បន្ទាប់ពីក្រុមហ៊ុនក្នុងស្រុកមួយបានផលិតបទចម្រៀងមួយបទសម្រាប់អបអរព្រឹត្តិការណ៍ SEA Game នោះ រូបថតមួយសន្លឹកដែលបង្ហាញតារាងចម្រៀងកម្ពុជាបួនរូបសម្ដែងនៅក្នុងបទចម្រៀងមួយមានចំណងជើងថា «បំផ្លាញអ្វីដែរខ្មែរមាន» ត្រូវបានបង្ហោះនៅលើបណ្ដាញសង្គម។ រូបថតមួយសន្លឹកនេះ ត្រូវបានចែករំលែកបន្តយ៉ាងព្រោងព្រាតនៅក្នុងរយៈពេលប៉ុន្មានមកនេះ។ ទោះជាយ៉ាងណា យើងរកឃើញថា រូបថតនេះ គឺជារូបភាពកាត់តតែប៉ុណ្ណោះ។
ការអះអាងលើបណ្ដាញសង្គម
រូបភាពមួយសន្លឹកដែលបង្ហាញតារាចម្រៀងល្បីរបស់កម្ពុជាជាមួយសំណេរ«បំផ្លាញអ្វីដែរខ្មែរមាន» ត្រូវបានបង្ហោះព្រោងព្រាតនៅលើបណ្ដាញសង្គមហ្វេសប៊ុកនៅដើមសប្ដាហ៍នេះ ហើយបន្ទាប់មកក៏ទទួលបានការចែករំលែកបន្តដល់ទៅរាប់ពាន់ដងពីសំណាក់អ្នកប្រើប្រាស់ហ្វេសប៊ុក។
រូបភាពនេះ ក៏ទទួលបានការបញ្ចេញមតិយោបល់ដ៏ច្រើន និងប្រតិកម្មចម្រុះបែបផងដែរ បន្ទាប់ពីវាត្រូវបានបង្ហោះនៅលើបណ្ដាញសង្គមនៅក្នុងរយៈពេលប៉ុន្មានថ្ងៃកន្លងមកនេះ។
ខាងក្រោមនេះ គឺជារូបភាពផ្ដាមចេញពីការបង្ហោះនៅលើបណ្ដាញសង្គមដោយអ្នកប្រើប្រាស់ហ្វេសប៊ុកម្នាក់កាលពីថ្ងៃទី០១ ខែឧសភា ឆ្នាំ២០២៣។
រូបភាពក៏ត្រូវបានបង្ហោះនៅលើបណ្ដាញសង្គមពីសំណាក់អ្នកប្រើប្រាស់ហ្វេសប៊ុកដទៃទៀតផង។ សូមមើលការបង្ហោះរូបភាពនេះនៅលើបណ្ដាញសង្គមតាមរយៈតំណភ្ជាប់នៅទីនេះ ១ (archived) ២ (archived) ៣ (archived)។
ការត្រួតពិនិត្យការពិត
Fact Crescendo Cambodia បានត្រួតពិនិត្យ និងផ្ទៀងផ្ទាត់ទៅលើរូបភាពនេះតាមរយៈការដំណើរការ Google Reverse Image Search ដែលនាំឱ្យយើងរកឃើញការពិតដូចខាងក្រោមនេះ។
រូបភាពដែលបង្ហាញតារាចម្រៀងជួរមុខរបស់កម្ពុជាកាន់ដៃគ្នានេះ ត្រូវបានរកឃើញនៅលើទំព័រហ្វេសប៊ុករបស់ផលិតកម្មចម្រៀង Galaxy Navatra ដែលបង្ហោះរូបភាពក្រាហ្វិកនេះកាលពីថ្ងៃទី១០ ខែមេសា ឆ្នាំ២០២៣។
រូបភាពដើមរបស់ផលិតកម្មចម្រៀងមួយនេះ បង្ហាញឱ្យឃើញតារាចម្រៀង ៤រូបរបស់កម្ពុជានៅលើផ្ទាំងមួយដែលផ្សាយនូវចម្រៀងមួយបទមានចំណងជើងថា «CAMBODIAN PRIDE» ដែលផលិតកម្មមួយនេះផលិតឡើងស្របនឹងព្រឹត្តិការណ៍ប្រកួតកីឡាតំបន់អាស៊ីអាគ្នេយ៍លើកទី៣២ (32nd SEA GAME)។
រូបភាពមួយសន្លឹកនេះ ក៏ត្រូវបានបង្ហោះនៅលើបណ្ដាញសង្គមដោយអ្នកប្រើប្រាស់ហ្វេសប៊ុកម្នាក់កាលពីថ្ងៃទី២៤ ខែមីនា ឆ្នាំ២០២៣ ដែលរៀបរាប់ថា រូបថតមួយសន្លឹកនេះ គឺជាការសម្ដែងរបស់តារាចម្រៀងកម្ពុជាសម្រាប់បទចម្រៀងមួយបទមានចំណងជើងថា «ស្រឡាញ់អ្វីដែលខ្មែរមាន»។
ខាងក្រោមនេះ គឺជាការប្រៀបធៀបគ្នារវាងរូបថតដែលត្រូវបានកាត់តឱ្យខុសពីរូបថតដើម និងរូបថតដើមដែលយើងបានរកឃើញនៅលើបណ្ដាញសង្គមផងដែរ។
សន្និដ្ឋាន
Fact Crescendo Cambodia រកឃើញថា រូបភាពដូចដែលត្រូវបានរៀបរាប់ខាងលើនេះ គឺជារូបភាពកាត់។ រូបថតច្បាប់ដើម បង្ហាញក្រុមតារាងចម្រៀងជួរមុខកម្ពុជានៅក្នុងរូបភាពក្រាហ្វិកមួយមានសំណេរ«ស្រឡាញ់អ្វីដែលខ្មែរមាន»របស់ផលិតកម្មចម្រៀង Galaxy Navatra។
Title:រូបថតតារាងចម្រៀងកម្ពុជាក្នុងបទចម្រៀងមួយត្រូវបានកាត់តឱ្យខុសពីចំណងជើងដើម
Fact Check By: Jay UdomResult: Altered
