កាលពីថ្ងៃទី៧ ខែធ្នូកន្លងមកនេះ សកម្មភាពសិទ្ធិមនុស្ស កញ្ញា សេង ធារី បានដើរចូលសវនាការនៃសាលាដំបូងរាជធានីភ្នំពេញ ជាមួយការតុបតែងខ្លួនជាមួយឈុតអ្នករាំរបាំអប្សរា និងកោរសក់ក្បាល ដែលនាំឱ្យលោកនាយករដ្ឋមន្ត្រី ហ៊ុន សែន ហៅជាសាធារណៈថា «អប្សរាក្បាលត្រងោល»។
នៅដើមខែមករានេះ កញ្ញា សេង ធារី បានបង្ហោះរូបថតមួយសន្លឹកលើបណ្ដាញសង្គម ដែលបង្ហាញលោក ហ៊ុន សែន មានគូទ និងក្បាលពោះធំដូចតារាសម្ដែងអាមេរិកនាង Kim Kardashian។ រូបថតនេះ ត្រូវបានអ្នកប្រើប្រាស់បណ្ដាញសង្គមហ្វេសប៊ុកចែករំលែកបន្តគ្នាជាច្រើនដង រួមជាមួយមតិចម្រុះបែបផងដែរ។ ទោះជាយ៉ាងណា ការផ្ទៀងផ្ទាត់របស់យើង បានរកឃើញថា រូបថតដែលបង្ហោះដោយកញ្ញា សេង ធារី គឺជារូបថតកាត់ត។
ការអះអាងលើបណ្ដាញសង្គម
កាលពីថ្ងៃទី០២ ខែមករា អ្នកប្រើប្រាស់ហ្វេសប៊ុកម្នាក់ បានបង្ហោះរូបថតមួយសន្លឹកដែលបង្ហាញលោកនាយករដ្ឋមន្ត្រី ហ៊ុន សែន វាយកូនគោលនៅលើទីលានដ៏ខៀវស្រងាត់មួយកន្លែង ហើយគាត់មានគូទធ្លាក់ និងក្បាលពោះធ្លាក់លយទៅមុខ។
អ្នកប្រើប្រាស់បណ្ដាញសង្គមដដែលនេះ បានសរសេរថា រូបរាងរបស់លោកនាយករដ្ឋមន្ត្រី ហ៊ុន សែន មានលក្ខណៈដូចទៅនឹងតារាម៉ូឌែលអាមេរិក Kim Kardashian ដែលមានគូទធំខុសប្លែកពីមនុស្សស្រីទូទៅ។
ប៉ុស្តិ៍របស់អ្នកប្រើប្រាស់ដដែលនេះ ត្រូវបានចែករំលែកបន្តជាច្រើនដង និងមានការបញ្ចេញមតិ និងប្រតិកម្មចម្រុះបែបផងដែរ។
ខាងក្រោមនេះ គឺជារូបភាពផ្ដាមចេញពីប៉ុស្តិ៍របស់អ្នកប្រើប្រាស់ហ្វេសប៊ុកដែលសរសេរជាភាសាអង់គ្លេសថា «If this is an unaltered image, it reminds me of Kim Kardashian, but he’s au naturel…» ឬអាចប្រែសម្រួលជាភាសាខ្មែរថា «ប្រសិនបើមិនមែនជារូបថតកាត់ត វាធ្វើឱ្យខ្ញុំនឹកឃើញដល់ Kim Kardashian ប៉ុន្តែ គាត់មានលក្ខណៈពីធម្មជាតិ…»។
ការត្រួតពិនិត្យការពិត
Fact Crescendo Cambodia ចាប់ផ្ដើមត្រួតពិនិត្យទៅលើរូបថតមួយសន្លឹកនេះតាមរយៈ Google Reverse Image ដែលនាំឱ្យយើងរកឃើញរូបថតច្បាប់ដើមទាំងស្រុង។
រូបថតមួយសន្លឹកនេះ ត្រូវបានរកឃើញនៅក្នុងទំព័រហ្វេសប៊ុក Samdech Hun Sen, Cambodian Prime Minister ដែលជាផេកផ្លូវការរបស់លោកនាយករដ្ឋមន្ត្រី ហ៊ុន សែន។ ទំព័រហ្វេសប៊ុកមួយនេះ បានបង្ហោះរូបថតមួយសន្លឹកនេះរួមជាមួយរូបថត ២០សន្លឹកផ្សេងទៀត ដែលបង្ហាញលោក ហ៊ុន សែន លេងកីឡាវាយកូនគោលនៅលើទីលានវាយកូនគោលមួយកន្លែង កាលពីថ្ងៃទី២៦ ខែតុលា ឆ្នាំ២០១៩កន្លងមក។
ខាងក្រោមនេះ គឺជារូបភាពផ្ដាមពីទំព័រហ្វេសប៊ុកផ្លូវការរបស់លោកនាយករដ្ឋមន្ត្រី ហ៊ុន សែន ដែលបង្ហោះនូវរូបថតចំនួន ២១សន្លឹកកាលពីជាង ២ឆ្នាំមុន។
ខាងក្រោមនេះ គឺជាការប្រៀបធៀបរវាងរូបថតដែលត្រូវបានបង្ហោះលើបណ្ដាញសង្គមដោយអ្នកប្រើប្រាស់ហ្វេសប៊ុក និងរូបថតដែលបង្ហោះដោយទំព័រហ្វេសប៊ុកផ្លូវការរបស់លោកនាយករដ្ឋមន្ត្រី ហ៊ុន សែន។
សន្និដ្ឋាន
Fact Crescendo Cambodia រកឃើញថា រូបថតដែលត្រូវបានបង្ហោះលើបណ្ដាញសង្គមដោយអ្នកប្រើប្រាស់ហ្វេសប៊ុកដូចបានរៀបរាប់ខាងលើនេះ មិនត្រឹមត្រូវនោះឡើយ។ រូបថតច្បាប់ដើម បង្ហាញលោកនាយករដ្ឋមន្ត្រី ហ៊ុន សែន លេងកីឡាវាយកូនគោលកាលពីឆ្នាំ២០១៩កន្លងមក ដោយលោកមិនមានសភាពគូទធំយារធ្លាក់ និងក្បាលពោះប៉ោងលយទៅមុខនោះឡើយ។
Title:Fact-Check: រូបថតលោក ហ៊ុន សែន ត្រូវបានកាត់តឱ្យមានគូថធំដូច Kim Kardashian
Fact Check By: Jay UdomResult: Altered
