លោក លឹម គឹមយ៉ាង អតីតអ្នកតំណាងរាស្ត្របក្សជំទាស់របស់កម្ពុជា ត្រូវខ្មាន់កាំភ្លើងបាញ់សម្លាប់កាលពីល្ងាចថ្ងៃម្សិលមិញនេះ។ បន្ទាប់មក ការអះអាងនានានៅលើបណ្ដាញសង្គម បាននិយាយថា សមត្ថកិច្ចថៃចាប់ខ្លួនខ្មាន់កាំភ្លើងបានហើយ។ ព័ត៌មាននេះ ត្រូវបានចែករំលែកព្រោងព្រាតលើបណ្ដាញសង្គម។ ទោះជាយ៉ាងណា ការផ្ទៀងផ្ទាត់របស់យើង រកឃើញថា ការអះអាងនេះមិនត្រឹមត្រូវនោះឡើយ។
ការអះអាងលើបណ្ដាញសង្គម
ព័ត៌មានដ៏ផុសផុលនៅលើបណ្ដាញសង្គមនៅថ្ងៃនេះ បានផ្សព្វផ្សាយថា ខ្មាន់កាំភ្លើងដែលបាញ់សម្លាប់លោក លឹម គឹមយ៉ា អតីតតំណាងរាស្ត្របក្សជំទាស់របស់កម្ពុជា ត្រូវបានសមត្ថកិច្ចថៃចាប់ខ្លួនបានហើយ ហើយថា ខ្មាន់កាំភ្លើងនោះជាជនជាតិខ្មែរទៀតផង។
ព័ត៌មាននេះ ត្រូវបានចែករំលែកព្រោងព្រាតលើបណ្ដាញសង្គមនៅថ្ងៃនេះ ហើយមានអ្នកប្រើប្រាស់បណ្ដាញសង្គមកម្ពុជាជាច្រើន បានបញ្ចេញមតិ និងប្រតិកម្មផ្សេងៗយ៉ាងច្រើន ដោយជឿថា ព័ត៌មាននេះ គឺជាការពិត។
ខាងក្រោមនេះ គឺជារូបភាពផ្ដាមចេញពីព័ត៌មាននៅលើបណ្ដាញសង្គមដែលរៀបរាប់ថា “អាជ្ញាធរថៃចាប់បានជនដៃដល់បាញ់សម្លាប់លោក លឹម គឹមយ៉ា អតីតអ្នកតំណាងរាស្ត្រគណបក្សសង្គ្រោះជាតិហើយ។ ព័ត៌មានបឋមត្រូវបានគេអះអាងថា ជនដៃគឺជាជនជាតិខ្មែរ […]”។
ចំណែកអ្នកប្រើប្រាស់បណ្ដាញសង្គមម្នាក់ទៀត ក៏បានបង្ហោះព័ត៌មាននៅលើបណ្ដាញសង្គមនៅថ្ងៃនេះថា សមត្ថកិច្ចថៃបានចាប់ខ្លួនខ្មាន់កាំភ្លើងម្នាក់បានភ្លាមៗ បន្ទាប់ពីខ្មាន់កាំភ្លើងរូបនោះ បានបាញ់ប្រហារសម្លាប់អតីតសមាជិកសភាគណបក្សប្រឆាំងរបស់កម្ពុជានៅកណ្ដាលក្រុងបាងកកកាលពីថ្ងៃម្សិលមិញនេះ។
ការអះអាងនេះ ត្រូវបានចែករំលែកបន្តជាច្រើនដងពីសំណាក់អ្នកប្រើប្រាស់បណ្ដាញសង្គមនិយាយភាសាខ្មែរ ជាពិសេសវាត្រូវបានចែករំលែកទៅកាន់ក្រុមបណ្ដាញសង្គមហ្វេសប៊ុកដែលមានសមាជិករាប់ម៉ឺន។
