ខណៈដែលវៀតណាមនៅតែជាប្រធានបទក្ដៅសម្រាប់ការជជែកនោះ ការអះអាងដ៏ផុសផុលមួយកាលពីដើមខែនេះ បាននិយាយថា ព្រះសង្ឃខ្មែរកម្ពុជាក្រោមមួយអង្គ បានសុគតដោយសារការធ្វើទុក្ខបុកម្នេញពីសំណាក់អាជ្ញាធរវៀតណាម។ ការអះអាងនេះ ត្រូវបានចែករំលែកបន្តយ៉ាងផុសផុល ហើយទទួលបានការប្រតិកម្មពីអ្នកប្រើប្រាស់បណ្ដាញសង្គមនិយាយភាសាខ្មែរផងដែរ។ ទោះជាយ៉ាងណា ការត្រួតពិនិត្យរបស់យើង បានរកឃើញថា ការអះអាងនេះ មិនត្រឹមត្រូវនោះឡើយ។
ការអះអាងលើបណ្ដាញសង្គម
កាលពីដើមខែវិច្ឆិកានេះ គណនីហ្វេសប៊ុកមួយបានបង្ហោះរូបថតព្រះសង្ឃមួយអង្គស្ថិតក្នុងស្ថានភាពអាការៈមានទុក្ខ ឬជំងឺ ហើយអះអាងថា ព្រះសង្ឃខ្មែរកម្ពុជាអង្គនេះបានសុគតដោយសារតែវៀតណាមបានវាយធ្វើបាន ឬដាក់ថ្នាំបំពុលក្នុងម្ហូបអាហារ។
ការអះអាងនេះ ត្រូវបានចែករំលែកបន្តយ៉ាងផុសផុលពីសំណាក់អ្នកប្រើប្រាស់បណ្ដាញសង្គមហ្វេសប៊ុក ហើយក៏មានអ្នកប្រើប្រាស់បណ្ដាញសង្គមជាច្រើនទៀត បានបញ្ចេញប្រតិកម្ម និងមតិចម្រុះបែបផងដែរទៅនឹងការអះអាងមួយនេះ។
ខាងក្រោមនេះគឺជារូបភាពផ្ដាមចេញពីការអះអាងនៅលើបណ្ដាញសង្គមកាលពីថ្ងៃទី០១ ខែវិច្ឆិកា ឆ្នាំ២០២២ ដែលរៀបរាប់ថា «ព្រះសង្ឃស្នេហាជាតិខ្មែរក្រោមសុគត ដោយសារចោរយួនវាយធ្វើបាប? ឬដាក់ថ្នាំពុលក្នុងទឹក-អាហារ សូមប្រយ័ត្ន(ចោរយួន)»។
ក្រោយមក អ្នកប្រើប្រាស់បណ្ដាញសង្គមដែលបង្ហោះការអះអាងខាងលើនេះ បានកែប្រែសំណេររបស់ខ្លួន ដោយលុបចោលពាក្យ«យួន»ចេញទៅវិញ។
ខាងក្រោមនេះ គឺជារូបភាពផ្ដាមចេញពីការអះអាងខាងលើ បន្ទាប់ពីត្រូវបានកែប្រែសំណេរដែលរៀបរាប់ថា «ព្រះសង្ឃស្នេហារជាតិខ្មែរក្រោមសុគត ដោយសារតែចោរវាយធ្វើបាប ឬដាក់ថ្នាំពុលក្នុងទឹក-អាហារ សូមប្រយ័ត្ន»។
ខាងក្រោមនេះ គឺជារូបភាពផ្ដាមចេញពីទំព័រហ្វេបស៊ុកមួយទៀត ដែលបានបង្ហោះការអះអាងដដែលនេះកាលពីថ្ងៃទី០២ ខែវិច្ឆិកា ឆ្នាំ២០២២កន្លងមកនេះ។
ការត្រួតពិនិត្យការពិត
Fact Crescendo Cambodia បានត្រួតពិនិត្យ និងផ្ទៀងផ្ទាត់ទៅលើការអះអាងខាងលើនេះតាមរយៈសម្ភាសជាមួយប្រភពដែលបានដឹងពីការសុគតរបស់ព្រះសង្ឃខ្មែរកម្ពុជាមួយអង្គនេះ ដែលនាំឱ្យយើងរកឃើញការពិតដូចខាងក្រោមនេះ។
តាមរយៈការត្រួតពិនិត្យទៅលើមតិយោបល់ដែលប្រតិកម្មទៅនឹងការអះអាងខាងលើនេះ Fact Crescendo Cambodia បានរកឃើញមនុស្សមួយចំនួន ដែលអាចបញ្ជាក់ប្រាប់ពីរឿងរ៉ាវនៃការសុគតរបស់ព្រះសង្ឃខ្មែរកម្ពុជាអង្គនេះ។
