ក្នុងប៉ុន្មានឆ្នាំចុងក្រោយនេះ កោះពេជ្របានទទួលនូវការវិនិយោគគម្រោងសាងសង់ធំៗ ដែលក្នុងនោះរួមមានសាលារៀនអន្តរជាតិ អគារពាណិជ្ជកម្ម ខុនដូ គេហដ្ឋានកម្រិតខ្ពស់ និងកន្លែងកម្សាន្តជាច្រើនផ្សេងៗទៀត។ សំណង់អគារជាច្រើន ត្រូវបានសាងសង់ឡើងតាមរចនាបថអឺរ៉ុប ឬចម្លងតាមរចនាបថនៃអគារល្បីៗនៅទីក្រុងធំៗនៅតំបន់អឺរ៉ុប។ ទន្ទឹមគ្នានេះ រូបថតអគារនៅក្នុងទីក្រុងរណបមួយនេះ ថែមទាំងបានអះអាងថាវាស្ថិតនៅក្នុងទីក្រុងប៉ារីសទៅវិញ។ ទោះយ៉ាងណាការផ្ទៀងផ្ទាត់របស់ Fact Crescendo Cambodia បានបង្ហាញថាការអះអាងនេះ គឺមិនត្រឹមត្រូវនោះឡើយ។
ការអះអាងលើបណ្តាញសង្គម
កាលពីថ្ងៃទី២៦ ខែឧសភា ឆ្នាំ២០២១កន្លងទៅនេះ មានអ្នកប្រើប្រាស់បណ្តាញសង្គមហ្វេសប៊ុកម្នាក់ បានបង្ហោះរូបថតមួយសន្លឹកបង្ហាញពីទិដ្ឋភាពអគារមួយដែលមានរចនាបថ ឬសណ្ឋាណរូបរាងបែបអឺរ៉ុប។ អ្នកប្រើហ្វេសប៊ុកដដែលនោះ ក៏បានអះអាងផងដែរថា រូបថតនេះ គឺជាទិដ្ឋភាពនៃម្ដុំអគារ Arc de Triomphe នាទីក្រុងប៉ារីស។
រូបភាពផ្ដាមចេញពីប៉ុស្តិ៍របស់អ្នកប្រើប្រាស់ដែលបានរៀបរាប់ជាភាសាខ្មែរថា «មានណាគេនៅម្តុំ Arc de Triomphe ប៉ារីសនេះអត់ ម៉ោះអូនទំនេរ»។
ការត្រួតពិនិត្យការពិត
Fact Crescendo Cambodia បានចាប់ផ្តើមត្រួតពិនិត្យ និងផ្ទៀងផ្ទាត់រូបថតតាមរយៈកម្មវិធី Google Reverse Image ដែលនាំឲ្យទៅរកឃើញប្រភពដើមនៃទិដ្ឋភាពអគារ និងផ្លូវមួយនេះទាំងមូលដែលមានទម្រង់ដូចគ្នាទាំងស្រុង។
រូបថតដូចគ្នាមួយសន្លឹកនេះ បានរកឃើញនៅក្នុងគេហទំព័រ Unsplash ដែលជាគេហទំព័រសម្រាប់ការប្រើប្រាស់រូបថតដោយសេរី មិនគិតថ្លៃ។ រូបថតមួយនេះត្រូវបានបង្ហោះឡើងដោយលោក Paul Szewczyk កាលពីថ្ងៃទី១១ ខែមិថុនា ឆ្នាំ២០២០កន្លងមក។
គេហទំព័រដដែលនេះ ក៏បានភ្ឋាប់ជាមួយនឹងការសរសេររៀបរាប់ និងបានបញ្ជាក់ទីតាំងកន្លែងសម្រាប់អគារមួយនេះផងដែរ «The Elysée, Koh Pich street, Phnom Penh» ឬដែលអាចប្រែសម្រួលជាភាសាខ្មែរថា «Elysée ផ្លូវកោះពេជ្រ រាជធានីភ្នំពេញ»។
