តើរូបថតនេះជាអវកាសយានិកត្រូវបានបញ្ជូនទៅផ្ដិតយករូបភពភពទាំងប្រាំរះតម្រៀបគ្នាមែនឬទេ?

ព័ត៌មានអំពីភពប្រាំតម្រៀបជួរគ្នា ត្រូវបានជជែក និងចែករំលែកនៅលើបណ្ដាញសង្គមយ៉ាងព្រោងព្រាតកាលពីសប្ដាហ៍មុន។ ទន្ទឹមគ្នានេះ រូបថតមួយសន្លឹកដែលបង្ហាញអវកាសយានិកម្នាក់ស្ថិតនៅក្នុងទីលំហអវកាសនោះ ត្រូវបានបង្ហោះនៅលើបណ្ដាញសង្គម ដោយមានការអះអាងថា ទីភ្នាក់ងារអវកាសអាមេរិក NASA បានបញ្ជូនអវកាសយានិកនោះទៅទីអវកាស ដើម្បីផ្ដិតយករូបភាពភពទាំង៥រះតម្រៀបជួរគ្នា។

រូបថតជាមួយការអះអាងបែបនេះ ត្រូវបានចែករំលែកជាច្រើនដងរួមជាមួយការបញ្ចេញមតិចម្រុះបែប និងប្រតិកម្មផ្សេងជាច្រើនផងដែរ។

ទោះជាយ៉ាងណា តាមរយៈការដំណើរការ Google Reverse Image Search យើងបានរកឃើញថា ការអះអាងទៅលើរូបថតនេះ មិនត្រឹមត្រូវនោះឡើយ។

ការអះអាងលើបណ្ដាញសង្គម

អ្នកប្រើប្រាស់ហ្វេសប៊ុកម្នាក់ បានបង្ហោះរូបថតមួយសន្លឹកនៅលើបណ្ដាញសង្គមកាលពីសប្ដាហ៍មុន ដែលបង្ហាញឱ្យឃើញអវកាសយានិកមួយរូបស្ថិតនៅក្នុងអណ្ដែតនៅក្នុងលំហអវកាស។

អ្នកប្រើប្រាស់បណ្ដាញសង្គមដដែលនេះ អះអាងថា អវកាសយានិកមួយរូប ត្រូវបានទីភ្នាក់ងារអវកាសអាមេរិក (NASA)បញ្ជូនទៅលំហអវកាសកាលពីថ្ងៃទី២២ ខែមិថុនា ដើម្បីផ្ដិតយករូបភាពនៃភពទាំង៥ស្ថិតនៅតម្រៀបគ្នាជួរនៅថ្ងៃទី២៤ ខែមិថុនា។

ការអះអាងបែបនេះទៅលើរូបថតមួយសន្លឹកនេះ ត្រូវបានអ្នកប្រើប្រាស់បណ្ដាញសង្គមហ្វេសប៊ុកចែករំលែកបន្តជាច្រើនដង និងមានការបញ្ចេញមតិ និងប្រតិកម្មចម្រុះបែបផងដែរ។

ខាងក្រោមនេះ គឺជារូបភាពផ្ដាមចេញពីការអះអាងនៅលើបណ្ដាញសង្គម ដែលសរសេររៀបរាប់ថា «បើគិតថាខ្លួនឯងកំពុងតែ lonely ខ្លាំង សូមមើលអវកាសយានិករូបនេះទៅ! អង្គការ NASA យកគាត់ទៅទុកចោលឱ្យនៅម្នាក់ឯងកណ្ដាលលំហអវកាសតាំងពីម្សិលមិញម៉្លេះ ដើម្បីធ្វើរបាយការណ៍ទាក់ទងមហាសន្និបាតភពទាំង៥ស្អែកនេះ»។

Facebook Post | Archived Link

ការត្រួតពិនិត្យការពិត

Fact Crescendo Cambodia បានត្រួតពិនិត្យ និងផ្ទៀងផ្ទាត់ទៅលើរូបថតមួយសន្លឹកនេះតាមរយៈការដំណើរការ Google Reverse Image Search ដែលនាំឱ្យយើងរកឃើញការពិតដូចខាងក្រោមនេះ។

រូបថតមួយសន្លឹកនេះ ត្រូវបានរកឃើញនៅក្នុងអត្ថបទព័ត៌មានមួយរបស់គេហទំព័រនៃប្រព័ន្ធផ្សព្វផ្សាយ National Geographic មានចំណងជើងថា «First Person to Walk Untethered in Space Gives a Final Interview» ដែលបានចេញផ្សាយកាលពីដើមឆ្នាំ២០១៨កន្លងមក។

