ក្រោយពីលោក ហ៊ុន ម៉ាណែត ត្រូវបានគណបក្សប្រជាជនកម្ពុជាជ្រើសរើសជាអនាគតនាយករដ្ឋមន្ត្រីកាលពីចុងឆ្នាំមុន ដើម្បីបន្តវេនពីឪពុករបស់លោករួចមក មេញ្ជាការកងទ័ពជើងគោករូបនេះ ក្លាយជាផ្ទាំងស៊ីបនៃការរិះគន់ និងការអះអាងនានា។ ក្នុងនោះ រូបថតមួយសន្លឹកដែលបង្ហាញម្ដាយលោក ហ៊ុន ម៉ាណែត ឈរដាក់ដៃលើស្មារបស់បុរសម្នាក់ ត្រូវបានបង្ហោះលើបណ្ដាញសង្គមជាមួយការអះអាងថា ជារូបថតជាមួយមេដឹកនាំវៀតណាម។ ទោះជាយ៉ាងណា ការផ្ទៀងផ្ទាត់របស់ Fact Crescendo Cambodia រកឃើញថា រូបភាពមួយសន្លឹកនេះ ត្រូវបានកាត់ត។
ការអះអាងលើបណ្ដាញសង្គម
រូបភាពសខ្មៅមួយសន្លឹកដែលបង្ហាញឱ្យឃើញភរិយារបស់លោកនាយករដ្ឋមន្ត្រី ហ៊ុន សែន ឈរដាក់ដៃលើស្មារបស់អតីតមេដឹកនាំវៀតណាម លោក ឡេ ដឹកថូ ហើយមានរូបលោក ហ៊ុន ម៉ាណែត ផងដែរនោះ ត្រូវបានបង្ហោះនៅលើបណ្ដាញសង្គមកាលពីខែមេសាកន្លងមកនេះ។
រូបភាពនេះ ត្រូវបានបង្ហោះភ្ជាប់ជាមួយសំណេរថា «អញ្ចឹងបានដូចគ្នា» ក្នុងន័យថា លោក ហ៊ុន ម៉ាណែត ជាកូនប្រុសរបស់លោកស្រី ប៊ុន រ៉ានី ជាមួយលោក ឡេ ដឹកថូ។
រូបភាពជាមួយសំណេរបែបនេះ ត្រូវបានចែករំលែកបន្តជាង ៤០០ដងពីសំណាក់អ្នកប្រើប្រាស់បណ្ដាញសង្គមនិយាយភាសាខ្មែរ រួមជាមួយការបញ្ចេញមតិចម្រុះបែបផងដែរ។
ខាងក្រោមនេះ គឺជារូបភាពផ្ដាមចេញពីការបង្ហោះនៅលើបណ្ដាញសង្គមដែលសរសេររៀបរាប់ថា «អញ្ចឹងបានដូចគ្នា» កាលពីថ្ងៃទី១០ ខែមេសា ឆ្នាំ២០២២។
ការត្រួតពិនិត្យការពិត
Fact Crescendo Cambodia បានផ្ទៀងផ្ទាត់ទៅលើការអះអាងខាងលើតាមរយៈការដំណើរការ Google Reverse Image Search ដែលនាំឱ្យយើងរកឃើញការពិតដូចខាងក្រោមនេះ។
ក្រុមការងារ Fact Crescendo Cambodia បានត្រួតពិនិត្យលើរូបថតសខ្មៅមួយសន្លឹកនេះម្ដងរួចមកហើយកាលពីខែមេសា ឆ្នាំ២០២១កន្លងមក។
នៅក្នុងដំណើរការផ្ទៀងផ្ទាត់នោះ យើងបានរកឃើញថា រូបថតសខ្មៅមួយសន្លឹកនេះ ត្រូវបានកាត់តពីរូបថតច្បាប់ដើម ដែលជារូបថតរបស់លោកនាយករដ្ឋមន្ត្រី ហ៊ុន សែន និងភរិយារបស់លោក បានថតរូបរួមគ្នាកាលពីខែមិថុនា ឆ្នាំ២០១៦កន្លងមក។
មន្ត្រីខុទ្ទកាល័យរបស់លោកនាយករដ្ឋមន្ត្រី ហ៊ុន សែន ក៏បានផ្ញើរូបថតច្បាប់ដើមមកបញ្ជាក់ជាមួយ Fact Crescendo Cambodia ផងដែរ ដែលរូបថតច្បាប់ដើមនោះ បង្ហាញឱ្យឃើញថា គឺជារូបថតលោក ហ៊ុន សែន និងភរិយារបស់លោក។
