ថ្មីៗនេះ មានការផ្សព្វផ្សាយព្រោងព្រាតលើបណ្ដាញសង្គមថា កម្ពុជានឹងកសាងព្រែកជីកថ្មីមួយទៀតតភ្ជាប់ទន្លេមេគង្គទៅកាន់ទន្លេសាប។ ព័ត៌មាននេះ ទទួលបានការសាទរពីសំណាក់អ្នកប្រើប្រាស់បណ្ដាញសង្គមហ្វេសប៊ុក។ ទោះជាយ៉ាងណា ការផ្ទៀងផ្ទាត់របស់ Fact Crescendo រកឃើញថា ព័ត៌មាននេះមិនត្រឹមត្រូវនោះឡើយ។
ការអះអាងលើបណ្ដាញសង្គម
ចាប់តាំងពីចុងសប្ដាហ៍មុនមក មហាជនអ្នកប្រើប្រាស់បណ្ដាញសង្គម បានសម្ដែងមតិសាទរ បន្ទាប់ពីមានការបង្ហោះព័ត៌មាននៅលើបណ្ដាញសង្គមថា រាជរដ្ឋាភិបាលកម្ពុជានឹងកសាងព្រែកជីកមួយទៀតភ្ជាប់ពីទន្លេមេគង្គនៅក្នុងទឹកដីខេត្តកំពង់ចាមទៅកាន់ទន្លេសាប។
ព័ត៌មាននេះ ត្រូវបានចែកចាយបន្តរាប់សិបដងពីសំណាក់អ្នកប្រើប្រាស់បណ្ដាញសង្គមនិយាយភាសាខ្មែរ ដោយបង្ហាញការសាទរ និងជឿថា ដំណឹងនេះជាការពិត។
ខាងក្រោមនេះ គឺជារូបភាពផ្ដាមចេញពីអះអាងដែលបង្ហោះនៅលើបណ្ដាញសង្គមហ្វេសប៊ុកលកាលពីថ្ងៃទី២២ ខែកុម្ភៈ ឆ្នាំ២០២៥ រៀបរាប់ថា “ដំណឹងរីករាយ!!! ខេត្តកំពង់ចាមនឹងស្ថាបនាព្រែកជីកតភ្ជាប់ពីទន្លេមេគង្គទៅទន្លេសាប”។
បន្ទាប់មក ទំព័រហ្វេសប៊ុកដទៃទៀតបានបង្ហោះនូវព័ត៌មាននេះនៅលើបណ្ដាញសង្គមផងដែរ ហើយក៏ត្រូវបានចែកចាយបន្តរហូតដល់រាប់រយដងពីសំណាក់អ្នកប្រើប្រាស់ហ្វេសប៊ុកកម្ពុជា ដែលជឿទៅតាមព័ត៌មាននេះ។
ខាងក្រោមនេះ គឺជារូបភាពផ្ដាមចេញពីការបង្ហោះព័ត៌មានដូចគ្នានេះនៅលើបណ្ដាញសង្គមកាលពីថ្ងៃទី២២ ខែកុម្ភៈ ឆ្នាំ២០២៥ រៀបរាប់ថា “ដំណឹងរីករាយ!!! ខេត្តកំពង់ចាមនឹងស្ថាបនាព្រែកជីកតភ្ជាប់ពីទន្លេមេគង្គទៅទន្លេសាប”។
ខាងក្រោមនេះ គឺជារូបភាពផ្ដាមចេញពីការអះអាងនៅលើបណ្ដាញសង្គមកាលពីថ្ងៃទី២២ ខែកុម្ភៈ ឆ្នាំ២០២៥ ដែលមានខ្លឹមសារដូចគ្នាទាំងស្រុងទៅនឹងការអះអាងខាងលើ ហើយវាត្រូវបានចែកចាយជាច្រើនដងបន្ថែមទៀត។
ការត្រួតពិនិត្យការពិត
Fact Crescendo បានផ្ទៀងផ្ទាត់ទៅលើការអះអាងនេះតាមរយៈការស្វែងរកការបញ្ជាក់ពីប្រភពពាក់ព័ន្ធនានា ដែលនាំឱ្យយើងរកឃើញការពិតដូចខាងក្រោមនេះ។
អ្នកនាំពាក្យក្រសួងសាធារណការ និងដឹកជញ្ជូន លោក ផន រឹម បានប្រាប់ថា ក្រសួងមិនមានគម្រោងកសាងព្រែកជីកថ្មីនោះឡើយ ហើយលោកគ្មានព័ត៌មានអំពីគម្រោងនេះដែរ។
ក្រោយការបញ្ជាក់បែបនេះពីភាគីខាងក្រសួងសាធារណការ និងដឹកជញ្ជូន Fact Crescendo បានស្វែងរកការបញ្ជាក់ពីប្រភព និងស្ថាប័នដទៃទៀតដែរ។
ព័ត៌មាននេះ ត្រូវបានបង្ហោះនៅលើបណ្ដាញសង្គមដំបូងគេដោយអ្នកប្រើប្រាស់ហ្វេសប៊ុកម្នាក់ឈ្មោះ Chou Rathnavong ដែលគណនីរបស់លោកបង្ហាញថា លោកជាមន្ត្រីមួយរូបនៅក្រោមរដ្ឋបាលខេត្តកំពង់ចាម។
