ព័ត៌មានមិនពិតថា ឃាតករពីរនាក់ប្រឈមមុខជាប់គុកមិនស្មើភាពគ្នាក្រោមបទចោទឃាតកម្មដូចគ្នា
បន្ទាប់ពីតុលាការចោទប្រកាន់អតីតឧកញ៉ា ស្រី ស៊ីណា និងបញ្ជូនបុគ្គលរូបដាក់ពន្ធនាគារហើយនោះ ព័ត៌មានដ៏ផុសផុលមួយផ្សាយថា បុរសសម្លាប់ស្ត្រីជាម្ចាស់បំណុលម្នាក់ ត្រូវបានតុលាការខេត្តកាត់ទោសឱ្យជាប់គុកមួយជីវិត ប៉ុន្តែ ជនដៃដល់ ស្រី ស៊ីណា ត្រូវបានតុលាការសម្រេចឱ្យជាប់គុកពី ១០ ទៅ ១៥ឆ្នាំ។ ព័ត៌មាននេះ ត្រូវបានចែករំលែកព្រោងព្រាតលើបណ្ដាញសង្គម ដែលនាំឱ្យមហាជនរិះគន់ទៅលើប្រព័ន្ធតុលាការកម្ពុជា។ ទោះជាយ៉ាងណា បន្ទាប់ពីពិនិត្យមើលប្រភពនានា យើងរកឃើញថា ព័ត៌មាននេះមិនត្រឹមត្រូវនោះឡើយ។
ការអះអាងលើបណ្ដាញសង្គម
ព័ត៌មានដ៏ផុសផុលមួយនៅលើបណ្ដាញសង្គមក្នុងរយៈពេលថ្មីៗនេះ បានលើកឡើងថា បុរសម្នាក់ដែលបានសម្លាប់ស្ត្រីម្ចាស់បំណុលនៅក្នុងខេត្តកណ្ដាល ត្រូវបានតុលាការកាត់ទោសឱ្យជាប់ពន្ធនាគារអស់មួយជីវិត ប៉ុន្តែ អតីតឧកញ៉ា ស្រី ស៊ីណា ដែលបានបាញ់សម្លាប់មនុស្ស ២នាក់ និងបាញ់ប្រហារមនុស្ស ២នាក់ទៀតឱ្យរងរបួសនោះ បែរជាត្រូវតុលាការកាត់ទោសឱ្យជាប់គុកចន្លោះពី ១០ ទៅ ១៥ឆ្នាំវិញ។
ព័ត៌មាននេះ ត្រូវបានចែកចាយយ៉ាងច្រើនផុសផុលនៅលើបណ្ដាញសង្គម រួមជាមួយការបញ្ចេញប្រតិកម្ម និងមតិយោបល់ចម្រុះបែបពីសំណាក់អ្នកប្រើប្រាស់ហ្វេសប៊ុកនិយាយភាសាខ្មែរ។
ជាងនេះទៅទៀត ព័ត៌មាននេះក៏បានជំរុញឱ្យមានការរិះគន់យ៉ាងព្រោងព្រាតពីសំណាក់មហាជនកម្ពុជាទៅលើតុលាការកម្ពុជាផងដែរ ក្រោយពីដឹងពីរបៀបនៃការអនុវត្តរបស់តុលាការនៅលើករណីពីរនេះ។
ខាងក្រោមនេះ គឺជារូបភាពផ្ដាមចេញព័ត៌មានផ្សាយនៅលើបណ្ដាញសង្គមកាលពីថ្ងៃទី២២ ខែមិថុនា ឆ្នាំ២០២៤ ដែលរៀបរាប់ថា “មហាជននាំគ្នាលើកឡើងព្រោងព្រាតថា បុរសម្នាក់ដែលកាប់ទៅលើស្ត្រីជាមេបំណុលស្លាប់នៅខេត្តកណ្ដាល តុលាការកាត់ក្ដីឱ្យជាប់គុកមួយជីវិត បែរជាអតីតឧកញ៉ាចិត្តខ្មៅ ស្រី ស៊ីណា បម្រុងនឹងបាញ់សម្លាប់មនុស្សទាំងអស់ សម្រេចឱ្យជាប់គុកពី ១០ ទៅ ១៥ឆ្នាំ (អ្វីដែលសំខាន់គឺប្រើប្រាស់អាវុធខុសច្បាប់ទៀត”។
