តើផែនដីនឹងរលាយត្រឹមរយៈពេលខ្លីដូចការអះអាងមួយចំនួនមែនឬទេ?

ខណៈដែលក្រុមមនុស្សជាច្រើនបន្តស្នាក់នៅឯចម្ការរបស់លោកនៅឯខេត្តសៀមរាបនោះ មេដឹកនាំគណបក្សសម្ព័ន្ធដើម្បីប្រជាធិបតេយ្យ លោក ខឹម វាសនា បានអះអាងនៅលើបណ្ដាញសង្គមនៅដើមខែនេះថា ផែនដីនឹងមានមហន្តរាយនៅក្នុងរយៈពេលមិនលើសពីមួយសប្ដាហ៍នោះឡើយ។ ការអះអាងរបស់លោក ទទួលបានការចែករំលែកយ៉ាងផុសផុលនៅលើបណ្ដាញសង្គមក្នុងរយៈពេលប៉ុន្មានសប្ដាហ៍មកនេះ។ ទោះជាយ៉ាងណា ការផ្ទៀងផ្ទាត់របស់យើង រកឃើញថា ការអះអាងរបស់មេដឹកនាំនយោបាយរូបនេះ មិនត្រឹមត្រូវនោះឡើយ។

ការអះអាងលើបណ្ដាញសង្គម

មេដឹកនាំគណបក្សសម្ព័ន្ធដើម្បីប្រជាធិបតេយ្យ (LDP) លោក ខឹម វាសនា បានអះអាងនៅលើទំព័រហ្វេសប៊ុកផ្ទាល់ខ្លួននៅដើមខែនេះថា ផែនដីនឹងទទួលរងមហន្តរាយនៅក្នុងរយៈពេលយ៉ាងយូរត្រឹមមួយសប្ដាហ៍ដើមខែនេះប៉ុណ្ណោះ។

ការអះអាងនេះ ទទួលបានការចែករំលែកយ៉ាងផុសផុលនៅលើបណ្ដាញសង្គម ខណៈអ្នកប្រើប្រាស់បណ្ដាញសង្គមជាច្រៀន ក៏បានបញ្ចេញមតិចម្រុះបែបតបទៅនឹងការអះអាងរបស់មេដឹកនាំគណបក្សនយោបាយនេះផងដែរ។

ខាងក្រោមនេះ គឺជារូបភាពផ្ដាមចេញពីការអះអាងរបស់លោក ខឹម វាសនា នៅលើបណ្ដាញសង្គមកាលពីថ្ងៃទី០៥ ខែធ្នូ ដែលរៀបរាប់ថា៖

«ពូគ្រាន់តែអោយ[ឱ្យ]ជាព័ត៌មានតាមការយល់របស់ពូទេ ពួកក្មួយគិតហើយសំរេច[សម្រេច]ដោយខ្លួនឯងទៅចុះ។ រឿងពូជាអ្នកមានបុណ្យមកបំភ្លឺធម៌ឡើងវិញ គឺប្រាកដណាស់។ រឿងពូនឹងសំរេច[សម្រេច]ឈានគឺប្រាកដណាស់។ រឿងផែនដីមានមហន្តរាយគឺប្រាកដណាស់។ រឿងមហន្តរាយដល់លោកហ្នឹង ពូគិតថានឹងកើតមានមិនលើសពីក្នុងមួយអាទិត្យទៀតយ៉ាងយូរ ក្មួយៗគិតហើយសំរេច[សម្រេច]ធ្វើយ៉ាងណាគឺសំរេច[សម្រេច]លើក្មួយៗទេ»។

Facebook Post | Archived Link

ការត្រួតពិនិត្យការពិត

Fact Crescendo Cambodia បានត្រួតពិនិត្យ និងផ្ទៀងផ្ទាត់ទៅលើការអះអាងនេះតាមរយៈការពិនិត្យមើលព័ត៌មានស្ដីពីមហន្តរាយកើតឡើងនៅលើពិភពលោក ដែលត្រូវបានចុះផ្សាយដោយសារព័ត៌មានអន្តរជាតិធំៗ និងការពិនិត្យមើលការសិក្សាវាយតម្លៃពីអាយុកាលរបស់ផែនដីដែលត្រូវបានសិក្សាដោយក្រុមអ្នកវិទ្យាសាស្ត្រអន្តរជាតិ ដែលនាំឱ្យយើងរកឃើញការពិតដូចខាងក្រោមនេះ។

