បុរស​ជន​ជាតិ​ចិន​មិន​បាន​រត់​គេច​ពី​មណ្ឌល​ចត្តាឡីស័ក​នៅ​ភ្នំពេញ​ទេ

False Medical

កម្ពុជា​កំពុង​តែ​ប្រយុទ្ធ​​នឹង​ការ​ឆ្លង​រីករាល​ដាល​នៃ​វីរុស​កូរ៉ូណា​ចាប់​តាំង​ពី​រដ្ឋាភិបាល​បាន​ប្រកាស​វិធានការ​បន្ទាន់​ដើម្បី​ទប់​ស្កាត់​ការ​ផ្ទុះ​ឡើង​នៃ​ការ​ឆ្លង​ក្នុង​សហគមន៍​លើក​ទី​៣​នៅ​ថ្ងៃ​ទី​២០ ខែ​កុម្ភៈ។ ការ​ផ្ទុះ​ឡើង​នៃ​ការ​ឆ្លង​ក្នុង​សហគមន៍​លើក​ទី​៣​នេះ បាន​កើត​ឡើង បន្ទាប់​ពី​ការ​រក​ឃើញជន​ជាតិ​ចិន​មួយ​ក្រុម​ធំដែល​រស់​នៅ​តំបន់​ពាណិជ្ជកម្ម​កោះ​ពេជ្រ បាន​ឆ្លង​វីរុស​កូរ៉ូណា។

កម្ពុជា​រក​ឃើញ​មនុស្ស​ដល់​ទៅ ៧៦៦​នាក់ បាន​ឆ្លង​វីរុស​កូរ៉ូណា ក្នុង​នោះ ២៥៩​នាក់​ បាន​ឆ្លង​វីរុស​នេះ​ជាប់​ពាក់​ព័ន្ធ​នឹង​​ការ​ឆ្លង​ក្នុង​សហគមន៍លើក​ទី​៣ ហើយ​ភាគ​ច្រើន​ជា​ជន​ជាតិ​ចិន នេះតាម​របាយការណ៍​របស់​ក្រសួង​សុខាភិបាល​នៅ​ថ្ងៃ​ទី​២៧ ខែ​កុម្ភៈ។ ជា​លទ្ធផល ការ​អះ​អាង និង​ពាក្យ​មិន​ត្រឹម​ត្រូវ​ជាច្រើន​ជាប់​ពាក់​ព័ន្ធ​នឹង​ជន​ជាតិ​ចិន ត្រូវ​បាន​ចែក​រំលែក​នៅ​លើ​ហ្វេសប៊ុក តេឡេក្រាម និង​បណ្ដាញ​សង្គម​ដទៃ​ទៀត​នៅ​កម្ពុជា។

ករណី​មួយ​បែប​នេះ ការ​ត្រួត​ពិនិត្យ​របស់ FC Cambodia បាន​បញ្ជាក់​ថា ការ​បង្ហោះ​សារ​ដែល​និយាយ​ថា បុរស​ជន​ជាតិ​បាន​រត់​គេច​ពី​មណ្ឌល​ចត្តាឡីស័ក​នៅ​ភ្នំពេញ មិន​ត្រឹម​ត្រូវ​នោះ​ទេ។

ការ​អះ​អាង​លើ​បណ្ដាញ​សង្គម (Social Media Claims)

​នៅ​ថ្ងៃ​ទី​២៦ ខែ​កុម្ភៈ រូបថត​នៃ​បុរស​ជន​ជាតិន​ចិនរួម​ជាមួយ​លិខិត​ឆ្លង​ដែន​ផង​ដែរ ត្រូវ​បាន​អ្នក​ប្រើ​ប្រាស់​ហ្វេសប៊ុក​ម្នាក់​ចែក​រំលែក ដោយ​អះ​អាង​ថា បុរស​ជន​ជាតិ​ចិន​នោះ កំពុង​រត់​គេច​ពី​ការ​ដាក់​ឱ្យ​ធ្វើ​ចត្តាឡីស័ក បន្ទាប់​ពី​ធ្វើ​តេស្ត​ឆ្លង​ជំងឺ​កូវីដ​១៩។ អ្នក​ប្រើ​ប្រាស់​ហ្វេសប៊ុក​ដដែល​នេះ បាន​ជំរុញ​ទៅ​ពលរដ្ឋ​កម្ពុជា​ឱ្យ​ប្រុង​ប្រយ័ត្ន​ចំពោះ​បុរស​ជន​ជាតិ​ចិន ហើយ​រាយការណ៍​ប្រាប់​ទៅ​អាជ្ញាធរ​មូលដ្ឋាន ប្រសិន​បើ​ប្រទះ​ឃើញ​បុរស​ចិន​រូប​នេះ​នៅ​ទីណា។

សារ​របស់​អ្នក​ប្រើ​ប្រាស់​ហ្វេសប៊ុក​​ដែល​បង្ហោះ​នៅ​ថ្ងៃ​ទី​២៦ ខែ​កុម្ភៈ បាន​រៀបរាប់​ថា «សូម​ប្រុង​ប្រយ័ត្ន​ចំពោះ​បុគ្គល​រូប​នេះ គាត់​វិជ្ជមាន​កូវីដ ហើយ​បាន​គេច​ចេញ​ពី​មណ្ឌល​ចត្តាឡីស័ក​ភ្នំពេញ»។

