បន្ទាប់ពីហេតុការណ៍ភ្លើងឆេះព្រៃរាលដាលឆេះផ្ទះសម្បែងជាច្រើននៅទីក្រុង Los Angeles ការអះអាងដ៏ផុសផុលមួយបានលើកឡើងថា ផ្ទះមួយមានដំបូលពណ៌ក្រហម បានរួចផុតពីគ្រោះមហន្តរាយនោះ ដោយសារតែម្ចាស់ផ្ទះជាបុគ្គលតែងតែធ្វើការងារសប្បុរសធម៌ជួយដល់កុមារក្រីក្រនៅទ្វីបអាហ្វ្រិក។ បន្ទាប់ពីការអះអាងនេះ ត្រូវបានបង្ហោះព្រោងព្រាតលើបណ្ដាញសង្គម ទោះជាយ៉ាងណា ការផ្ទៀងផ្ទាត់របស់យើង រកឃើញថា ការអះអាងនេះ មិនត្រឹមត្រូវនោះឡើយ។
ការអះអាងលើបណ្ដាញសង្គម
រូបថតផ្ទះថ្មដំបូលក្រហមមួយរក្សារូបរាងដូចធម្មតាដោយមិនត្រូវភ្លើងឆាបឆេះសោះនោះ ត្រូវបានគេបង្ហោះនៅលើបណ្ដាញសង្គមព្រោងព្រាតជាមួយសំណេររៀបរាប់ថា ម្ចាស់ផ្ទះមួយនេះគឺជាអ្នកគោរពប្រតិបត្តិព្រះពុទ្ធសាសនា ទើបភ្លើងឆេះព្រៃនៅរដ្ឋកាលីហ្វ័រនៀ (California) មិនឆាបឆេះផ្ទះគាត់សោះ។
រូបថតជាមួយនឹងការអះអាងបែបនេះ ត្រូវបានអ្នកប្រើប្រាស់បណ្ដាញសង្គមចែករំលែកតៗគ្នាយ៉ាងផុសផុល ព្រមទាំងការបញ្ចេញមតិចម្រុះបែបផងដែរ ដែលស្ដែងឱ្យឃើញថា មានអ្នកប្រើប្រាស់បណ្ដាញសង្គមជាច្រើនជឿទៅតាមការអះអាងនេះ។
ខាងក្រោមនេះ គឺជារូបភាពផ្ដាមចេញពីការអះអាងមួយដែលបង្ហោះនៅលើបណ្ដាញសង្គមកាលពីថ្ងៃទី១៥ ខែមករា ឆ្នាំ២០២៥ ជាមួយសំណេររៀបរាប់ថា “មិនមែនជារឿងអបិយជំនឿអីទេតាមអត្ថបទរៀបរាប់ខាងក្រោមនេះ ផ្ទះនេះគាត់កាន់ពុទ្ធសាសនា ទោះគាត់កាន់ពុទ្ធសាសនាក៏ដោយ បើអស់បុណ្យហើយ ត្រូវទទួលអកុសលវិបាកដូចគ្នា នត្ថិកម្មំសមំ ពលំ គ្មានកម្លាំងអ្វី ស្មើនឹងកម្លាំងកម្មឡើយ មិនអាចរារាំងបាបដែលត្រូវឲ្យផលបានឡើយ អាមេរិកខ្លាំងហេតុអី្វជួយមិនបាន? នត្ថិកម្មំសមំ ពលំ”។
សំណេររៀបរាប់ជាភាសាខ្មែរខាងលើនេះ បានផ្អែកទាំងស្រុងទៅតាមការអះអាងនៅលើបណ្ដាញសង្គមដែលរៀបរាប់ជាភាសាអង់គ្លេសថា គេហដ្ឋានមួយនេះ បានរួចផុតពីភ្លើងឆេះព្រៃនៅរដ្ឋកាលីហ្វ័រនៀ ហើយម្ចាស់ផ្ទះមួយនេះ គឺជាអ្នកមានជឿនឿលើសាសនា និងធ្វើសប្បរសធម៌ជួយដល់កុមារក្រីក្រនៅទ្វីបអាហ្វ្រិក។
