បន្ទាប់ពីការបោះឆ្នោតកាលពីថ្ងៃអាទិត្យកន្លងមក ការអះអាងដ៏ផុសផុលមួយនៅលើបណ្ដាញសង្គម បានលើកឡើងថា លោកនាយករដ្ឋមន្ត្រីថៃ ប្រាយុទ្ធ ច័ន្ទអូឆា ដែលចាញ់ការបោះឆ្នោត បានសម្រេចលាឈប់ពីនយោបាយ។ ការអះអាងនេះ ត្រូវបានចែករំលែកបន្តយ៉ាងផុសផុល និងមានការបញ្ចេញមតិយោបល់ជាច្រើន។ ទោះជាយ៉ាងណា Fact Crescendo Cambodia បានរកឃើញថា ការអះអាងនេះ មិនត្រឹមត្រូវនោះឡើយ។
ការអះអាងលើបណ្ដាញសង្គម
ការអះអាងមួយដែលត្រូវបានបង្ហោះលើបណ្ដាញសង្គមកាលពីថ្ងៃពុធកន្លងមកនេះ បានលើកឡើងថា នាយករដ្ឋមន្ត្រីថៃ លោក ប្រាយុទ្ធ ច័ន្ទអូឆា បានប្រកាសទទួលស្គាល់នៃការចាញ់ការបោះឆ្នោត និងលាឈប់ពីនយោបាយដោយស្ងៀមស្ងាត់។
ការអះអាងនេះ ត្រូវបានចែករំលែកបន្តដល់ទៅជាង ១ពាន់ដង និងទទួលបានការបញ្ចេញមតិយ៉ាងច្រើនផងដែរនៅក្នុងរយៈពេលប៉ុន្មានថ្ងៃកន្លងមកនេះ។
ខាងក្រោមនេះ គឺជារូបភាពផ្ដាមចេញពីការអះអាងនៅលើបណ្ដាញសង្គមកាលពីថ្ងៃទី១៧ ខែឧសភា ឆ្នាំ២០២៣ ដែលរៀបរាប់ថា «លោក ប្រាយុទ្ធ ប្រកាសទទួលស្គាល់ខ្លួនចាញ់ និងសុំចូលនិវត្តន៍ដោយស្ងៀមស្ងាត់»។
ការអះអាងដដែលនេះ ក៏ត្រូវបានបង្ហោះលើបណ្ដាញសង្គមដោយទំព័រហ្វេសប៊ុកដទៃទៀតផងដែរ ហើយក៏ទទួលបានការចែករំលែកបន្ត និងការបញ្ចេញមតិយោបល់យ៉ាងច្រើនផងដែរ។
សូមមើលរូបភាពខាងក្រោមនេះ ដែលត្រូវបានផ្ដាមចេញពីទំព័រហ្វេសប៊ុកឈ្មោះ ព័ត៌មានពិត ដែលបានបង្ហោះការអះអាងដូចគ្នាកាលពីថ្ងៃទី១៧ ខែឧសភា ឆ្នាំ២០២៣។
ដើម្បីមើលខ្លឹមសារទាំងស្រុងនៃការអះអាងដូចគ្នានេះ ដែលត្រូវបានបង្ហោះនៅលើបណ្ដាញសង្គមដោយអ្នកប្រើប្រាស់ហ្វេសប៊ុកដទៃទៀត សូមមើលតាមរយៈតំណភ្ជាប់មាននៅទីនេះ (archived) ឬតាមរយៈតំណភ្ជាប់មួយទៀតមាននៅទីនេះ (archived) ផងដែរ។
ការត្រួតពិនិត្យការពិត
Fact Crescendo Cambodia បានចាប់ផ្ដើមត្រួតពិនិត្យទៅលើការអះអាងនេះតាមរយៈការពិនិត្យមើលសេចក្ដីរាយការណ៍ព័ត៌មានស្ដីពីការបោះឆ្នោតនៅប្រទេសថៃដែលរាយការណ៍ដោយសារព័ត៌មានអន្តរជាតិ។ ជាលទ្ធផល យើងបានរកឃើញការពិតដូចខាងក្រោមនេះ។
សេចក្ដីរាយការណ៍របស់ទីភ្នាក់ងារ Reuters គណបក្សកាវខ្លៃ (Move Forward Party)ដឹកនាំដោយលោក ភីថា លីមចារ៉ើនរ៉ាត់ (Pita Limjaroenrat) ឈ្នះបានអាសនៈ ១៥១ នៅក្នុងចំណោមអាសនៈសរុប ៥០០នៅក្នុងសភាថៃ ដែលបង្ហាញថា គណបក្សមួយនេះឈ្នះការបោះឆ្នោតកាលពីថ្ងៃអាទិត្យចុងសប្ដាហ៍មុន។
បើតាមសេចក្ដីរាយការណ៍ដដែលនេះ គណបក្សរួមថៃសាងឆាត (UTNP)របស់នាយករដ្ឋមន្ត្រី ប្រាយុទ្ធ ច័ន្ទអូឆា ទទួលបានត្រឹមតែ ៣៦អាសនៈតែប៉ុណ្ណោះ ដែលនេះមានន័យថា លោក ប្រាយុទ្ធ បានចាញ់ការបោះឆ្នោតនេះ។
សេចក្ដីរាយការណ៍មួយរបស់ប្រព័ន្ធផ្សព្វផ្សាយថៃ ThaiPBS បានដកស្រង់សម្ដីលោក ប្រាយុទ្ធ ដែលនិយាយថា លោកគោរពលទ្ធផលនៃការបោះឆ្នោតកាលពីថ្ងៃទី១៤ ខែឧសភា ដែលនេះមានន័យថា លោកទទួលលទ្ធផលនៃការបោះឆ្នោតដែលគណបក្សលោកមិនទទួលសំឡេងភាគច្រើន។
ខាងក្រោមនេះ គឺជារូបភាពផ្ដាមចេញពីការចុះផ្សាយកាលពីថ្ងៃទី១៥ ខែឧសភា ឆ្នាំ២០២៣ របស់គេហទំព័រ ThaiPBS ដែលជាផ្នែកមួយនៃទូរទស្សន៍ថៃ ThaiPBS។
តើលោក ប្រាយុទ្ធ ច័ន្ទអូឆា នឹងចូលលាឈប់ពីនយោបាយទេ?