អ្នក​ប្រើ​ប្រាស់​ហ្វេសប៊ុក​រាប់​ពាន់​នាក់ បាន​បញ្ចេញ​ប្រតិកម្ម​លាយ​ឡំ​ជាមួយ​មតិ​យោបល់​ផ្សេងៗ​ឆ្លើយ​តប​នឹង​សារ​បង្ហោះ​នេះ។ ការ​អះ​អាង​នេះ ក៏​ត្រូវ​បាន​ចែក​រំលែក​ទៅ​ក្រុម​ផ្សេងៗ​ទៀត ដែល​មាន​សមាជិក​រាប់​រយន​ពាន់​នាក់។

Facebook Post | Archived Link

Facebook Post |Archived Link

ការ​ត្រួត​ពិនិត្យ​ការ​ពិត (Fact Check )

យើង​ចាប់​ផ្ដើម​​ផ្ទៀង​ផ្ទាត់​លើ​ការ​អះ​អាង​នេះ​តាម​រយៈ​ការ​ជជែក​ជាមួយ​ប្រភព​ដ៏​គួរ​ឱ្យ​ទុក​ចិត្ត​នៅ​ក្រសួង​សុខាភិបាល និង​រដ្ឋបាល​ខេត្ត​កែប។

លោក សោម ចិន្ដា ប្រធាន​មន្ទីរ​ទេសចរណ៍​ខេត្ត​កែប បាន​ប្រាប់ FC Cambodia នៅ​ថ្ងៃ​ទី២៧​កុម្ភៈ​ថា មន្ត្រី​ម្នាក់​របស់​លោក​ដែល​កាន់​ទំព័រ​ហ្វេសប៊ុក​របស់​អង្គភាព បាន​បង្ហោះ​សារ​នេះ​ដោយ​មិន​មាន​ការ​ផ្ទៀង​ផ្ទាត់​នោះ​ឡើយ បន្ទាប់​ពី​ស្ដាប់​សារ​ជា​សំឡេង​ដែល​ត្រូវ​បាន​ចែក​រំលែក​នៅ​ក្នុង​ក្រុម​តេឡេក្រាម។ លោក​បន្ថែម​ថា បន្ទាប់​ពី​បាន​ដឹង​ពី​បញ្ហានេះ មន្ទីរ​ទេសចរណ៍​ខេត្ត​កែប បាន​ដក​ចេញ​នូវ​សារ​ដែល​បង្ហោះ​នោះ ហើយ​ជំនួស​មក​វិញ​នូវ​សារ​កែ​តម្រូវ។

អ្នកស្រី ឱ វណ្ណឌីន អ្នក​នាំ​ពាក្យ​ក្រសួង​សុខាភិបាល បាន​ប្រាប់​ក្រុម​អ្នកសារព័ត៌មាន​តាមគ្រុប​​តេឡេក្រាម​នៅ​ថ្ងៃ​ទី​២៦​កុម្ភៈ​ថា ការ​បង្ហោះ​សារ​នោះ «ជា​ដំណឹង​ក្លែងក្លាយ» ដោយ​អ្នកស្រី​បញ្ជាក់​ថា បុរស​ជន​ជាតិ​ចិន​នោះ ស្ថិត​នៅ​ក្នុង​មណ្ឌល​ចត្តាឡីស័ក​នៅ​ភ្នំពេញ​នៅ​ពេល​ដែល​មាន​ការ​បង្ហោះ​សារ​បែប​នោះ។

វីដេអូ​ឃ្លីប​ដែល​បង្ហោះ​ដោយ​ការី​និពន្ធ​សារព័ត៌មាន Cambodia China Times បង្ហាញ​បុរស​ជន​ជាតិ​ចិនឈ្មោះ Zhou Daoqing កាន់​លិខិត​ឆ្លង​ដែន​របស់​គាត់​ស្ថិត​នៅ​ក្រោយ​ខ្សែ​ពណ៌​លឿង​នៅ​ក្នុង​មណ្ឌល​ចត្តាឡីស័ក​មួយ។

សារព័ត៌មាន Khmer Times បាន​ចេញផ្សាយ​ថា «ក្រសួង​សុខាភិបាល​កម្ពុជា នៅ​យប់​ថ្ងៃ​ទី​២៦ ខែ​កុម្ភៈ ឆ្នាំ​២០២១ បាន​ប្រកាស​ច្រាន​ចោល​ភ្លាមៗ​នូវ​ព័ត៌មាន​ដែល​ចែក​រំលែក​នៅ​លើ​បណ្ដាញ​សង្គម​ថា បុរស​ជន​ជាតិ​ម្នាក់​បាន​រត់​គេច​ពី​មណ្ឌល​ចត្តាឡីស័ក​នៅ​ភ្នំពេញ»

Khmer Times’ Facebook Post | Archived Link

សន្និដ្ឋាន (Conclusion)

FC Cambodia រក​ឃើញ​ថា សារ​ដែល​បង្ហោះ​ខាង​លើ មិន​ត្រឹម​ត្រូវ​ទេ។ បុរស​ជន​ជាតិ​ចិន​រូប​នោះ មិន​បាន​រត់​គេច​ពី​មណ្ឌល​ចត្តាឡីស័ក​នោះ​ឡើយ ក្រោយ​ពីរក​ឃើញ​ឆ្លង​វីរុស​កូរ៉ណា។

Avatar

Title:បុរស​ជន​ជាតិ​ចិន​មិន​បាន​រត់​គេច​ពី​មណ្ឌល​ចត្តាឡីស័ក​នៅ​ភ្នំពេញ​ទេ

Fact Check By: Jay Udom 

Result: False

Leave a Reply

Your email address will not be published.