- >>
- Insight
កម្ពុជាបញ្ជាក់ថា មិនទាន់សម្រេចឱ្យ Vingroup ធ្វើប្រតិបត្តិការតាក់ស៊ីអគ្គិសនីនៅឡើយទេ
កាលពីពាក់កណ្ដាលសប្ដាហ៍មុន សារព័ត៌មាននានា បានចុះផ្សាយព្រោងព្រាតថា ក្រុមហ៊ុន Vingroup ដែលជាក្រុមហ៊ុនផលិតរថយន្តរបស់ប្រទេសវៀតណាម គ្រោងធ្វើប្រតិបត្តិការអាជីវកម្មតាក់ស៊ីនៅកម្ពុជាដើមឆ្នាំក្រោយនេះ ដោយប្រើប្រាស់រថយន្តដំណើរការដោយថាមពលអគ្គិសនី។
បន្ទាប់ពីព័ត៌មាននេះ ត្រូវបានចុះផ្សាយរួចមកហើ វាត្រូវបានចែករំលែកបន្តព្រោងព្រាតនៅលើបណ្ដាញសង្គមហ្វេសប៊ុក ហើយក៏ទទួលបានប្រតិកម្មយ៉ាងច្រើនពីមហាជនផងដែរ ដែលយល់ឃើញថា ក្រុមហ៊ុនវៀតណាមមួយនេះនឹងដណ្ដើមការងាររបស់ប្រជាជនកម្ពុជា។
ខាងក្រោមនេះ គឺជារូបភាពផ្ដាមចេញពីការបង្ហោះនៅលើបណ្ដាញសង្គមហ្វេសប៊ុកដោយអ្នកប្រើប្រាស់ហ្វេសប៊ុកម្នាក់ ដែលចែករំលែកបន្តនូវព័ត៌មានខាងលើ។
ព័ត៌មានអះអាងខាងលើ ក៏ត្រូវបានផ្សព្វផ្សាយជាវីដេអូរាយការណ៍យ៉ាងទូលំទូលាយ ទៅដល់អ្នកប្រើប្រាស់ដទៃទៀតផងដែរ។
ការអះអាងបែបនេះ ត្រូវបានបង្ហោះ និងរកឃើញនៅលើបណ្ដាញសង្គមហ្វេសប៊ុក ជាច្រើនទៀតផងដែរ។ សូមមើលខ្លឹមសារអះអាងទាំងស្រុង តាមរយៈតំណភ្ជាប់មាននៅទីនេះ (archived link) និងតំណភ្ជាប់មួយទៀតនៅទីនេះ (archived link)។
រាជរដ្ឋាភិបាលកម្ពុជាបកស្រាយប្រាប់មហាជន ក្រោយមានមតិរិះគន់ផុសផុល
បន្ទាប់ពីមហាជនបានរិះគន់ចំពោះដំណឹងនេះមក រាជរដ្ឋាភិបាលកម្ពុជាបានច្រានចោលនូវព័ត៌មាននេះ ដោយបញ្ជាក់ថា ព័ត៌មាននេះ ត្រូវបានចុះផ្សាយដោយមិនត្រឹមត្រូវនោះឡើយ។
នៅក្នុងសេចក្ដីថ្លែងការណ៍របស់ខ្លួនកាលពីថ្ងៃពុធសប្ដាហ៍មុន អង្គភាពអ្នកនាំពាក្យរាជរដ្ឋាភិបាលកម្ពុជា បានបញ្ជាក់ថា លោកនាយករដ្ឋមន្ត្រី ហ៊ុន ម៉ាណែត ពុំបានអនុញ្ញាតទៅតាមសំណើរបស់ក្រុមហ៊ុនវៀតណាមនោះឡើយ។
ខាងក្រោមនេះ គឺជាសេចក្ដីថ្លែងការណ៍ទាំងស្រុងរបស់អង្គភាពអ្នកនាំពាក្យរាជរដ្ឋាភិបាលកម្ពុជា ដែលត្រូវបានផ្សព្វផ្សាយនៅលើទំព័រហ្វេសប៊ុករបស់ខ្លួនកាលពីថ្ងៃទី១៤ ខែធ្នូ ឆ្នាំ២០២៣។
សេចក្ដីថ្លែងការណ៍របស់អង្គភាពអ្នកនាំពាក្យរាជរដ្ឋាភិបាលកម្ពុជា ត្រូវបានចុះផ្សាយដោយសារព័ត៌មាននានានៅក្នុងប្រទេស បន្ទាប់ពីស្ថាប័នមួយនេះយល់ឃើញថា ការផ្សាយព័ត៌មានខាងលើនេះ បានធ្វើឱ្យមហាជនយល់ច្រឡំ។
ខាងក្រោមនេះ គឺជាវីដេអូរាយការណ៍ ចុះផ្សព្វផ្សាយដោយក្រសួងព័ត៌មានកាលពីថ្ងៃទី១៤ ខែធ្នូ កន្លងទៅ ដែលបានច្រានចោលព័ត៌មានថា ក្រុមហ៊ុន Vingroup របស់វៀតណាមគ្រោងបើកក្រុមហ៊ុនតាក់ស៊ី ដោយប្រើរថយន្តអគ្គិសនីចំនួន ២៥០០គ្រឿងនៅរាជធានីភ្នំពេញ។
The Minister of Information | Archived Link
ចំណែកលោកនាយករដ្ឋមន្រ្តីកម្ពុជា ហ៊ុន ម៉ាណែត ក៏បានច្រានចោលផងដែរថា រាជរដ្ឋាភិបាលកម្ពុជាពុំមានគោលការណ៍ និងបានអនុញ្ញាតឱ្យក្រុមហ៊ុន Vingroup បើកវិនិយោគគម្រោងរថយន្តតាក់ស៊ីប្រើអគ្គិសនីរបស់ខ្លួននៅកម្ពុជានោះឡើយ។
ខាងក្រោមនេះ គឺជាវីដេអូឃ្លីបដើមរបស់លោកនាយករដ្ឋមន្រ្តី ដែលបានធ្វើឡើងបន្ទាប់ពីមានព័ត៌មានអះអាងយ៉ាងផុសផុលពីសំណាក់ប្រជាពលរដ្ឋកម្ពុជា។
Fresh News Report | Archived Link
ក្រុមការងាររបស់ Fact Crescendo Cambodia ក៏បានធ្វើការស្នើសុំការបញ្ជាក់បន្ថែមទៀតពីក្រុមហ៊ុន Vingroup របស់វៀតណាមផ្ទាល់តាមរយៈប្រព័ន្ធសារអេឡិចត្រូនិក (Email)ផងដែរ ប៉ុន្ដែ គិតត្រឹមថ្ងៃចេញផ្សាយអត្ថបទនេះ នៅមិនទាន់មានការឆ្លើយតបនៅឡើយទេ។
Fact Crescendo Cambodia នឹងធ្វើបច្ចុប្បន្នភាពបន្ថែមទៀត បន្ទាប់ពីក្រុមហ៊ុន Vingroup បានបញ្ជាក់លម្អិតអំពីរឿងនេះ។
ដើម្បីស្វែងរកព័ត៌មានពិត សូមតាមដានការផ្សាយរបស់យើងតាមរយៈប្រព័ន្ធដូចខាងក្រោម៖
Facebook Twitter Telegram Google News TikTok
Title:កម្ពុជាបញ្ជាក់ថា មិនទាន់សម្រេចឱ្យ Vingroup ធ្វើប្រតិបត្តិការតាក់ស៊ីអគ្គិសនីនៅឡើយទេ
Written By: Kakada SimResult: Insight
