បន្ទាប់ពីប្រមូលយកបានអាសនៈទាំងអស់នៅក្នុងសភានៅក្នុងការបោះឆ្នោតដ៏ចម្រូងចម្រាស់មួយកាលពីឆ្នាំ២០១៨មក លោកនាយករដ្ឋមន្ត្រី ហ៊ុន សែន បានប្រកាសថា លោកនឹងទៅថ្លែងនៅមហាសន្និបាតអង្គការសហប្រជាជាតិក្នុងនាមលោកជាមេដឹកនាំតំណាងឱ្យកម្ពុជា។
ទន្ទឹមគ្នានេះ អ្នកប្រើប្រាស់បណ្ដាញសង្គម បានចែករំលែកនូវការអះអាងមួយដែលនិយាយថា ប្រធានាធិបតីបារាំង លោក អេមម៉ានូអ៊ែល ម៉ាក្រុង នឹងលើកយកបញ្ហាការបោះឆ្នោតរបស់កម្ពុជាដែលផាត់ចោលបក្សប្រឆាំងនោះ ទៅនិយាយនៅមហាសន្និបាតនោះ។ ការអះអាងនេះ ត្រូវបានចែករំលែកបន្តដល់ទៅជិត ៣ពាន់ដងពីសំណាក់អ្នកប្រើប្រាស់ហ្វេសប៊ុកនិយាយភាសាខ្មែរ រួមជាមួយការបញ្ចេញមតិយោបល់ និងប្រតិកម្មដ៏ច្រើនផងដែរ។
ទោះជាយ៉ាងណា ការផ្ទៀងផ្ទាត់របស់យើង បានរកឃើញថា ការអះអាងខាងលើនេះ មិនត្រឹមត្រូវនោះឡើយ ដែលធ្វើឱ្យមានការភ័ន្តច្រឡំ។
ការអះអាងលើបណ្ដាញសង្គម
កាលពីថ្ងៃទី១៨ ខែកញ្ញា ឆ្នាំ២០១៨កន្លងមក គណនីហ្វេសប៊ុកមួយឈ្មោះថា Mono Tep បានបង្ហោះនូវការអះអាងមួយ ដែលនិយាយថា ប្រធានាធិបតីបារាំង លោក អេមម៉ានូអ៊ែល ម៉ាក្រុង (Emmanuel Macron) នឹងលើកយកបញ្ហាការបោះឆ្នោតដ៏ចម្រូងចម្រាស់របស់កម្ពុជា ទៅនិយាយនៅក្នុងមហាសន្និបាតអង្គការសហប្រជាជាតិនាពេលខាងមុខ។
ការអះអាងនេះ ត្រូវបានចែករំលែកបន្តដោយអ្នកប្រើប្រាស់ហ្វេសប៊ុកនិយាយភាសាខ្មែររហូតដល់ទៅជាអ ៣,៧០០ដង រួមជាមួយការបញ្ចេញមតិយោបល់ និងប្រតិកម្មយ៉ាងច្រើនផងដែរ។
ព័ត៌មាននេះ ត្រូវបានអ្នកប្រើប្រាស់ចែករំលែកឡើងវិញទៅតាមក្រុមបណ្ដាញសង្គមហ្វេសប៊ុកឈ្មោះថា យុវជនគណបក្សសង្គ្រោះជាតិរាជធានីភ្នំពេញ កាលពីថ្ងៃទី៥ ខែមករានេះ។
ខាងក្រោមនេះ គឺជារូបភាពផ្ដាមចេញពីប៉ុស្តិ៍របស់អ្នកប្រើប្រាស់ហ្វេសប៊ុក Mono Tep ដែលសរសេររៀបរាប់ថា «ប្រធានាធិបតីបារាំង លោក Emmanuel Macron បានប្រកាសថា លោកនឹងលោករឿងកម្ពុជាមកពិភាសា[ពិភាក្សា]ក្នុងមហាសន្និបាតនៅបុរី New York ខាងមុខនេះ»។
ការត្រួតពិនិត្យការពិត
Fact Crescendo Cambodia បានចាប់ផ្ដើមត្រួតពិនិត្យទៅលើការអះអាងដូចដែលរៀបរាប់ខាងលើនេះតាមរយៈការស្វែងរកព័ត៌មានដែលចុះផ្សាយអំពីសម្ដីរបស់ប្រធានាធិបតីបារាំង លោក ម៉ាក្រុង ទាក់ទងនឹងប្រទេសកម្ពុជាកាលពីខែកញ្ញា ឆ្នាំ២០១៨កន្លងមក។
