផ្សព្វផ្សាយលក់បញ្ចុះតម្លៃដោយទំព័រហ្វេសប៊ុកមួយចំនួននោះ គឺជាល្បិចបោកបញ្ឆោតតាមអនឡាញតែប៉ុណ្ណោះ។
យើងបានរកឃើញទៀតថា ទំព័រហ្វេសប៊ុកឈ្មោះ Chip Mong 271 Mega Mall មិនមែនជាទំព័រហ្វេសប៊ុកផ្លូវការរបស់ផ្សារទំនើបជីបម៉ុងនៅផ្លូវ២៧១នោះឡើយ។ ទំព័រហ្វេសប៊ុកមួយនេះ ទើបតែត្រូវបានបង្កើតឡើងថ្មីៗកាលពីថ្ងៃទី០៦ ខែមិថុនា ឆ្នាំ២០២៤ប៉ុណ្ណោះ ហើយមានអ្នកតាមដានត្រឹមតែ២នាក់ប៉ុណ្ណោះ។
ទំព័រហ្វេសប៊ុកផ្លូវការរបស់ផ្សារទំនើបមួយនេះ ដាក់ឈ្មោះថា Chip Mong 271 Megal Mall ដូចគ្នា ប៉ុន្តែ អ្នកតាមដានចំនួន ១៩០,០០០នាក់ ហើយត្រូវបានបង្កើតឡើងតាំងពីឆ្នាំ២០២០កន្លងមក។
ចំណែកឯការផ្សព្វផ្សាយលក់បញ្ចុះតម្លៃដោយទំព័រហ្វេសប៊ុកមួយទៀតឈ្មោះ 𝐒𝐨𝐫𝐲𝐚 𝐂𝐞𝐧𝐭𝐞𝐫 𝐏𝐨𝐢𝐧𝐭 ក៏មិនមែនជាទំព័រហ្វេសប៊ុកផ្លូវការរបស់ផ្សារទំនើបសូរិយានោះឡើយ។ ទំព័រហ្វេសប៊ុកមួយនេះ ទើបតែត្រូវបានបង្កើតឡើងកាលពីខែមេសាក្នុងឆ្នាំនេះ ហើយមានអ្នកតាមដានត្រឹមតែជាង ៣០០នាក់ប៉ុណ្ណោះ។
ទំព័រហ្វេសប៊ុកផ្លូវការរបស់ផ្សារទំនើបសូរិយា មានឈ្មោះថា SORYA Center Point ដូចគ្នា ប៉ុន្តែ មានអ្នកតាមដានចំនួន ១០០.០០០នាក់ ដែលត្រូវបានបង្កើតឡើងតាំងពីឆ្នាំ២០១១កន្លងមក។
សន្និដ្ឋាន
Fact Crescendo Cambodia បានរកឃើញថា ការផ្សព្វផ្សាយលក់បញ្ចុះតម្លៃផលិតផលិត Apple ដូចដែលរៀបរាប់ខាងលើនេះ មិនមែនជាការពិតនោះ។ ក្រុមហ៊ុនបច្ចេកវិទ្យាអាមេរិក Apple ពុំមានហាងលក់រាយផលិតផលរបស់ខ្លួនជាផ្លូវការនៅក្នុងប្រទេសកម្ពុជានោះឡើយ។ ផលិតផលរបស់ក្រុមហ៊ុនមួយនេះ ត្រូវបានផ្ដល់សិទ្ធិលក់បន្តដល់ក្រុមហ៊ុនចំនួន ៣មានក្រុមហ៊ុន iOne ក្រុមហ៊ុន Cactus និងក្រុមហ៊ុន Digibox។ ក្រុមហ៊ុនទទួលបានសិទ្ធិចែកចាយផលិតផល Apple នៅកម្ពុជា បានបញ្ជាក់ថា ពួកគេមិនពាក់ព័ន្ធនឹងការផ្សព្វផ្សាយលក់បញ្ចុះតម្លៃដ៏ធំបែបនេះដែលធ្វើឡើងដោយទំព័រហ្វេសប៊ុកមួយចំនួននោះឡើយ។
Title:ក្រុមបោកបញ្ឆោតអនឡាញផ្សព្វផ្សាយថា ក្រុមហ៊ុន Apple លក់បញ្ចុះតម្លៃដ៏ធំសម្រាប់កាសស្ដាប់
Written By: Jay UdomResult: False
