កាលពីខែកក្កដាកន្លងមកនេះ ស្ត្រីកម្ពុជាមួយរូប បានល្បីនៅលើបណ្ដាញសង្គម បន្ទាប់ពីសារព័ត៌មាននានាបានចុះផ្សាយថា គាត់បានសម្រេចចិត្តចាក់វ៉ាក់សាំងបង្ការជំងឺកូវីដ-១៩ ខណៈគាត់មានអាយុរហូតដល់ ១០១ឆ្នាំហើយនោះ។ ចាប់តាំងពីពេលនោះមក រដ្ឋាភិបាលកម្ពុជា បានផ្ដល់ទឹកប្រាក់ឧបត្ថម្ភដល់មនុស្សចាស់នានានៅទូទាំងប្រទេស ដែលបានចាក់វ៉ាក់សាំងកូវីដ-១៩។
ទន្ទឹមគ្នានេះដែរ វីដេអូស្ត្រីវ័យចំណាស់ម្នាក់ ត្រូវបានចុះផ្សាយថា គឺជាស្ត្រីជនជាតិប៉ាគីស្ថានមានអាយុ ៣០០ឆ្នាំហើយ ដែលក្លាយទៅជាស្ត្រីមានវ័យចំណាស់ជាងគេលើពិភពលោក។ វីដេអូនោះ ត្រូវបានអ្នកប្រើប្រាស់បណ្ដាញសង្គមហ្វេសប៊ុកចូលមើលដល់ទៅរាប់ម៉ឺនដង។ ទោះជាយ៉ាងណា ការផ្ទៀងផ្ទាត់របស់យើង រកឃើញថា ព័ត៌មាននេះ មិនត្រឹមត្រូវនោះឡើយ។
ការអះអាងលើបណ្ដាញសង្គម
កាលពីថ្ងៃទី៣០ ខែកញ្ញាកន្លងមកនេះ ទំព័រហ្វេសប៊ុកនៃសារព័ត៌មានត្រយ៉ង បានចុះផ្សាយនូវអត្ថបទ និងព័ត៌មានជាវីដេអូ ដែលនិយាយថា ស្ត្រីជនជាតិប៉ាគីស្ថានម្នាក់អាយុ ៣០០ឆ្នាំ បានក្លាយជាស្ត្រីវ័យចំណាស់ជាងគេនៅលើពិភពលោក។
វីដេអូព័ត៌មានមួយនេះ ត្រូវបានទស្សនារហូតដល់ទៅជាង ៧ម៉ឺនដងពីសំណាក់អ្នកប្រើប្រាស់បណ្ដាញសង្គម រួមជាមួយការបញ្ចេញមតិ និងប្រតិកម្មជាច្រើនផងដែរ បន្ទាប់ពីវាត្រូវបានផ្សព្វផ្សាយដោយសារសារព័ត៌មានត្រយ៉ង។
ខាងក្រោមនេះ គឺជារូបភាពផ្ដាមចេញពីទំព័រហ្វេសប៊ុកសារព័ត៌មានត្រយ៉ងដែលចុះផ្សាយព័ត៌មានមានចំណងជើងថា «លោកយាយវ័យ ៣០០ឆ្នាំ ចាស់ជាងគេលើភពផែនដី!»។
គេអាចមើលវីដេអូទាំងស្រុងចេញផ្សាយដោយសារព័ត៌មានត្រយ៉ងតាមរយៈតំណភ្ជាប់នៅទីនេះ ឬតំណភ្ជាប់ដែលត្រូវបានរក្សាទុកនៅទីនេះផងដែរ។
ព័ត៌មានស្ដីពីស្ត្រីវ័យ ៣០០ឆ្នាំរូបនេះ ត្រូវបានផ្សព្វផ្សាយព្រោងព្រាតលើនៅលើបណ្ដាញសង្គមដទៃទៀតផងដែរ និងបណ្ដាញអ៊ិនធឹណិត។ សារព័ត៌មានមួយចំនួន បានចុះផ្សាយថា ស្ត្រីប៉ាគីស្ថានរូបនេះ មានអាយុ ២១០ឆ្នាំ។
Tel Aviv Post’s YouTube | Archived
ការត្រួតពិនិត្យការពិត
Fact Crescendo Cambodia បានចាប់ផ្ដើមផ្ទៀងផ្ទាត់ទៅលើការអះអាងនេះតាមរយៈការដំណើរការកម្មវិធី Google Reverse Image ដែលបង្ហាញថា រូបថត ឬវីដេអូនៃស្ត្រីរូបនេះ ត្រូវបានចែកចាយព្រោងព្រាតលើបណ្ដាញអ៊ិនធឹណិតនាពេលថ្មីៗនេះ។
ប៉ុន្តែ ព័ត៌មានលម្អិតអំពីស្ត្រីរូបនេះ មិនត្រូវបានគេដឹងឱ្យជាក់លាក់នោះឡើយ ហើយក៏ត្រូវបានអះអាងផ្សេងៗគ្នាថែមទៀតផងដែរ ដូចជាទំព័រហ្វេសប៊ុក African History អះអាងថា ស្ត្រីរូបនេះមានអាយុ ២១០ឆ្នាំហើយ។