ចាប់តាំងពីពេលលោក ខឹម វាសនា អះអាងនៅលើបណ្ដាញសង្គមកាលពីថ្ងៃទី០៥ ខែធ្នូមក Fact Crescendo Cambodia បានពិនិត្យមើលហេតុការណ៍មហន្តរាយដែលកើតឡើងចំពោះផែនដី ហើយពុំបានរកឃើញគ្រោះមហន្តរាយណាមួយគួរឱ្យកត់សម្គាល់ ដែលបង្កមហន្តរាយធ្ងន់ធ្ងរដល់ផែនដីយើងនោះឡើយ។

នៅក្នុងរយៈពេល ១សប្ដាហ៍ចាប់តាំងពីថ្ងៃទី០៥ រហូតដល់ថ្ងៃទី១២ក្នុងខែធ្នូនេះ យើងកត់សម្គាល់ឃើញគ្រោះមហន្តរាយមួយចំនួនបានកើតឡើងនៅបណ្ដាប្រទេសមួយចំនួនដូចខាងក្រោមនេះ៖

គ្រោះថ្នាក់បាក់ដីសង្កត់រថយន្តក្រុងនៅប្រទេសកូឡុំប៊ី៖ មនុស្ស ៣៤នាក់ ក្នុងនោះមានទាំងកុមារ ៨នាក់ផងដែរ បានស្លាប់ ហើយមនុស្ស ៩នាក់ទៀត បានរងរបួស បន្ទាប់ពីដីបានបាក់ធ្លាក់សង្កត់លើរថយន្តមួយគ្រឿងនៅភាគពាយ័ព្យប្រទេសកូឡុំប៊ី នៅថ្ងៃទី០៥ ខែធ្នូ។ ទីភ្នាក់ងារព័ត៌មានរ៉យទ័រ បានឱ្យដឹងថា គ្រោះថ្នាក់បណ្ដាលមកពីការបាក់ដីភ្នំនេះ បានកើតឡើងជារឿយៗនៅប្រទេសអាមេរិកខាងត្បូងមួយនេះ។ សូមអានអត្ថបទទាំងស្រុងនៅទីនេះ។
ការលេចធ្លាយឧស្ម័ននៅអង់គ្លេស៖ សារព័ត៌មាន BBC របស់អង់គ្លេស បានរាយការណ៍ថា ពលរដ្ឋដល់ទៅ ២,០០០គ្រួសារ ប្រឈមមុខនឹងកង្វះខាតឧស្ម័នហ្គេសសម្រាប់ដុតកម្ដៅនៅក្នុងផ្ទះសម្បែងចំពេលធាតុអាកាសចុះត្រជាក់ក្រោមសូន្យនៅរយៈពេលប៉ុន្មានសប្ដាហ៍ចុងឆ្នាំនេះ ប៉ុន្តែ អាជ្ញាធរក្នុងតំបន់បញ្ជាក់ថា ការផ្គត់ផ្គង់ឧស្ម័នហ្គេស នឹងតភ្ជាប់ឡើងវិញនៅក្នុងរយៈពេលត្រឹម ១សប្ដាហ៍ប៉ុណ្ណោះ។ សូមអានអត្ថបទទាំងស្រុងនៅទីនេះ។
ផ្ទុះអណ្ដូងរ៉ែធ្យូងថ្មនៅឥណ្ឌូនេស៊ី៖ ទីភ្នាក់ងារព័ត៌មានអាមេរិក AP បានរាយការណ៍ថា កម្មករអណ្ដូងរ៉ែ ១០នាក់ បានស្លាប់ ហើយ ៤នាក់ទៀត ត្រូវគេជួយសង្គ្រោះបាន បន្ទាប់ពីហេតុការណ៍ផ្ទុះអណ្ដូងរ៉ែធ្យូងថ្មមួយនៅខេត្តស៊ូម៉ាត្រាភាគខាងលិច កាលពីថ្ងៃទី០៩ ខែធ្នូ។ សូមអានអត្ថបទទាំងស្រុងនៅទីនេះ។

បន្ទាប់ពីការអះអាងនេះបានរំលងទៅមួយសប្ដាហ៍ហើយនោះ Fact Crescendo Cambodia ក៏បានកត់សម្គាល់នូវគ្រោះមហន្តរាយមួយចំនួនបានកើតឡើងនៅតាមបណ្ដាប្រទេសមួយចំនួនដូចខាងក្រោមនេះ៖