ឆ្លើយតបមកកាន់ Fact Crescendo តាមតេឡេក្រាម លោក ជួន រតនាវង្ស បានឱ្យដឹងថា ព័ត៌មាននិយាយពីគម្រោងព្រែកជីកថ្មីនេះ ត្រូវបានលោកដកស្រង់សម្ដីរបស់អភិបាលខេត្តកំពង់ចាម លោក អ៊ុន ចាន់ដា ដែលបានថ្លែង ក្នុងពិធីសម្ពោធសមិទ្ធផលនានានៅក្នុងវត្តទួលប្រាសាទ ស្ថិតក្នុងស្រុកបាធាយ កាលពីថ្ងៃទី២២ ខែកុម្ភៈ ឆ្នាំ២០២៥។
អភិបាលខេត្តកំពង់ចាម លោក អ៊ុន ចាន់ដា ក៏បានបញ្ជាក់ប្រាប់ Fact Crescendo តាមតេឡេក្រាមផងដែរថា គម្រោងស្ថាបនាព្រែកជីកតភ្ជាប់ទន្លេមេគង្គទៅនឹងទន្លេសាបនេះ កំពុងស្ថិតនៅក្រោមការសិក្សានៅឡើយ។
អភិបាលខេត្តរូបនេះ បានបញ្ជាក់ទៀតថា ព្រែកជីកថ្មីនេះនឹងជួយបញ្ចៀសទឹកជំនន់ ជួយគាំទ្រដល់វិស័យកសិកម្ម ផ្ដល់នូវគមនាគមន៍ផ្លូវមួយទៀត និងជួយដល់វិស័យទេសចរណ៍។
លោក អ៊ុន ចាន់ដា បញ្ជាក់ថា គម្រោងព្រែកជីកនេះ ត្រូវបានរំពឹងថានឹងបើកការដ្ឋាននៅចុងឆ្នាំ២០២៦ ឬដើមឆ្នាំ២០២៧ខាងមុខ ដោយសង្ឃឹមថា វានឹងតភ្ជាប់ផ្លូវទឹកពីទន្លេមេគង្គនៅក្នុងភូមិសាស្ត្រនៃខេត្តកំពង់ចាមទៅភ្ជាប់នឹងទន្លេសាបស្ថិតក្នុងភូមិសាស្ត្រនៃខេត្តកំពង់ឆ្នាំងនោះ។
អភិបាលខេត្តកំពង់ឆ្នាំង លោក ស៊ុន សុវណ្ណរិទ្ធិ បញ្ជាក់ប្រាប់ Fact Crescendo តាមតេឡេក្រាមកាលពីថ្ងៃម្សិលមិញថា ពិតជាមានគម្រោងស្ថាបនាព្រែកជីកនេះមែន ប៉ុន្តែ លោកថា វាស្ថិតនៅក្នុងដំណាក់កាលនៃការសិក្សាដោយក្រសួងធនធានទឹក និងឧតុនិយមនៅឡើយ។
Fact Crescendo បានស្វែងរកព័ត៌មានលម្អិតបន្ថែមពីលោក អ៊ុំ រីណា អ្នកនាំពាក្យក្រសួងធនធានទឹក និងឧតុនិយម ប៉ុន្តែ ពុំទាន់ទទួលបានការបញ្ជាក់នៅឡើយទេ។
ទោះជាយ៉ាងណា អ្នកនាំពាក្យរាជរដ្ឋាភិបាលកម្ពុជា លោក ប៉ែន បូណា បានបញ្ជាក់ថា គ្មានគម្រោងព្រែកជីកថ្មីនេះ ត្រូវបានស្នើឡើងទៅ ឬយកទៅពិភាក្សានៅគណៈរដ្ឋមន្ត្រីនៅឡើយទេរហូតមកដល់ពេលនេះ។
កម្ពុជាបានបើកការដ្ឋានស្ថាបនាព្រែកជីកហ្វូណនតេជោកាលពីខែសីហា ឆ្នាំ២០២៤កន្លង។ ព្រែកជីកមានតម្លៃ ១,៧០០លានដុល្លារនេះ ត្រូវបានរំពឹងថានឹងតភ្ជាប់វិស័យដឹកជញ្ជូនកម្ពុជាពីទន្លេមេគង្គទៅកាន់ផ្លូវសមុទ្រនៅក្នុងចម្ងាយ ១៨០គីឡូម៉ែត្រ។
សន្និដ្ឋាន
Fact Crescendo បានរកឃើញថា ព័ត៌មានដូចដែលត្រូវបានរៀបរាប់ខាងលើនេះ មិនត្រឹមត្រូវនោះឡើយ។ ព្រែកជីកតភ្ជាប់ពីទន្លេមេគង្គស្ថិតក្នុងភូមិសាស្ត្រខេត្តកំពង់ចាមទៅកាន់ទន្លេសាប ស្ថិតនៅក្នុងដំណាក់កាលនៃការសិក្សានៅឡើយ នៅមិនទាន់មានសេចក្ដីសម្រេចជាផ្លូវការណាមួយពីរាជរដ្ឋាភិបាលនៅឡើយទេ។
Title:ព្រែកជីកតភ្ជាប់ទន្លេមេគង្គទៅទន្លេសាបស្ថិតក្នុងដំណាក់កាលសិក្សានៅឡើយ
Fact Check By: Jay UdomResult: Misleading
