ការអះអាងដ៏ផុសផុលមួយនៅលើបណ្ដាញសង្គម បានលើកឡើងថា ជនជាតិវៀតណាមម្នាក់ ត្រូវបានដំឡើងឋានន្តរស័ក្តិជាឧត្ដមសេនីយ៍ទោនៅក្នុងជួរនគរបាលជាតិ ក្រោយពីទទួលបានសញ្ជាតិកម្ពុជាកាលពី ២ឆ្នាំមុន។ ការអះអាងនេះ ត្រូវបានចែករំលែកព្រោងព្រាតលើបណ្ដាញសង្គម ដែលនាំឱ្យមានការរិះគន់ទៅលើការដំឡើងឋានន្តរស័ក្តិបុគ្គលរូបនេះ។ ទោះជាយ៉ាងណា ការផ្ទៀងផ្ទាត់របស់យើង រកឃើញថា ការអះអាងនេះមិនត្រឹមត្រូវនោះឡើយ។
ការអះអាងលើបណ្ដាញសង្គម
ព័ត៌មានដ៏ផុសផុលនៅលើបណ្ដាញសង្គមនៅថ្ងៃនេះ បានអះអាងថា បុរសជនជាតិវៀតណាម ត្រូវបានដំឡើងតួនាទី និងឋានន្តរស័ក្តិរហូតដល់ឧត្ដមសេនីយ៍ទោផ្កាយ២នៅក្នុងជួរនគរបាលជាតិ បន្ទាប់ពីទទួលបានសញ្ជាតិកម្ពុជាក្នុងរយៈពេលត្រឹមតែ ២ឆ្នាំប៉ុណ្ណោះ។
ខាងក្រោមនេះ គឺជារូបភាពផ្ដាមចេញពីការអះអាងមួយដែលបង្ហោះនៅលើបណ្ដាញសង្គមកាលពីថ្ងៃទី០៥ ខែមករា ឆ្នាំ២០២៥ ជាមួយសំណេររៀបរាប់ថា “ចុមទើបបានសញ្ជាតូបនិយកម្មនៅខែមេសា ឆ្នាំ២០២៣សោះ បានផ្កាយ២ នៃនាយនគរបាលជាន់ខ្ពស់បាត់ទៅហើយ សូមខាងព្រះបរមរាជវាំងពិនិត្យមើលព្រះរាជក្រឹត្យដំឡើងស័ក្តិ និងផ្ដល់សញ្ជាតិផង តើហេតុអ្វីជននេះទទទួលបានស័ក្តិនគរបាលជាតិតាមរបៀបណា? តើមនុស្សពិតទេ?”។
ព័ត៌មាននេះ ត្រូវបានចែករំលែកបន្តយ៉ាងច្រើនពីសំណាក់អ្នកប្រើប្រាស់ហ្វេសប៊ុកនិយាយភាសាខ្មែរ ហើយក៏មានការបញ្ចេញមតិរិះគន់ចំពោះដំឡើងឋានន្តរស័ក្តិជាន់ខ្ពស់ដល់បុគ្គលរូបនេះនៅក្នុងជួរកម្លាំងនគរបាលជាតិផងដែរ។
ព័ត៌មាននេះ ក៏ត្រូវបានបង្ហោះលើបណ្ដាញសង្គមដោយអ្នកប្រើប្រាស់ហ្វេសប៊ុកដទៃទៀតដែរចាប់តាំងពីថ្ងៃទី០៥ ខែមករា ឆ្នាំ២០២៥មក ហើយក៏ត្រូវបានចែករំលែកបន្តយ៉ាងផុសផុលដែរ។
ខាងក្រោមនេះ គឺជារូបភាពផ្ដាមចេញពីការបង្ហោះព័ត៌មាននេះនៅលើបណ្ដាញសង្គមហ្វេសប៊ុកកាលពីថ្ងៃម្សិលមិញនេះ ដោយសរសេររៀបរាប់ថា “បុរសជនជាតិវៀតណាមម្នាក់ ក្រោយទទួលបានសញ្ជាតិខ្មែរ និងប្ដូរឈ្មោះថ្មីថា ប៊ុន ភក្ដី កំពុងពាក់ផ្កាយ២ក្នុងជួរនគរបាលជាតិកម្ពុជា”។
ការបង្ហោះចែករំលែកព័ត៌មាននេះនៅលើបណ្ដាញសង្គម បានកើតឡើង បន្ទាប់ពីទំព័រហ្វេសប៊ុកនៃសារព័ត៌មាន DTN7 បានបង្ហោះនូវព័ត៌មាននេះនៅលើបណ្ដាញសង្គមកាលពីថ្ងៃម្សិលមិញនេះ។
