រូបថតមួយសន្លឹកដែលបង្ហាញស្ត្រីបីនាក់ ត្រូវបានគេបង្ហោះ និងចែករំលែកព្រោងព្រាតលើបណ្ដាញសង្គមជាមួយការអះអាងថា រូបថតនោះ គឺជាកំពូលតារាចម្រៀងខ្មែរកាលពីសម័យមុន។ អ្នកប្រើប្រាស់បណ្ដាញសង្គមជាច្រើន បានបញ្ចេញមតិយោបល់ចម្រុះ ដោយជឿទៅតាមការអះអាងនេះ។ ទោះជាយ៉ាងណា ការផ្ទៀងផ្ទាត់របស់យើង រកឃើញថា ការអះអាងនេះ មិនត្រឹមត្រូវនោះឡើយ។
ការអះអាងលើបណ្ដាញសង្គម
រូបថតសខ្មៅដែលបង្ហាញស្ត្រី ៣នាក់ ត្រូវបានគេបង្ហោះនៅលើបណ្ដាញសង្គមជាមួយការអះអាងថា ស្ត្រីទាំង ៣នាក់នោះ គឺជាអ្នកស្រី ប៉ែន រ៉ន អ្នកស្រី រស់ សេរីសុទ្ធា និងអ្នកស្រី ហួយ មាស ដែលសុទ្ធតែជាតារាចម្រៀងស្រីដ៏ល្បីល្បាញរបស់កម្ពុជាកាលពីជាង ៥០ឆ្នាំមុន។
រូបថតជាមួយនឹងការអះអាងបែបនេះ ត្រូវបានចែករំលែកបន្តរហូតដល់ជាង ៣០០ដង ហើយក៏ទទួលបានការបញ្ចេញមតិដ៏ច្រើនពីសំណាក់អ្នកប្រើប្រាស់ហ្វេសប៊ុកនិយាយភាសាខ្មែរផងដែរ។
ខាងក្រោមនេះ គឺជារូបភាពផ្ដាមចេញពីការបង្ហោះរូបថតនៅលើបណ្ដាញសង្គមកាលពីថ្ងៃទី០២ ខែវិច្ឆិកា ឆ្នាំ២០២៤ ជាមួយសំណេររៀបរាប់ថា “អ្នកចម្រៀងមរតកដើមទាំងបីដួងជាអ្នកចម្រៀងឯក កំពូល” ហើយសំណេរនៅលើរូបថត “ប៉ែន រ៉ន, រស់ សេរីសុទ្ធា, ហួយ មាស”។
បន្ទាប់ពីរូបថតនេះ ត្រូវបានបង្ហោះនៅលើបណ្ដាញសង្គម វាក៏ត្រូវបានយកទៅបង្ហោះបន្តថែមទៀតនៅលើបណ្ដាញសង្គមហ្វេសប៊ុក ដែលនាំឱ្យមានការចែករំលែកបន្តរហូតដល់ទៅជាង ៥ពាន់ដងឯណោះនៅក្នុងរយៈពេលប៉ុន្មានថ្ងៃចុងក្រោយនេះ។
ខាងក្រោមនេះ គឺជារូបភាពផ្ដាមចេញពីការបង្ហោះរូបថតដដែលនេះនៅលើបណ្ដាញសង្គមដោយទំព័រហ្វេសប៊ុកមួយទៀតកាលពីថ្ងៃទី០១ ខែវិច្ឆិកា ឆ្នាំ២០២៤ ដោយរក្សាទុកខ្លឹមសារដដែល។
ក្រៅពីការបង្ហោះនៅលើបណ្ដាញសង្គមខាងលើនេះ រូបថតរួមជាមួយការអះអាងដូចគ្នានេះ ក៏ត្រូវបានបង្ហោះ និងចែករំលែកព្រោងព្រាតនៅលើបណ្ដាញសង្គមដោយអ្នកប្រើប្រាស់ហ្វេសប៊ុកដទៃទៀតដែរ។
គេអាចរកមើលការបង្ហោះរូបថតជាមួយសំណេរបែបនេះនៅលើបណ្ដាញសង្គមតាមរយៈតំណភ្ជាប់នៅទីនេះ (archived) ឬតំណភ្ជាប់មួយទៀតនៅទីនេះ (archived) ឬតំណភ្ជាប់មួយទៀតនៅទីនេះ (archived)។
បន្ទាប់ពីការបង្ហោះរូបថតនេះនៅលើបណ្ដាញសង្គម មានអ្នកប្រើប្រាស់ហ្វេសប៊ុកកម្ពុជាជាច្រើន បានបញ្ចេញមតិកោតសរសើរចំពោះរូបថតនេះ ដោយជឿទៅតាមព័ត៌មានដែលគេបង្ហោះនេះ។
ការត្រួតពិនិត្យការពិត
Fact Crescendo បានចាប់ផ្ដើមត្រួតពិនិត្យ និងផ្ទៀងផ្ទាត់លើព័ត៌មាននេះតាមរយៈ Google Reverse Image Search ដែលនាំឱ្យយើងរកឃើញការពិតដូចខាងក្រោមនេះ។
