ការអះអាងមិនត្រឹមត្រូវថា ជនជាតិថៃរត់ចែកជើងគ្នាដោយសាររញ្ជួយដីថ្មីកើតចំថ្ងៃចូលឆ្នាំថ្មី

ខណៈដែលប្រជាជនថៃប្រារព្ធពិធីបុណ្យចូលឆ្នាំថ្មីទូទាំងប្រទេសនោះ វីដេអូឃ្លីបមួយដែលបង្ហាញប្រជាជនថៃរត់ទាំងភ័យខ្លាចនៅតាមដងផ្លូវនោះ ត្រូវបានគេបង្ហោះព្រោងព្រាតលើបណ្ដាញសង្គមជាមួយការអះអាងថា ប្រជាជនថៃរត់ចែកជើងគ្នាដោយសារតែរញ្ជួយដីវាយប្រហារប្រទេសថៃសារជាថ្មីចំថ្ងៃប្រារព្ធពិធីបុណ្យចូលឆ្នាំថ្មី។ វីដេអូឃ្លីបនេះ ត្រូវបានចែកចាយព្រោងព្រាតលើបណ្ដាញសង្គម។ ទោះជាយ៉ាងណា ការផ្ទៀងផ្ទាត់របស់ Fact Crescendo រកឃើញថា ការអះអាងនេះមិនត្រឹមត្រូវនោះឡើយ។

ការអះអាងលើបណ្ដាញសង្គម

ឃ្លីបវីដេអូរយៈពេល ១៤វិនាទីមួយដែលបង្ហាញមនុស្សម្នារត់ប្រសេចប្រសាចនៅលើដងផ្លូវមួយ ត្រូវបានគេបង្ហោះនៅលើបណ្ដាញសង្គមជាមួយការអះអាងថា រញ្ជួយដីមួយទៀតកម្លាំង ៣.៥រ៉ិចទ័រ បានវាយប្រហារប្រទេសថៃអំឡុងពេលបុណ្យចូលឆ្នាំដែលបណ្ដាលឱ្យប្រជាពលរដ្ឋភ័យតក់ស្លុត និងរត់គេចនៅលើដងផ្លូវ។

ខាងក្រោមនេះ គឺជាវីដេអូដែលត្រូវបានបង្ហោះនៅលើបណ្ដាញសង្គមហ្វេសប៊ុកកាលពីថ្ងៃទី១៤ ខែមេសា ឆ្នាំ២០២៥ ដោយមានសំណេរនៅលើវីដេអូឃ្លីបនោះថា “នៅថៃរញ្ជួយដីសារថ្មីកម្រិត ៣.៥ [ថ្ងៃទី]១៤-០៤-២០២៥”។

វីដេអូឃ្លីបនេះ ទទួលបានការចូលទស្សនារហូតដល់ជាង ៣លានដង ព្រមទាំងការចែកចាយបន្តរហូតដល់ ៥ពាន់ដង ខណៈអ្នកប្រើប្រាស់ហ្វេសប៊ុកនិយាយភាសាខ្មែរជាច្រើន បានបញ្ចេញមតិដោយជឿតាមខ្លឹមសារនេះ។

Facebook Post | Archived Link

វីដេអូឃ្លីបនេះ ក៏ត្រូវបានបង្ហោះ និងចែកចាយនៅលើបណ្ដាញសង្គមហ្វេសប៊ុកដោយអ្នកប្រើប្រាស់បណ្ដាញសង្គមដទៃទៀតផងដែរនៅក្នុងរយៈពេលប៉ុន្មានថ្ងៃកន្លងមកនេះ។

ខាងក្រោមនេះ គឺជាវីដេអូដូចគ្នាដែលត្រូវបានបង្ហោះនៅលើបណ្ដាញសង្គមកាលពីថ្ងៃទី១៥ ខែមេសា ឆ្នាំ២០២៥ ជាមួយសំណេរថា “ថៃរញ្ជួយដីសារថ្មី ៣.៥”។

Facebook Post | Archived Link

វីដេអូជាមួយការអះអាងដូចគ្នានេះ ត្រូវបានបង្ហោះនៅលើបណ្ដាញសង្គម Instagram ផងដែរកាលពី ៣ថ្ងៃមុន ដោយមានអក្សរនៅលើផ្ទៃវីដេអូថា “នៅថៃរញ្ជួយដីសារថ្មីកម្រិត ៣.៥ ថ្ងៃទី១៤ ខែមេសា ឆ្នាំ២០២៥”។