រូបថតមួយសន្លឹកទៀតដែលបង្ហាញពីគម្រោង និងទិដ្ឋភាពអគារដែលមានរូបរាងទម្រង់ដូចគ្នាទាំងស្រុងនេះ ក៏ត្រូវបានចុះផ្សាយផងដែរតាមរយៈគេហទំព័រអចលនទ្រព្យកម្ពុជា realestate.com។
រូបភាពផ្ដាមចេញពីគេហទំព័រដែលបានសរសេររៀបរាប់ជាភាសាអង់គ្លេសថា «The Élysée by Dara is a luxurious serviced-apartment complex adorned with French architectural styles» ប្រែជាភាសាខ្មែរមានន័យថា «The Élysée by Dara គឺជាអគារស្នាក់នៅដ៏ទំនើបមួយដែលមានសណ្ឋានទម្រង់បែបប្រទេសបារាំង»។
Real Estate Report | Archived Link
តាមរយៈទំព័រហ្វេសប៊ុកមួយ The Elysee Koh Pich ដែលជាគម្រោងនៃអគារម៉ូតអឺរ៉ុបមួយនេះក៏បានបង្ហោះវីដេអូអបង្ហាញទិដ្ឋភាពអគារទាំងមូល ដោយភ្ជាប់នឹងការលក់ប្រម៉ូតគម្រោងរបស់ខ្លួនទៅកាន់អតិថិជនផងដែរ។
រូបភាពផ្ដាមចេញពីទំព័រហ្វេសប៊ុកខាងលើ បានសរសេររៀបរាប់ជាភាសាខ្មែរថា «ប្រូម៉ូសិនពិសេសមិនធ្លាប់មានពី The Elysee & Elite Town lll បានទាំងការបញ្ចុះតម្លៃ បានទាំងកាដូឆ្នាំថ្មីចំណេញទ្វេរដងរហូតដល់រាប់ម៉ឺនដុល្លារ។»។
ដោយឡែកតាមរយៈគេហទំព័រមួយរបស់បារាំងដែលបានបង្ហោះអំពីរូបថត និងទិដ្ឋភាពរបស់ Arc de Triomphe ដែលមានទម្រង់ និងសណ្ឋានខុសប្លែកគ្នាពីរូបថតដែលអ្នកប្រើប្រាស់បានអះអាងខាងលើ។
រូបភាពផ្ដាមចេញពីទំព័រហ្វេសប៊ុកខាងលើ បានសរសេររៀបរាប់ជាភាសាអង់គ្លេសថា «You can get to Arc de Triomphe by either driving down or using public transport» ឬប្រែសម្រួលជាភាសាខ្មែរថា «អ្នកអាចទៅដល់ Arc de Triomphe បានតាមរយៈការបើកបរ ឬប្រើមធ្យោបាយសាធារណៈ»។
Arc-De-Triomphe Link | Archived Link
សន្និដ្ឋាន (Conclusion)
Fact Crescendo Cambodia បានរកឃើញថា ការអះអាងដូចបានរៀបរាប់ខាងលេីនេះ គឺមិនត្រឹមត្រូវនោះឡេីយ។ រូបថតមួយសន្លឹកនេះ មិនមែនជាទិដ្ឋភាពអគារ Arc de Triomphe នៅក្នុងទីក្រុងប៉ារីសនោះទេ។ ការពិតរូបថតមួយសន្លឹកនេះ គឺត្រូវបានថតចេញពីទិដ្ឋភាពអគារមួយនៅក្នុងតំបន់ទីក្រុងរណបកោះពេជ្រ រាជធានីភ្នំពេញ។
Title:សំណង់អគារចម្លងតាមរចនាបថបារាំងនេះស្ថិតនៅទីក្រុងរណបកោះពេជ្រ
Fact Check By: Kakada SimResult: False