ទោះជាយ៉ាងណា គ្មានប្រភពជាក់លាក់ណាមួយ អាចផ្ទៀងផ្ទាត់បាននោះឡើយជុំវិញការអះអាងនេះ ខណៈដែលគ្មានការផ្សាយព័ត៌មានផ្លូវការណាមួយផងដែរនោះ។
ដោយហេតុនេះ យើងបានពិនិត្យមើលកំណត់ត្រាផ្លូវការស្ដីពីមនុស្សវ័យចាស់បំផុតនៅលើពិភពលោក ដែលត្រូវបានកត់ត្រាជាក់លាក់។
បើយោងតាមកំណត់ត្រារបស់សៀវភៅហ្គីណេស ស្ត្រីមានអាយុវែងជាងគេនៅលើភពផែនដីយើងនេះ គឺស្ត្រីជនជាតិបារាំងឈ្មោះ Jeanne Louise Calment។ លោកយាយ Jeanne Calment បានកើតនៅថ្ងៃទី២១ ខែកុម្ភៈ ឆ្នាំ១៨៧៥ ហើយទទួលមរណភាពនៅឯមណ្ឌលថែទាំមនុស្សចាស់ នៅទីក្រុង Arles ស្ថិតនៅភាគខាងត្បូងប្រទេសបារាំង កាលពីថ្ងៃទី០៤ ខែសីហា ឆ្នាំ១៩៩៧។ ស្ត្រីរូបនេះ មានអាយុរហូតដល់ទៅ ១២២ឆ្នាំ និង ១៦៤ថ្ងៃ។
រហូតមកដល់ពេលនេះ មិនទាន់មានស្ត្រីណាអាចបំបែកកំណត់ត្រាលោកយាយJeanne Louise Calment នៅឡើយទេ។
Guinness World Records | Archived
ចំណែកឯស្ត្រីអាយុវែងជាងគេ ហើយកំពុងនៅមានជីវិតនៅឡើយនោះ គឺជាស្ត្រីជនជាតិជប៉ុន លោកយាយ Kane Tanaka។ បើតាមកំណត់ត្រាសៀវភៅហ្គីណេស លោកយាយ Kane Taneka កើតនៅថ្ងៃទី០២ ខែមករា ឆ្នាំ១៩០៣ ហើយគិតមកដល់ថ្ងៃទី១០ ខែតុលានេះ លោកយាយមានអាយុរហូតដល់ ១១៨ឆ្នាំ និង ២៨៤ថ្ងៃហើយ។
Guinness World Records | Archived
ខាងក្រោមនេះ គឺជាវីដេអូបង្ហាញលោកយាយ Kane Tanaka ប្រារព្ធខួបកំណើតគម្រប់អាយុ ១១៦ឆ្នាំ កាលពីថ្ងៃទី០៩ ខែមីនា ឆ្នាំ២០១៩ ហើយក៏ទទួលបានកំណត់ត្រារបស់សៀវភៅហ្គីណេស ជាស្ត្រីកំពុងមានអាយុវែងជាងគេនៅលើពិភពលោក។
ខាងក្រោមនេះ គឺជាបញ្ជីឈ្មោះស្ត្រីមានអាយុវែងជាងគេបំផុតនៅលើពិភពលោក ដែលត្រូវបានកត់ត្រាទុក និងផ្ទៀងផ្ទាត់បានត្រឹមត្រូវ ដែលគេអាចរកអានបានទាំងស្រុងនៅលើគេហទំព័រ Wikipedia។
សន្និដ្ឋាន
Fact Crescendo Cambodia រកឃើញថា ការអះអាងដូចបានរៀបរាប់ខាងលើនេះ មិនត្រឹមត្រូវនោះឡើយ។ គ្មាននរណាម្នាក់ ឬព័ត៌មានផ្លូវការណាមួយបញ្ជាក់អំពីស្ត្រីជនជាតិប៉ាគីស្ថានអាយុ ៣០០ឆ្នាំនោះឡើយ។ ស្ត្រីមានអាយុវែងជាងគេបំផុតនៅលើពិភពលោក គឺស្ត្រីជនជាតិបារាំងឈ្មោះ Jeanne Louise Calment មានអាយុ ១២២ឆ្នាំ និង ១៦៤ថ្ងៃ។ ចំណែកស្ត្រីមានអាយុវែងជាងគេដែលកំពុងនៅរស់រានមានជីវិតនៅឡើយនោះ គឺស្ត្រីជនជាតិជប៉ុនឈ្មោះ Kane Tanaka ដែលមានអាយុ ១១៨ឆ្នាំ ២៨៤ថ្ងៃហើយ គិតត្រឹមថ្ងៃទី១០ ខែតុលា ឆ្នាំ២០២១នេះ។
Title:តើនរណាជាស្ត្រីអាយុវែងជាងគេបំផុតនៅលើពិភពលោក?
Fact Check By: Jay UdomResult: Missing Context