ក្នុងចំណោមនោះ គណនីហ្វេសប៊ុកមួយឈ្មោះ Thạch Khemara បានបញ្ចេញមតិតបនឹងការអះអាងខាងលើ ដោយបញ្ជាក់ថា ព្រះសង្ឃដែលបានសុគតនោះ ជាប្អូនប្រុសរបស់លោក ហើយថា ការអះអាងនេះ មិនត្រឹមត្រូវនោះឡើយ។
គណនីហ្វេសប៊ុកដដែលនេះ ក៏បានស្នើទៅអ្នកបង្ហោះការអះអាងនេះឱ្យលុបចោលទៅវិញ ដោយថា ការបង្ហោះការអះអាងនេះ ប៉ះពាល់ដល់ផ្លូវចិត្តរបស់ក្រុមគ្រួសារលោក។
គណនីហ្វេសប៊ុកដដែលនេះ ក៏បានបង្ហោះសារកាន់ទុក្ខនៅលើបណ្ដាញសង្គមផ្ទាល់ខ្លួនផងដែរកាលពីថ្ងៃទី៣១ ខែតុលា ដោយបួងសួងវិញ្ញាណក្ខន្ធប្អូនប្រុសរបស់លោកបានដល់ទីស្ងប់សុខ។
នៅពេល Fact Crescendo Cambodia សាកសួរបន្ថែម លោក ថាច់ ខេមរា អាយុ ២៧ឆ្នាំ បានប្រាប់ឱ្យដឹងថា ព្រះភិក្ខុ ថាច់ ណាស៊ី គឺជាប្អូនប្រុសបង្កើតរបស់លោកនៅក្នុងចំណោមបងប្អូនសរុប ៤នាក់ ដែលរស់នៅក្នុងខេត្តព្រះត្រពាំង ឬវៀតណាមហៅថា ខេត្តតាវិញ។
លោក ថាច់ ខេមរា ដែលជាប្រជាជនវៀតណាមដើមកំណើតខ្មែរនៅក្នុងខេត្តព្រះត្រពាំង បានឱ្យដឹងទៀតថា ព្រះភិក្ខុ ថាច់ ណាស៊ី បានក្អកធ្លាក់ឈាមតាមមាត់អំឡុងពេលកំពុងរៀនសូត្រនៅឯវត្តបរមនិម្មិត្តវាលលាក់ ហើយត្រូវបានបញ្ជូនទៅសង្គ្រោះនៅឯមន្ទីរពេទ្យស្ថិតនៅក្នុងខេត្តព្រះត្រពាំង ឬវៀតណាមហៅខេត្តត្រាវិញ ប៉ុន្តែ ពុំអាចជួយសង្គ្រោះបាន។
ពលរដ្ឋវៀតណាមដើមកំណើតខ្មែរកម្ពុជាក្រោមរូបនេះ បានឱ្យដឹងបន្ថែមថា ប្អូនប្រុសរបស់លោកមានជំងឺប្រចាំកាយតាំងតូច ហើយមានជំងឺពោះវៀនកម្រិតធ្ងន់ ដែលព្រះភិក្ខុអង្គនេះមិនបានដឹងនោះឡើយ។
លោក ខេមរា អះអាងថា លោកស្ថិតនៅឯមន្ទីរពេទ្យជាមួយប្អូនប្រុសលោក ដែលត្រូវបានបញ្ជូនទៅសង្គ្រោះនៅទីនោះ ហើយគ្រូពេទ្យបានប្រាប់ថា ប្អូនប្រុសលោកមានជំងឺពោះវៀនធ្ងន់ធ្ងរ ហើយគាំងបេះដូង ដែលមិនអាចជួយសង្គ្រោះបាននោះឡើយ។
ទាក់ទងការអះអាងនៅលើបណ្ដាញសង្គមអំពីមូលហេតុនៃការសុគតរបស់ប្អូនប្រុសលោក លោក ថាច់ ខេមរា បានច្រានចោលនូវការអះអាងនេះ ហើយនិយាយថា ប្អូនប្រុសរបស់លោកមិនទទួលរងការធ្វើទុក្ខបុកម្នេញពីសំណាក់អាជ្ញាធរវៀតណាម។
លោក ខេមរា បានឱ្យដឹងទៀតថា ការអះអាងដោយមិនត្រឹមត្រូវបាននេះ បានបង្កក្ដីកង្វល់សម្រាប់គ្រួសាររបស់លោក និងសហគមន៍ខ្មែរកម្ពុជានៅវត្តបរមនិម្មិត្តវាលលាក់ផងដែរ បន្ទាប់ពីមានការសួរនាំពីខាងអាជ្ញាធរវៀតណាម។
សូមស្ដាប់សម្ដីដើមទាំងស្រុងរបស់លោក ថាច់ ខេមរា ដែលបានឆ្លើយតបនឹងការសាកសួររបស់អ្នកសារព័ត៌មានត្រួតពិនិត្យការពិតនៃសារព័ត៌មាន Fact Crescendo Cambodia តាមរយៈតំណភ្ជាប់នៅទីនេះ។