ខាងក្រោមនេះ គឺជារូបភាពផ្ដាមចេញពីការអះអាងជាភាសាអង់គ្លេសដែលត្រូវបានបង្ហោះនៅលើបណ្ដាញសង្គមកាលពីថ្ងៃទី១៣ ខែមករា ឆ្នាំ២០២៥ ដោយរៀបរាប់ក្នុងន័យថា ម្ចាស់ផ្ទះមួយនេះជាអ្នកគោរពប្រតិបត្តិតាមជំនឿព្រះពុទ្ធសាសនា។
ព័ត៌មាននេះ ត្រូវបានបង្ហោះ និងចែករំលែកព្រោងព្រាតលើបណ្ដាញសង្គមដោយអ្នកប្រើប្រាស់ហ្វេសប៊ុក ដែលស្ដែងឱ្យឃើញថា អ្នកប្រើប្រាស់បណ្ដាញសង្គមជាច្រើនជឿទៅតាមការអះអាងនេះ។
ខាងក្រោមនេះ គឺជារូបភាពផ្ដាមចេញពីការអះអាងនៅលើបណ្ដាញសង្គម Instagram កាលពី ៣ថ្ងៃមុន ដែលរៀបរាប់ថា ផ្ទះមួយនេះបានរួចផុតពីអណ្ដាតភ្លើងឆេះព្រៃកើតឡើងនៅរដ្ឋកាលីហ្វ័រនៀ។
Instagram Post | Archived Link
សម្រាប់ការអះអាងដូចគ្នា ឬប្រហាក់ប្រហែលគ្នានេះដែលត្រូវបានបង្ហោះរំលែកលើបណ្ដាញសង្គមដោយអ្នកប្រើប្រាស់ហ្វេសប៊ុកដទៃទៀត សូមចូលទៅមើលតាមរយៈតំណភ្ជាប់មាននៅទីនេះ៖ Link 1 (archived), Link 2 (archived), Link 3 (archived) និង Link 4 (archived)។
ការត្រួតពិនិត្យការពិត
Fact Crescendo បានត្រួតពិនិត្យ និងផ្ទៀងផ្ទាត់ទៅលើការអះអាងដូចដែលត្រូវបានរៀបរាប់ខាងលើនេះតាមរយៈការដំណើរការ Google Reverse Image Search ដែលនាំឱ្យយើងរកឃើញការពិតដូចខាងក្រោមនេះ។
តាមរយៈ Google Reverse Image Search យើងបានរកឃើញថា រូបថតលំនៅមួយនេះ ត្រូវបានចុះផ្សាយព្រោងព្រាតកាលពីឆ្នាំ២០២៣កន្លងមក ដោយវាមិនពាក់ព័ន្ធអ្វីសោះនឹងហេតុការណ៍ភ្លើងឆេះព្រៃរាលដាលឆេះលំនៅឋានជាច្រើននៅក្នុងទីក្រុង Los Angeles ក្នុងរដ្ឋកាលីហ្វ័រនៀនោះឡើយ។
សេចក្ដីរាយការណ៍របស់សារព័ត៌មាន NPR កាលពីខែសីហា ឆ្នាំ២០២៣កន្លងមក បានឱ្យដឹងថា លំនៅឋានមួយនេះ បានរួចផុតពីហេតុការណ៍ភ្លើងឆេះព្រៃកើតឡើងនៅលើតំបន់ Lahaina ស្ថិតនៅលើកោះ Maui នៃរដ្ឋហាវ៉ៃ។