ទឹកជំនន់នៅសាធារណរដ្ឋកុងហ្កូ៖ វិទ្យុប៉ាគីស្ថាន បានចុះផ្សាយកាលពីថ្ងៃទី១៤ធ្នូថា មនុស្សរហូតដល់ ១៤១នាក់ បានស្លាប់ដោយសារទឹកជំនន់ និងការរអិលបាក់ដី ដែលបណ្ដាលមកពីភ្លៀងធ្លាក់ខ្លាំងក្លានៅ Kinshasa សាធារណរដ្ឋកុងហ្កូ។ សូមអានអត្ថបទទាំងស្រុងនៅទីនេះ។
ព្យុះកំបុតត្បូងវាយប្រហារភាគខាងត្បូងសហរដ្ឋអាមេរិក៖ សារព័ត៌មាន CNN បានរាយការណ៍ថា ព្យុះកំបុតត្បូងបានវាយប្រហារបណ្ដាទីក្រុងជាច្រើននៅភាគខាងត្បូងសហរដ្ឋអាមេរិកនៅចន្លោះថ្ងៃទី១៣ និង១៤ ខែធ្នូនេះ។ សូមអានអត្ថបទទាំងស្រុងនៅទីនេះ។ សារព័ត៌មាន BBC បានរាយការណ៍ថា មនុស្ស ៣នាក់បានស្លាប់ដោយសារព្យុះកំបុតត្បូងនេះបោកបក់រដ្ឋល្វីស៊ីណា (Louisiana) ហើយថា បណ្ដាញអគ្គិសនីនៅក្នុងរដ្ឋចំនួន៧ស្ថិតនៅតាមឆ្នេរភាគខាងកើតរបស់សហរដ្ឋអាមេរិក ត្រូវបានកាត់ផ្ដាច់ដោយសារព្យុះនេះ។ សូមអានអត្ថបទទាំងស្រុងនៅទីនេះ។
បាក់ដីនៅម៉ាឡេស៊ី៖ ទីភ្នាក់ងារព័ត៌មានរ៉យទ័រ បានរាយការណ៍ថា គ្រោះបាក់ដីមួយបានកើតឡើងនៅជាយទីក្រុងគួឡាឡុំពួរ កាលពីថ្ងៃទី១៦ ខែធ្នូ ដោយបានសម្លាប់មនុស្ស ២១នាក់។ សូមអានអត្ថបទទាំងស្រុងនៅទីនេះ។
ធាតុអាកាសចុះត្រជាក់ខ្លាំងនៅចុងខែធ្នូនៅសហរដ្ឋអាមេរិក៖ សារព័ត៌មានអាមេរិក New York Times បានចុះផ្សាយកាលពីថ្ងៃម្សិលមិញថា មនុស្សយ៉ាងហោចណាស់ ២០០លាននាក់ ឬស្មើនឹង ២/៣នៃប្រជាជនអាមេរិកទាំងមូល ប្រឈមមុខនឹងធាតុអាកាសត្រជាក់ខ្លាំងក្លានៅចុងខែធ្នូនេះ ហើយរដ្ឋមួយចំនួនរបស់អាមេរិក បានដាក់បម្រាមធ្វើដំណើរអំឡុងពេលនេះ។ ទន្ទឹមគ្នានេះ ប្រជាជនអាមេរិកខ្ទង់ ១លាននាក់នៅទូទាំងប្រទេស កំពុងគ្មានអគ្គិសនីប្រើប្រាស់។ សូមអានអត្ថបទទាំងស្រុងនៅទីនេះ។

Fact Crescendo Cambodia កត់សម្គាល់ឃើញថា គ្មានគ្រោះមហន្តរាយណាមួយដែលបង្កមហន្តរាយធ្ងន់ធ្ងរដល់ផែនដីយើងនោះឡើយ ហើយហេតុការណ៍គ្រោះថ្នាក់ដូចដែលយើងរៀបរាប់ខាងលើនេះ ត្រឹមតែបង្កឱ្យបាត់បង់ជីវិតមនុស្សមួយចំនួនប៉ុណ្ណោះ។

តើផែនដីអាចនឹងវិនាសនៅក្នុងរយៈពេលខ្លីឬទេ?