ខាងក្រោមនេះ គឺជារូបភាពផ្ដាមចេញពីការអះអាងដែលត្រូវបានបង្ហោះនៅលើបណ្ដាញសង្គមនៅថ្ងៃទី០៨ ខែមករា ឆ្នាំ២០២៥ ដែលរៀបរាប់ថា “ប្រទេសថៃបានឃាត់ខ្លួនជនសង្ស័យភ្លាមៗក្រោយពីមានការឃុបឃិត និងបាញ់ប្រហារជីវិតលោក លឹម គឹមយ៉ា នៅទីក្រុងបាងកកកាលពីថ្ងៃទី៧ មករា ឆ្នាំ២០២៥មុននេះ។ សូមរំលឹកថា លោក លឹម គឹមយ៉ា ជាអតីតតំណាងរាស្ត្រគណបក្សសង្គ្រោះជាតិមួយរូបប្រចាំខេត្តកំពង់ធំ”។
លោក លឹម គឹមយ៉ា អាយុ ៧៣ឆ្នាំ ត្រូវបានខ្មាន់កាំភ្លើងបាញ់ប្រហារចំនួន ៣គ្រាប់បណ្ដាលឱ្យស្លាប់កាលពីថ្ងៃទី០៧ ខែមករា ឆ្នាំ២០២៥ នៅឯដងផ្លូវមួយកន្លែងស្ថិតនៅក្នុងខណ្ឌព្រះណៈខន នៃទីក្រុងបាងកក បន្ទាប់ពីលោកធ្វើដំណើរពីខេត្តសៀមរាបជាមួយភរិយារបស់លោកជាជនជាតិបារាំង និងសាច់ញាតិម្នាក់ទៀត ទៅកាន់ប្រទេសថៃ។
ការអះអាងមួយទៀតនៅលើបណ្ដាញសង្គម បានលើកឡើងថា ខ្មាន់កាំភ្លើងដែលបានបាញ់ប្រហារលោក លឹម គឹមយ៉ា ត្រូវបានសមត្ថកិច្ចថៃចាប់ខ្លួនបាននៅព្រំដែនខ្មែរ-ថៃ ដោយជនដៃដល់រូបនេះព្យាយាមឆ្លងដែនចូលទៅទឹកដីកម្ពុជា។
ការអះអាងនេះ ត្រូវបានចែករំលែកកាន់តែច្រើនពីសំណាក់អ្នកប្រើប្រាស់បណ្ដាញសង្គមហ្វេសប៊ុក ជាពិសេសអ្នកប្រើប្រាស់បណ្ដាញសង្គមនិយាយភាសាខ្មែរ។
ខាងក្រោមនេះ គឺជារូបភាពផ្ដាមចេញពីការអះអាងដែលត្រូវបានបង្ហោះនៅលើបណ្ដាញសង្គមហ្វេសប៊ុកនៅថ្ងៃទី០៨ ខែមករា ឆ្នាំ២០២៥ រៀបរាប់ថា “ព័ត៌មានបឋម អាជ្ញាធរថៃចាប់ខ្លួនជនដៃដល់បាននៅព្រំដែនខ្មែរ-ថៃ ខណៈជននេះកំពុងព្យាយាមឆ្លងដែនពីទឹកដីថៃចូលទៅកម្ពុជា”។
ខាងក្រោមនេះ គឺជារូបភាពផ្ដាមចេញពីការអះអាងដូចគ្នានេះដែលត្រូវបានបង្ហោះនៅលើបណ្ដាញសង្គមហ្វេសប៊ុកនៅថ្ងៃទី០៨ ខែមករា ឆ្នាំ២០២៥ ហើយត្រូវបានចែករំលែកបន្តរាប់សិបដងផងដែរ។
ការត្រួតពិនិត្យការពិត
Fact Crescendo បានត្រួតពិនិត្យ និងផ្ទៀងផ្ទាត់ទៅលើការអះអាងខាងលើនេះតាមរយៈការពិនិត្យមើលសេចក្ដីរាយការណ៍ព័ត៌មានរបស់ប្រព័ន្ធផ្សព្វផ្សាយនានានៅក្នុងប្រទេសថៃ និងបណ្ដាញផ្សព្វផ្សាយព័ត៌មានអន្តរជាតិធំៗនៅលើពិភពលោក ដែលនាំឱ្យយើងរកឃើញការពិតដូចខាងក្រោមនេះ។
