រូប​ថត​២​សន្លឹក​ត្រូវ​បាន​ភ្ជាប់​ដោយ​មិន​ត្រឹម​ត្រូវ​នឹង​វិបត្តិ​អ៊ុយក្រែន-រុស្ស៊ីថ្មី​ៗ​នេះ​

International Misleading

ខណៈ​ដែល​រុស្ស៊ី​បន្ត​ឈ្លាន​ពាន​ទៅ​លើ​ប្រទេស​អ៊ុយក្រែន​នោះ រូប​ថត​ជាច្រើន​​ពាក់​ព័ន្ធន​ឹង​ព្រឹត្តិការណ៍​នេះ ត្រូវ​បាន​ចែក​រំលែក​យ៉ាង​ព្រោង​ព្រាត​លើ​បណ្ដាញ​សង្គម។ ក្នុង​នោះ មាន​រូបថត​​ពីរ​សន្លឹក​ បង្ហាញ​អំពី​ទិដ្ឋ​ភាព​បុរស​រង​របួស​ម្នាក់​ និង​ការ​ផ្ទុះ​មួយ​កន្លែង​ ត្រូវ​បាន​បង្ហោះ​ចែក​ចាយ​នៅ​លើ​បណ្តាញ​សង្គម​នា​ពេល​ថ្មី​ៗ​នេះ​។​ ការ​បង្ហោះ​នេះ​ ត្រូវ​បាន​ភ្ជាប់​ទៅ​នឹង​វិបត្តិ​អ៊ុយក្រែន-រុស្ស៊ីដែល​កំពុង​កើត​មាន​ឡើង​ជា​បន្ត​បន្ទាប់​។

ទោះ​ជា​យ៉ាង​ណា​ ការ​ត្រួត​ពិនិត្យ​ និង​ផ្ទៀង​ផ្ទាត់​ការ​ពិត​របស់​ក្រុម​ការងារ​ Fact Crescendo Cambodia បាន​រក​ឃើញ​ថា​ រូបថត​ និង​ការ​អះ​អាង​ដោយ​​អ្នក​ប្រើ​ប្រាស់​ហ្វេស​ប៊ុក​​បាន​បង្ហោះ​នៅ​លើ​បណ្តាញ​សង្គម​នោះ​ គឺ​ការ​យល់​ច្រឡំ​។

ការ​អះ​អាង​លើ​បណ្តាញសង្គម

កាល​ពី​ថ្ងៃ​ទី​២៥​ ខែ​កុម្ភៈ​ ឆ្នាំ​២០២២​កន្លង​ទៅ​ អ្នក​ប្រើ​ប្រាស់​ហ្វេស​ប៊ុក​ម្នាក់​ បង្ហោះ​រូប​ថត​ចំនួន​ ៨​សន្លឹក​​​នៅ​លើ​បណ្ដាញ​សង្គម ដោយ​បាន​​ភ្ជាប់​រូបថត​ទាំង​នោះ​​ទៅ​នឹង​ការ​ឈ្លាន​ពាន​របស់​រុស្ស៊ី​ទៅ​លើ​ប្រទេស​អ៊ុយក្រែន។

​ក្នុង​ចំណោម​រូបថត​ទាំង​នោះ​ រូប​ថត​មួយ​សន្លឹក​ បាន​បង្ហាញ​ទិដ្ឋភាពកំសួល​ភ្លើង​ដ៏​ធំ ហើយ​រូប​ថត​មួយ​សន្លឹក​ទៀត​ បាន​បង្ហាញ​នូវ​​បុរស​ម្នាក់​រង​របួស​ក្បាល​​​ឈរ​នៅ​មុខ​​អគារ​បាក់​បែក​​។

ការ​អះ​អាង​នេះ ត្រូវ​បាន​ចែក​រំលែក​ជាច្រើន​ដង​ពី​សំណាក់​អ្នក​ប្រើ​ប្រាស់​ហ្វេសប៊ុក​និយាយ​ភាសា​ខ្មែរ ហើយ​អ្នក​ប្រើ​ប្រាស់​ហ្វេសប៊ុក​ជាច្រើន បាន​បញ្ចេញ​មតិ និង​ប្រតិកម្ម​ទៅ​នឹង​ការ​អះ​អាង​នេះ​ផង​ដែរ។