Instagram Post | Archived Link

ដោយសារវាត្រូវបានបង្ហោះ និងចែកចាយបន្តព្រោងព្រាតនៅលើបណ្ដាញសង្គម គេអាចរកមើលវីដេអូនេះតាមរយៈតំណភ្ជាប់ដទៃទៀតនៅទីនេះ៖ Link 1 (archived), Link 2 (archived), Link 3 (archived), និង Link 4 (archived)។

ការត្រួតពិនិត្យការពិត

Fact Crescendo បានត្រួតពិនិត្យ និងផ្ទៀងផ្ទាត់ការអះអាងនេះតាមរយៈការដំណើរការ Google Reverse Image Search ដែលជួយឱ្យយើងរកឃើញការពិតដូចខាងក្រោមនេះ។

Google Reverse Image Search បាននាំទៅរកឃើញវីដេអូដើម និងព័ត៌មានលម្អិតអំពីវីដេអូនេះ ដែលត្រូវបានចុះផ្សាយដោយប្រព័ន្ធផ្សព្វផ្សាយនៅក្នុងប្រទេសថៃ។

សេចក្ដីរាយការណ៍របស់សារព័ត៌មានថៃ KHAOSOD ONLINE កាលពីថ្ងៃទី១៤ ខែមេសា បានឱ្យដឹងថា ប្រជាពលរដ្ឋថៃលេងជះទឹកដាក់់គ្នាសុខៗស្រាប់តែរត់ចេញប្រសេចប្រសាច បន្ទាប់ពីក្រុមយុវជនវាយតប់គ្នា ដែលបណ្ដាលឱ្យមានចលាចលកើតឡើង។

សេចក្ដីរាយការណ៍របស់សារព័ត៌មានថៃដដែលនេះ បានឱ្យដឹងថា ហេតុការណ៍នេះ បានកើតឡើងនៅតំបន់៨ ស្ថិតក្នុងទីប្រជុំជនហាតយ៉ៃ ស្ថិតនៅក្នុងខេត្តសុងក្លា ភាគខាងត្បូងប្រទេសថៃ កាលពីថ្ងៃទី១៣ ខែមេសា ឆ្នាំ២០២៥។

ខាងក្រោមនេះ គឺជារូបភាពផ្ដាមចេញពីសារព័ត៌មានថៃដែលបានចុះផ្សាយហេតុការណ៍នោះកាលពីថ្ងៃទី១៤ ខែមេសា ឆ្នាំ២០២៥ ដោយភ្ជាប់មកជាមួយរូបថតពីរសន្លឹកដូចទៅនឹងវីដេអូដែលត្រូវបានគេអះអាងថា ជាហេតុការណ៍រញ្ជួយដីសារជាថ្មីនៅក្នុងប្រទេសថៃ។

Khaosod’s Report | Archived Link

សារព័ត៌មានថៃមួយនេះ បានចុះផ្សាយបែបនេះដោយផ្អែកតាមវីដេអូមួយដែលត្រូវបានបង្ហោះនៅលើបណ្ដាញសង្គម TikTok កាលពីថ្ងៃទី១៤ ខែមេសា ដែលរៀបរាប់ជាភាសាថៃក្នុងន័យថា ប្រជាពលរដ្ឋលេងជះទឹកសុខៗក៏រត់ចែកជើងគ្នា បន្ទាប់ពីក្រុមយុវជនបើកការប្រយុទ្ធគ្នា។

Khaosod’S Report | Archived Link

សារព័ត៌មានថៃមួយទៀតឈ្មោះថា Hatyai Focus បានចុះផ្សាយថា សមត្ថកិច្ចថៃនៅតំបន់នោះ បានចុះទៅត្រួតពិនិត្យរួចរាល់ហើយ ពុំបានរកឃើញថា មានការប្រើប្រាស់កាំភ្លើងដែលបង្កឱ្យប្រជាពលរដ្ឋភ្ញាក់ផ្អើលនោះឡើយ។

សារព័ត៌មានមួយនេះ បានដកស្រង់សេចក្ដីបំភ្លឺរបស់ប៉ូលិសថៃនៅខេត្តសុងក្លា ដែលនិយាយថា ប្រជាពលរដ្ឋបានផ្អើលនាំគ្នារត់គេចចេញ ដោយសារតែមានជម្លោះពាក្យសម្ដីគ្នារវាងអ្នកលេងជះទឹកនៅតំបន់នោះតែប៉ុណ្ណោះ។

រញ្ជួយដីសារជាថ្មីញ័រដល់ផ្នែកខ្លះនៃប្រទេសថៃ

សារព័ត៌មានថៃ The Nation បានចុះផ្សាយថា រញ្ជួយដីកម្លាំង ៥.៣រ៉ិចទ័រ បានកើតឡើងនៅប្រទេសភូមា ហើយវាបានបង្កឱ្យញ័រដល់ផ្នែកខ្លះនៃប្រទេសថៃកាលពីថ្ងៃទី១៤ ខែមេសា ឆ្នាំ២០២៥។

