តារាភាពយន្តអាមេរិកដ៏ល្បីល្បាញ Arnold Schwarzenegger សម្ដែងធ្វើជាជនអនាថាដេកតាមផ្លូវ
កាលពីចុងខែមករាកន្លងមកនេះ រូបថតមួយសន្លឹករបស់តារាសម្ដែងភាពយន្តដ៏ល្បីរបស់អាមេរិក លោក Arnold Schwarzenegger គេងនៅមុខរូបចម្លាក់របស់លោក ត្រូវបានគេបង្ហោះនៅលើបណ្ដាញសង្គមជាមួយសំណេររៀបរាប់ថា អតីតអភិបាលរដ្ឋកាលីហ្វ័រញ៉ារូបនេះ សម្រេចចិត្តគេងបែបនេះ បន្ទាប់ពីបុគ្គលិកសណ្ឋាគារមួយបដិសេធផ្ដល់បន្ទប់ពិសេសដល់រូបលោក ដែលម្ចាស់សណ្ឋាគារនោះធ្លាប់សន្យាផ្ដល់ឱ្យលោកស្នាក់នៅដោយឥតគិតថ្លៃ។ ទោះជាយ៉ាងណា យើងរកឃើញថា ការអះអាងនេះមិនត្រឹមត្រូវនោះឡើយ។
ការអះអាងលើបណ្ដាញសង្គម
អតីតមន្ត្រីក្រសួងព័ត៌មាន លោក ខៀវ កាញ៉ារីទ្ធ បានបង្ហោះរូបថតតារាភាពយន្តអាមេរិក លោក Arnold Schwarzenegger នៅលើបណ្ដាញសង្គមហ្វេសប៊ុកកាលពីខែមករាកន្លងមកនេះ ដោយសរសេររៀបរាប់ថា តារាភាពយន្តរូបនេះ បានគេងនៅមុខរូបចម្លាក់របស់លោក។
សំណេររបស់លោកបន្តថា អតីតអភិបាលរដ្ឋកាលីហ្វ័រញ៉ារូបនេះ បានសម្រេចគេងនៅចិញ្ចើមថ្នល់ក្បែររូបសំណាក់ទង់ដែងរបស់លោក បន្ទាប់ពីបុគ្គលិកសណ្ឋាគារដែលធ្លាប់សន្យាផ្ដល់បន្ទប់ឱ្យលោកស្នាក់នៅដោយឥតគិតថ្លៃនោះ បានបដិសេធរូបលោក។
រូបថត និងសំណេរបែបនេះ ត្រូវបានចែករំលែកបន្តយ៉ាងច្រើនរហូតដល់ជាង ៧ពាន់ដង ហើយមានអ្នកប្រើប្រាស់ហ្វេសប៊ុកនិយាយភាសាខ្មែរជាច្រើន បានបញ្ចេញប្រតិកម្ម និងមតិយោបល់ទៅនឹងសារមួយនេះ។
ខាងក្រោមនេះ គឺជារូបភាពផ្ដាមចេញពីការបង្ហោះនៅលើបណ្ដាញសង្គមរបស់លោក ខៀវ កាញ៉ារីទ្ធ កាលពីថ្ងៃទី២៦ ខែមករា ឆ្នាំ២០២៤។
ព័ត៌មាននេះ ក៏ត្រូវបានចុះផ្សាយដោយសារព័ត៌មានក្នុងស្រុកមួយផងដែរកាលពីចុងខែមករាកន្លងមកនេះ ប៉ុន្មានម៉ោងក្រោយពីលោក ខៀវ កាញ៉ារីទ្ធ បានបង្ហោះនៅលើបណ្ដាញសង្គមរបស់លោក។
ខាងក្រោមនេះ គឺជារូបភាពផ្ដាមចេញពីអត្ថបទព័ត៌មានមានចំណងជើងថា “មូលហេតុនៅពីក្រោយតារាភាពយន្តដ៏ល្បី លោក Arnold គេងនៅចិញ្ចើមថ្នល់” ចុះផ្សាយដោយសារព័ត៌មានត្នោ (TNAOT) កាលពីរសៀលថ្ងៃទី២៦ ខែមករា ឆ្នាំ២០២៤។
ការត្រួតពិនិត្យការពិត
Fact Crescendo Cambodia បានចាប់ផ្ដើមត្រួតពិនិត្យ និងផ្ទៀងផ្ទាត់ទៅលើរូបថតខាងលើតាមរយៈការដំណើរការ Google Reverse Image Search ដែលនាំឱ្យយើងរកឃើញការពិតដូចខាងក្រោមនេះ។
