តើរដ្ឋាភិបាលវៀតណាមអនុញ្ញាតខ្មែរក្រោមលើកទង់តាមផ្ទះមែនឬទេ?

រឿងរ៉ាវខ្មែរក្រោមនៅភាគខាងត្បូងវៀតណាមសព្វថ្ងៃនេះ នៅតែជាប្រធានបទនៃការជជែកនៅលើបណ្ដាញសង្គមដដែល។ នៅដើមខែវិច្ឆិកានេះ ព័ត៌មានមួយត្រូវបានផ្សព្វផ្សាយថា អាជ្ញាធរវៀតណាមបានអនុញ្ញាតឱ្យលើកទង់តំណាងខ្មែរក្រោមនៅតាមផ្ទះ។ ព័ត៌មាននេះ ត្រូវបានចែករំលែកព្រោងព្រាតលើបណ្ដាញសង្គម និងទទួលបានមតិយោបល់ចម្រុះបែបផងដែរ។ ទោះជាយ៉ាងណា យើងរកឃើញថា ព័ត៌មាននេះមិនត្រឹមត្រូវនោះឡើយ។

ការអះអាងលើបណ្ដាញសង្គម

ការអះអាងមួយដែលផុសផុលនៅលើបណ្ដាញសង្គមកាលពីដើមខែវិច្ឆិកានេះ បានលើកឡើងថា អាជ្ញាធរវៀតណាមបានអនុញ្ញាតឱ្យពលរដ្ឋខ្មែរកម្ពុជាក្រោម លើកទង់ជាតិកម្ពុជាក្រោមនៅក្នុងផ្ទះរបស់ពួកគេ។

ការអះអាងនេះ ទទួលបានការចែករំលែកយ៉ាងព្រោងព្រាត និងមតិយោបល់ចម្រុះបែបពីសំណាក់អ្នកប្រើប្រាស់បណ្ដាញសង្គមនិយាយភាសាខ្មែរ។

ខាងក្រោមនេះ គឺជាវីដេអូដែលផ្ដាមចេញពីការអះអាងនៅលើបណ្ដាញសង្គមកាលពីថ្ងៃទី០២ ខែវិច្ឆិកា ឆ្នាំ២០២៣ ដែលរៀបរាប់ថា «ជោគជ័យធំហើយខ្មែរក្រោម! អាជ្ញាធរយួនអនុញ្ញាតឱ្យខ្មែរក្រោមអាចលើកទង់ជាតិរបស់ខ្លួនៅក្នុងផ្ទះបានដោយគ្មានបញ្ហា»។

Facebook Post | Archived Link

ការអះអាងដដែលនេះ ក៏ត្រូវបានបង្ហោះដោយអ្នកប្រើប្រាស់ហ្វេសប៊ុកមួយទៀតនៅប៉ុន្មានថ្ងៃក្រោយមក ហើយក៏ទទួលបានការចែករំលែកបន្ត និងមតិយោបល់ជាច្រើនផងដែរ។

ខាងក្រោមនេះ គឺជារូបភាពផ្ដាមចេញពីការអះអាងដែលបង្ហោះនៅលើបណ្ដាញសង្គមហ្វេសប៊ុកកាលពីថ្ងៃទី០៦ ខែវិច្ឆិកាជាមួយសំណេររៀបរាប់ថា «ជោគជ័យធំហើយខ្មែរក្រោម! អាជ្ញាធរយួនអនុញ្ញាតឱ្យខ្មែរក្រោមអាចលើកទង់ជាតិរបស់ខ្លួននៅក្នុងផ្ទះបានដោយគ្មានបញ្ហា»។

Facebook Post | Archived Link

គេអាចរកមើលការអះអាងដដែលនេះដែលត្រូវបានបង្ហោះលើបណ្ដាញសង្គមដោយអ្នកប្រើប្រាស់ហ្វេសប៊ុកដទៃទៀតតាមរយៈតំណភ្ជាប់នៅទីនេះ ឬតាមរយៈតំណភ្ជាប់មួយទៀតនៅទីនេះ ឬតាមរយៈតំណភ្ជាប់មួយនៅទីនេះ (archived)។

FACT CHECK

Fact Crescendo Cambodia បានចាប់ផ្ដើមត្រួតពិនិត្យ និងផ្ទៀងផ្ទាត់ទៅលើការអះអាងខាងលើនេះតាមរយៈការសាកសួរទៅប្រភពមួយចំនួនដែលពាក់ព័ន្ធនឹងការអះអាងនេះ និងការស្វែងរកព័ត៌មានចេញពីប្រភពរដ្ឋាភិបាលវៀតណាមពាក់ព័ន្ធនឹងរឿងនេះ ដែលនាំឱ្យយើងរកឃើញការពិតដូចខាងក្រោមនេះ។

ដើម្បីផ្ទៀងផ្ទាត់ទៅលើព័ត៌មាន Fact Crescendo Cambodia បានសាកសួរទៅប្រភពពាក់ព័ន្ធនានា ក្នុងនោះមានសមាគមខ្មែរកម្ពុជា និងពលរដ្ឋខ្មែរក្រោមដែលរស់នៅភាគខាងត្បូងវៀតណាមនាពេលសព្វថ្ងៃនេះ។