សារព័ត៌មានថៃដដែលនេះ បានឱ្យដឹងទៀតថា មានតែខេត្តឈៀងម៉ៃស្ថិតនៅភាគខាងជើងប្រទេសថៃតែប៉ុណ្ណោះដែលបានរងការញ័ររញ្ជួយកម្រិត ១.៣រ៉ិចទ័រនៅចំថ្ងៃប្រទេសថៃប្រារព្ធពិធីបុណ្យចូលឆ្នាំទូទាំងប្រទេស។

ខាងក្រោមនេះ គឺជារូបភាពផ្ដាមចេញពីមួយផ្នែកនៃសេចក្ដីរាយការណ៍ព័ត៌មានរបស់សារព័ត៌មានថៃ The Nation ដែលបង្ហាញថា ស្រុកព្រៅ នៃខេត្តឈៀងម៉ៃ បានរងការរញ្ជួយដីកម្រិត ១.៤រ៉ិចទ័រ នៅវេលាម៉ោង ១២.០៤ព្រឹកឈានចូលថ្ងៃទី១៤ ខែមេសា ឆ្នាំ២០២៥។

The Nation’s Report | Archived Link

ចំណែកឯវីដេអូដែលបង្ហាញប្រជាពលរដ្ឋរត់ចែកជើងគ្នានោះ បានកើតឡើងនៅខេត្តសុងក្លា ស្ថិតនៅភាគខាងត្បូងនៃប្រទេសថៃ ពោលគឺស្ថិតចម្ងាយជិត ១,៧០០គីឡូម៉ែត្រពីខេត្តឈៀងម៉ៃ។

រូបភាពខាងក្រោម បង្ហាញខេត្តសុងក្លាស្ថិតនៅភាគខាងត្បូងមានចម្ងាយដល់ទៅ ១,៦៨៧គីឡូម៉ែត្រពីខេត្តឈៀងម៉ៃ ដែលស្ថិតនៅភាគខាងជើងជាប់នឹងប្រទេសភូមា។

ប្រទេសថៃបានរងការវាយប្រហារពីរញ្ជួយដីមានកម្លាំង ៧.៧រ៉ិចទ័រ ដែលកើតឡើងនៅក្នុងប្រទេសភូមាកាលពីចុងខែមីនាកន្លងមកនេះ បានសម្លាប់់មនុស្សយ៉ាងតិច ១៧នាក់ និងបាត់ខ្លួនជាច្រើននាក់ នេះបើតាមសេចក្ដីរាយការណ៍របស់សារព័ត៌មាន Bangkok Post កាលពីថ្ងៃទី៣០ ខែមីនាកន្លងមក។

បើតាមសេចក្ដីរាយការណ៍មួយទៀតរបស់សារព័ត៌មាន The Nation ខេត្តឈៀងម៉ៃ និងឈៀងរ៉ៃរបស់ថៃ ក៏រងររំញ័រនៃរញ្ជួយដីកម្រិតស្រាលចំនួន ១២លើកនៅក្នុងប្រទេសភូមា ដែលត្រូវបានគេកត់ត្រាកាលពីថ្ងៃទី១៧ ខែមេសា ឆ្នាំ២០២៥។

Follow Us and Stay Up to Date with Our Latest Fact-Checks

សន្និដ្ឋាន

Fact Crescendo រកឃើញថា ការអះអាងដូចដែលត្រូវបានរៀបរាប់ខាងលើនេះ មិនត្រឹមត្រូវនោះឡើយ។ វីដេអូដែលបង្ហាញប្រជាពលរដ្ឋថៃរត់ប្រសេចប្រសាចនៅតាមដងផ្លូវអំឡុងពេលប្រារព្ធពិធីបុណ្យចូលឆ្នាំនោះ មិនពាក់ព័ន្ធនឹងរញ្ជួយដីនោះឡើយ។ វីដេអូនេះ បង្ហាញប្រជាជនថៃរត់ចែកជើងគ្នា ក្រោយពីពួកគេបានលឺជម្លោះពាក្យសម្ដីរវាងក្រុមយុវជន ដែលបានកើតឡើងនៅតំបន់៨ នៃខេត្តសុងក្លា ភាគខាងត្បូងប្រទេសថៃ។

Title:ការអះអាងមិនត្រឹមត្រូវថា ជនជាតិថៃរត់ចែកជើងគ្នាដោយសាររញ្ជួយដីថ្មីកើតចំថ្ងៃចូលឆ្នាំថ្មី

Written By: Jay Udom

Result: False