បន្ទាប់ពីកម្ពុជាប្រកាសដាក់ឱ្យប្រើប្រាស់ក្រដាសប្រាក់រៀលប្រភេទថ្មីកាលពីសប្ដាហ៍មុននោះ ស្រាប់តែរូបភាពក្រដាសប្រាក់ ២សែនរៀលដែលមានរូបលោក ហ៊ុន សែន និងកូនប្រុសរបស់លោក ត្រូវបានគេបង្ហោះនៅលើបណ្ដាញសង្គម ក្នុងន័យថា ក្រដាសប្រាក់រៀលប្រភេទថ្មីនេះមានរូបរាងបែបហ្នឹង។ រូបភាពនេះ ត្រូវបានចែករំលែកបន្តព្រោងព្រាតពីសំណាក់អ្នកប្រើប្រាស់ហ្វេសប៊ុកនិយាយភាសាខ្មែរ ក្នុងនោះមានការចោទសួរថា តើក្រដាសប្រាក់ប្រភេទថ្មីពិតជាបោះពុម្ពបែបហ្នឹងមែនឬក៏យ៉ាងណា។ ទោះជាយ៉ាងណា ការផ្ទៀងផ្ទាត់របស់យើង រកឃើញថា រូបភាពនេះត្រូវបានកាត់ត។
ការអះអាងលើបណ្ដាញសង្គម
រូបថតក្រដាសប្រាក់ថ្មី ២សែនរៀល ត្រូវបានគេបង្ហោះនៅលើបណ្ដាញសង្គមកាលពី ២ថ្ងៃមុននេះ ដោយធនប័ត្រ ឬក្រដាសប្រាក់រៀលថ្មីនេះ ត្រូវបានបោះពុម្ពមកជាមួយរូបមេដឹកនាំបក្សកាន់អំណាច លោក ហ៊ុន សែន និងកូនប្រុសរបស់លោក ដែលជានាយករដ្ឋមន្ត្រីសព្វថ្ងៃ។
រូបថតក្រដាសប្រាក់រៀលថ្មីដែលមានរូបថតបែបនេះ ត្រូវបានគេចែករំលែកបន្តព្រោងព្រាតនៅលើបណ្ដាញសង្គម ហើយក៏ទាក់ទាញការបញ្ចេញមតិចម្រុះបែប និងប្រតិកម្មយ៉ាងច្រើនពីអ្នកប្រើប្រាស់បណ្ដាញសង្គម។
ខាងក្រោមនេះ គឺជារូបភាពផ្ដាមចេញពីការបង្ហោះរូបថតនេះនៅលើបណ្ដាញសង្គមហ្វេសប៊ុកកាលពីថ្ងៃទី២០ ខែតុលា ឆ្នាំ២០២៤ ជាមួយសំណេររៀបរាប់ថា “ធនាគារជាតិបោះពុម្ពលុយជិត ១០០០លានដុល្លារឱ្យរដ្ឋ ពិតណាស់ ការបោះពុម្ពលុយនេះដើម្បីយកមកចំណាយក្នុងរដ្ឋាភិបាល ព្រោះរដ្ឋាភិបាលកំពុងជួបវិបត្តិសេដ្ឋកិច្ច និងមិនមានលុយបើកឱ្យមន្ត្រីរាជការតាមស្ថាប័ន ខណៈលុយចុះថោក […]”។
បន្ទាប់មក រូបថតនេះក៏ត្រូវបានបង្ហោះនៅលើបណ្ដាញសង្គមដោយអ្នកប្រើប្រាស់ហ្វេសប៊ុកមួយទៀត ហើយត្រូវបានចែករំលែកបន្តកាន់តែច្រើន និងមានអ្នកបញ្ចេញមតិដ៏ច្រើនផងដែរ។
ខាងក្រោមនេះ គឺជារូបភាពផ្ដាមចេញពីការបង្ហោះរូបថតនេះនៅលើបណ្ដាញសង្គមហ្វេសប៊ុកដោយគណនីហ្វេសប៊ុកមួយកាលពីថ្ងៃទី២១ ខែតុលា ឆ្នាំ២០២៤។
