- >>
- Political
រូបថតបង្ហាញទិដ្ឋភាពលោកនាយករដ្ឋមន្ត្រី ហ៊ុន សែន អង្គុយទិញបន្លែ ជារូបថតកាត់ត
លោកនាយករដ្ឋមន្ត្រី ហ៊ុន សែន កំពុងកាន់អំណាចអស់រយៈពេលជិត ៤០ឆ្នាំហើយ ដែលធ្វើឱ្យគាត់ក្លាយទៅជាមុខព្រួញនៃការរិះគន់ និងពាក្យចរចាមអារ៉ាមផ្សេងៗ។ ក្នុងចំណោមនោះ រូបថតមួយសន្លឹក បង្ហាញទិដ្ឋភាពនាយករដ្ឋមន្ត្រីកម្ពុជាលោក ហ៊ុន សែន អង្គុយទិញបន្លែពីស្រ្តីម្នាក់ ត្រូវបានបង្ហោះដោយអ្នកប្រើប្រាស់បណ្ដាញសង្គម។ រូបថតនេះ ត្រូវបានភ្ជាប់ជាមួយនឹងការសរសេរថា លោក ហ៊ុន សែន ពុំបានអង្គុយទិញបន្លែនោះឡើយ តែកំពុងតែសម្លឹងមើលអ្វីផ្សេង។ ការបង្ហោះបែបនេះ ទទួលបានការចែកចាយ និងមតិប្រតិកម្មចម្រុះពីសំណាក់អ្នកប្រើប្រាស់បណ្ដាញសង្គមហ្វេសប៊ុកនាពេលថ្មីៗនេះ។
ទោះជាយ៉ាងណា ការត្រួតពិនិត្យការពិតរបស់ Fact Crescendo Cambodia បានរកឃើញថា រូបថតបង្ហោះដោយអ្នកប្រើប្រាស់ខាងលើនោះ គឺមិនត្រឹមត្រូវនោះឡើយ។
ការអះអាងលើបណ្តាញសង្គម
កាលពីថ្ងៃទី២០ ខែវិចិ្ឆកា ឆ្នាំ២០២២កន្លងទៅថ្មីៗនេះ អ្នកប្រើប្រាស់ហ្វេសប៊ុកម្នាក់ បង្ហោះរូបមួយសន្លឹក បង្ហាញទិដ្ឋភាពលោក ហ៊ុន សែន ក្នុងឈុតសម្លៀកបំពាក់ខ្មៅ អង្គុយទិញបន្លែពីស្ត្រី ដែលអ្នកប្រើប្រាស់បានអះអាងថា ជាស្ត្រីជនជាតិវៀតណាមម្នាក់។ រូបថតបង្ហោះខាងលើនេះ ត្រូវបានអ្នកប្រើប្រាស់បណ្ដាញសង្គមចែករំលែកជាច្រើនដង រួមជាមួយការបញ្ចេញមតិ និងប្រតិកម្មចម្រុះបែបផងដែរ។
ខាងក្រោមនេះ គឺជារូបភាពផ្ដាមចេញពីប៉ុស្តិ៍របស់អ្នកប្រើប្រាស់ខាងលើ ដែលបានសរសេររៀបរាប់ថា «តាសែនគាត់មិនបានទិញបន្លែស្រីយួនទេ គាត់សម្លឹងមើលស្រីយួន»។
ការត្រួតពិនិត្យការពិត
Fact Crescendo Cambodia ចាប់ផ្ដើមត្រួតពិនិត្យទៅលើរូបថត និងការអះអាងខាងលើនេះតាមរយៈ Google Reverse Image Search ដែលនាំឱ្យយើងរកឃើញការពិតដូចខាងក្រោមនេះ។
រូបថតដែលមានទម្រង់ និងសណ្ឋានដូចគ្នានេះ ត្រូវបានរកឃើញ និងបង្ហោះនៅលើគណនី Instagram ផ្ទាល់ខ្លួនរបស់តារាហ្វីលីពីនលោកស្រី Sharon Cuneta កាលពីថ្ងៃទី០៩ ខែកញ្ញា ឆ្នាំ២០១៧កន្លងទៅនេះ។ រូបថតនេះ ពុំបានបង្ហាញទិដ្ឋភាពលោកនាយករដ្ឋមន្ត្រី ហ៊ុន សែន បានអង្គុយទិញបន្លែពីស្ត្រីម្នាក់នោះឡើយ។ ខាងក្រោមនេះ គឺជារូបភាពផ្ដាមចេញពីប៉ុស្តិ៍ខាងលើ ដែលបានសរសេរជាភាសាហ្វីលីពីន ឬប្រែសម្រួលជាភាសាខ្មែរ តាមរយៈកម្មវិធី Google Translate ដោយមានន័យថា «តើក្មេងនេះនៅឯណា?!!! ខ្ញុំចង់ទិញបន្លែរបស់គាត់រាល់ថ្ងៃ ឬមានអ្នកណាជួយទិញ ទើបគាត់បានទៅរៀន»។
ដូចគ្នានេះ ច្បាប់ដើមនៃរូបថតបង្ហោះខាងលើ ក៏ត្រូវបានបង្ហោះ និងផ្សព្វផ្សាយផងដែរ នៅលើគេហទំព័រដទៃផ្សេងទៀត ដូចជាគេហទំព័រ LionhearTV និង Eva ក្នុងអំឡុងឆ្នាំ២០១៧កន្លងទៅនេះ។ ខាងក្រោមនេះ គឺជាការប្រៀបធៀបគ្នាមួយ រវាងរូបថតដែលត្រូវបានកាត់ត និងរូបថតច្បាប់ដើមដែលត្រូវបានរកឃើញផ្សព្វផ្សាយនៅលើបណ្តាញសង្គម។
ដើម្បីស្វែងរកព័ត៌មានពិត សូមតាមដានការផ្សាយរបស់យើងតាមរយៈប្រព័ន្ធដូចខាងក្រោម៖
Facebook Twitter Telegram Google News TikTok
សន្និដ្ឋាន
Fact Crescendo Cambodia រកឃើញថារូបថត និងការលើកឡើងដោយអ្នកប្រើប្រាស់ហ្វេសប៊ុកខាងលើនោះ គឺពិតជាមិនត្រឹមត្រូវនោះឡើយ។ ច្បាប់ដើមនៃរូបថតនេះ គឺជាទិដ្ឋភាពក្មេងប្រុសម្នាក់ អង្គុយច្រត់ដៃសម្រាក អំឡុងពេលលក់បន្លែនៅដងផ្លូវមួយកន្លែង ដោយពុំបានបង្ហាញទិដ្ឋភាពលោកនាយករដ្ឋមន្ត្រី ហ៊ុន សែន បានអង្គុយទិញបន្លែពីស្ត្រីម្នាក់នោះឡើយ។
Title:រូបថតបង្ហាញទិដ្ឋភាពលោកនាយករដ្ឋមន្ត្រី ហ៊ុន សែន អង្គុយទិញបន្លែ ជារូបថតកាត់ត
Fact Check By: Kakada SimResult: Satire
