មន្ត្រីបញ្ជាក់ថា ដាវដែលកសិកររកឃើញនៅខេត្តព្រះវិហារ មានលក់នៅផ្សារទួលទំពូង
កាលពីដើមសប្ដាហ៍នេះ សារព័ត៌មានក្នុងស្រុក និងក្រៅប្រទេស បានចុះផ្សាយថា បំណែករូបចម្លាក់ និងបុរាណវត្ថុរបស់កម្ពុជាជាច្រើនបំណែក នឹងត្រូវបញ្ជូនពីសហរដ្ឋអាមេរិកមកឱ្យកម្ពុជាវិញនាពេលឆាប់ខាងមុខ។ បន្ទាប់ពីមានការចុះផ្សាយបែបនេះ ស្រាប់តែមានការអះអាងមួយលើបណ្ដាញសង្គម លើកឡើងថា ព្រះខ័នរាជ្យបុរាណមួយ ត្រូវបានប្រទះឃើញដោយកសិករម្នាក់នៅខេត្តព្រះវិហារ។ ការអះអាងនេះ ត្រូវបានចែករំលែកបន្តព្រោងព្រាត ហើយទទួលបានប្រតិកម្ម និងមតិយោបល់បែបសារទរពីអ្នកប្រើប្រាស់បណ្ដាញសង្គម។ ទោះជាយ៉ាងណា បន្ទាប់ពីសម្ភាសជាមួយមន្ត្រីជំនាញ យើងរកឃើញថា ការអះអាងនេះមិនត្រឹមត្រូវនោះឡើយ។
ការអះអាងលើបណ្ដាញសង្គម
ការអះអាងមួយដែលផុសផុលនៅលើបណ្ដាញសង្គមរយៈពេលប៉ុន្មានថ្ងៃនេះ បានលើកឡើងថា ព្រះខ័នរាជ្យមួយ ត្រូវបានរកឃើញដោយកសិករមួយរូបនៅឯវាលស្រែមួយកន្លែងនៅក្នុងខេត្តព្រះវិហារនៅឆ្នាំ២០២៣នេះ ហើយបានប្រគល់ទៅឱ្យសមត្ថកិច្ចរួចហើយ។
ការអះអាងនេះ បានបង្ហោះរូបថតចំនួន ៦សន្លឹក ដែលបង្ហាញដាវមួយមានក្បាច់ចម្លាក់ និងរូបរាងប្រឡាក់ដី ដែលត្រូវបានបុរសម្នាក់ប្រគល់ទៅឱ្យមន្ត្រីនគរបាល។
ការអះអាងនេះ ត្រូវបានចែករំលែកព្រោងព្រាត និងទទួលបានការបញ្ចេញមតិយោបល់ចម្រុះបែបពីសំណាក់អ្នកប្រើប្រាស់ហ្វេសប៊ុកនិយាយភាសាខ្មែរ។
ខាងក្រោមនេះ គឺជារូបភាពផ្ដាមចេញពីការអះអាងនៅលើបណ្ដាញសង្គមហ្វេសប៊ុកកាលពីថ្ងៃទី១៧ ខែធ្នូ ឆ្នាំ២០២៣ ដែលសរសេររៀបរាប់ថា «នេះជារឿងដ៏ល្អមួយសម្រាប់ឆ្នាំ២០២៣ ដែលកសិករម្នាក់បានភ្ជួរស្រែបែរជាជួបព្រះខ័នរាជ្យដែលបានបាត់ជំនាន់ ប៉ុល ពត។ ពេលនេះព្រលឹងដូនតាខ្មែរបានត្រឡប់មកវិញហើយ។ សំណាងហើយដែលមិនធ្លាក់ដល់ទឹកដីថៃដែលជនជាតិថៃប្រាថ្នាចង់បាន ហើយខ្ញុំសុំឱ្យអាជ្ញាធរមេត្ដាផ្ដល់ថវិកាខ្លះៗជូនដល់កសិករដែលជាអ្នករកឃើញ។ ព្រះខ័នរាជ្យគឺជាវត្ថុបុរាណជារបស់ឋានសួគ៌ឱ្យមកដូនតាខ្មែរមានអាយុកាលរាប់ពាន់ឆ្នាំ ហើយពេលនេះក្លាយជាសម្បត្តិជាតិខ្មែរយើងទាំងអស់គ្នា សុំអបអរសាទរ»។
