ការប្រកាសជាសាធារណៈពីសំណាក់លោក ហ៊ុន សែន គាំទ្រកូនប្រុសរបស់ខ្លួន គឺលោក ហ៊ុន ម៉ាណែត ឲ្យធ្វើជានាយករដ្ឋមន្ត្រីបន្តពីលោក បានធ្វើឲ្យមានការចេញ សារគាំទ្របន្តបន្ទាប់គ្នា ពីគ្រប់ស្ថាប័នរដ្ឋ និងឯកជន។ ការប្រកាសនេះ ក៏បានធ្វើឲ្យមានការរិះគន់ជាច្រើនពីសំណាក់អ្នកគាំទ្រ និងមេដឹកនាំរបស់គណបក្សប្រឆាំងយ៉ាងផុសផុលនៅតាមបណ្តាញសង្គមនានាផងដែរ។
ក្នុងចំណោមនោះ រូបថតមួយសន្លឹកបង្ហាញអំពីទិដ្ឋភាពលោក ហ៊ុន ម៉ាណែត កំពុងអង្គុយពិភាក្សាការងារជាមួយភាគីវៀតណាមត្រូវបានបង្ហោះឡើងដោយអ្នកប្រើប្រាស់ម្នាក់។ រូបថតនេះ បានបង្ហាញលោក ហ៊ុន ម៉ាណែត ពាក់មួកទាហានវៀតណាមផងដែរ ដោយមានប្រតិកម្មចម្រុះ និងចែកចាយតៗគ្នា។
ទោះជាយ៉ាងណា ការត្រួតពិនិត្យ និងផ្ទៀងផ្ទាត់ការពិតរបស់ក្រុមការងារ Fact Crescendo Cambodia បានរកឃើញថា រូបថតដែលអ្នកប្រើប្រាស់បានបង្ហោះនៅលើបណ្តាញសង្គមនោះ គឺជារូបថតកែច្នៃ។
ការអះអាងលើបណ្តាញសង្គម
កាលពីថ្ងៃទី០៥ ខែធ្នូ ឆ្នាំ២០២១កន្លងទៅថ្មីៗនេះ អ្នកប្រើប្រាស់ហ្វេសប៊ុកម្នាក់ បានបង្ហោះរូបថតចំនួន២សន្លឹក ដោយក្នុងនោះមានមួយសន្លឹក បង្ហាញអំពីទិដ្ឋភាពកិច្ចប្រជុំរវាងលោក ហ៊ុន ម៉ាណែត និងអនុព័ន្ធយោធាវៀតណាមប្រចាំប្រទេសកម្ពុជា។ រូបថតនេះ ក៏បានបង្ហាញរូបលោក ពាក់មួកទាហានវៀតណាមផងដែរ ខណៈលោកកំពុងតែប្រជុំ។ អ្នកប្រើប្រាស់ដដែលខាងលើនេះ ពុំបានបញ្ជាក់អំពីទីតាំង និងព័ត៌មានលម្អិតជាក់លាក់អំពីទិដ្ឋភាពនៃរូបថតនោះទេ។
រូបថតនេះត្រូវបានចែករំលែកតៗគ្នាជាច្រើនរយដង រួមជាមួយនឹងប្រតិកម្ម និងការបញ្ចេញមតិចម្រុះពីសំណាក់អ្នកប្រើហ្វេសប៊ុកនិយាយភាសាខ្មែរ។
រូបភាពផ្ដាមចេញពីប៉ុស្តិ៍របស់អ្នកប្រើហ្វេសប៊ុក ដែលបានសរសេររៀបរាប់ថា «ច្រើនជំនាន់មកហើយ ដែលយួនព្យាយាមលេបត្របាក់កម្ពុជាមិនបានសម្រេច ទើបតែសម័យហ៊ុនសែននេះទេ ដែលយួនបានសម្រេចផែនការរបស់វាស្ទើរទាំងស្រុង យួនមិនត្រឹមតែចំណេញទឹកដីពីខ្មែរទេ គឺយួនកំពុងត្រួតត្រាខ្មែរគ្រប់វិស័យទាំងអស់ ក្នុងនោះវិស័យសំខាន់ៗដែលយួនក្តាប់ណែនដៃជាងគេ គឺវិស័យសេដ្ឋកិច្ច នយោបាយ វប្បធម៍ យោធា អប់រំ សុខាភិបាល និងវិស័យកសិកម្ម»។
ការត្រួតពិនិត្យការពិត
Fact Crescendo Cambodia បានចាប់ផ្ដើមធ្វើការត្រួតពិនិត្យ និងផ្ទៀងផ្ទាត់លើរូបថតនេះតាមរយៈ ការដំណើរការកម្មវិធីស្វែងរករូបថតរបស់ក្រុមហ៊ុន Google ដែលនាំឱ្យយើងប្រទះនូវប្រភពមួយចំនួន។