នៅក្នុងសំណេរ (archived) បង្ហោះនៅលើបណ្ដាញសង្គម សារព័ត៌មាន DTN7 បានបង្ហោះរូបថតនគរបាលជាន់ខ្ពស់កម្ពុជាឈ្មោះ ប៊ុន ភក្ដី និងរូបថតនៃព្រះរាជក្រឹត្យនៃការផ្ដល់សញ្ជាតិកម្ពុជាដល់ជនជាតិវៀតណាមម្នាក់កាលពីខែមេសា ឆ្នាំ២០២៣កន្លងមក ហើយចោទសួរថា តើជានាយនគរបាលជាតិកម្ពុជារូបនេះជាបុរសដើមកំណើតវៀតណាម ឬយ៉ាងណា។
ព័ត៌មាននេះ ត្រូវបានបង្ហោះ និងចែករំលែកព្រោងព្រាតលើបណ្ដាញសង្គមដោយអ្នកប្រើប្រាស់ហ្វេសប៊ុកកម្ពុជា ដែលបានចោទសួររកការពិត ហើយខ្លះទៀតបានរិះគន់ទៅដល់រាជរដ្ឋាភិបាលដែលបានផ្ដល់សញ្ជាតិដល់ជនជាតិវៀតណាម ហើយថែមទាំងដំឡើងឋានន្តរស័ក្តិជាន់ខ្ពស់ក្នុងជួរនគរបាលជាតិទៅទៀត។
សម្រាប់ការអះអាងដូចគ្នា ឬប្រហាក់ប្រហែលគ្នានេះដែលត្រូវបានបង្ហោះរំលែកលើបណ្ដាញសង្គមដោយអ្នកប្រើប្រាស់ហ្វេសប៊ុកដទៃទៀត សូមចូលទៅមើលតាមរយៈតំណភ្ជាប់មាននៅទីនេះ (archived) ឬតំណភ្ជាប់មួយទៀតនៅទីនេះ (archived)។
ការត្រួតពិនិត្យការពិត
Fact Crescendo បានត្រួតពិនិត្យ និងផ្ទៀងផ្ទាត់ទៅលើការអះអាងខាងលើនេះតាមរយៈការស្វែងរកការបញ្ជាក់ពីស្ថាប័នពាក់ព័ន្ធ និងសាមីខ្លួនផ្ទាល់ ដែលនាំឱ្យយើងរកឃើញការពិតដូចខាងក្រោមនេះ។
នៅក្នុងដំណើរស្វែងរកការពិតនេះ Fact Crescendo បានព្យាយាមទាក់ទងតាមទូរស័ព្ទទៅលោក ទូច សុខៈ អ្នកនាំពាក្យរងក្រសួងមហាផ្ទៃ ប៉ុន្តែ មិនទាន់ទទួលបានការឆ្លើយតបនៅឡើយទេ។
ទោះជាយ៉ាងណា សារព័ត៌មានក្នុងស្រុកបានចុះផ្សាយព្រោងព្រាតនូវការបកស្រាយបំភ្លឺរបស់មន្ត្រីនាំពាក្យក្រសួងមហាផ្ទៃរូបនេះនៅថ្ងៃនេះ ហើយក៏ងត្រូវបានបង្ហោះព្រោងព្រាតលើបណ្ដាញសង្គមផងដែរ។
នៅក្នុងវីដេអូបង្ហោះដោយទំព័រហ្វេសប៊ុកនៃសារព័ត៌មានត្រយ៉ងនៅរសៀលថ្ងៃនេះ លោក ទូច សុខៈ អះអាងថា លោក ប៊ុន ភក្តី ដែលជានគរបាលជាន់ខ្ពស់កម្ពុជាពាក់ផ្កាយ២នៅលើស្មានោះ គឺជាជនជាតិខ្មែរពីកំណើត មិនមែនជាជនជាតិវៀតណាមចូលសញ្ជាតិកម្ពុជានោះឡើយ។
នៅក្នុងវីដេអូនេះ ឯកសារ និងលិខិតជាច្រើនដែលបញ្ជាក់អត្តសញ្ញាណរបស់លោក ប៊ុន ភក្ដី ក៏ត្រូវបានគេបង្ហាញផងដែរ ក្នុងនោះអត្តសញ្ញាណប័ណ្ណបង្ហាញថា នគរបាលជាតិខ្ពស់រូបនេះ កើតនៅថ្ងៃទី០៥ ខែមេសា ឆ្នាំ១៩៨៦ នៅឯភូមិកំពង់ ឃុំព្រះបាទជាន់ជុំ នៃស្រុកគិរីវង់ ខេត្តតាកែវ។