តាមរយៈសំណេរជាភាសាបារាំង យើងបានរកឃើញអត្ថបទមួយរបស់សារព័ត៌មាន Paris Match ដែលចុះផ្សាយពីការអំពាវនាវរបស់ពលរដ្ឋខ្មែរនៅអឺរ៉ុប ទៅកាន់ប្រធានាធិបតីបារាំង លោក ម៉ាក្រុង កាលពីពាក់កណ្ដាលខែកញ្ញា ឆ្នា២០១៨។
អត្ថបទនោះ បានឱ្យដឹងថា ប្រធានាធិបតីបារាំងរូបនេះ មានឱកាសលើកយកបញ្ហាការបោះឆ្នោតនៅកម្ពុជានៅឆ្នាំ២០១៨ ទៅនិយាយនៅឯមហាសន្និបាតអង្គការសហប្រជាជាតិ ដែលគ្រោងធ្វើឡើងនៅចុងខែកញ្ញានាឆ្នាំនោះ។
អត្ថបទរបស់សារព័ត៌មានបារាំងមួយនេះ អាចរកអានបានទាំងស្រុងតាមរយៈតំណភ្ជាប់នៅទីនេះ ឬក៏តំណភ្ជាប់ដែលត្រូវបានរក្សាទុកនៅទីនេះផងដែរ។
តើប្រធានាធិបតីបារាំង លោក អេមម៉ានូអ៊ែល ម៉ាក្រុង លើកឡើងបញ្ហាកម្ពុជានៅឯមហាសន្និបាតអង្គការសហប្រជាជាតិឬទេ?
ដើម្បីបញ្ចាក់ថា តើប្រធានាធិបតីបារាំង លោក ម៉ាក្រុង បានលើកឡើងបញ្ហាការបោះឆ្នោតដ៏ចម្រូងចម្រាស់នៅកម្ពុជា នៅឯមហាសន្និបាតអង្គការសហប្រជាជាតិដែរ ឬយ៉ាងណានោះ យើងបានស្វែងរកសុន្ទរកថដើមទាំងស្រុងរបស់លោក ដែលបានថ្លែងនៅឯវេទិកាមេដឹកនាំពិភពលោកនោះ។
នៅក្នុងសុន្ទរកថារបស់លោកកាលពីថ្ងៃទី២៥ ខែកញ្ញា ឆ្នាំ២០១៨កន្លងមក លោក ម៉ាក្រុង មិនបានលើកឡើងទាល់តែសោះសូម្បីតែឈ្មោះប្រទេសកម្ពុជា ឬឈ្មោះលោកនាយករដ្ឋមន្ត្រី ហ៊ុន សែន។
គេអាចស្វែងរកអានសុន្ទរកថាដើមទាំងស្រុងរបស់ប្រធានាធិបតីបារាំង លោក ម៉ាក្រុង តាមរយៈតំណភ្ជាប់នៅទីនេះ ឬក៏តំណភ្ជាប់ដែលត្រូវបានរក្សាទុកនៅទីនេះផងដែរ។
សន្និដ្ឋាន
Fact Crescendo Cambodia រកឃើញថា ការអះអាងដូចដែលបានរៀបរាប់ខាងលើនេះ មិនត្រឹមត្រូវនោះឡើយ។ ប្រធានាធិបតីបារាំង លោក អេមម៉ានូអ៊ែល ម៉ាក្រុង មិនបានបញ្ជាក់ទេថា លោកនឹងលើកយកបញ្ហាការបោះឆ្នោតដ៏ចម្រូងចម្រាស់របស់កម្ពុជានៅឆ្នាំ២០១៨ ទៅនិយាយនៅមហាសន្និបាតអង្គការសហប្រជាជាតិនោះឡើយ។ នៅក្នុងសុន្ទរកថារបស់គាត់នៅឯមហាសន្និបាតអង្គការសហប្រជាជាតិកាលពីថ្ងៃទី២៥ ខែកញ្ញា ឆ្នាំ២០១៨ លោក ម៉ាក្រុង មិនបានថ្លែងអ្វីទាល់តែសោះទាក់ទងនឹងបញ្ហានយោបាយរបស់កម្ពុជា។
Title:តើលោក ម៉ាក្រុង លើកឡើងបញ្ហាការបោះឆ្នោតកម្ពុជានៅមហាសន្និបាត UN ឬទេ?
Fact Check By: Jay UdomResult: Misleading