គិតត្រឹមម៉ោង ៧ល្ងាចថ្ងៃទី០៨ ខែមករា ឆ្នាំ២០២៥នេះដែលមានរយៈពេល ២៤ម៉ោងក្រោយការបាញ់ប្រហារហើយនោះ គ្មានប្រព័ន្ធផ្សព្វផ្សាយព័ត៌មានថៃណាមួយរាយការណ៍ពីការចាប់ខ្លួនខ្មាន់កាំភ្លើង ដែលត្រូវបានគេស្គាល់ឈ្មោះថា ឯកល័ក្ខណ៍ ភែណយ (เอกลักษณ์ แพน้อย) ឬហៅក្រៅថា ចាអ៊ែម (จ่าเอ็ม)នោះឡើយ។
ប្រព័ន្ធផ្សព្វផ្សាយនានារបស់ថៃ បានផ្សាយថា ប៉ូលិសថៃបានចេញបញ្ជាតាមស្វែងរកចាប់ខ្លួនខ្មាន់កាំភ្លើងរូបនេះ ដែលបានកំពុងរត់គេចខ្លួន បន្ទាប់ពីបាញ់ប្រហារសម្លាប់លោក លឹម គឹមយ៉ា កាលពីល្ងាចថ្ងៃម្សិលមិញនេះ។
ខាងក្រោមនេះ គឺជារូបភាពផ្ដាមចេញពីព័ត៌មានថ្មីៗបំផុតរបស់សារព័ត៌មានថៃ បាងកក ប៉ុស្តិ៍ នៅល្ងាចថ្ងៃទី០៨ ខែមករា ឆ្នាំ២០២៥ ដែលគ្មានសេចក្ដីរាយការណ៍និយាយពីការចាប់ខ្លួនខ្មាន់កាំភ្លើងនោះឡើយ។
នៅក្នុងគេហទំព័រសារព័ត៌មានថៃមួយទៀតឈ្មោះថា The Nation ក៏មានចុះផ្សាយសេចក្ដីរាយការណ៍ព័ត៌មាននិយាយពីការចាប់ខ្លួនខ្មាន់កាំភ្លើងនោះឡើយ។ ប៉ុន្តែ សារព័ត៌មានបានផ្សាយព័ត៌មានថា នាយករដ្ឋមន្ត្រីថៃ អ្នកស្រី ផែថងថាន ស៊ីណាវ៉ាត់ បានទាមទារឱ្យចាប់ខ្លួនខ្មាន់កាំភ្លើងឱ្យបានលឿនបំផុត និងព័ត៌មានមួយទៀតដែលនិយាយថា អាជ្ញាធរថៃចេញដីកាតាមចាប់ខ្លួនខ្មាន់កាំភ្លើង។
ខាងក្រោមនេះ គឺជារូបភាពផ្ដាមចេញពីគេហទំព័រសារព័ត៌មានថៃ The Nation នៅត្រឹមល្ងាចថ្ងៃទី០៨ ខែមករា ឆ្នាំ២០២៥។
The Nation Front Page | Archived Link
ដោយស្វែងរកព័ត៌មានតាមរយៈពាក្យគន្លឹះនៅលើ Google Search យើងរកពុំឃើញសេចក្ដីរាយការណ៍ព័ត៌មានអំពីការចាប់ខ្លួនខ្មាន់កាំភ្លើងបាញ់សម្លាប់លោក លឹម គឹមយ៉ា នោះឡើយ ប៉ុន្តែ ក៏បានឃើញការផ្សាយព័ត៌មានថា សមត្ថកិច្ចថៃកំពុងតាមរកចាប់ខ្លួនជនដៃដល់រូបនេះ។
ទោះជាយ៉ាងណា សារព័ត៌មានថៃរ៉ាត់ (Thairath) ទើបតែចុះផ្សាយព័ត៌មាននិយាយពីការចាប់ខ្លួនខ្មាន់កាំភ្លើងបាននៅម៉ោង ១៩៖៤១នាទីល្ងាចថ្ងៃទី០៨ ខែមករា ឆ្នាំ២០២៥។
Thairath Report | Archived Link
បើមើលទៅលើការអះអាងដូចរៀបរាប់ខាងលើ យើងឃើញថា ការអះអាងទាំងនោះ សុទ្ធតែបង្ហាញរូបថតរបស់ខ្មាន់កាំភ្លើងត្រូវបានដាក់ឱ្យឈរវាស់កម្ពស់ ដែលជានីតិវិធីមួយរបស់សមត្ថកិច្ចនៅពេលចាប់ខ្លួនជនសង្ស័យ។