ក្រៅពីរូបថតមួយសន្លឹកនេះ យើងក៏បានរកឃើញរូបថតផ្សេងទៀតរបស់លោក ហ៊ុន សែន ថតរួមគ្នាជាមួយភរិយារបស់លោកនៅត្រង់ទីតាំងតែមួយ ដែលមានផ្ទាំងគំនូរផ្កា ២ផ្ទាំងស្ថិតនៅខាងក្រោយ។
រូបថតទាំងនោះ ត្រូវរកឃើញនៅក្នុងសេចក្ដីរាយការណ៍មួយរបស់សារព័ត៌មាន នគរដ្រេហ្គន កាលពីខែមិថុនា ឆ្នាំ២០១៦កន្លងមក ដែលនិយាយអំពីដំណើរទស្សនកិច្ចរបស់លោក ហ៊ុន សែន និងភរិយារបស់លោកនៅឯប្រទេសម៉ាឡេស៊ីនៅក្នុងឆ្នាំនោះ។ សូមមើលរូបថតទាំងនោះតាមរយៈតំណភ្ជាប់នៅទីនេះ ឬតំណភ្ជាប់ត្រូវបានរក្សាទុកនៅទីនេះផងដែរ។
សូមអានអត្ថបទ«រូបថតលោកនាយករដ្ឋមន្ត្រី ហ៊ុន សែន និងភរិយា ត្រូវបានកាត់តភ្ជាប់នឹងអតីតមេដឹកនាំវៀតណាម» ដែលចុះផ្សាយដោយ Fact Crescendo Cambodia កាលពីមេសា ឆ្នាំ២០២១កន្លងមក។
តើលោក ហ៊ុន ម៉ាណែត ជាកូនប្រុសមេដឹកនាំវៀតណាមមែនឬទេ?
ជារឿយៗ លោក ហ៊ុន ម៉ាណែត ដែលជាកូនប្រុសច្បងរបស់លោក ហ៊ុន សែន តែងតែត្រូវបានគេអះអាងថាជាកូនប្រុសមេដឹកនាំវៀតណាម លោក ឡេ ឌឹកថូ (Le Duc Tho) ដែលជាប្រធានទីប្រឹក្សានៃរណសិរ្សសាមគ្គីសង្គ្រោះជាតិកម្ពុជា ហើយក្រោយមកក្លាយជារបបសាធារណរដ្ឋប្រជាមានិតកម្ពុជា បន្ទាប់ពីការដួលរំលំនៃរបបខ្មែរក្រោមនៅដើមឆ្នាំ១៩៧៩។
ទោះជាយ៉ាងណា លោក ហ៊ុន សែន តែងតែច្រានចោលការអះអាងនេះជារឿយៗ ដោយបញ្ជាក់ថា លោក ហ៊ុន ម៉ាណែត ជាកូនប្រុសច្បងរបស់លោកជាមួយភរិយាលោក គឺអ្នកស្រី ប៊ុន រ៉ានី។ សូមមើលសេចក្ដីបដិសេធរបស់លោក ហ៊ុន សែន តាមរយៈតំណភ្ជាប់នៅទីនេះ និងតំណភ្ជាប់មួយនៅទីនេះ។
សន្និដ្ឋាន
Fact Crescendo Cambodia រកឃើញថា រូបថតដូចដែលត្រូវបានរៀបរាប់ខាងលើនេះ មិនត្រឹមត្រូវនោះឡើយ។ រូបថតសខ្មៅមួយសន្លឹកនេះ ត្រូវបានកាត់តជាមួយរូបថតមេដឹកនាំវៀតណាម។ រូបថតច្បាប់ដើម គឺជារូបថតលោកនាយករដ្ឋមន្ត្រី ហ៊ុន សែន ថតរួមគ្នាជាមួយភរិយារបស់លោកអំឡុងដំណើរទស្សនកិច្ចទៅកាន់ប្រទេសម៉ាឡេស៊ីកាលពីឆ្នាំ២០១៦កន្លងមក។
Title:រូបថតភរិយាលោក ហ៊ុន សែន ត្រូវបានកាត់តជាមួយមេដឹកនាំវៀតណាម ឡេ ឌឹកថូ
Fact Check By: Jay UdomResult: Altered
