ស្របពេលដែលទេសចរណ៍អំណានរបស់លោក អ៊ុក វណ្ណដេ បានធ្វើដំណើរទៅដល់ខេត្តកំពតនោះ រូបថតសខ្មៅមួយសន្លឹកដែលបង្ហាញបណ្ណាល័យចល័តមួយ ត្រូវបានបង្ហោះឡើងនៅលើបណ្ដាញសង្គមជាមួយនឹងការអះអាងវារូបថតនៅខេត្តកំពតក្នុងឆ្នាំ១៩២៣។ ការបង្ហោះខាងលើ ត្រូវបានចែកចាយ និងបញ្ចេញមតិជាច្រើនដងពីសំណាក់អ្នកប្រើប្រាស់បណ្ដាញសង្គមនានា។ ទោះជាយ៉ាងណា ការត្រួតពិនិត្យការពិតរបស់ Fact Crescendo Cambodia រកឃើញថា ការអះអាងខាងលើនោះ គឺមិនត្រឹមត្រូវនោះឡើយ។
ការអះអាងលើបណ្ដាញសង្គម
កាលពីថ្ងៃទី២៩ ខែឧសភា ឆ្នាំ២០២៤កន្លងទៅនេះ អ្នកប្រើប្រាស់ហ្វេសប៊ុកម្នាក់ បានបង្ហោះរូបថតមួយសន្លឹក ដែលមានទម្រង់ជាការប្រៀបធៀប ទិដ្ឋភាពនៃបណ្ណាល័យចល័ត រវាងឆ្នាំ១៩២៣ និងឆ្នាំ២០២៤នៅក្នុងភូមិសាស្រ្តខេត្តកំពត ប្រទេសកម្ពុជា។
ការបង្ហោះខាងលើនេះ ត្រូវបានចែកចាយតៗគ្នាជាច្រើនដង រួមជាមួយនឹងប្រតិកម្ម និងការបញ្ចេញមតិចម្រុះពីសំណាក់អ្នកប្រើប្រាស់សង្គមហ្វេសប៊ុកយ៉ាងផុសផុល។
ខាងក្រោមនេះ គឺជារូបភាពផ្ដាមចេញពីប៉ុស្តិ៍របស់អ្នកប្រើប្រាស់ខាងលើ ដែលបានសរសេររៀបរាប់ថា «ទេសចរណ៍អំណានលើកកម្ពស់ចំណេះដឹង និងកិត្យានុភាពជាតិយើង សូមចូលរួមគាំទ្រទាំងអស់គ្នាបងប្អូន»។
ដូចគ្នានេះ រូបថតមួយសន្លឹកដែលបង្ហាញនូវទិដ្ឋភាពដូចគ្នានេះ ក៏ត្រូវបានរកឃើញ និងបង្ហោះដោយអ្នកប្រើប្រាស់បណ្ដាញសង្គមហ្វេសប៊ុក ដទៃទៀតផងដែរ។
ការត្រួតពិនិត្យការពិត
Fact Crescendo Cambodia បានត្រួតពិនិត្យ និងផ្ទៀងផ្ទាត់ទៅលើរូបភាពទាំងនេះតាមរយៈការដំណើរការ Google Reverse Image Search ដែលនាំឱ្យយើងរកឃើញការពិតដូចខាងក្រោមនេះ។
រូបថតដើមចំនួន៤សន្លឹក ដែលមានទម្រង់ និងសណ្ឋានដូចគ្នាទាំងស្រុងនេះ ត្រូវបានបង្ហោះកាលពីថ្ងៃទី២៧ ខែឧសភា កន្លងទៅ នៅលើទំព័រហ្វេសប៊ុក «ពនេចរ» ដោយបានសរសេរថា ស្ពានឥន្ធនូឆ្នាំ១៩២៣។
ទំព័រហ្វេសប៊ុកដដែលខាងលើនេះ បានបញ្ជាក់នៅក្នុងសំណេររបស់ខ្លួនថា លោកបានកែសម្រួលពណ៌រូបថតទៅសខ្មៅ ដើម្បីឱ្យមើលទៅសមនឹងស្ពានបុរាណ ដែលត្រូវបានថតជាប់ទិដ្ឋភាពស្ពានក្រុងកំពតផងដែរ។
ខាងក្រោមនេះ គឺជារូបភាពផ្ដាមចេញពីការបញ្ជាក់របស់អ្នកប្រើប្រាស់ហ្វេសប៊ុកដែលបានបង្ហោះរូបថតនេះដំបូងគេ ដោយបញ្ជាក់ថា លោកគ្រាន់តែកែពណ៌រូបថតទៅសខ្មៅតែប៉ុណ្ណោះ។
ដោយសារតែមានការយល់ច្រឡំកាន់តែកើនឡើង ទំព័រហ្វសប៊ុកខាងលើ ដែលជាអ្នកបង្ហោះដើមនោះ ក៏បានចេញវីដេអូឃ្លីបបកស្រាយ និងបញ្ជាក់ផងដែរ ថារូបថតទាំងនោះ គឺជារូបថតរបស់លោកផ្ទាល់ ហើយឆ្នាំ១៩២៣នោះ គឺលោកសំដៅទៅលើស្ពានឥន្ធនូ ដែលមានទីតាំងនៅខេត្តកំពតតែប៉ុណ្ណោះ។
លោកអ្នក អាចស្វែងរក និងមើលវីដេអូទាំងស្រុងបាន នៅខាងក្រោមនេះ។
ព័ត៌មានទាក់ទងទៅនឹងការធ្វើដំណើរទៅកាន់ទៅខេត្តកំពត របស់បណ្ណាល័យចល័ត ឬទេសចរណ៍អំណាន ក៏ត្រូវបានផ្សព្វផ្សាយផងដែរ នៅលើគេហទំព័រសារព័ត៌មានថ្មីៗ។
Thmey Thmey News Report | Archived Link
ខាងក្រោមនេះ គឺជាវីដេអូឃ្លីបនៃការសម្ភាសរបស់ស្ថាបនិកបណ្ណាល័យចល័ត លោក អ៊ុក វណ្ណដេ។
ដើម្បីស្វែងរកព័ត៌មានពិត សូមតាមដានការផ្សាយរបស់យើងតាមរយៈប្រព័ន្ធដូចខាងក្រោម៖
Facebook Twitter Telegram Google News TikTok WhatsApp
សន្និដ្ឋាន
Fact Crescendo Cambodia បានរកឃើញ ការអះអាងដូចដែលត្រូវបានរៀបរាប់ខាងលើនេះ មិនត្រឹមត្រូវនោះឡើយ។ ការពិត រូបថតបង្ហាញទិដ្ឋភាពបណ្ណាល័យចល័ត ក្នុងអំឡុងឆ្នាំ១៩២៣ គឺជារូបថតបច្ចុប្បន្ន ដែលទំព័រហ្វេសប៊ុកមួយ បានថត និងកែសម្រួលពណ៌ទៅ ស ខ្មៅ តែប៉ុណ្ណោះ។
Title:តើនេះគឺជាទិដ្ឋភាពបណ្ណាល័យចល័តក្នុងអំឡុងឆ្នាំ១៩២៣មែនដែរឬទេ?
Fact Check By: Kakada SimResult: Misleading