តាមរយៈការដំណើរការ Google Reverse Image Search យើងបានរកឃើញនូវអត្ថបទត្រួតពិនិត្យព័ត៌មានក្លែងក្លាយដែលត្រូវបានផ្ទៀងផ្ទាត់ដោយក្រុមការងារ Fact Crescendo នៅឯប្រទេសស្រីលង្កា។
ក្រុមផ្ទៀងផ្ទាត់ការពិត Fact Crescendo នៅស្រីលង្កា បានឱ្យដឹងថា តារាភាពយន្តហូលីវូដ លោក Arnold បានបង្ហោះរូបថតមួយសន្លឹកនេះនៅលើបណ្ដាញសង្គមផ្ទាល់ខ្លួនកាលពីខែមករា ឆ្នាំ២០១៦កន្លងមក ដែលប្រហែលជានិយាយលេងសើចតែប៉ុណ្ណោះ។
ដោយស្រាវជ្រាវព័ត៌មានអំពីរូបចម្លាក់មួយនេះ គេបានដឹងថា រូបចម្លាក់មួយនេះ ដំបូងឡើយ ត្រូវបានគេតម្កល់នៅខាងក្រៅវិមានអនុស្សាវរីយ៍ Franklin County Veteran Memorial នៅក្នុងឆ្នាំ២០១២ ប៉ុន្តែ ត្រូវបានគេប្ដូរយកទៅតម្កល់នៅទីតាំងបច្ចុប្បន្ននេះ ដែលស្ថិតនៅខាងក្រៅមជ្ឈមណ្ឌលសន្និបាត Greater Columbus Convention Center កាលពីឆ្នាំ២០១៤។
ដោយពិនិត្យមើលទីតាំងថ្មីនៃរូបចម្លាក់នេះ គេបានរកឃើញថា គ្មានសណ្ឋាគារណាមួយស្ថិតនៅទល់មុខនឹងរូបចម្លាក់នេះដូចដែលការអះអាងនៅលើបណ្ដាញសង្គមនោះឡើយ។
រូបថតរបស់តារាភាពយន្តរូបនេះ ក៏ត្រូវបានចុះផ្សាយនៅក្នុងអត្ថបទព័ត៌មានមួយរបស់សារព័ត៌មានអង់គ្លេស Daily Mail ដោយរៀបរាប់ថា លោក Arnold សម្ដែងធ្វើជាមនុស្សគ្មានទីជម្រកផ្ទះសម្បែង គេងនៅក្បែរខឿនរូបចម្លាក់របស់លោកនៅរដ្ឋ Ohio។
បន្ថែមពីលើនេះ អត្ថបទព័ត៌មានរបស់ទីភ្នាក់ងារព័ត៌មាន Armen Press បានឱ្យដឹងថា តារាសម្ដែងភាពយន្តរូបនេះ បានថតរូបមួយសន្លឹកនេះអំឡុងពេលលោកចុះថតឈុតមួយនៃភាពយន្តរឿង “Aftermath”កាលពីឆ្នាំ២០១៦។
សូមអានអត្ថបទទាំងស្រុងរបស់ Fact Crescendo Sri Lanka ដែលបានផ្ទៀងផ្ទាត់លើព័ត៌មានរូបថតនេះកាលពីឆ្នាំ២០២០កន្លងមក ហើយចុះផ្សាយនៅក្នុងអត្ថបទមួយនៅទីនេះ។
ក្រៅពីស្ថាប័ន Fact Crescendo Sri Lanka ស្ថាប័នត្រួតពិនិត្យព័ត៌មានក្លែងក្លាយ FACTLY ក៏បានផ្ទៀងផ្ទាត់ទៅលើរូបថតនេះផងដែរ ហើយរកឃើញថា ព័ត៌មានដែលបង្ហោះជាមួយរូបថតនេះ មិនត្រឹមត្រូវនោះឡើយ។
សន្និដ្ឋានFact Crescendo Cambodia
បានរកឃើញថា ការអះអាងដូចដែលត្រូវបានរៀបរាប់ខាងលើនេះ មិនត្រឹមត្រូវនោះឡើយ។ តារាភាពយន្តហូលីវូដ លោក Arnold Schwarzenegger គ្រាន់តែសម្ដែងធ្វើជាជនអនាថាគេងតាមចិញ្ចើមផ្លូវនៅក្បែរជើងតម្កល់រូបចម្លាក់លោកតែប៉ុណ្ណោះ។
Title:តារាភាពយន្តអាមេរិក Arnold Schwarzenegger សម្ដែងធ្វើជាជនអនាថាដេកតាមផ្លូវ
Written By: Jay UdomResult: Misleading
