ខណៈដែលកម្ពុជាកំពុងស្ថិតលើដំណើរឆ្ពោះទៅរកការបោះឆ្នោតថ្នាក់ក្រោមជាតិនៅឆ្នាំក្រោយ និងការបោះឆ្នោតជាតិនៅឆ្នាំ២០២២ខាងមុខនោះ ការចោទប្រកាន់ពីគណបក្សនយោបាយមួយទៅលើគណបក្សនយោបាយមួយទៀត ក៏ចាប់ផ្ដើមកើតឡើងវិញជាបណ្ដើរៗហើយ។
ទន្ទឹមគ្នានេះ មានរូបថតមួយបង្ហាញអ្នកស្រី ប៊ុន រ៉ានី ភរិយារបស់លោកនាយករដ្ឋមន្ត្រី ហ៊ុន សែន ដែលជាមេដឹកនាំគណបក្សប្រជាជនកម្ពុជាកំពុងកាន់អំណាច ឈរថតកៀកបង្កើយនឹងបុរសម្នាក់ ដែលជាអតីតមេដឹកនាំវៀតណាម។
ទោះជាយ៉ាងណា ការផ្ទៀងផ្ទាត់របស់យើង បានបង្ហាញថា រូបថតនោះ មិនត្រឹមត្រូវនោះឡើយ ហើយវាត្រូវបានកែច្នៃមុននឹងបង្ហោះចែករំលែកនៅលើបណ្ដាញសង្គម។
ការអះអាងលើបណ្ដាញសង្គម
កាលពីថ្ងៃទី៧ ខែមេសា គណនីហ្វេសប៊ុកមួយ បានបង្ហោះរូបថតមួយក្នុងចំណោម ៥សន្លឹក ដែលបង្ហាញអ្នកស្រី ប៊ុន រ៉ានី ដែលជាភរិយារបស់លោក ហ៊ុន សែន នាយករដ្ឋមន្ត្រីកម្ពុជាបច្ចុប្បន្ន បានឈរជាប់នឹងបុរសម្នាក់ ដែលមានឈ្មោះថា ឡេ ឌឹកថូ (Lê Đức Thọ)។
សំណេរប៉ុស្តិ៍នោះ បានលើកឡើងថា វៀតណាមបង្កាត់ពូជសាសន៍ជាមួយខ្មែរ ដើម្បីបង្កើតអ្នកបន្តវេនដឹកនាំប្រទេសកម្ពុជា ដែលមានន័យថា អ្នកស្រី ប៊ុន រ៉ានី គឺជាអតីតភរិយារបស់លោក ឡេ ឌឹកថូ ហើយថា ពួកគាត់មានកូនប្រុសម្នាក់ គឺលោក ហ៊ុន ម៉ាណែត ដែលជាមេបញ្ជាការកងទ័ពជើងគោកនាពេលបច្ចុប្បន្ននេះ។
រូបភាពផ្ដាមចេញប៉ុស្តិ៍នៃគណនីហ្វេសប៊ុកនោះ សរសេរថា «យួនបន្លំធ្វើខ្មែរ បង្កាត់ពូជសាសន៍យួនជាមួយសាសន៍ខ្មែរ»។
ការពិនិត្យការពិត
Fact Crescendo Cambodia បានចាប់ផ្ដើមផ្ទៀងផ្ទាត់នូវរូបថតនេះតាមរយៈកម្មវិធីស្រាវជ្រាវរូបថត ដែលនាំឱ្យយើងជួបរូបថតមួយចំនួនពាក់ព័ន្ធ និងតាមរយៈការស្នើសុំរូបថតដើមពីខុទ្ទកាល័យលោកនាយករដ្ឋមន្ត្រី ហ៊ុន សែន។
អ្នកស្រី ប៊ុន រ៉ានី បានថតរូបជាមួយស្វាមីរបស់គាត់គឺលោកនាយករដ្ឋមន្ត្រី ហ៊ុន សែន នៅអំឡុងដំណើរទស្សនកិច្ចទៅកាន់ប្រទេសម៉ាឡេស៊ីកាលពីឆ្នាំ២០១៦កន្លងមក។
ថ្វីបើអ្នកស្រី ប៊ុន រ៉ានី ស្ថិតក្នុងសម្លៀកបំពាក់ខុសគ្នាមែន ហើយរូបថតមួយគ្មានកាសែតនៅលើតុ ហើយរូបថតមួយទៀតមានកាសែតនៅលើតុមែន ប៉ុន្តែ ទិដ្ឋភាពផ្នែកខាងក្រោយនៃរូបថតទាំងពីរ បង្ហាញនូវផ្ទាំងគំនូផ្កា ២ផ្ទាំងដូចគ្នា។