ព័ត៌មានដូចគ្នានេះ ក៏ត្រូវបានបង្ហោះបន្តនៅលើបណ្ដាញសង្គមដោយទំព័រហ្វេសប៊ុកដទៃទៀត ដែលនាំឱ្យមានការចែកចាយបន្តរាប់រយដង និងការបញ្ចេញមតិយោបល់ដ៏ច្រើនពីអ្នកប្រើប្រាស់បណ្ដាញសង្គម។
ខាងក្រោមនេះ គឺជារូបភាពផ្ដាមចេញពីការបង្ហោះព័ត៌មាននេះនៅលើបណ្ដាញសង្គមដោយទំព័រហ្វេសប៊ុកកាលពីថ្ងៃទី២៣ ខែឧសភា ឆ្នាំ២០២៤ ដែលមានសំណេរដូចគ្នាទាំងស្រុងទៅនឹងព័ត៌មានខាងលើ។
ខាងក្រោមនេះ គឺជារូបភាពផ្ដាមចេញពីការបង្ហោះព័ត៌មានដូចគ្នានៅលើបណ្ដាញសង្គមដោយទំព័រហ្វេសប៊ុកមួយទៀតកាលពីថ្ងៃទី២៦ ខែមិថុនា ឆ្នាំ២០២៤ ហើយក៏ត្រូវបានចែកចាយបន្តដល់ទៅរាប់រយដងដែរ។
រូបភាពខាងក្រោមនេះ គឺជាព័ត៌មានដូចគ្នាទាំងស្រុងដែលត្រូវបានបង្ហោះនៅលើបណ្ដាញសង្គមដោយទំព័រហ្វេសប៊ុក Viral Post Today កាលពីថ្ងៃទី២៣ ខែមិថុនា ឆ្នាំ២០២៤ ហើយទទួលបានការចែកចាយបន្តដល់ទៅជាង ១០០ដង។
ព័ត៌មានមួយទៀតដែលមានន័យដូចគ្នានឹងព័ត៌មានខាងលើនេះ ត្រូវបានបង្ហោះនៅលើបណ្ដាញសង្គមហ្វេសប៊ុកដែរកាលពីចុងសប្ដាហ៍កន្លងមកនេះ។ អ្នកប្រើប្រាស់ហ្វេសប៊ុកជាច្រើន បានបញ្ចេញមតិថ្កោលទោស និងរិះគន់ប្រព័ន្ធតុលាការកម្ពុជា បន្ទាប់ពីបានឃើញព័ត៌មាននេះ។
ខាងក្រោមនេះ គឺជារូបភាពផ្ដាមចេញពីការបង្ហោះព័ត៌មានមានន័យដូចគ្នានៅលើបណ្ដាញសង្គមកាលពីថ្ងៃទី២៣ ខែមិថុនា ឆ្នាំ២០២៤ ហើយព័ត៌មាននេះ ត្រូវបានចែកចាយបន្តដល់ទៅជិត ៣ពាន់ដងឯណោះ។
សម្រាប់ព័ត៌មានដូចគ្នានេះដែលបង្ហោះនៅលើបណ្ដាញសង្គមដោយអ្នកប្រើប្រាស់បណ្ដាញសង្គមផ្សេងទៀត សូមមើលតាមរយៈតំណភ្ជាប់មានទីនេះ Link 1 (archived), Link 2 (archived), Link 3 (archived), Link 4 (archived), Link 5 (archived)។
ការត្រួតពិនិត្យការពិត
Fact Crescendo Cambodia បានចាប់ផ្ដើមត្រួតពិនិត្យទៅលើការអះអាងខាងលើនេះតាមរយៈការពិនិត្យមើលឡើងវិញសំណុំរឿងនីមួយៗ និងដំណើរវិវត្តន៍នៃករណីទាំងពីរ ដែលនាំឱ្យយើងរកឃើញការពិតដូចខាងក្រោមនេះ។
សំណុំរឿងឃាតកម្មបង្កឡើងដោយ ស្រី ស៊ីណា
