- >>
- FALSE
Fact Check: អ្នកស្រី ស៊ុយ សុផាន ទទួលមរណភាពមិនមែនដោយសារការចាក់វ៉ាក់សាំងទេ
យុទ្ធនាការចាក់វ៉ាក់សាំងបង្ការមេរោគកូវីត១៩នៅក្នុងប្រទេសកម្ពុជា បានកើតមានអស់រយៈពេលជាង ២ខែមកហើយ ចំពេលដែលកម្ពុជាកំពុងព្យាយាមទប់ស្កាត់កំណើននៃការឆ្លងរីករាលដាលនៃមេរោគកូវីដ១៩ ដែលភាគច្រើនពាក់ព័ន្ធនឹងការឆ្លងក្នុងសហគមន៍ ២០កុម្ភៈ។
ខណៈដែលយុទ្ធនាការចាក់វ៉ាក់សាំងត្រូវបានរដ្ឋាភិបាលជំរុញឲ្យបង្កើនល្បឿននោះ ព័ត៌មានមរណភាពរបស់អ្នកស្រី ស៊ុយ សុផាន ដែលជាអគ្គនាយកក្រុមហ៊ុន ផានអ៊ីម៉ិច ត្រូវបានគេអះអាងថា បណ្ដាលមកពីការចាក់វ៉ាក់សាំងស៊ីណូហ្វាម ដែលត្រូវបានផលិតឡើងដោយប្រទេសចិន និងត្រូវបានរដ្ឋាភិបាលផ្ដល់ជាជំនួយមកដល់រដ្ឋាភិបាលកម្ពុជា។
ទោះយ៉ាងណា ការផ្ទៀងផ្ទាត់របស់ Fact Crescendo Cambodia បានបង្ហាញថា ការអះអាង និងផ្សព្វផ្សាយនោះ គឺមិនត្រឹមត្រូវទេ។
ការអះអាងលើបណ្តាញសង្គម
កាលពីប៉ុន្មានថ្ងៃកន្លងទៅនេះ អ្នកប្រើបណ្តាញហេ្វសប៊ុកម្នាក់ បានអះអាងថា អ្នកស្រី ស៊ុយ សុផាន ស្លាប់ដោយសារតែការចាក់វ៉ាក់សាំងចិនស៊ីណូហ្វាម ដើម្បីបង្ការជំងឺកូវីត១៩។ អ្នកប្រើហ្វេសប៊ុករូបនេះ បានអះអាងបែបនេះដោយមិនបានបញ្ជាក់ប្រភពច្បាស់លាស់នោះឡើយ។
ការអះអាងដោយអ្នកប្រើបណ្ដាញសង្គមហ្វេសប៊ុករូបនេះ ត្រូវបានចែករំលែកតៗគ្នាជាច្រើនដង និងមានមតិយោបល់ចម្រុះគ្នាពីសំណាក់អ្នកប្រើបណ្ដាញសង្គមហ្វេសប៊ុកនិយាយភាសាខ្មែរ។
រូបភាពផ្ដាមពីប៉ុស្តិ៍របស់អ្នកប្រើហ្វេសបុក បានរៀបរាប់ថា «មិនយល់ទេ ក្រោយពីចាក់វ៉ាក់សាំងការពារកូវីដ១៩ស៊ីណូហ្វាម (Sinopharm) របស់ចិនហើយ នៅតែស្លាប់ជាបន្តបន្ទាប់ទៀត»។
Facebook Post | Archived Link
ការត្រួតពិនិត្យការពិត
Fact Crescendo Cambodia បានចាប់ផ្តើមត្រួតពិនិត្យ និងរកការបញ្ជាក់ពីមូលហេតុនៃការស្លាប់របស់អ្នកស្រី ស៊ុយ សុផាន ដែលបាននាំឲ្យយើងទៅដល់ប្រភព និងស្ថាប័នមួយចំនួនដែលមានការជាប់ពាក់ព័ន្ធ និងបកស្រាយទាក់ទងទៅនឹងការអះអាងខាងលើនេះ។