បើតាមសេចក្ដីរាយការណ៍ដដែលនេះ តំបន់ Lahaina ស្ថិតនៅលើកោះ Maui របស់រដ្ឋហាវ៉ៃ បានរងការបំផ្លិចបំផ្លាញដោយអគ្គិភ័យដែលកើតចេញពីភ្លើងឆេះព្រៃនៅដើមខែសីហា ឆ្នាំ២០២៣កន្លងមក ដោយបានសម្លាប់មនុស្សយ៉ាងតិច ១០២នាក់ បំផ្លិចបំផ្លាញហេដ្ឋារចនាសម្ព័ន្ធផ្ទះសម្បែងដល់ទៅ ២,២០៧កន្លែង។
ទោះជាយ៉ាងណា លំនៅឋានរបស់លោក Trip Millikin បានក្លាយជាទីចាប់អារម្មណ៍របស់មហាជន បន្ទាប់ពីគេចផុតពីអណ្តាតភ្លើងដ៏សន្ធោសន្ធៅនាពេលនោះ ហើយក៏ត្រូវបានចុះផ្សាយព្រោងព្រាតដោយសារព័ត៌មាននានា ខណៈដែលលំនៅឋានជាច្រើននៅតំបន់នោះ ត្រូវភ្លើងឆេះរាបដាលដី។
ដោយបានសម្ភាសម្ចាស់ផ្ទះផ្ទាល់ សេចក្ដីរាយការណ៍ព័ត៌មានរបស់សារព័ត៌មាន NPR បានឱ្យដឹងថា ផ្ទះរបស់លោក Trip Millikin ដែលមានអាយុកាល ១០០ឆ្នាំហើយនោះ អាចរួចផុតពីអណ្ដាតភ្លើងដោយសារតែគាត់បានជួសជុលកែសម្រួលផ្ទះនេះ ដោយដាក់ដំបូលដែកស័ង្កសីក្រហម រៀបចំក្រាលថ្មនៅជុំវិញបរិវេណផ្ទះ និងដាំដើមត្នោត ដែលអាចជួយទប់ទល់ការរាលដាលនៃអណ្ដាតភ្លើង។
ខាងក្រោមនេះ គឺជារូបភាពផ្ដាមចេញពីសេចក្ដីរាយការណ៍របស់សារព័ត៌មាន NPR ដែលចុះផ្សាយអំពីលំនៅឋានលោក Trip Millikin ដែលឈរជ្រោងនៅធម្មតា ខណៈដែលផ្ទះសម្បែងនៅជុំវិញត្រូវភ្លើងឆេះរាបដល់ដី។
Follow Us and Stay Up to Date with Our Latest Fact-Checks
Facebook | Twitter | Telegram | TikTok | WhatsApp | Instagram
សន្និដ្ឋាន
Fact Crescendo រកឃើញថា ការអះអាងដូចដែលត្រូវបានរៀបរាប់ខាងលើនេះ មិនត្រឹមត្រូវនោះឡើយ។ គេហដ្ឋានមួយមានដំបូលពណ៌ក្រហម ដែលរួចផុតពីអណ្ដាតភ្លើងនោះ មិនមែនស្ថិតនៅក្នុងទីក្រុង Los Angeles នោះឡើយ។ គេហដ្ឋានមានដំបូលពណ៌ក្រហមនេះដែលបានរួចផុតពីអណ្ដាតភ្លើងនោះ ស្ថិតនៅក្នុងតំបន់ Lahaina នៃកោះ Maui ស្ថិតក្នុងរដ្ឋហាវ៉ៃ។ ផ្ទះមួយនេះ បានរួចផុតពីអណ្ដាតភ្លើងកាលពីដើមខែសីហាឆ្នាំ២០២៣កន្លង ដែលបានផ្ដាច់ជីវិតមនុស្សយ៉ាងតិច ១០២នាក់។
Title:ផ្ទះដំបូលក្រហមរួចផុតពីអណ្ដាតភ្លើងជាហេតុការណ៍ឆ្នាំ២០២៣កើតនៅរដ្ឋហាវ៉ៃ
Written By: Jay UdomResult: False