ករណីបាញ់ប្រហារមួយបានកើតឡើងកាលពីថ្ងៃទី១៧ ខែមិថុនា ឆ្នាំ២០២៤ ទៅមនុស្សមួយក្រុមនៅក្នុងលំនៅឋានមួយនៅខណ្ឌច្បារអំពៅ ដោយបានសម្លាប់គូស្នេហ៍វ័យក្មេងមួយគូ និងបាញ់ប្រហារបង្កឱ្យមនុស្ស ២នាក់ទៀតរងរបួសកាលពីថ្ងៃទី១៧ ខែមិថុនា ឆ្នាំ២០២៤។
ខ្មាន់កាំភ្លើងឈ្មោះ ស្រី ស៊ីណា អាយុ ៥០ឆ្នាំ ដែលមានងារជាឧកញ៉ា ត្រូវបានសមត្ថកិច្ចចាប់ខ្លួនបាននៅឯជាយរាជធានីភ្នំពេញ តែប៉ុន្មានម៉ោងប៉ុណ្ណោះក្រោយពីអំពើបាញ់ប្រហារបានកើតឡើង។
បន្ទាប់ពីករណីបាញ់ប្រហារបានកើតឡើង ខ្មាន់កាំភ្លើង ស្រី ស៊ីណា ត្រូវបានលោកនាយករដ្ឋមន្ត្រី ហ៊ុន ម៉ាណែត ទូលស្នើសុំព្រះមហាក្សត្រដកហូតគោរមងារ “ឧកញ៉ា” ពីបុគ្គលរូបនេះ ហើយព្រះមហាក្សត្របានត្រាស់បង្គាប់ដកហូតគោរមងារចាប់ពីថ្ងៃទី២០ ខែមិថុនា។
ខាងក្រោមនេះ គឺជាព្រះរាជក្រឹត្យត្រាស់បង្គាប់បញ្ចប់គោរមងារ “ឧកញ៉ា”ពី ស្រី ស៊ីណា ដែលព្រះរាជក្រឹត្យនេះត្រូវបានផ្សព្វផ្សាយនៅលើទំព័រហ្វេសប៊ុកសមាគមឧកញ៉ាកម្ពុជាកាលពីថ្ងៃទី២០ ខែមិថុនា។
៦ថ្ងៃក្រោយការបាញ់ប្រហារ សាលាដំបូងរាជធានីភ្នំពេញ បានសម្រេចចោទប្រកាន់ទៅលើខ្មាន់កាំភ្លើង ស្រី ស៊ីណា ចំនួន ៣បទល្មើស ក្នុងនោះមានការចោទប្រកាន់ពីបទឃាតកម្ម ចោទពីបទប៉ុនប៉ងឃាតកម្ម និងចោទពីបទប្រើប្រាស់អាវុធដោយគ្មានការអនុញ្ញាត។
បើតាមសេចក្ដីប្រកាសព័ត៌មានរបស់តុលាការ ក្រោមការចោទប្រកាន់ពីបទ “ឃាតកម្ម” ខ្មាន់កាំភ្លើង ស្រី ស៊ីណា ប្រឈមមុខនឹងការកាត់ទោសឱ្យច្បាប់ពន្ធនាគាររហូតដល់ ១៥ឆ្នាំ។
ចំណែកបទចោទ “ប៉ុនប៉ងឃាតកម្ម” សាលាដំបូងរាជធានីភ្នំពេញ បញ្ជាក់ថា ខ្មាន់កាំភ្លើង ស្រី ស៊ីណា ប្រឈមមុខនឹងការផ្ដន្ទាទោសឱ្យជាប់ពន្ធនាគាររហូតដល់ ១៥ឆ្នាំដែរ។
ខាងក្រោមនេះ គឺជាសេចក្ដីប្រកាសព័ត៌មានទាំងស្រុងរបស់សាលាដំបូងរាជធានីភ្នំពេញកាលពីថ្ងៃទី២៣ ខែមិថុនា ឆ្នាំ២០២៤ ដែលរៀបរាប់ពីបទចោទប្រកាន់ទៅលើខ្មាន់កាំភ្លើង ស្រី ស៊ីណា និងស្ថានទម្ងន់ទោសទៅតាមបទល្មើស។