មរណភាពរបស់អ្នកស្រី ស៊ុយ សុផាន ត្រូវបានប្រកាសឱ្យដឹងជាសាធារណៈដោយអ្នកស្រី ហ៊ុន ស៊ីណាត ប្អូនស្រីបង្កើតរបស់លោកនាយករដ្ឋមន្ត្រី ហ៊ុន សែន តាមរយៈសារបង្ហោះនៅលើគណនីហ្វេសបុ៊ុករបស់គាត់។
អ្នកស្រី ស៊ីណាត បានរៀបរាប់ថា អ្នកស្រី ស៊ុយ សុផាន បានទទួលមរណភាពនៅថ្ងៃទី២៩ ខែមីនា ឆ្នាំ២០២១ នៅអាយុ ៦២ឆ្នាំ ដោយសាររោគាពាធ។
សំណេរឆ្លើយតបនឹងអ្នកប្រើហ្វេសប៊ុកម្នាក់ដែលចោទសួរពីមូលហេតុនៃមរណភាពរបស់អ្នកស្រី ស៊ុយ សុផាន នោះ អ្នកស្រី ហ៊ុន ស៊ីណាត បញ្ជាក់ថា អ្នកស្រី សុផាន បានទទួលមរណភាពដោយសារជំងឺមហារីកថ្លើម។
(រូបភាពផ្ដាមចេញពីប៉ុស្តិ៍របស់អ្នកស្រី ហ៊ុន ស៊ីណាត)
បើតាមការផ្សាយដោយទំព័រហ្វេសប៊ុកផ្លូវការរបស់ទូរទស្សន៍ជាតិនៃកម្ពុជា (ទទក) អ្នកនាំពាក្យក្រសួងសុខាភិបាលកម្ពុជា អ្នកស្រី ឱ វណ្ណឌីន បានច្រានចោលការអះអាងខាងលើ ដោយនិយាយថា រូបថតរបស់ស្ត្រីម្នាក់ចាក់វ៉ាក់សាំងដែលត្រូវបង្ហោះភ្ជាប់នឹងមរណភាពរបស់អ្នកស្រី ស៊ុយ សុផាន នោះ មិនមែនជាអ្នកស្រី ស៊ុយ សុផាន នោះឡើយ។
អ្នកស្រី ឱ វណ្ណឌីន បានសរសេរថា «ក្រសួងសុខាភិបាលសូមច្រានចោលទាំងស្រុងនូវការផ្សាយប្រឌិតបែបនេះ។ រូបភាពអ្នកចាក់វ៉ាក់សាំងនេះ មិនមែនជារូបរបស់អ្នកស្រី ស៊ុយ សុផាន នោះទេ»។
រូបថតស្ត្រីម្នាក់អង្គុយទទួលការចាក់វ៉ាក់សាំង ដែលត្រូវបានអះអាងថាជាអ្នកស្រី ស៊ុយ សុផាន នោះ គឺជាអ្នកស្រី អាន្នី សុខ អាន ជាភរិយារបស់លោក សុខ អាន អតីតឧបនាយករដ្ឋមន្ត្រី រដ្ឋមន្ត្រីទទួលបន្ទុកទីស្ដីការគណៈរដ្ឋមន្ត្រី ដែលបានទទួលមរណភាពនៅឆ្នាំ២០១៧កន្លងមក។ អ្នកស្រី អាន្នី មានតួនាទីជាអនុប្រធានកាកបាទក្រហមកម្ពុជា។
សន្និដ្ឋាន
Fact Crescendo Cambodia បានរកឃើញថា ការអះអាងថាអ្នកស្រី ស៊ុយ សុផាន បានទទួលមរណភាពដោយសារតែ ការចាក់វ៉ាក់សាំងការពារជំងឺកូវីត១៩នេះ គឺមិនត្រឹមត្រូវនោះឡើយ។ ការពិតអ្នកស្រី ស៊ុយ សុផាន បានទទួល មរណភាពដោយសារតែជំងឺមហារីកថ្លេីម ដែលជំងឺមួយនេះបានកេីតឡើងទៅលេីអ្នកស្រីជាយូរខែណាស់មកហេីយ។
Title:អ្នកស្រី ស៊ុយ សុផាន ទទួលមរណភាពមិនមែនដោយសារការចាក់វ៉ាក់សាំងទេ
Fact Check By: Kakada SimResult: False
