កាលពីសប្ដាហ៍មុន អតីតម្ចាស់ជើងឯកប្រដាល់ទម្ងន់ធ្ងន់ លោក Mike Tyson បានប្រកួតចាញ់លោក Jake Paul អ្នកលេងបណ្ដាញសង្គមប្រែជាអ្នកប្រដាល់។ បន្ទាប់ពីការប្រកួតដ៏ល្បីនោះមក ការអះអាងដ៏ផុសផុលនៅលើបណ្ដាញសង្គម បានលើកឡើងថា កីឡាករប្រដាល់អាមេរិករូបនេះ បានទទួលមរណភាពនៅឯមន្ទីរពេទ្យ។ ការអះអាងនេះ ត្រូវបានចែករំលែកព្រោងព្រាតលើបណ្ដាញសង្គម។ ទោះជាយ៉ាងណា ការផ្ទៀងផ្ទាត់របស់យើង បង្ហាញថា ការអះអាងនេះ មិនត្រឹមត្រូវ។
ការអះអាងលើបណ្ដាញសង្គម
ការអះអាងដ៏ផុសផុលនៅលើបណ្ដាញសង្គមកាលពីថ្ងៃម្សិលមិញនេះ បានផ្សព្វផ្សាយថា អ្នកប្រដាល់ល្បីឈ្មោះ លោក Mike Tyson បានទទួលមរណភាពហើយនៅឯមន្ទីរពេទ្យមួយ តែប៉ុន្មានថ្ងៃប៉ុណ្ណោះក្រោយការប្រកួតរបស់គាត់ជាមួយអ្នកលេងបណ្ដាញសង្គម Jake Paul ដែលបានប្រែខ្លួនជាកីឡាករប្រដាល់។
ខាងក្រោមនេះ គឺជារូបភាពផ្ដាមចេញពីការបង្ហោះព័ត៌មាននៅលើបណ្ដាញសង្គមកាលពីថ្ងៃទី១៩ ខែវិច្ឆិកា ឆ្នាំ២០២៤ ដែលសរសេររៀបរាប់ថា “ម៉ៃ ថៃសាន់ គាត់ស្លាប់ហើយ មើលក្នុងខមមិន”។
ការអះអាងជាភាសាខ្មែរនេះ ក៏ត្រូវបានបង្ហោះនៅលើបណ្ដាញសង្គមដោយអ្នកប្រើប្រាស់ហ្វេសប៊ុក(archived)មួយទៀតកាលពីថ្ងៃទី១៧ ខែវិច្ឆិកា ឆ្នាំ២០២៤ ដោយបានបង្ហាញរូបថតលោក Mike Tyson ដេកនៅលើគ្រែពេទ្យ។
ការអះអាងជាភាសាខ្មែរបែបនេះ បានកើតឡើង បន្ទាប់ពីមានការផ្សព្វផ្សាយព្រោងព្រាតលើបណ្ដាញសង្គមជាភាសាអង់គ្លេសថា អតីតម្ចាស់ជើងឯក៣ស្ថាប័នរូបនេះ បានទទួលមរណភាពនៅឯមន្ទីរពេទ្យមួយ ក្រោយការប្រកួតរបស់គាត់ទល់នឹង Jake Paul កាលពីសប្ដាហ៍មុន។
ខាងក្រោមនេះ គឺជារូបភាពផ្ដាមចេញពីការផ្សព្វផ្សាយព័ត៌មាននៅលើបណ្ដាញសង្គមកាលពីថ្ងៃម្សិលមិញនេះ ដោយរៀបរាប់ជាភាសាអង់គ្លេសថា “Shocking news: Sad Mike Tyson passed away in hospital after his recent fight, along with his final regret for … See more.”