នៅក្នុងសេចក្ដីប្រកាសព័ត៌មានខាង សាលាដំបូងរាជធានីភ្នំពេញបានសម្រេចបញ្ជូនបុគ្គល ស្រី ស៊ីណា ទៅដាក់ឃុំបណ្ដោះអាសន្ននៅពន្ធនាគារ ហើយរូបថតដែលត្រូវបានចុះផ្សាយដោយសារព័ត៌មានក្នុងស្រុក បង្ហាញថា ខ្មាន់កាំភ្លើងរូបនេះ ត្រូវបានបញ្ជូនទៅឃុំខ្លួននៅមណ្ឌលអប់រំកែប្រែទី១ (ម១) ឬពន្ធនាគារព្រៃស។
ជាងនេះទៅទៀត ក្រសួងយុត្តិធម៌ក៏បានចេញសេចក្ដីប្រកាសព័ត៌មានមួយនៅថ្ងៃដដែលនោះ ទាក់ទងនឹងសំណុំរឿងឃាតកម្មដែលបង្កឡើងដោយខ្មាន់កាំភ្លើង ស្រី ស៊ីណា ដោយក្រសួងបានស្នើទៅស្ថាប័នតុលាការឱ្យអនុវត្តច្បាប់ឱ្យបាន “ត្រឹមត្រូវ” និង “ម៉ឹងម៉ាត់” ដើម្បីធានាថា ជនរងគ្រោះដាច់ខាតត្រូវតែទទួលបានយុត្តិធម៌ត្រឹមត្រូវតាមច្បាប់។
ខាងក្រោមនេះ គឺជាសេចក្ដីប្រកាសព័ត៌មានរបស់អ្នកនាំពាក្យក្រសួងយុត្តិធម៌កាលពីថ្ងៃទី២៣ ខែមិថុនា ឆ្នាំ២០២៤ ដែលត្រូវបានផ្សព្វផ្សាយនៅលើទំព័រហ្វេសប៊ុករបស់ក្រសួង។
បន្ទាប់ពីតុលាការសម្រេចចោទប្រកាន់បែបនេះទៅលើខ្មាន់កាំភ្លើង ស្រី ស៊ីណា ដែលអាចឱ្យគាត់ជាប់ឃុំចន្លោះពី ១០ ទៅ ១៥ឆ្នាំនោះ មហាជននៅលើបណ្ដាញសង្គម បានបញ្ចេញប្រតិកម្មរបស់ពួកគេរិះគន់ទៅលើប្រព័ន្ធតុលាការកម្ពុជា ដោយចោទថា ប្រព័ន្ធតុលាការអនុវត្តមិនបានត្រឹមត្រូវទៅលើបុគ្គលរូបនេះដែលធ្លាប់មានគោរមងារជាឧកញ៉ា។
ដើម្បីបញ្ជាក់ប្រាប់មហាជនឱ្យបានយល់កាន់តែច្បាស់នោះ រដ្ឋមន្ត្រីក្រសួងយុត្តិធម៌ លោក កើត រិទ្ធ ដែលមានឋានៈជាឧបនាយករដ្ឋមន្ត្រីផងនោះ បានរៀបចំធ្វើសន្និសីទសារព័ត៌មាននៅថ្ងៃទី២៦ ខែមិថុនា ឆ្នាំ២០២៤។
លោក កើត រិទ្ធិ បានថ្លែងបញ្ជាក់នៅមុខក្រុមអ្នកសារព័ត៌មានថា ខ្មាន់កាំភ្លើង ស្រី ស៊ីណា ត្រូវបានចោទប្រកាន់នៅក្នុងសំណុំរឿង ២ផ្សេងគ្នា ដែលសុំរឿង “ឃាតកម្ម” ត្រូវប្រឈមមុខជាប់ពន្ធនាគារពី ១០ ទៅ ១៥ឆ្នាំ ហើយសំណុំរឿង “ប៉ុនប៉ងឃាតកម្ម” ត្រូវប្រឈមមុខជាប់ទោសពី ១០ ទៅ ១៥ឆ្នាំផងដែរ។
បើតាមការបញ្ជាក់របស់រដ្ឋមន្ត្រីយុត្តិធម៌រូបនេះ ការអនុវត្តទោសចំពោះខ្មាន់កាំភ្លើង ស្រី ស៊ីណា នឹងត្រូវធ្វើឡើងដោយសាលក្រមពីរផ្សេងគ្នា និងត្រូវធ្វើឡើងជាបន្តបន្ទាប់គ្នា ដោយផ្អែកតាមគោលការណ៍ “សមទណ្ឌោ” ដែលជាគោលការណ៍នៃការអនុវត្តទោសដោយស្មើភាពគ្នាទៅលើជនដែលប្រព្រឹត្តអំពើល្មើសដូចគ្នា។