ការអះអាងដដែលនេះ ត្រូវបានបង្ហោះនៅលើបណ្ដាញសង្គមដោយអ្នកប្រើប្រាស់ហ្វេសប៊ុកដទៃទៀតផងដែរនៅក្នុងរយៈពេលប៉ុន្មានថ្ងៃមកនេះ ហើយក៏ទទួលបានការចែករំលែកបន្ត និងមតិយោបល់ចម្រុះបែបពីអ្នកប្រើប្រាស់ហ្វេសប៊ុកនិយាយភាសាខ្មែរ។
ខាងក្រោមនេះ គឺជារូបភាពផ្ដាមចេញពីការអះអាងដដែលនេះ ដែលត្រូវបានបង្ហោះចូលក្នុងក្រុមបណ្ដាញសង្គមមួយកាលពីថ្ងៃទី១៨ ខែធ្នូ ឆ្នាំ២០២៣។
ការអះអាងដដែលនេះ ត្រូវបានបង្ហោះនៅលើបណ្ដាញសង្គមតាំងពីខែតុលាកន្លងមកនេះ ហើយខាងក្រោមនេះ គឺជារូបភាពផ្ដាមចេញពីការបង្ហោះការអះអាងនេះនៅក្នុងក្រុមបណ្ដាញសង្គមហ្វេសប៊ុក ដែលទទួលបានការចែករំលែកបន្តរហូតដល់ ៦៥០០ដង។
គេអាចរកមើលការអះអាងដូចគ្នានេះនៅលើបណ្ដាញសង្គមតាមរយៈបណ្ដាញតំណភ្ជាប់មាននៅទីនេះ តំណភ្ជាប់ទី១(archived) តំណភ្ជាប់ទី២ (archived) តំណភ្ជាប់ទី៣ (archived)។
ការត្រួតពិនិត្យការពិត
Fact Crescendo Cambodia បានចាប់ផ្ដើមត្រួតពិនិត្យ និងផ្ទៀងផ្ទាត់ទៅលើការអះអាងខាងលើនេះតាមរយៈការសម្ភាសជាមួយអ្នកជំនាញផ្នែកវត្ថុបុរាណនៃក្រសួងវប្បធម៌ និងវិចិត្រសិល្បៈ ដែលនាំឱ្យយើងរកឃើញការពិតដូចខាងក្រោមនេះ។
ដើម្បីបញ្ជាក់លើការអះអាងនេះ Fact Crescendo Cambodia ស្នើសុំការបញ្ជាក់ពីលោក ស៊ុំ ម៉ាប់ អ្នកនាំពាក្យក្រសួងវប្បធម៌ និងវិចិត្រសិល្បៈ ប៉ុន្តេ លោករុញសំណួរឱ្យទៅសួរលោក អ៊ុក សុខា អគ្គនាយកនៃអគ្គនាយដ្ឋានបេតិកភណ្ឌ។
ឆ្លើយតបមកកាន់ Fact Crescendo Cambodia តាមបណ្ដាញតេឡេក្រាមកាលពីថ្ងៃទី១៩ ខែធ្នូ លោក អ៊ុក សុខា បានត្រឹមបញ្ជាក់ថា ដាវដែលត្រូវបានរកឃើញដោយកសិករម្នាក់នៅខេត្តព្រះវិហារនោះ ត្រូវបានប្រគល់ទៅឱ្យសារមន្ទីរជាតិរក្សាទុក ហើយលោកប្រាប់ឱ្យសាកសួរទៅលោក ឆាយ វិសុទ្ធ ដែលជាប្រធានសារមន្ទីរជាតិ។
ប្រធានសារមន្ទីរជាតិ លោក ឆាយ វិសុទ្ធ ដែលជាប្រធាននាយកដ្ឋានសារមន្ទីរផងដែរនោះ បានបកស្រាយតាមបណ្ដាញតេឡេក្រាមប្រាប់ Fact Crescendo Cambodia ថា ដាវដែលត្រូវបានរកឃើញដោយកសិករនៅខេត្តព្រះវិហារនោះ មិនមែនជាព្រះខ័នបុរាណនោះឡើយ។
លោក ឆាយ វិសុទ្ធ បានបញ្ជាក់ទៀតថា ផ្ទុយទៅវិញ វាជាដាវផលិតឡើងនាសម័យបច្ចុប្បន្ន និងអាវរកទិញបានដោយងាយនៅផ្សារទួលទំពូង ជាកន្លែងលក់ស្នាដៃចម្លាក់នៃចម្លាក់ និងវត្ថុសិល្បៈនានា។