ក្រៅពីរូបថតមួយសន្លឹកខាងលើនេះ យើងក៏បានរកឃើញរូបថតមួយសន្លឹកផ្សេងទៀតនៃគូស្វាមីភរិយាមេដឹកនាំកម្ពុជា ដែលត្រូវបានចុះផ្សាយដោយសារព័ត៌មានអនឡាញនគរដ្រេហ្គន នៅដើមខែមិថុនា ឆ្នាំ២០១៦កន្លងមក។ រូបថតពីរសន្លឹកនោះ បង្ហាញលោកនាយករដ្ឋមន្ត្រី ហ៊ុន សែន និងភរិយាលោក ថតរូបរួមគ្នា ដែលមានផ្ទាំងគំនូផ្កា ២ផ្ទាំង ដែលត្រូវបានផ្ដិតជាមួយនៅផ្នែកខាងក្រោយនៃរូបថតគូស្វាមីភរិយាមេដឹកនាំកម្ពុជារូបនេះ។
យើងក៏បានរកឃើញរូបថតដើមរបស់អតីតមេដឹកនាំវៀតណាម លោក ឡេ ឌឹកថូ ផងដែរ ដែលមួយផ្នែកខាងក្បាលរបស់លោកត្រូវបានកាត់យកមកភ្ជាប់នឹងរូបថតរបស់លោកនាយករដ្ឋមន្ត្រី ហ៊ុន សែន។
លោក ឡេ ឌឹកថូ ដែលមានឈ្មោះពីកំណើតថា ផាន ឌីញខៃ (Phan Đình Khải) គឺជាអតីតមេដឹកនាំជាន់ខ្ពស់មួយរបស់វៀតណាម ដែលត្រូវបានរដ្ឋាភិបាលប្រទេសតែងតាំងឱ្យទទួលខុសត្រូវលើការជួយគាំទ្រដល់ចលនាតស៊ូប្រឆាំងនឹងរបបខ្មែរក្រហម ហើយជួយរៀបចំរដ្ឋាភិបាលនៃរបបសាធារណរដ្ឋប្រជាមានិតកម្ពុជានៅចន្លោះឆ្នាំ១៩៧៩ រហូតដល់ឆ្នាំ១៩៩០។ កើតនៅក្នុងឆ្នាំ១៩១១ មេដឹកនាំវៀតណាមរូបនេះ បានទទួលមរណភាពនៅឆ្នាំ១៩៩០ នៅក្នុងជន្មាយុ ៧៩ឆ្នាំ។
ឆ្លើយតបនឹងការស្នើសុំពី Fact Crescendo Cambodia ខុទ្ទកាល័យលោកនាយករដ្ឋមន្ត្រី ហ៊ុន សែន ក៏បានបញ្ជូនរូបថតច្បាប់ដើមដើម្បីបញ្ជាក់ផងដែរថា រូបថតសខ្មៅនោះ ត្រូវបានកាត់តមុននឹងត្រូវបានបង្ហោះចែករំលែកនៅលើបណ្ដាញទំនាក់ទំនងសង្គម។
សន្និដ្ឋាន
Fact Crescendo Cambodia បានរកឃើញថា រូបថតដែលត្រូវបានបង្ហោះចែករំលែកនៅលើបណ្ដាញសង្គមដូចដែលបានរៀបរាប់ខាងលើនេះ មិនត្រឹមត្រូវនោះឡើយ។ រូបថតអតីតមេដឹកនាំវៀតណាម លោក ឡេ ឌឹកថូ ត្រូវបានកាត់តយកមកភ្ជាប់ជាមួយអ្នកស្រី ប៊ុន រ៉ានី ភរិយារបស់លោកនាយករដ្ឋមន្ត្រី ហ៊ុន សែន។ ការពិត រូបថតច្បាប់ដើម គឺជារូបថតលោកនាយករដ្ឋមន្ត្រី ហ៊ុន សែន និងភរិយារបស់លោក។
Title:រូបថតលោកនាយករដ្ឋមន្ត្រី ហ៊ុន សែន និងភរិយា ត្រូវបានកាត់តភ្ជាប់នឹងអតីតមេដឹកនាំវៀតណាម
Fact Check By: Jay UdomResult: Altered