សូមមើលសេចក្ដីរាយការណ៍ព័ត៌មានទាំងស្រុងចេញផ្សាយដោយសារព័ត៌មាន Fresh News កាលពីថ្ងៃទី២៦ ខែមិថុនា ឆ្នាំ២០២៦ នៅក្នុងអត្ថបទ “ឧក្រិដ្ឋជន ស្រី ស៊ីណា ត្រូវបានចោទប្រកាន់២សំណុំរឿងផ្សេងគ្នា ដែលក្នុងមួយសំណុំរឿងៗប្រឈមការជាប់ពន្ធនាគារ ១០-១៥ឆ្នាំ ដែលទោសនេះនឹងត្រូវបូកសរុបបញ្ចូលគ្នា”។
ក្រៅពីអត្ថបទសំណេរហើយនោះ សារព័ត៌មាននេះក៏បានផ្សាយមកជាមួយនូវវីដេអូមានរយៈពេលជិត ៥នាទី ដែលបង្ហាញលោក កើត រិទ្ធ និយាយអំពីសំណុំរឿងចោទប្រកាន់ទៅលើខ្មាន់កាំភ្លើង ស្រី ស៊ីណា។
សូមមើលវីដេអូទាំងស្រុងនៅខាងក្រោមនេះ
ជាងនេះទៅទៀត រដ្ឋមន្ត្រីយុត្តិធម៌ លោក កើត រិទ្ធ បានប្រកាសជំហរថា លោកនឹងចុះចេញពីតំណែង ប្រសិនបើខ្មាន់កាំភ្លើង ស្រី ស៊ីណា ត្រូវបានកាត់ឱ្យជាប់ពន្ធនាគារ ហើយត្រូវបានដោះលែងវិញក្រោយការអនុវត្តទោសត្រឹមពីរបីឆ្នាំនោះ។
ដើម្បីធានាការអនុវត្តទោសដ៏តឹងរឹង និងម៉ឹងម៉ាត់ចំពោះករណីនេះ លោក កើត រិទ្ធ បានប្រកាសផងដែរថា លោកនឹងស្នើដាក់ឈ្មោះបុគ្គលនេះទៅក្នុងបញ្ជី “ជនសាហាវៗ” ដែលមិនអាចស្នើសុំការបន្ធូរបន្ថយ ឬលើកលែងទោសបានឡើយ ដើម្បីធានាការអនុវត្តទោសឱ្យបានធ្ងន់ធ្ងរសាកសមនឹងអំពើរបស់បុគ្គលនេះ។
នៅក្នុងសន្និសីទនោះ រដ្ឋមន្ត្រីយុត្តិធម៌បានបញ្ជាក់ផងដែរថា ការផ្សព្វផ្សាយនៅលើបណ្ដាញសង្គមថា ខ្មាន់កាំភ្លើង ស្រី ស៊ីណា ដែលបានបាញ់សម្លាប់មនុស្ស ២នាក់ និងបាញ់ប្រហារមនុស្ស ២នាក់ទៀតឱ្យរងរបួសនោះ នឹងត្រូវជាប់ពន្ធនាគារចន្លោះពី ១០ ទៅ ១៥ឆ្នាំនោះ គឺជាព័ត៌មានមិនត្រឹមត្រូវដែលនាំឱ្យមានការភ័ន្តច្រឡំ។
កាលពីថ្ងៃម្សិលមិញនេះ តុលាការរាជធានីភ្នំពេញ បានសម្រេចចោទប្រកាន់បុគ្គល ស្រី ស៊ីណា ពីបទរំលោភលើលំនៅឋានអ្នកដទៃតាមមាត្រា២៩៩ នៃក្រមព្រហ្មទណ្ឌ ដែលអាចប្រឈមមុខនឹងទោសជាប់ពន្ធនាគារពី ១ខែ ទៅ ១ឆ្នាំបន្ថែមទៀត បន្ថែមទៅលើបទចោទប្រកាន់ចំនួន ៣ករណីរួចមកហើយនោះ។ អត្ថបទទាំងស្រុងនៅទីនេះ