លោក ឆាយ វិសុទ្ធ ប្រាប់ថា «…ហើយក្រោយពីក្រុមការងារយើងពិនិត្យទៅ ឃើញថា ដាវហ្នឹងមិនមែនជាដាវបុរាណទេ ជាដាវដែលធ្វើថ្មី ហើយអាហ្នឹងមានលក់នៅទួលទំពូងអីហូរហែរ។ អ៊ីចឹងសរុបមក មិនមែនជាដាវព្រះខ័នរាជ្យអីទេ គ្រាន់តែជាពាក្យចរចាមអារ៉ាមដែលគេនាំគ្នាបង្កើត»។
នៅពេលត្រូវបានសួរថា តើដាវនោះមានអាយុកាលប៉ុន្មានឆ្នាំហើយនោះ អ្នកជំនាញផ្នែកអភិរក្សបេតិកភណ្ឌបុរាណរូបនេះ បានប្រាប់ថា «អាហ្នឹងរបស់ថ្មីតែម្ដងប្អូន! ប្អូនអាចទៅមើលនៅទួលទំពូងបានដាវ។ របៀបអ៊ីចឹង គេសិតអាចមួយឆ្នាំពីរឆ្នាំចុងក្រោយ ហើយវាអាស្រ័យលើតម្រូវការទីផ្សារ។ បើតម្រូវការទីផ្សាររបស់អ្នកដែលសច្ចំបន់បត់ ឬក៏គ្រូមន្តអាគមអី គាត់ត្រូវការយកទៅប្រើប្រាស់ច្រើនទៅ គេក៏ទិញច្រើនទៅ ហើយមួយចំនួនទៀតក៏អាចអ្នកលក់យើងនៅខាងទួលទំពូងហ្នឹងគាត់ធ្វើនាំចេញទៅលក់នៅប្រទេសជិតខាង ដោយកុហកថា អាហ្នឹងជារបស់បុរាណ វាមិនមែនជាចាស់អីទេ របស់ថ្មីៗ»។
សូមស្ដាប់ប្រសាសន៍របស់លោក ឆាយ វិសុទ្ធ ប្រធាននាយកដ្ឋានសារមន្ទីរជាតិ ដែលបានបញ្ជាក់មកកាន់ Fact Crescendo Cambodia កាលពីថ្ងៃទី១៩ ខែធ្នូ ឆ្នាំ២០២៣។
សេចក្ដីរាយការណ៍របស់សារព័ត៌មានក្នុងស្រុក បានឱ្យដឹងថា កសិករម្នាក់នៅឯស្រុករវៀង ខេត្តព្រះវិហារ បានប្រទះឃើញដាវមួយនេះអំឡុងពេលលោកភ្ជួរដីធ្វើស្រែចម្ការកាលពីថ្ងៃទី១០ ខែមិថុនា ឆ្នាំ២០២៣។ [archived]
ចំណែកសេចក្ដីរាយការណ៍របស់សារព័ត៌មានក្នុងស្រុកមួយទៀត បានឱ្យដឹងថា ដាវដែលកសិករម្នាក់បានប្រទះឃើញនេះ មានប្រវែង ០.៨៦ម៉ែត្រ មុខកាត់ផ្លែដាវប្រវែង ០.៦០សង់ទីម៉ែត្រ និងមានទម្ងន់សរុប ២.៦គីឡូក្រាម។ [archived]
នៅក្នុងសេចក្ដីរាយការណ៍ដដែលនេះ អ្នកជំនាញបុរាណវិទ្យា លោក អ៊ឹម សុខរិទ្ធី បានកត់សម្គាល់ទៅក្បាច់ចម្លាក់ដ៏ចម្លែកនៅលើដាវនោះ ដែលលោកអះអាងថា មិនធ្លាប់ជួបពីមុនមកទេ ប៉ុន្តែ លោកបានក្រើនរំលឹកពីល្បិចបោកប្រាស់របស់មនុស្សមួយចំនួនដែលរកស៊ីជួយដូរវត្ថុសិល្បៈបែបចម្លង។ [archived]
