តារាចម្រៀង ម៉េង កែវពេជ្ជតា និយាយរិះគន់ថ្នាក់ដឹកនាំប្រទេស តើជាការពិតឬទេ?
ថ្មីៗនេះ ជម្លោះពាក្យសម្ដីរវាងតារាចម្រៀងជើងចាស់ អ្នកនាង ម៉េង កែវពេជ្ជតា និងអ្នកសិល្បៈដទៃទៀត បានផ្ទុះឡើងនៅលើបណ្ដាញសង្គម។ ទន្ទឹមគ្នានេះ វីដេអូមួយរបស់តារាចម្រៀងរូបនេះ ត្រូវបានបង្ហោះនៅលើបណ្ដាញសង្គមដោយមានសំណេរក្នុងន័យថា អ្នកនាង ម៉េង កែវពេជ្ជតា បាននិយាយរិះគន់ថ្នាក់ដឹកនាំប្រទេសនាពេលសព្វថ្ងៃនេះ។ វីដេអូនេះ ត្រូវបានគេចែករំលែកបន្តយ៉ាងច្រើន ហើយមានអ្នកប្រើប្រាស់ហ្វេសប៊ុកជាច្រើន ជឿថា តារាចម្រៀងរូបនេះពិតជាបានរិះគន់បែបនេះមែន។ ទោះជាយ៉ាងណា ក្រោយពិនិត្យមើលវីដេអូទាំងស្រុងរបស់គាត់ យើងបានរកឃើញថា ការអះអាងខាងលើនេះ មិនត្រឹមត្រូវទេ។
ការអះអាងលើបណ្ដាញសង្គម
វីដេអូឃ្លីបមួយដែលបង្ហាញតារាចម្រៀងកម្ពុជា អ្នកស្រី ម៉េង កែវពេជ្ជតា និយាយរិះគន់នរណាម្នាក់នោះ ត្រូវបានគេបង្ហោះនៅលើបណ្ដាញសង្គមជាមួយសំណេររៀបរាប់ក្នុងន័យថា តារាចម្រៀងជើងចាស់រូបនេះរិះគន់ក្បាលម៉ាស៊ីនដឹកនាំប្រទេស។
វីដេអូឃ្លីបមានរយៈពេល ១៤វិនាទីនេះ ត្រូវបានគេចែករំលែកបន្តដល់ទៅរាប់រយដង ហើយមានអ្នកប្រើប្រាស់ហ្វេសប៊ុកនិយាយភាសាខ្មែរជាច្រើន បានបញ្ចេញមតិយោបល់ និងប្រតិកម្មទៅនឹងវីដេអូនេះ។
ខាងក្រោមនេះ គឺជាវីដេអូទាំងស្រុងដែលត្រូវបានបង្ហោះនៅលើបណ្ដាញសង្គមកាលពីថ្ងៃទី០៤ ខែកុម្ភៈ ឆ្នាំ២០២៣ ជាមួយសំណេររៀបរាប់ថា “ផ្ញើជូនសម្ដេចៗស្ដាប់ដោយប្រើខួរពិចារណា និយាយត្រូវម្ដង”។
ការត្រួតពិនិត្យការពិត
Fact Crescendo Cambodia បានចាប់ផ្ដើមត្រួតពិនិត្យ និងផ្ទៀងផ្ទាត់ទៅលើការអះអាងខាងលើនេះតាមរយៈការពិនិត្យមើល និងផ្ទៀងផ្ទាត់ឡើងវិញនូវសម្ដីដើមទាំងស្រុងរបស់អ្នកចម្រៀង ម៉េង កែវពេជ្ជតា ដែលនាំឱ្យយើងរកឃើញការពិតដូចខាងក្រោមនេះ។
នៅក្នុងទំព័រហ្វេសប៊ុកផ្លូវការរបស់នាង យើងបានរកឃើញវីដេអូមានរយៈពេលដល់ទៅជាង៤ម៉ោង ដែលអ្នកស្រី ម៉េង កែវពេជ្ជតា បានផ្សាយផ្ទាល់កាលពីថ្ងៃសុក្រសប្ដាហ៍មុន។
នៅត្រង់នាទី ១២ នៃវីដេអូផ្សាយផ្ទាល់នោះ យើងរកឃើញថា តារាចម្រៀងស្រីជើងចាស់រូបនេះ បាននិយាយរិះគន់ការដឹកនាំរបស់ថ្នាក់ដឹកនាំនៃសមាគមអ្នកសិល្បៈ ពោលមិនមែនជាការរិះគន់ទៅដល់ការដឹកនាំប្រទេសរបស់ថ្នាក់ដឹកនាំបច្ចុប្បន្ននោះឡើយ។
សូមស្ដាប់វីដេអូទាំងស្រុងរបស់អ្នកស្រី ម៉េង កែវពេជ្ជតា ដែលផ្សាយផ្ទាល់នៅលើទំព័រហ្វេសប៊ុកផ្លូវការរបស់អ្នកស្រីកាលពីថ្ងៃទី០២ ខែកុម្ភៈ ឆ្នាំ២០២៤។
ឆ្លើយតបនឹង Fact Crescendo Cambodia តាមរយៈប្រព័ន្ធផ្ញើសារតាមបណ្ដាញសង្គម អ្នកស្រី ម៉េង កែវពេជ្ជតា បញ្ជាក់ថា ការរិះគន់របស់អ្នកស្រីនៅក្នុងវីដេអូនោះ មិនបានសំដៅទៅលើថ្នាក់ដឹកនាំប្រទេសនោះឡើយ។ អ្នកស្រីបញ្ជាក់បន្ថែមថា អ្នកស្រីនិយាយរិះគន់ការដឹកនាំរបស់ថ្នាក់ដឹកនាំសមាគមអ្នកសិល្បៈកម្ពុជា។
សន្និដ្ឋាន
Fact Crescendo Cambodia បានរកឃើញថា ការអះអាងដូចរៀបរាប់ខាងលើនេះ មិនត្រឹមត្រូវនោះឡើយ។ តារាចម្រៀងជើងចាស់ អ្នកស្រី ម៉េង កែវពេជ្ជតា បាននិយាយរិះគន់ដល់ថ្នាក់ដឹកនាំសមាគមសិល្បករកម្ពុជា មិនមែនរិះគន់ថ្នាក់ដឹកនាំប្រទេសនាពេលបច្ចុប្បន្ននេះទេ។
Title:តារាចម្រៀង ម៉េង កែវពេជ្ជតា និយាយរិះគន់ថ្នាក់ដឹកនាំប្រទេស តើជាការពិតឬទេ?
Written By: Jay UdomResult: Misleading