សំណុំរឿងឃាតកម្មសម្លាប់ម្ចាស់បំណុលនៅខេត្តកណ្ដាល
ករណីឃាតកម្មទៅលើស្ត្រីម្ចាស់បំណុលម្នាក់ បានកើតឡើងនៅភូមិមួយស្ថិតក្នុងស្រុកស្អាង ខេត្តកណ្ដាល កាលពីថ្ងៃទី១៩ ខែឧសភាកន្លងមក ដោយស្ត្រីរងគ្រោះត្រូវបានគេកាប់រហូតដល់ស្លាប់។
បុរសម្នាក់អាយុ ៣២ឆ្នាំ ដែលជាកូនបំណុល ត្រូវបានសមត្ថកិច្ចចាប់ខ្លួនបាននៅឯស្រុកវាលវែង ខេត្តពោធិ៍សាត់ បន្ទាប់ពីជនដៃដល់រូបនេះ បានរត់គេចខ្លួនអស់រយៈពេល ២ថ្ងៃនេះ។ អត្ថបទទាំងស្រុងនៅទីនេះ (archived)
បន្ទាប់ពីត្រូវបានចាប់ខ្លួនបានហើយ តុលាការខេត្តកណ្ដាល បានសម្រេចចោទប្រកាន់ទៅលើជនដៃដល់រូបនេះពីបទ “ឃាតកម្ម” តាមមាត្រា ១៩៩ នៃក្រមព្រហ្មទណ្ឌកម្ពុជា ហើយត្រូវបានបញ្ជាឱ្យដាក់ឃុំបណ្ដោះអាសន្ននៅពន្ធនាគារខេត្តកណ្ដាល កាលពីថ្ងៃទី២៣ ខែឧសភា ឆ្នាំ២០២៤។ អត្ថបទទាំងស្រុងនៅទីនេះ (archived)
បន្ទាប់ពីមានការផ្សាយព័ត៌មានលើបណ្ដាញសង្គមថា ជនដៃដល់នៃឃាតកម្មនេះ ត្រូវបានតុលាការផ្ដន្ទាទោសដាក់ពន្ធនាគារមួយជីវិតនោះ អ្នកនាំពាក្យសាលាដំបូងខេត្តកណ្ដាល ក៏បានបញ្ជាក់នៅក្នុងសេចក្ដីបំភ្លឺមួយថា ការផ្សាយព័ត៌មានខាងលើនេះ គឺជាព័ត៌មាន “មិនពិត”។
អ្នកនាំពាក្យសាលាដំបូងខេត្តកណ្ដាល បានបញ្ជាក់បន្ថែមថា សំណុំរឿងនេះ ត្រូវបានចោទប្រកាន់ពីបទ “ឃាតកម្ម” ដែលត្រូវប្រឈមមុខនឹងទោសជាប់ពន្ធនាគារចន្លោះពី ១០ ទៅ ១៥ឆ្នាំ ហើយថា សំណុំរឿងនេះមិនទាន់ត្រូវបានជំនុំជម្រះ ឬចេញសាលដីកាផ្ដន្ទាទោសនៅឡើយទេ។
ខាងក្រោមនេះ គឺជាសេចក្ដីបំភ្លឺទាំងស្រុងរបស់តុលាការខេត្តកណ្ដាល ដែលត្រូវបានចុះផ្សាយដោយសារព័ត៌មានក្នុងស្រុកកាលពីថ្ងៃទី២៤ ខែមិថុនា ឆ្នាំ២០២៤។
Fresh News’s Report | Archived Link
សមត្ថកិច្ចចាប់ខ្លួនអ្នករាយការណ៍ព័ត៌មានម្នាក់ដែលបង្ហោះព័ត៌មាន “មិនពិត”
នៅក្នុងសន្និសីទកាលពីថ្ងៃពុធកន្លងមកនេះ រដ្ឋមន្ត្រីយុត្តិធម៌ លោក កើត រិទ្ធ ក៏បានលើកឡើងពីការផ្សាយព័ត៌មានអំពីករណីនេះដោយមិនត្រឹមត្រូវនៅលើបណ្ដាញសង្គម ដោយចាត់ទុកថាជាព័ត៌មានដែលធ្វើឱ្យសាធារណជនមានការភ័ន្តច្រឡំ និងមហាជនខឹងសម្បារកាន់តែខ្លាំង។
