ខណៈដែលមេដឹកនាំបក្សជំទាស់ លោក កឹម សុខា ត្រូវបានផាត់ចេញពីឆាកនយោបាយអស់រយៈពេលជាង ៥ឆ្នាំមកហើយនោះ រូបថតមួយសន្លឹកដែលបង្ហាញលោកអង្គុយកាន់សៀវភៅធម៌មួយក្បាល និងញញឹមផងដែរនោះ ត្រូវបានបង្ហោះនៅលើបណ្ដាញសង្គម។ រូបថតនេះ ត្រូវបានចែករំលែកបន្តព្រមទាំងមានការបញ្ចេញមតិប្រតិកម្មពីសំណាក់អ្នកប្រើប្រាស់បណ្ដាញសង្គមហ្វេសប៊ុកជាច្រើននាពេលថ្មីៗនេះ។ ទោះជាយ៉ាងណា ការត្រួតពិនិត្យការពិតរបស់ Fact Crescendo Cambodia បានរកឃើញថា រូបថតបង្ហោះដោយអ្នកប្រើប្រាស់ខាងលើនោះ គឺមិនត្រឹមត្រូវនោះឡើយ។
ការអះអាងលើបណ្តាញសង្គម
កាលពីថ្ងៃទី០៨ ខែធ្នូ ឆ្នាំ២០២២កន្លងទៅថ្មីៗនេះ អ្នកប្រើប្រាស់ហ្វេសប៊ុកម្នាក់ បង្ហោះរូបថតមួយសន្លឹកដែលបង្ហាញទិដ្ឋភាពមេដឹកនាំគណបក្សប្រឆាំងលោក កឹម សុខា បានអង្គុយញញឹម និងកាន់អានសៀវភៅមួយដែលមានចំណងជើងថា «ឧត្តមវិបស្សនា»។ រូបថតបង្ហោះខាងលើនេះ ត្រូវបានអ្នកប្រើប្រាស់បណ្ដាញសង្គមចែករំលែកជាច្រើនដង រួមជាមួយការបញ្ចេញមតិ និងប្រតិកម្មចម្រុះបែបផងដែរ។
ខាងក្រោមនេះ គឺជារូបភាពផ្ដាមទាំងស្រុង ចេញពីប៉ុស្តិ៍របស់អ្នកប្រើប្រាស់ខាងលើ ដែលបានសរសេររៀបរាប់ថា «ទំនេរអានសៀវភៅបង្កើនចំណេះ ប្រសើរជាងដើរផឹក ដើរកេះស្រីញីណា បងប្អូន។ ការអានតែងមានប្រយោជន៍ជានិច្ច»។
ការត្រួតពិនិត្យការពិត
Fact Crescendo Cambodia ចាប់ផ្ដើមត្រួតពិនិត្យទៅលើរូបថត និងការអះអាងខាងលើនេះតាមរយៈ Google Reverse Image Search ដែលនាំឱ្យយើងរកឃើញការពិតដូចខាងក្រោមនេះ។
រូបថតដែលមានទម្រង់ និងសណ្ឋានដូចគ្នានេះ ត្រូវបានរកឃើញ និងបង្ហោះដោយអ្នកប្រើប្រាស់ហ្វេសប៊ុកម្នាក់ កាលពីថ្ងៃទី២៨ ខែវិច្ឆិកា ឆ្នាំ២០១៩កន្លងទៅ ដោយពុំបានបង្ហាញទិដ្ឋភាពលោកញញឹមពេលកាន់សៀវភៅនោះឡើយ។
ខាងក្រោមនេះ គឺជារូបភាពផ្ដាមចេញពីប៉ុស្តិ៍របស់អ្នកប្រើប្រាស់ខាងលើ ដែលបានបង្ហាញទិដ្ឋភាពលោក កឹម សុខា បានអង្គុយកាន់សៀវភៅ «ឧត្តមវិបស្សនា» ដែលជាកម្រងនៃសង្ឃដីការបស់ព្រះតេជគុណ សំ ប៊ុនធឿន ដែលបានសុគត ក្រោយពីត្រូវបានខ្មាន់កាំភ្លើងបាញ់ប្រហារកាលពីឆ្នាំ២០០៣កន្លងទៅ។
ដូចគ្នានេះ រូបថតមួយសន្លឹកខាងលើ ក៏ត្រូវបានផ្សព្វផ្សាយនៅលើគេហទំព័រសារព័ត៌មាន VOD កាលពីថ្ងៃទី០៥ ខែធ្នូ ឆ្នាំ២០១៩កន្លងទៅផងដែរ។ ខាងក្រោមនេះ គឺជារូបភាពផ្ដាមចេញពីគេហទំព័រសារព័ត៌មានក្នុងស្រុកខាងលើ ដែលមានចំណងជើងថា «លោក កឹម សុខា ធ្វើសមាធិជា ប្រចាំអំឡុងពេលជាប់ឃុំក្នុងគុក និងក្នុងផ្ទះ»។
VOD News Report | Archived Link
ខាងក្រោមនេះ គឺជាការប្រៀបធៀបគ្នារវាងរូបថតដែលត្រូវបានកាត់ត និងរូបថតច្បាប់ដើមដែលត្រូវបានរកឃើញផ្សព្វផ្សាយនៅលើបណ្តាញសង្គម។
ដើម្បីស្វែងរកព័ត៌មានពិត សូមតាមដានការផ្សាយរបស់យើងតាមរយៈប្រព័ន្ធដូចខាងក្រោម៖
Facebook Twitter Telegram Google News TikTok
សន្និដ្ឋាន
Fact Crescendo Cambodia រកឃើញថារូបថត បង្ហោះដោយអ្នកប្រើប្រាស់ហ្វេសប៊ុកខាងលើនោះ គឺពិតជាមិនត្រឹមត្រូវនោះឡើយ។ រូបថតមួយសន្លឹកនេះ ត្រូវបានកាត់តឱ្យឃើញលោក កឹម សុខា មានទឹកមុខញញឹម។ រូបថតច្បាប់ដើម បង្ហាញលោក កឹម សុខា អង្គុយអានសៀវភៅធម៌មួយក្បាលជាមួយទឹកមុខរាបស្មើមិនញញឹមនោះឡើយ។
Title:រូបថតបង្ហាញលោក កឹម សុខា ញញឹមពេលកាន់សៀវភៅ «ឧត្តមវិបស្សនា» ជារូបថតកាត់ត
Fact Check By: Kakada SimResult: Altered