ទោះជាយ៉ាងណា សារព័ត៌មានថៃសុទ្ធតែបានបញ្ជាក់ថា រូបថតនោះ គឺជារូបថតចាស់នៅពេលដែលជនដៃដល់រូបនេះ ត្រូវបានសមត្ថកិច្ចចាប់ខ្លួនម្ដងរួចមកហើយសម្រាប់ការប្រព្រឹត្តល្មើសនាពេលកន្លងមក ដោយមិនពាក់ព័ន្ធនឹងករណីបាញ់ប្រហារលើលោក លឹម គឹមយ៉ាង កាលពីថ្ងៃម្សិលមិញឡើយ។
ប្រព័ន្ធផ្សព្វផ្សាយថៃ ក៏បានផ្សាយផងដែរថា ដោយផ្អែកតាមវីដេអូថតបានដោយកាមេរ៉ាសុវត្ថិភាព បង្ហាញថា ខ្មាន់កាំភ្លើងបានចាកចេញភ្លាមៗពីកន្លែងកើតហេតុ និងបានជិះម៉ូតូមួយគ្រឿងចេញទៅបាត់នៅមុនពេលសមត្ចកិច្ចថៃចុះទៅដល់កន្លែងកើតហេតុ។
នៅឯកម្ពុជាឯណេះវិញ ដោយផ្អែកតាមសេចក្ដីប្រកាសព័ត៌មានរបស់នគរបាលកម្ពុជា ប្រព័ន្ធផ្សព្វផ្សាយនានា បានចុះផ្សាយនៅម៉ោងជិត៩យប់ថ្ងៃនេះថា ខ្មាន់កាំភ្លើងដែលបាញ់សម្លាប់លោក លឹម គឹមយ៉ា ត្រូវសមត្ថកិច្ចកម្ពុជាចាប់ខ្លួនបាននៅម៉ោង ១ និង ៥០នាទីរសៀលថ្ងៃទី០៨ ខែមករា ឆ្នាំ២០២៥ នៅឯស្រុកមោងឫស្សី ក្នុងខេត្តបាត់ដំបង។
ខាងក្រោមនេះ គឺជាសេចក្ដីប្រកាសព័ត៌មានរបស់អគ្គស្នងការនគរបាលជាតិកម្ពុជាស្ដីពីការចាប់ខ្លួនខ្មាន់កាំភ្លើងដែលបានរត់គេចខ្លួនចូលមកទឹកដីកម្ពុជា។
Follow Us and Stay Up to Date with Our Latest Fact-Checks
Facebook | Twitter | Telegram | TikTok | WhatsApp | Instgram
សន្និដ្ឋាន
Fact Crescendo រកឃើញថា ការអះអាងដូចដែលត្រូវបានរៀបរាប់ខាងលើនេះ មិនត្រឹមត្រូវនោះឡើយ។ ខ្មាន់កាំភ្លើងដែលបានបាញ់សម្លាប់អ្នកនយោបាយកម្ពុជា បានរត់គេចខ្លួនភ្លាមៗ និងមិនត្រូវបានសមត្ថកិច្ចថៃចាប់ខ្លួនបានភ្លាមៗនោះឡើយ។ ខ្មាន់កាំភ្លើងត្រូវបានសមត្ថកិច្ចកម្ពុជាចាប់ខ្លួននៅលើទឹកដីខេត្តបាត់ដំបងនៅម៉ោង ១ និង ៥០នាទីរសៀលថ្ងៃទី០៨ ខែមករា ឆ្នាំ២០២៥។
Title:សមត្ថកិច្ចកម្ពុជាចាប់ខ្លួនបានខ្មាន់កាំភ្លើងថៃបាញ់សម្លាប់អតីតតំណាងរាស្ត្របក្សជំទាស់
Written By: Jay UdomResult: Misleading