រូបថតមួយសន្លឹកមានទម្រង់ និងសណ្ឋានដូចគ្នាទាំងស្រុងនេះ ត្រូវបានរកឃើញនៅលើទំព័រហ្វេសប៊ុកផ្លូវការរបស់លោក ហ៊ុន ម៉ាណែត ដែលបង្ហោះកាលពីថ្ងៃទី២២ ខែកញ្ញា ឆ្នាំ២០២១កន្លងទៅនេះ ដោយពុំបានបង្ហាញនូវទិដ្ឋភាពរូបលោក បានពាក់មួយទាហានវៀតណាមនោះឡើយ។
ខាងក្រោមនេះ គឺជារូបភាពផ្តាមចេញពីទំព័រហ្វេសប៊ុករបស់លោក ដែលបានសរសេររៀបរាប់ថា «រាជធានីភ្នំពេញ, ថ្ងៃអង្គារ ទី២១ កញ្ញា ២០២១ ទទួលជួបសម្ដែងការគួរសម និងពិភាក្សាការងារជាមួយវរសេនីយ៍ឯក Nguyen Thanh Chinh អនុព័ន្ធយោធាវៀតណាម ប្រចាំព្រះរាជាណាចក្រកម្ពុជា»។
ដូចគ្នានេះ តាមរយៈគេហទំព័រសារព័ត៌មានកម្ពុជាថ្មី ផ្សព្វផ្សាយកាលពីថ្ងៃទី២២ ខែកញ្ញា ឆ្នាំ២០២១ ក៏បានបង្ហាញនូវទិដ្ឋភាពកិច្ចប្រជុំពិភាក្សារវាងលោក ហ៊ុន ម៉ាណែត អគ្គមេបញ្ជាការរងនៃកងយោធពលខេមរភូមិន្ទ មេបញ្ជាការកងទ័ពជើងគោក និងលោកវរសេនីយ៍ឯកពិសេស ង្វៀន ថាញ់ជីញ អនុព័ន្ធយោធាវៀតណាមប្រចាំនៅកម្ពុជាផងដែរ កាលពីថ្ងៃទី២១ ខែកញ្ញាថ្មីៗនេះ។ រូបថតដដែលនេះ ពុំបានបង្ហាញទិដ្ឋភាពលោក ហ៊ុន ម៉ាណែត បានពាក់មួកទាហានវៀតណាមនៅក្នុងកិច្ចប្រជុំនោះទេ។
ខាងក្រោមនេះ គឺជារូបភាពផ្តាមចេញពីគេហទំព័រសារព័ត៌មាន ដោយបានសរសេររៀបរាប់ថា «កងទ័ពកម្ពុជា និងវៀតណាម បន្តពង្រឹងកិច្ចសហការ និងជួយគ្នាប្រយុទ្ធជំងឺកូវីដ-១៩»។
Kampuchea Thmey News Report | Archived Link
ដើម្បីស្វែងរកព័ត៌មានពិត សូមតាមដានការផ្សាយរបស់យើងតាមរយៈប្រព័ន្ធដូចខាងក្រោម៖
Facebook Twitter Telegram Google News
សន្និដ្ឋាន
Fact Crescendo Cambodia បានរកឃើញថា រូបថតដែលបានបង្ហោះដោយអ្នកប្រើប្រាស់ខាងលើនោះ គឺពិតជាមិនត្រឹមត្រូវនោះឡើយ។ រូបថតមួយសន្លឹកនេះ ត្រូវបានកាត់តមុននឹងបង្ហោះនៅលើបណ្តាញសង្គម។ ការពិតច្បាប់ដើមនៃរូបថតនេះ ពុំបានបង្ហាញទិដ្ឋភាពលោក ហ៊ុន ម៉ាណែត ពាក់មួកទាហានវៀតណាមនៅក្នុងកិច្ចប្រជុំពិភាក្សាការងារជាមួយលោកវរសេនីយ៍ឯក ង្វៀន ថាញ់ជីញ (Nguyen Thanh Chinh) អនុព័ន្ធយោធាវៀតណាមប្រចាំនៅកម្ពុជាកាលពីខែកញ្ញាកន្លងទៅនោះទេ។
Title:រូបថតលោក ហ៊ុន ម៉ាណែត ពាក់មួកទាហានវៀតណាម ជារូបថតកាត់ត
Fact Check By: Kakada SimResult: Altered