បន្ទាប់ពីបរាជ័យនៅក្នុងការបោះឆ្នោតនេះ សំណួរសំខាន់មួយបានតម្រង់ទៅលោក ប្រាយុទ្ធ ដែលជានាយករដ្ឋមន្ត្រីត្រៀមចាកចេញពីតំណែងនាពេលឆាប់ៗខាងមុខនេះ។ សំណួរនោះ ត្រូវបានចោទសួរថា តើលោក ប្រាយុទ្ធ នឹងលាឈប់ពីនយោបាយ ឬចូលនិវត្តន៍លែងធ្វើនយោបាយទៀតឬទេ?
ប្រព័ន្ធផ្សព្វផ្សាយថៃ ThaiPBS បានចុះផ្សាយកាលពីថ្ងៃចន្ទដើមសប្ដាហ៍នេះថា លោក ប្រាយុទ្ធ អាចនឹងចាកចេញពីឆាកនយោបាយថៃ បន្ទាប់ពីគណបក្សរួមថៃសាងឆាតពុំទទួលបានជ័យជម្នះនៅក្នុងការបោះឆ្នោត។
សារព័ត៌មានថៃបានចុះផ្សាយបែបនេះដោយផ្អែកតាមសម្ដីរបស់លោក ថាណាខន វ៉ាងបុណ្យកងឆាណា (Thanakorn Wanboonkongchana) ដែលជាអនុប្រធានគណបក្សរួមថៃសាងឆាត។ សូមមើលខ្លឹមសារទាំងស្រុងនៅទីនេះ(archived)។
ទោះជាយ៉ាងណា សេចក្ដីរាយការណ៍របស់សារព័ត៌មានបាងកក ប៉ុស្តិ៍ បានដកស្រង់សម្ដីរបស់លោក ប្រាយុទ្ធ ដោយផ្ទាល់ដែលនិយាយថា លោកនឹងនៅតែបន្តធ្វើនយោបាយដោយកាន់តំណែងជាអ្នកយុទ្ធសាស្ត្ររបស់គណបក្សរួមថៃសាងឆាត។ សូមមើលខ្លឹមសារទាំងស្រុងនៅទីនេះ(archived)។
ទូរទស្សន៍ Channel News Asia (CNA) ដែលជាប្រព័ន្ធផ្សព្វផ្សាយរបស់ប្រទេសសិង្ហបុរី បានរាយការណ៍ថា នាយករដ្ឋមន្ត្រីថៃផុតអាណត្តិ លោក ប្រាយុទ្ធ មិនបានបញ្ជាក់ទេថា លោកនឹងលាឈប់ពីនយោបាយនោះ បន្ទាប់ពីត្រូវបានអ្នកសារព័ត៌មានសាកសួរអំពីចំណុចនេះ។
ដើម្បីស្វែងរកព័ត៌មានពិត សូមតាមដានការផ្សាយរបស់យើងតាមរយៈប្រព័ន្ធដូចខាងក្រោម៖
Facebook Twitter Telegram Google News TikTok
សន្និដ្ឋាន
Fact Crescendo Cambodia បានរកឃើញថា ការអះអាងដូចដែលត្រូវបានរៀបរាប់ខាងលើនេះ គឺជាព័ត៌មានមិនត្រឹមត្រូវដោយអន្លើ។ លោក ប្រាយុទ្ធ ច័ន្ទអូឆា បានទទួលស្គាល់លទ្ធផលនៃការបោះឆ្នោតកាលពីថ្ងៃអាទិត្យកន្លងមកនេះ ដែលគេមើលឃើញគណបក្សរួមថៃសាងឆាតរបស់លោកទទួលបរាជ័យ។ ទោះជាយ៉ាងណា មិនទាន់មានព័ត៌មានផ្លូវការណាមួយបញ្ជាក់ថា លោក ប្រាយុទ្ធ នឹងលាឈប់ពីឆាកនយោបាយនៅឡើយទេ។
Title:ក្រោយបរាជ័យក្នុងការបោះឆ្នោត តើលោក ប្រាយុទ្ធ លាឈប់ពីឆាកនយោបាយមែនឬ?
Written By: Kakada SimResult: Partly False