ក្រៅពីលោក ថាច់ ខេមរា ដែលជាបងប្រុសបង្កើតរបស់ព្រះភិក្ខុ ថាច់ ណាស៊ី គណនីហ្វេសប៊ុកមួយមួយទៀតឈ្មោះ ថាច់ សុផាត ដែលតាំងព្រះឆាយាល័ក្ខណ៍ជាព្រះសង្ឃនោះ ក៏បានបញ្ចេញមតិប្រតិកម្មទៅនឹងការអះអាងនេះផងដែរ ដោយបានទាមទារទៅអ្នកបង្ហោះការអះអាងនេះ ឱ្យកែប្រែសំណេររបស់ខ្លួនវិញ។
អ្នកប្រើប្រាស់បណ្ដាញសង្គម ព្រះតេជគុណ ថាច់ សុផាត បានប្រាប់ Fact Crescendo Cambodia ឱ្យដឹងបន្ថែមថា ព្រះភិក្ខុ ថាច់ ណាស៊ី ជាព្រះសង្ឃគង់នៅរៀនសូត្រជាមួយព្រះអង្គ ហើយបានធ្លាក់ខ្លួនឈឺភ្លាមៗអំឡុងពេលរៀនសូត្រ។
ព្រះតេជគុណ ថាច់ សុផាត ក៏បានច្រានចោលការអះអាងខាងលើដែរ ដោយបញ្ជាក់ថា ព្រះភិក្ខុ ថាច់ ណាស៊ី បានសុគតដោយសារជំងឺ មិនមែនបណ្ដាលមកពីការបំពុលនៅក្នុងទឹក ឬម្ហូបអាហារពីសំណាក់អាជ្ញាធរវៀតណាមនោះឡើយ។
សូមស្ដាប់សម្ដីទាំងស្រុងរបស់ព្រះតេជគុណ ថាច់ សុផាត ដែលបានបកស្រាយប្រាប់អ្នកត្រួតពិនិត្យការពិតនៃសារព័ត៌មាន Fact Crescendo Cambodia ជុំវិញការសុគតរបស់ព្រះភិក្ខុ ថាច់ ណាស៊ី តាមរយៈតំណភ្ជាប់នៅទីនេះ។
តាមរយៈគណនីហ្វេសប៊ុករបស់ព្រះតេជគុណ ថាច់ សុផាត យើងបានរកឃើញការចែករំលែកព័ត៌មានអំពីការសុគតរបស់ព្រះភិក្ខុ ថាច់ ណាស៊ី ពីសំណាក់គណនីហ្វេសប៊ុករបស់ព្រះសង្ឃមួយអង្គទៀតព្រះនាម Nhan Thach។
សំណេររបស់ព្រះតេជគុណ Nhan Thach នៅលើគណនីហ្វេសប៊ុករបស់ព្រះអង្គ បានឱ្យដឹងថា ព្រះភិក្ខុ ថាច់ ណាស៊ី មានអការៈក្អក ហើយហូរឈាមតាមច្រមុះ និងមាត់អំឡុងពេលកំពុងសិក្សារៀនសូត្រ។
សំណេរដដែលនេះ រៀបរាប់បន្តថា ព្រះភិក្ខុ ថាច់ ណាស៊ី ត្រូវបានគ្រូៗបញ្ជូនទៅសង្គ្រោះនៅមន្ទីរពេទ្យស្រុក និងក្រុង ប៉ុន្តែ ព្រះអង្គបានសុគតនៅម៉ោង ៣រសៀលថ្ងៃទី៣១ ខែតុលា ក្នុងព្រះជន្ម ២៤ព្រះវស្សា។
សន្និដ្ឋាន Fact Crescendo Cambodia បានរកឃើញថា ការអះអាងដូចដែលត្រូវបានរៀបរាប់ខាងលើនេះ មិនត្រឹមត្រូវនោះឡើយ។ ព្រះសង្ឃខ្មែរកម្ពុជា ព្រះភិក្ខុ ថាច់ ណាស៊ី មិនមែនសុគតដោយសារការបំពុលពីសំណាក់ជនជាតិវៀតណាម ឬអាជ្ញាធរវៀតណាមនោះឡើយ។ សមាជិកគ្រួសារ និងព្រះសង្ឃគង់សិក្សារៀនសូត្រជាមួយគ្នា បានអះអាងថា ព្រះអង្គសុគតដោយសារតែជំងឺបៀតបៀនរាងកាយ។
Title:តើព្រះសង្ឃខ្មែរក្រោម ថាច់ ណាស៊ី សុគតដោយសារមូលហេតុអ្វី?
Fact Check By: Jay UdomResult: Misleading