រូបថតក្រដាសប្រាក់រៀលបែបនេះ ក៏ត្រូវបានបង្ហោះនៅលើបណ្ដាញសង្គមដោយអ្នកប្រើប្រាស់ហ្វេសប៊ុកដទៃទៀតផងដែរនៅក្នុងរយៈពេលប៉ុន្មានមកនេះ។ គេអាចរកមើលរូបថតនេះដែលត្រូវបានបង្ហោះនៅលើបណ្ដាញសង្គមដោយអ្នកប្រើប្រាស់ហ្វេសប៊ុកដទៃទៀតបានតាមរយៈតំណភ្ជាប់នៅទីនេះ (archived) ឬតំណភ្ជាប់មួយទៀតនៅទីនេះ (archived)។
នៅក្នុងចំណោមការបង្ហោះ ២ខាងលើដែលទទួលបានការចែករំលែកបន្តយ៉ាងច្រើននោះ មានអ្នកប្រើប្រាស់បណ្ដាញសង្គមជាច្រើន បានចោទសួរថា តើរូបថតនេះពិតប្រាកដឬយ៉ាងណា ខណៈអ្នកប្រើប្រាស់បណ្ដាញសង្គមមួយចំនួនទៀត បានបញ្ចេញមតិក្នុងលក្ខណៈជឿថា រូបថតនេះគឺជាការពិត។
ខាងក្រោមនេះ គឺជារូបភាពផ្ដាមចេញពីការបញ្ចេញមតិរបស់អ្នកប្រើប្រាស់ហ្វេសប៊ុកកម្ពុជា បន្ទាប់ពីរូបថតនេះត្រូវបានបង្ហោះនៅលើបណ្ដាញសង្គមរួចមក។
ការត្រួតពិនិត្យការពិត
Fact Crescendo បានចាប់ផ្ដើមត្រួតពិនិត្យ និងផ្ទៀងផ្ទាត់លើព័ត៌មាននេះតាមរយៈ Google Reverse Image Search និងតាមរយៈព័ត៌មានពីប្រភពគួរឱ្យទុកចិត្តនានា ដែលនាំឱ្យយើងរកឃើញការពិតដូចខាងក្រោមនេះ។
តាមរយៈការដំណើរការ Google Reverse Image Search យើងបានរកឃើញថា រូបថតក្រដាសប្រាក់រៀលថ្មីដែលមានរូបលោក ហ៊ុន សែន និងលោក ហ៊ុន ម៉ាណែត នោះ មិនមែនជាការពិតនោះឡើយ។
សេចក្ដីរាយការណ៍ព័ត៌មានដោយកាសែតភ្នំពេញ ប៉ុស្តិ៍ ជាភាសាអង់គ្លេស បានឱ្យដឹងថា រដ្ឋាភិបាលកម្ពុជាបានសម្រេចបោះពុម្ព និងដាក់ឱ្យចរាចរណ៍នូវក្រដាសប្រាក់រៀលប្រភេទថ្មី ២សែនរៀលកាលពីសប្ដាហ៍មុន។
សេចក្ដីប្រកាសព័ត៌មានរបស់រដ្ឋាភិបាលដែលដកស្រង់ដោយសារព័ត៌មាននេះ បាននិយាយថា ក្រដាសប្រាក់រៀលប្រភេទថ្មីនេះ គឺជាធនប័ត្រអនុស្សាវរីយ៍ ដើម្បីរំលឹកខួប ២០ឆ្នាំនៃការឡើងសោយរាជសម្បត្តិរបស់ព្រះមហាក្សត្រ នរោត្ដម សីហមុនី ដែលនឹងកើតនៅចំថ្ងៃទី២៩ ខែតុលាខាងមុខនេះ។
ព័ត៌មានអំពីក្រដាសប្រាក់រៀលប្រភេទថ្មីនេះ ត្រូវបានចុះផ្សាយព្រោងព្រាតដោយសារព័ត៌មានដទៃទៀតនៅក្នុងប្រទេសកម្ពុជា និងសារព័ត៌មានបរទេសផងដែរ ដូចជាសារព័ត៌មាន Kiripost និងប្រព័ន្ធផ្សព្វផ្សាយអូស្ត្រាលី SBS។