ជាងនេះទៅទៀត រដ្ឋមន្ត្រីរូបនេះ បានបញ្ជាក់បន្ថែមថា អ្នកសារព័ត៌មានដែលផ្សព្វផ្សាយព័ត៌មានមិនពិតបែបនេះ កំពុងប្រឈមមុខបន្ដឹងតាមផ្លូវច្បាប់ពីស្ថាប័នមានសមត្ថកិច្ច។
Video at minutes 50
https://www.facebook.com/share/v/SDfDekHmpU7C5F8L
សេចក្ដីរាយការណ៍មួយរបស់ប្រព័ន្ធផ្សព្វផ្សាយ CNC កាលពីថ្ងៃម្សិលមិញនេះ បានឱ្យដឹងថា អ្នកសារព័ត៌មានម្នាក់ដែលធ្វើការនៅស្ថាប័នម្អមស្រែ (Ma’orm Sre TV) ត្រូវបានសមត្ថកិច្ចនគរបាលខេត្តកណ្ដាលឃាត់ខ្លួនកាលពីថ្ងៃទី២៨ ខែមិថុនា ឆ្នាំ២០២៤។
បើតាមសេចក្ដីរាយការណ៍ដដែលនេះ អ្នកសារព័ត៌មាននោះ ត្រូវបានឃាត់ខ្លួនពាក់ព័ន្ធនឹងការផ្សាយព័ត៌មាននិយាយថា ជនដៃដល់កាប់សម្លាប់ម្ចាស់បំណុល ត្រូវតុលាការកាត់ទោសឱ្យជាប់គុកមួយជីវិត ប៉ុន្តែ ខ្មាន់កាំភ្លើង ស្រី ស៊ីណា ដែលបាញ់សម្លាប់មនុស្ស ២នាក់ និងបាញ់ប្រហារមនុស្ស ២នាក់ទៀតឱ្យរងរបួសនោះ បែរជាមានទោសពី ១០ ទៅ ១៥ឆ្នាំ។ អត្ថបទទាំងស្រុងនៅទីនេះ (archived)
សន្និដ្ឋាន
Fact Crescendo Cambodia បានរកឃើញថា ព័ត៌មានដូចដែលត្រូវបានរៀបរាប់ខាងលើ មិនត្រឹមត្រូវនោះឡើយ។ តុលាការខេត្តកណ្ដាល បានបញ្ជាក់ថា បុរសម្នាក់ដែលកាប់ស្ត្រីម្ចាស់បំណុលម្នាក់ឱ្យសម្លាប់ ត្រូវបានចោទប្រកាន់ពីបទ “ឃាតកម្ម” ដែលប្រឈមមុខនឹងការចាប់ពន្ធនាគារពី ១០ ទៅ ១៥ឆ្នាំ។ ហើយសំណុំរឿងនេះមិនត្រូវបានជំនុំជម្រះនៅឡើយទេ។ ចំណែកសំណុំរឿងឃាតកម្មបង្កឡើងដោយ ស្រី ស៊ីណា វិញ បុគ្គលនេះត្រូវបានចោទប្រកាន់ ៤បទចោទផ្សេងគ្នា ក្នុងនោះបទចោទ “ឃាតកម្ម” ប្រឈមមុខជាប់គុកចន្លោះពី ១០ ទៅ ១៥ឆ្នាំ, បទចោទ “ប៉ុនប៉ងឃាតកម្ម” ត្រូវមានទោសជាប់គុកពី ១០ ទៅ ១៥ឆ្នាំ បទចោទ “ប្រើប្រាស់អាវុធដោយខុសច្បាប់” និងបទចោទ “រំលោភលើលំនៅឋាន”អ្នកដទៃ។
Title:ព័ត៌មានមិនពិតថា ឃាតករពីរនាក់ប្រឈមមុខជាប់គុកមិនស្មើភាពគ្នាក្រោមបទចោទឃាតកម្មដូចគ្នា
Fact Check By: Jay UdomResult: False