អគ្គលេខាធិការសមាគមខ្មែរកម្ពុជាក្រោមដើម្បីសិទ្ធិមនុស្ស និងអភិវឌ្ឍន៍ លោក សឺន ជុំជួន បានប្រាប់ Fact Crescendo Cambodia កាលពីសប្ដាហ៍មុនថា រឿងនេះគ្រាន់តែករណីមួយដាច់ដោយឡែកដែលបានកើតឡើងអំឡុងពេលប្រារព្ធពិធីបុណ្យសែនដូនតា ឬភ្ជុំបិណ្ឌនៅឯដែនដីកម្ពុជា ប៉ុន្តែ លោកថា គ្មានសេចក្ដីប្រកាសផ្លូវការណាមួយចេញដោយរដ្ឋាភិបាលវៀតណាមនោះឡើយ។

អ្នកការពារសិទ្ធិមនុស្សខ្មែរកម្ពុជាក្រោមរូបនេះ អះអាងទៀតថា រឿងនេះបានបង្កឱ្យមានការយល់ច្រឡំនៅក្នុងចំណោមប្រជាពលរដ្ឋខ្មែរកម្ពុជា និងប្រជាជនកម្ពុជាផងដែរ។

ខាងក្រោមនេះ គឺជាសម្រង់របស់លោក សឺន ជុំជួន ដែលបាបញ្ជាក់ប្រាប់ Fact Crescendo Cambodia តាមរយៈបណ្ដាញតេឡេក្រាមកាលពីសប្ដាហ៍មុន។

Archived

បន្ទាប់ពីមានការអះអាងបែបនេះត្រូវបានផ្សព្វផ្សាយនៅលើបណ្ដាញសង្គម Fact Crescendo Cambodia បានស្វែងរកព័ត៌មានផ្សាយចេញដោយប្រព័ន្ធផ្សព្វផ្សាយប្រទេសវៀតណាម ប៉ុន្តែ គ្មានសេចក្ដីរាយការណ៍ណាមួយនិយាយអំពីករណីនេះឡើយ។

Fact Crescendo Cambodia បានព្យាយាមស្វែងរកមធ្យោបាយទំនាក់ទំនងទៅកាន់ស្ថានទូតវៀតណាមប្រចាំកម្ពុជា ដើម្បីសាកសួរព័ត៌មានលម្អិតជុំវិញបញ្ហានេះផងដែរ ប៉ុន្តែ ពុំអាចទាក់ទងបាននោះឡើយ។

ដើម្បីឈ្វេងយល់កាន់លម្អិតទៅលើការអះអាងនេះ Fact Crescendo Cambodia បានទាក់ទងទៅកាន់ពលរដ្ឋខ្មែរក្រោមម្នាក់ឈ្មោះ គឹម ចេង ដែលរស់នៅក្នុងនិគមថ្កូវ ស្ថិតក្នុងខេត្តព្រះត្រពាំង នៃភាគខាងត្បូងវៀតណាមសព្វថ្ងៃ។

លោក គឹម ចេង បានប្រាប់ Fact Crescendo Cambodia កាលពីសប្ដាហ៍មុនថា នៅអំឡុងពេលពលរដ្ឋវៀតណាមដើមកំណើតខ្មែរក្រោមប្រារព្ធពិធីបុណ្យភ្ជុំបិណ្ឌនោះ ពួកគេបានលើកទង់តំណាងខ្មែរក្រោមនៅតាមផ្ទះ ប៉ុន្តែ អាជ្ញាធរវៀតណាមនៅក្នុងខេត្តព្រះត្រពាំង បានចុះទៅហាមឃាត់។

ទោះជាយ៉ាងណា លោក គឹម ចេង បញ្ជាក់បន្ថែមថា បន្ទាប់ពីអ្នកភូមិបានតវ៉ា អាជ្ញាធរវៀតណាមបានអនុញ្ញាតឱ្យពលរដ្ឋក្នុងនិគមថ្កូវលើកទង់ខ្មែរក្រោមនៅក្នុងផ្ទះ។

លោក គឹម ចេង ប្រាប់បន្ថែមទៀតថា ករណីនេះកើតឡើងតែនៅនិគមថ្កូវប៉ុណ្ណោះ ប៉ុន្តែ គ្មានសេចក្ដីប្រកាសផ្លូវការណាមួយចេញពីរដ្ឋាភិបាលវៀតណាមនោះឡើយ។

Archived

Fact Crescendo Cambodia ក៏បានស្វែងរកព័ត៌មាន ឬសេចក្ដីរាយការណ៍ផ្លូវការចេញផ្សាយដោយប្រព័ន្ធផ្សព្វផ្សាយណាមួយរបស់ប្រទេសវៀតណាមផងដែរ ប៉ុន្តែ យើងរកពុំឃើញព័ត៌មាន ឬសេចក្ដីរាយការណ៍បែបនេះនោះឡើយចាប់តាំងពីដើមខែវិច្ឆិកានេះ។

CONCLUSION

Fact Crescendo Cambodia បានរកឃើញថា ការអះអាងដូចរៀបរាប់ខាងលើនេះ មិនត្រឹមត្រូវនោះឡើយ។ តាមការពិត រដ្ឋាភិបាលវៀតណាមពុំបានចេញសេចក្ដីប្រកាសផ្លូវការណាមួយអនុញ្ញាតឱ្យពលរដ្ឋវៀតណាមដើមកំណើតខ្មែរលើកទង់តំណាងខ្មែរក្រោមនៅតាមផ្ទះនោះឡើយ។ ព័ត៌មានដែលត្រូវបានផ្សព្វផ្សាយនៅលើបណ្ដាញសង្គមដូចដែលត្រូវបានរៀបរាប់ខាងលើនេះ គឺគ្រាន់តែជាករណីមួយដាច់ដោយឡែកតែប៉ុណ្ណោះ។