ក្រដាសប្រាក់រៀលប្រភេទថ្មី ២សែនរៀលនេះ ត្រូវបានធនាគារជាតិនៃកម្ពុជាផ្សព្វផ្សាយនៅលើទំព័រហ្វេសប៊ុកផ្លូវការរបស់ខ្លួនផងដែរកាលពីថ្ងៃទី១៦ ខែតុលា ឆ្នាំ២០២៤។
ខាងក្រោមនេះ គឺជារូបភាពផ្ដាមចេញពីទំព័រហ្វេសប៊ុកធនាគារជាតិនៃកម្ពុជា ដែលបានបង្ហោះរូបថតធនប័ត្រអនុស្សាវរីយ៍ប្រភេទ ២០០,០០០រៀល និងសេចក្ដីប្រកាសដាក់ឱ្យចរាចរណ៍ជាផ្លូវការ។
National Bank of Cambodia | Archived Link
ធនាគារជាតិកម្ពុជា បញ្ជាក់ថា ក្រដាសប្រាក់រៀលប្រភេទថ្មីនេះ ត្រូវបានបោះពុម្ពភ្ជាប់មកជាមួយព្រះឆាយាល័ក្ខណ៍ព្រះមហាក្សត្រ នរោត្ដម សីហមុនី និងព្រះមាតាទ្រង់ នៅផ្នែកខាងមុខនៃក្រដាសប្រាក់ ខណៈផ្នែកខាងក្រោយ មានតែព្រះឆាយាល័ក្ខណ៍ព្រះអង្គចុះព្រហស្ថលេខាកាលពី ២០ឆ្នាំមុន។
ខាងក្រោមនេះ គឺជារូបថតនៃក្រដាសប្រាក់រៀលប្រភេទថ្មី ២សែនរៀល ដែលធនាគារជាតិនៃកម្ពុជាប្រកាសថា ជាធនប័ត្រអនុស្សាវរីយ៍ខួប ២០ឆ្នាំនៃការឡើងគ្រងរាជសម្បត្តិរបស់ព្រះមហាក្សត្រ នរោត្ដម សីហមុនី ហើយត្រូវបានប្រកាសដាក់ឱ្យចរាចរណ៍ចាប់តាំងពីថ្ងៃទី១៦ ខែតុលា ឆ្នាំ២០២៤។
ចំណែករូបភាពខាងក្រោមនេះ គឺជាការប្រៀបធៀបឱ្យឃើញចំណុចខុសគ្នារវាងក្រដាសប្រាក់ប្រភេទថ្មី ២សែនរៀល និងរូបភាពកាត់តដែលដាក់រូបថតលោក ហ៊ុន សែន និងកូនប្រុសរបស់លោកនៅលើក្រដាសប្រាក់។
សន្និដ្ឋាន
Fact Crescendo រកឃើញថា រូបថតដូចដែលរៀបរាប់ខាងលើនេះ ត្រូវបានបង្ហោះដោយមិនត្រឹមត្រូវនៅលើបណ្ដាញសង្គម។ រូបថតក្រដាសប្រាក់ប្រភេទថ្មី ២សែនរៀលដែលមានរូបលោក ហ៊ុន សែន និងកូនប្រុសរបស់លោក គឺជារូបភាពកាត់តតែប៉ុណ្ណោះ។ រូបថតត្រឹមត្រូវ គឺក្រដាសប្រាក់ប្រភេទថ្មី ២សែនរៀលដែលមានព្រះឆាយាល័ក្ខណ៍ព្រះមហាក្សត្រ នរោត្ដម សីហមុនី និងព្រះមាតារបស់ទ្រង់ នៅផ្នែកខាងមុខ និងព្រះឆាយារបស់ទ្រង់ចុះព្រះហស្ថលេខានៅផ្នែកខាងក្រោយ។
Title:រូបភាពកាត់តលោក ហ៊ុន សែន និងកូនប្រុសលើធនប័ត្រថ្មីជំរុញឱ្យមានចម្ងល់ពីមហាជន
Written By: Jay UdomResult: Altered