ការផ្សាយរបស់ទូរទស្សន៍អាមេរិកមួយនេះ បានឱ្យដឹងថា រូបថតមួយសន្លឹកនេះ បង្ហាញឱ្យឃើញលោក Bruce McCandless អវកាសយានិករបស់ទីភ្នាក់ងារ NASA អាមេរិក ធ្វើដំណើរនៅក្នុងអវកាសដោយគ្មានចងភ្ជាប់ជាមួយខ្សែអ្វីនោះឡើយកាលពីឆ្នាំ១៩៨៤។

ប្រព័ន្ធផ្សព្វផ្សាយមួយនេះ បានឱ្យដឹងទៀតថា លោក Bruce McCandless បានក្លាយជាបុគ្គលទី១របស់ពិភពលោក ដែលបានដើរនៅក្នុងទីអវកាសដោយគ្មានចងភ្ជាប់ខ្សែអ្វីទៅនឹងយានអវកាសនោះឡើយ ប៉ុន្តែ ដោយប្រើប្រាស់ឯកសណ្ឋានពិសេសសម្រាប់អវកាសយានិក ដែលគេហៅថា Manned Maneuvering Unit (MMU)។

National Geographic | Archived Link

ក្រៅពីរូបថតមួយសន្លឹកនេះ មានរូបថតជាច្រើនដែលបង្ហាញលោក Bruce McCandless ធ្វើដំណើរផ្ដាច់ខ្លួនពីយានអវកាសនៅក្នុងទីអវកាសកាលពី ៣៨ឆ្នាំមុន។

គេហទំព័រទូរទស្សន៍ National Geographic បានបញ្ជាក់ថា រូបថតទាំងនេះ បានមកពីទីភ្នាក់ងារអវកាសអាមេរិក ហៅកាត់ថា NASA។

អត្ថបទមួយផ្សព្វផ្សាយដោយគេហទំព័រទីភ្នាក់ងារអវកាសអាមេរិក NASA ដែលនិយាយអំពីអវកាសយានិក Bruce McCandless។

នៅក្នុងគេហទំព័ររបស់ទីភ្នាក់ងារ NASA យើងបានរកឃើញរូបថតដូចខាងលើនេះជាមួយព័ត៌មាន ដែលឱ្យដឹងថា អវកាសយានិក Bruce McCandless បានស្ថិតនៅចម្ងាយឆ្ងាយជាអតិបរមាពីយាន Challenger មុននឹងប្ដូរទិសដៅម៉ាស៊ីន MMU ហើយត្រឡប់ទៅកាន់យាន Challenger វិញ។

ទីភ្នាក់ងារ NASA បានឱ្យដឹងទៀតថា រូបថតមួយសន្លឹកនេះ ថតដោយអវកាសយានិកមួយរូបទៀតដែលស្ថិតនៅក្នុងបន្ទប់យាន Challenger ដោយប្រើម៉ាស៊ីនថតមានកែវ ៧០មីលីម៉ែត្រ។

NASA | Archived Link

គេអាចស្វែងរករូបថតជាច្រើនទៀតរបស់លោក Bruce McCandless នៅក្នុងគេហទំព័ររបស់ទីភ្នាក់ងារ NASA តាមរយៈតំណភ្ជាប់នៅទីនេះ។

សន្និដ្ឋាន

Fact Crescendo Cambodia រកឃើញថា ការអះអាងដូចដែលត្រូវបានរៀបរាប់ខាងលើនេះ មិនត្រឹមត្រូវនោះឡើយ។ រូបថតមួយសន្លឹកនេះ មិនមែនជាអវកាសយានិកម្នាក់ដែលត្រូវបានបញ្ជូនឱ្យទៅផ្ដិតយកទិដ្ឋភាពនៃភពទាំង៥ស្ថិតនៅលើអ័ក្សតម្រៀបជួរគ្នាកាលពីព្រឹកថ្ងៃសុក្រសប្ដាហ៍មុននោះឡើយ។ រូបថតមួយសន្លឹកនេះ គឺជាអវកាសយានិកអាមេរិក លោក Bruce McCandless ដែលបានដើរនៅក្នុងទីអវកាសដោយប្រើម៉ាស៊ីន MMU និងគ្មានខ្សែភ្ជាប់ជាមួយយានអវកាសនោះឡើយ។