ពាក្យចចាមអារាមនេះ ត្រូវបានបង្ហោះ និងចែករំលែកព្រោងព្រាតលើបណ្ដាញសង្គមកាលពីម្សិលមិញ ដោយទាក់ទាញបានការចាប់អារម្មណ៍ពីអ្នកប្រើប្រាស់បណ្ដាញសង្គមដែលជឿថា ព័ត៌មាននេះពិត។
ខាងក្រោមនេះ គឺជារូបភាពផ្ដាមចេញពីការផ្សព្វផ្សាយរបស់អ្នកប្រើប្រាស់បណ្ដាញសង្គមមួយទៀតដែលសរសេររៀបរាប់ជាភាសាអង់គ្លេសថា “Mike Tyson passed away after the Jake Paul fight.” បន្ទាប់មកក៏មានអ្នកបញ្ចេញមតិថា “RIP.” ជាពាក្យសម្ដែងមរណភាពទុក្ខចំពោះនរណាម្នាក់។
ការអះអាងនេះ ក៏ត្រូវបានបង្ហោះ និងចែករំលែកយ៉ាងផុសផលនៅលើបណ្ដាញសង្គមដទៃទៀត ដូចជា X (អតីត Twitter) បណ្ដាញសង្គម Instagram និងបណ្ដាញសង្គមទើបបង្កើតថ្មីរបស់ក្រុមហ៊ុន Meta ហៅថា Threads។
ខាងក្រោមនេះ គឺជារូបភាពផ្ដាមចេញពីការបង្ហោះព័ត៌មាននេះនៅលើបណ្ដាញសង្គម X ដែលសរសេររៀបរាប់ជាភាសាអង់គ្លេសថា “Shocking news: R.I.P. Mkie Tyson passed away in hospital after his recent fight, along with his final regret for … see more.”
ខាងក្រោមនេះ គឺជារូបភាពនៃការបង្ហោះព័ត៌មាននេះនៅលើបណ្ដាញសង្គម Threads កាលពីថ្ងៃម្សិលមិញនេះជាមួយសំណេរជាភាសាអង់គ្លេសដូចខាងលើដែរ។
ដោយសារតែវាកំពុងតែផុសផុលនៅលើបណ្ដាញសង្គម គេអាចរកមើលការអះអាងនេះតាមរយៈការបង្ហោះរបស់អ្នកប្រើប្រាស់បណ្ដាញសង្គមផ្សេងទៀត៖ Link 1 (archived), Link 2 (archived), Link 3 (archived), Link 4 (archived), Link 5 (archived), និង Link 5 (archived)។
ការត្រួតពិនិត្យការពិត
Fact Crescendo បានចាប់ផ្ដើមផ្ទៀងផ្ទាត់ទៅលើការអះអាងខាងលើនេះតាមរយៈការពិនិត្យមើលព័ត៌មានផ្សព្វផ្សាយដោយសារព័ត៌មានល្បី និងតាមរយៈការដំណើរការ Reverse Image Search ដែលនាំឱ្យយើងរកឃើញការពិតដូចខាងក្រោមនេះ។
លោក Mike Tyson អាយុ ៥៨ឆ្នាំ ស្ថិតក្នុងចំណោមកីឡាករប្រដាល់ដ៏ល្បីឈ្មោះនៅសហរដ្ឋអាមេរិក។ ដោយបានចូលរួមប្រឡូកក្នុងវិស័យកីឡាការប្រដាល់ទម្ងន់ធ្ងន់ចន្លោះពីឆ្នាំ១៩៨៥ រហូតដល់ឆ្នាំ២០០៥ លោកបានគ្រប់គ្រងខ្សែក្រវ៉ាត់ ៣ស្ថាប័ន រួមមានស្ថាប័ន WBA ស្ថាប័ន WBC និងស្ថាប័ន IBF។
ជាកីឡាករប្រដាល់ដ៏មានល្បីឈ្មោះមួយរូប មរណភាពរបស់គាត់ប្រាកដជាសារព័ត៌មានជាច្រើនចាប់អារម្មណ៍ចុះផ្សាយទាំងនៅសហរដ្ឋអាមេរិក និងជុំវិញពិភពលោក។
ទោះជាយ៉ាងណា គិតត្រឹមថ្ងៃនេះ យើងរកពុំឃើញទាល់តែសោះនូវព័ត៌មានបែបនេះត្រូវបានចុះផ្សាយដោយសារព័ត៌មានធំៗ ដូចជា ទូរទស្សន៍ CNN កាសែត New York Times ឬក៏ប្រព័ន្ធផ្សព្វផ្សាយអង់គ្លេស BBC។
ព័ត៌មានផុសផុលចុងក្រោយទាក់ទងនឹងលោក Mike Tyson ផ្ដោតសំខាន់ទៅលើការប្រកួតរបស់លោកកាលពីសប្ដាហ៍មុនទល់នឹងលោក Jake Paul អ្នកប្រដាល់ដែលមានគម្លាតអាយុ ៣១ឆ្នាំពីគ្នា ហើយលោក Mike Tyson បានចាញ់នៅក្នុងការប្រកួតនោះ។