នៅក្នុងដំណើរស្វែងរកព័ត៌មាន និងរូបថតព្រះខ័នរាជ្យនៅលើប្រព័ន្ធអ៊ិនធឹណិត យើងបានរកឃើញរូបថតព្រះខ័នរាជ្យលក្ខណៈសខ្មៅ ដែលត្រូវបានចុះផ្សាយនៅក្នុងអត្ថបទមួយមានចំណងជើងថា «ព្រះខ័នរាជ្យ»ចុះផ្សាយនៅក្នុងបណ្ដាញផ្សព្វផ្សាយព័ត៌មានវប្បធម៌ខ្មែរហៅថា «យសោធរ»។
បើប្រៀបធៀបរូបរាង និងលក្ខណៈចម្លាក់រវាងដាវដែលគេប្រទះឃើញនៅខេត្តព្រះវិហារ និងព្រះខ័នរាជ្យដែលផ្សព្វផ្សាយនៅក្នុងយសោធរ យើងបានរកឃើញថា មានលក្ខណៈខុសគ្នាទាំងស្រុង។
អត្ថបទ«ព្រះខ័នរាជ្យ»និពន្ធដោយលោក ស៊ីយ៉ុន សុភារិទ្ធ ដែលផ្សព្វផ្សាយនៅលើវេបសាយ«យសោធរ» បានឱ្យដឹងថា ព្រះខ័នរាជ្យ មិនត្រឹមតែជាគ្រឿងមួយក្នុងចំណោមគ្រឿងទាំងប្រាំសម្រាប់អភិសេកព្រះមហាក្សត្រមួយអង្គប៉ុណ្ណោះទេ ប៉ុន្តែ ក៏ជាគ្រឿងរណ្ដាប់សម្រាប់គោរពបូជាផងដែរ។
ដោយបានដកស្រង់ខ្លឹមសារចេញពីសំណេររបស់អ្នកឧកញ៉ាវាំងជួនចុះផ្សាយនៅក្នុងទស្សនាវដ្ដីបារាំងកាលពី ១០០ឆ្នាំមុន អ្នកស្រាវជ្រាវរូបនេះ បានសង្ខេបមកថា ព្រះខ័នរាជ្យគឺជាដាវមានជីវិត ដែលតំណាងឱ្យអាទិទេពសំខាន់ទាំង៣នៅក្នុងជំនឿព្រហ្មញ្ញសាសនា ឬហៅថា «ត្រីមូរតិ» ពោលគឺព្រះសិវៈ (ព្រះឥសូរ) ព្រះវិស្ណុ (ព្រះនរាយណ៍) និងព្រះព្រហ្ម។
ផ្អែកតាមអត្ថបទស្រាវជ្រាវនេះ ព្រះសិវៈស្ថិតនៅផ្នែកខាងលើនៃព្រះខ័នរាជ្យ ហើយផ្នែកកណ្ដាលតំណាងឱ្យព្រះវិស្ណុ ខណៈផ្នែកខាងក្រោម ឬគល់ដាវ តំណាងឱ្យព្រះព្រហ្ម។ ព្រះខ័ន និងស្រោមព្រះខ័ន គឺជានិម្មិតរូបនៃការរួមភេទ ដែលបង្កើតមនុស្សជាតិ។ អត្ថបទទាំងស្រុង [archived]
លោក ស៊ីយ៉ុន សុភារិទ្ធ ដែលជាម្ចាស់អត្ថបទស្រាវជ្រាវនេះ និងជាអគ្គនាយក នៃអគ្គនាយកដ្ឋានបច្ចេកទេសវប្បធម៌ បានពន្យល់បន្ថែមអំពីអត្ថន័យនៃដាវ ឬព្រះខ័ននៅក្នុងជំនឿព្រហ្មញ្ញសាសនាខ្មែរតាំងពីសម័យបុរាណមក។
សន្និដ្ឋាន
Fact Crescendo Cambodia បានរកឃើញថា ការអះអាងដូចរៀបរាប់ខាងលើនេះ មិនត្រឹមត្រូវនោះឡើយ។ ដាវដែលកសិករម្នាក់ប្រទះឃើញនៅខេត្តព្រះវិហារ មិនមែនជាព្រះខ័នរាជ្យនោះឡើយ។ អ្នកជំនាញផ្នែកបុរាណវត្ថុនៅសារមន្ទីរជាតិ បានបញ្ជាក់ថា ដាវនោះគ្រាន់តែជាដាវផលិតឡើងថ្មី និងមានលក់នៅលើទីផ្សារ។
Title:មន្ត្រីបញ្ជាក់ថា ដាវដែលកសិករនៅខេត្តព្រះវិហារប្រទះឃើញនោះ មានលក់លើទីផ្សារទួលទំពូង
Written By: Jay UdomResult: False