អត្ថបទមួយចេញផ្សាយកាលពីឆ្នាំ២០១៤កន្លងមកដោយទស្សនាវដ្ដីវិទ្យាសាស្ត្រ (www.science.org) បានឱ្យដឹងថា យ៉ាងហោចណាស់ ផែនដីរបស់មនុស្សជាតិយើងនេះ អាចទ្រទ្រង់ជីវិតនៅលើផែនដីបាន ១.៥ពាន់លានឆ្នាំទៀត។ ទស្សនាវដ្ដីអាមេរិកមួយនេះ បានចុះផ្សាយបែបនេះដោយបានដកស្រង់សម្ដីរបស់លោក Eric Wolf ដែលនៅពេលនោះជានិស្សិតថ្នាក់បណ្ឌិតនៅសាកលវិទ្យាល័យខូឡូរ៉ាដូ (Colorado University) និងលោក Owen Brian Toon ដែលជាសហការីរបស់លោក Eric Wolf។

ទស្សនាវដ្ដីដដែលនេះ បានរៀបរាប់ថា លោក Wolf និងលោក Toon បានប្រើប្រាស់ម៉ូឌែលអាកាសធាតុ 3D របស់វិទ្យាសាស្ត្រជាតិសម្រាប់ស្រាវជ្រាវបរិយាកាស ដើម្បីគណនាការបាត់បង់សមាសធាតុនានាដែលទ្រទ្រង់ដល់បរិយាកាសផែនដីរបស់យើង។ សូមអានអត្ថបទទាំងស្រុងនៅទីនេះ។

ចំណែកឯទស្សនាវដ្ដី Science Focus របស់ប្រព័ន្ធផ្សព្វផ្សាយអង់គ្លេស BBC បានចុះផ្សាយថា ផែនដីរបស់មនុស្សជាតិយើង យ៉ាងហោចណាស់អាចមានពេលវេលាសល់ ១ពាន់លានឆ្នាំទៀត មុននឹងឈានថ្ងៃពេលវិនាសហិនហោច។

ទស្សនាវដ្ដីមួយនេះ បានចុះផ្សាយបែបនេះដោយបានដកស្រង់ការសិក្សាមួយរបស់មន្ទីរពិសោធន៍ឧតុនិយមឌីណាមិច នៅទីក្រុងប៉ារីស ដែលចេញផ្សាយនៅលើព្រឹត្តិប័ត្រធម្មជាតិ (Nature)កាលពីចុងឆ្នាំមុន។ សូមអានអត្ថបទទាំងស្រុងនៅទីនេះ។

បើទោះបីជាផែនដីនៅមានអាយុកាលរាប់ពាន់លានឆ្នាំទៅមុខទៀតក្ដី ប៉ុន្តែ ទស្សនាវដ្ដី LiveScience របស់អាមេរិក បានចុះផ្សាយថា ក្រុមអ្នកវិទ្យាសាស្ត្រអន្តរជាតិ បានព្រមានពីការឈានទៅរកវិនាសកម្មនៅលើផែនដី និងការវិនាសផុតពូជរបស់មនុស្សជាតិ កាន់តែលឿនជាងនេះ ប្រសិនបើការកើនឡើងកម្ដៅផែនដី មានល្បឿនលឿន។ សូមអានអត្ថបទទាំងស្រុងនៅទីនេះ។

ទោះជាយ៉ាងណា ការអះអាងរបស់មេដឹកនាំបក្សនយោបាយ លោក ខឹម វាសនា គ្មានអ្វីមកបញ្ជាក់ឱ្យបានត្រឹមត្រូវទៅតាមលក្ខណៈវិទ្យាសាស្ត្រនោះឡើយ។

សន្និដ្ឋាន

Fact Crescendo Cambodia បានរកឃើញថា ការអះអាងដូចដែលត្រូវបានរៀបរាប់ខាងលើនេះ មិនត្រឹមត្រូវនោះឡើយ។ ការសិក្សារបស់ក្រុមអ្នកវិទ្យាសាស្ត្រអន្តរជាតិ ផ្ដល់នូវការសន្និដ្ឋានជារួមថា ផែនដីរបស់មនុស្សជាតិយើងនេះ អាចទ្រទ្រង់ជីវិតរស់នៅយ៉ាងហោចណាស់ ១.៥ពាន់លានឆ្នាំខាងមុខនេះ មុននឹងវាឈានទៅវិនាសទាំងស្រុង។