ព័ត៌មាននេះ ត្រូវបានចុះផ្សាយព្រោងព្រាតដោយសារព័ត៌មានល្បីឈ្មោះធំៗ ដូចជា CNN សារព័ត៌មាន USA TODAY និងទូរទស្សន៍ Al Jazeera របស់ប្រទេសកាតា។
ការរុករកជាមួយឃ្លា “Mike Tyson passed away” នៅលើប្រព័ន្ធ Google វាបញ្ជាក់ច្បាស់ថា អ្នកប្រដាល់ដ៏ល្បីឈ្មោះរូបនេះ បាននិយាយថា លោកស្ទើតែបាត់បង់ជីវិតកាលពីប៉ុន្មានខែមុនដោយសារកត្តាសុខភាព។ ព័ត៌មាននេះ ត្រូវបានចុះផ្សាយដោយ BBC ដោយផ្អែកតាមសំណេររបស់គាត់នៅលើ Instagram។
តាមរយៈ Reverse Image Search យើងបានរកឃើញថា រូបថតដែលបង្ហាញពិធីបុណ្យសព្វលោក Mike Tyson នោះ ត្រូវបានកាត់តដោយប្រើប្រាស់រូបថតនៃហេតុការណ៍ដ៏សោកសៅកាលពីប៉ុន្មានឆ្នាំមុន។ ជាងនេះទៀត រូបថតដទៃទៀតដែលបង្ហាញលោក Mike Tyson ដេកនៅលើគ្រែពេទ្យនោះ សុទ្ធតែត្រូវបានកាត់តទាំងអស់។
ខាងក្រោមនេះ គឺជារូបភាពផ្ដាមចេញពីរូបថតនៃពិធីបុណ្យសពសម្រាប់គ្រួសារមួយដែលបាត់បង់សមាជិករហូតដល់ ៥នាក់នៅក្នុងគ្រោះថ្នាក់លិចលង់រថយន្តមួយគ្រឿងកាលពីឆ្នាំ២០១៦ នៅឯប្រទេសអៀឡង់។
Belfast Telegraph | Archived Link
ដោយសារតែពាក្យចចាមអារាមនេះកំពុងលេចធ្លោលើបណ្ដាញសង្គមនោះ ស្ថាប័នផ្ទៀងផ្ទាត់ព័ត៌មានក្លែងក្លាយដទៃទៀត ក៏បានត្រួតពិនិត្យផងដែរ ដូចជា Australian Associated Press (AAP) សារព័ត៌មាន Snopes និង Dubawa។
There are many rumors about the deaths of various celebrities, but Fact Crescendo has debunked these claims. Discover our previously debunked stories through the following links:
ការអះអាង ឬពាក្យចចាមអារាមនៃមរណភាពរបស់បុគ្គលល្បីៗ បានកើតឡើងព្រោងព្រាតនៅលើបណ្ដាញសង្គម ហើយស្ថាប័ន Fact Crescendo ក៏បានផ្ទៀងផ្ទាត់ការអះអាងទាំងនោះផងដែរ។ សម្រាប់អត្ថបទពីមុនៗ សូមចូលទៅមើលតាមរយៈតំណភ្ជាប់នៅទីនេះ ឬតំណភ្ជាប់មួយទៀតនៅទីនេះ។
Follow Us and Stay Up to Date with Our Latest Fact-Checks
Facebook | Twitter | Telegram | TikTok | WhatsApp | Instgram
សន្និដ្ឋាន
Fact Crescendo រកឃើញថា ការអះអាងដូចដែលត្រូវបានរៀបរាប់ខាងលើនេះ មិនត្រឹមត្រូវនោះឡើយ។ អតីតកីឡាករប្រដាល់ដ៏ល្បីឈ្មោះ លោក Mike Tyson នៅមានជីវិតនៅឡើយ បន្ទាប់ពីការប្រកួតជាមួយលោក Jake Paul កាលពីសប្ដាហ៍មុន។ បើទោះបីពាក្យចចាមអារាមនេះផុសផុលលើបណ្ដាញសង្គម ប៉ុន្តែ គ្មានអ្វីមកបញ្ជាក់ពីមរណភាពរបស់លោកឡើយ។
Title:ព័ត៌មានមិនពិតផ្សាយព្រាតថា Mike Tyson ស្លាប់ហើយក្រោយប្រកួតទល់ Jake Paul
Fact Check By: Jay UdomResult: False