នៅក្នុងដំណើរស្វែងរកព័ត៌មានពិតនេះ Fact Crescendo ក៏បានរកឃើញគណនីហ្វេសប៊ុកឈ្មោះ Bun Pheakdey ដែលបង្ហោះការបកស្រាយថា លោកគឺជានាយកវិទ្យាស្ថានបណ្ដុះបណ្ដាលវិជ្ជាជីវៈនគរបាល នៃបណ្ឌិតសភានគរបាលកម្ពុជា ចាប់តាំងពីឆ្នាំ២០២៤មក។
បើតាមសំណេររបស់គណនីហ្វេសប៊ុកដដែលនេះ ក្រៅពីបញ្ជាក់ថា លោកកើតនៅកម្ពុជា លោក ប៊ុន ភក្ដី ក៏បានឆ្លងកាត់ការសិក្សាគ្រប់កម្រិតនៅក្នុងប្រទេសកម្ពុជាផងដែរ ក្នុងនោះមានទាំងការសិក្សាថ្នាក់បណ្ឌិតនៅបណ្ឌិតសភានគរបាលកម្ពុជាផងដែរ។
ខាងក្រោមនេះ គឺជារូបភាពផ្ដាមចេញពីសំណេររបស់លោក ប៊ុន ភក្ដី នៅលើគណនីហ្វេសប៊ុករបស់លោកនៅថ្ងៃទី០៦ ខែមករា ឆ្នាំ២០២៥។
ព្រះរាជក្រឹត្យដែលត្រូវបានគេបង្ហោះនៅលើបណ្ដាញសង្គមនោះ បង្ហាញថា ជនជាតិវៀតណាមឈ្មោះ ង្វៀន ហ៊ឺវ ធ្វឺន (Nguyen Huu Thuan) កើតនៅថ្ងៃទី១៥ ខែវិច្ឆិកា ឆ្នាំ១៩៩២ នៅខេត្តក្វាងណាម (Quang Nam) នៃសាធារណរដ្ឋសង្គមនិយមវៀតណាម បានទទួលសញ្ជាតិខ្មែរ(កម្ពុជា)ចាប់ពីថ្ងៃទី០៨ ខែមេសា ឆ្នាំ២០២៣ ដោយប្ដូរឈ្មោះទៅជា ប៊ុន ភក្ដី។
បើយើងពិនិត្យលើថ្ងៃខែឆ្នាំកំណើតនៃជនជាតិវៀតណាមដែលទទួលបានសញ្ជាតិកម្ពុជានោះ យើងមើលឃើញថា ជនជាតិវៀតណាមនេះ កើតនៅថ្ងៃទី១៥ ខែវិច្ឆិកា ឆ្នាំ១៩៩២ ពោលគឺខុសពីឆ្នាំកំណើតរបស់នគរបាលជាតិកម្ពុជា លោក ប៊ុន ភក្ដី ដែលមានឆ្នាំកំណើត ០៥ មេសា ឆ្នាំ១៩៨៦។
ទោះជាយ៉ាងណា គ្មានព័ត៌មានលម្អិតបន្ថែមអំពីជនជាតិវៀតណាមដែលទទួលបានសញ្ជាតិខ្មែរនេះទេ បើទោះបីជាមានឈ្មោះដូចគ្នាទៅនឹងលោក ប៊ុន ភក្ដី ក៏ដោយ។
ខាងក្រោមនេះ គឺជាការគូសបញ្ជាក់ឱ្យពីថ្ងៃខែឆ្នាំកំណើតខុសគ្នារវាងលោក ប៊ុន ភក្ដី ដែលជានគរបាលជាតិជាន់ខ្ពស់របស់កម្ពុជា និងជនជាតិវៀតណាមដែលទទួលបានសញ្ជាតិកម្ពុជា។
Follow Us and Stay Up to Date with Our Latest Fact-Checks
Facebook | Twitter | Telegram | TikTok | WhatsApp | Instgram
សន្និដ្ឋាន
Fact Crescendo រកឃើញថា ការអះអាងដូចដែលត្រូវបានរៀបរាប់ខាងលើនេះ មិនត្រឹមត្រូវនោះឡើយ។ ឯកសារ និងលិខិតស្នាមនានា បង្ហាញថា នគរបាលកម្ពុជា លោក ប៊ុន ភក្ដី មានដើមកំណើតជាជនជាតិខ្មែរ នៅក្នុងស្រុកគិរីវង់ ខេត្តតាកែវ មិនមែនជាជនជាតិវៀតណាមដែលទទួលបានសញ្ជាតិខ្មែរទេ។
Title:ការអះអាងមិនត្រឹមត្រូវថា នគរបាលជាន់ខ្ពស់មួយរូបមានដើមកំណើតជាវៀតណាម
Written By: Jay UdomResult: False