តាមរយៈការដំណើរការ Google Reverse Image Search យើងបានរកឃើញរូបថតដូចគ្នានេះ និងព័ត៌មានលម្អិតអំពីរូបថតមួយសន្លឹកនេះផងដែរ ដែលត្រូវបានផ្សព្វផ្សាយនៅលើបណ្ដាញអ៊ិនធឹណិត។
យើងបានរកឃើញរូបថតដូចគ្នានេះ ត្រូវបានដាក់ផ្សព្វផ្សាយដេញថ្លៃនៅលើវេបសាយ Yahoo កាលពីខែតុលាកន្លងមកនេះ ដោយមានព័ត៌មានរៀបរាប់ថា រូបថតនេះ គឺជាតារាចម្រៀងជប៉ុននៃក្រុម Candies ដែលមានឈ្មោះ Ito Ran, Yoshiko Tanaka និង Miki Fujimura។
ខាងក្រោមនេះ គឺជារូបភាពផ្ដាមចេញពីគេហទំព័រដេញថ្លៃរូបថត Yahoo Auction ដែលភ្ជាប់មកជាមួយព័ត៌មានរូបថតជាភាសាជប៉ុន។
Candies គឺជាក្រុមតារាចម្រៀងស្រីជប៉ុនដ៏ល្បីល្បាញដែលត្រូវបានបង្កើតឡើងនៅក្នុងឆ្នាំ១៩៧៣ ដោយមានសមាជិក ៣រូប មាន Ito Ran ឬហៅ Ran, Yoshiko Tanaka ឬហៅ Sue និង Miki Fujimura ឬហៅ Miki។
ក្រុមចម្រៀងមួយនេះ ប្រឡូកក្នុងវិស័យចម្រៀងជប៉ុនរយៈពេល ៥ឆ្នាំដោយបានច្រៀងឱ្យផលិតកម្ម CBS Sony ដែលបានប្ដូរឈ្មោះមកជា Sony Music នាពេលសព្វថ្ងៃននេះ។
បន្ទាប់ពីក្រុមចម្រៀងនារីជប៉ុនមួយនេះបានរំសាយនៅក្នុងឆ្នាំ១៩៧៨ តារាចម្រៀង Ran និង Sue បានងាកទៅចាប់អាជីពជាតារាសម្ដែង ហើយទទួលបានជោគជ័យ។ ចំណែកតារាចម្រៀង Miki បានវិលត្រឡប់ទៅវិស័យចម្រៀងវិញដោយបានចេញអាល់ប៊ុលចម្រៀងទោលនៅក្នុងឆ្នាំ១៩៨៣ ប៉ុន្តែ ក៏បានដកថយទៅវិញក្រោយរៀបការរួច។
នៅក្នុងចំណោមតារាចម្រៀងស្រីទាំងបីរូប អ្នកស្រី Yoshiko Tanaka ដែលជាតារាសម្ដែងភាពយន្តផងនោះ បានទទួលមរណភាពនៅក្នុងឆ្នាំ២០១១ ក្នុងអាយុ ៥៥ឆ្នាំ ដោយសារតែមហារីកសុដន់។
ខាងក្រោមនេះ គឺជារូបភាពផ្ដាមចេញពី GettyImages ដែលបង្ហាញតារាស្រីទាំងបីដួងថែ្លងក្នុងសន្និសីទសារព័ត៌មានមួយនៅទីក្រុងតូក្យូ កាលពីឆ្នាំ១៩៧៧ ដែលនិយាយអំពីការរំសាយក្រុម។
សន្និដ្ឋាន
Fact Crescendo រកឃើញថា ការអះអាងដូចដែលត្រូវបានរៀបរាប់ខាងលើនេះ មិនត្រឹមត្រូវនោះឡើយ។ រូបថតសខ្មៅមួយសន្លឹកនេះ មិនមែនជារូបថតតារាចម្រៀងខ្មែរ អ្នកស្រី ប៉ែន រ៉ន, អ្នកស្រី រស់ សេរីសុទ្ធា និងអ្នកស្រី ហួយ មាស ដូចដែលគេអះអាងនោះឡើយ។ រូបថតមួយសន្លឹកនេះ គឺជាតារាចម្រៀងជប៉ុននៃក្រុម Candies ដ៏ល្បីល្បាញកាលពីទសវត្សរ៍១៩៧០ ដែលមានសមាជិក ៣រូប រួមាន Ito Ran, Yoshiko Tanaka និង Miki Fujimura។
Title:ព័ត៌មានមិនពិតថា រូបថតអ្នកចម្រៀងជប៉ុនជាតារាចម្រៀងខ្មែរដ៏ល្បីឈ្មោះពីអតីតកាល
Fact Check By: Jay UdomResult: False