ខាង​ក្រោម​នេះ​ គឺ​ជា​រូប​ភាព​ផ្តាម​ចេញ​ពី​អ្នក​ប្រើ​ប្រាស់​ហ្វេស​ប៊ុក​ខាង​លើ​ ​បាន​សរសេរ​ជា​ភាសា​អង់​គ្លេស​ថា​ «PRAY FOR UKRAINE 🇺🇦🙏​» ឬ​ប្រែ​សម្រួល​ជា​ភាសា​ខ្មែរ​មាន​ន័យ​ថា​ «បួង​សួងដល់​អ៊ុយ​ក្រែន​»​។​

Facebook Post | Archived Link

ការត្រួត​ពិនិត្យ​ការ​ពិត

Fact Crescendo Cambodia ចាប់​ផ្ដើម​ត្រួត​ពិនិត្យ និង​ផ្ទៀង​ផ្ទាត់​ទៅ​លើ​រូបថត​ដែល​ត្រូវ​បាន​អះ​អាង​ខាង​លើ​នេះ​​តាម​រយៈ​Google Reverse Image Search ដែល​នាំ​ឱ្យ​យើង​រក​ឃើញ​ការពិត​ដូច​ខាង​ក្រោម​នេះ។

រូប​ថត​មាន​ទម្រង់​ និង​សណ្ឋាន​ដូច​គ្នា​ ត្រូវ​បាន​រក​ឃើញ​នៅ​លើ​គេហទំព័រ​សារ​ព័ត៌មាន​ ABC News ដែល​បាន​ចុះ​​ផ្សាយ​​​កាល​ពី​ឆ្នាំ​២០១៤​កន្លង​មក ពោល​គឺ ៨​ឆ្នាំ​មុន​​រុស្ស៊ី​ចាប់​ផ្ដើម​ឈ្លាន​ពាន​ទ្រង់​ទ្រាយ​ធំ​ទៅ​លើ​ប្រទេស​អ៊ុយក្រែន​នៅ​ឆ្នាំ​នេះ។

​សារព័ត៌មាន ABC របស់​អូស្ត្រាលី បាន​រៀបរាប់​អំពី​រូបថត​នោះ​ថា «​លោក​ អ៊ីហ្ក័រ​​ ឆឺណេសូវ​ (Igor Chernetsov) ដែល​ប្រពន្ធ​របស់​គាត់​​បាន​ស្លាប់​នៅ​ក្នុង​អគារ​បាក់​បែក​ដោយសារ​ការ​វាយ​ប្រហារ​តាម​ផ្លូវ​អាកាស​នោះ បញ្ចេញ​កាយ​វិការ​នៅ​ជិត​អគារ​បាក់​បែក​នៅ​ទីក្រុង​ស្នីស្នី (Snizhne) ស្ថិត​​តំបន់​ភាគ​ខាង​កើត​​ប្រទេស​អ៊ុយក្រែន កាល​ពី​ថ្ងៃ​ទី​១៥ ខែ​កក្កដា ឆ្នាំ​២០១៤»។

សារព័ត៌មាន ABC រៀបរាប់​បន្ត​ថា «ក្រុម​អ្នក​ជួយ​សង្គ្រោះ​បាន​និយាយ​ថា​ យ៉ាង​ហោច​ណាស់​ជន​ស៊ីវិល​ ៩​នាក់​ត្រូវ​បាន​សម្លាប់​នៅ​ក្នុង​ការ​វាយ​ប្រហារ​នេះ​ ដោយ​បន្ថែម​ទៅ​លើ​ចំនួន​ជន​ស៊ីវិល​ ដែល​កំពុង​កើន​ឡើង​ជា​លំដាប់​ដែល​ត្រូវ​បាន​សម្លាប់​ក្នុង​រយៈ​ពេល​ ៤​ខែ​នៅ​ក្នុង​ការ​បះ​បោរ​ដែល​គាំទ្រ​រុស្ស៊ី​»។​

ABC News Report | Archived Link

ចំណែក​ឯ​រូបថត​មួយ​សន្លឹក​ទៀត​ដែល​​កំសួង​ភ្លើង​នៃ​ការ​ផ្ទុះ​ដ៏​ធំ​នោះ ត្រូវ​បាន​រក​ឃើញ​ចុះ​ផ្សាយ​ដោយ​​សារ​ព័ត៌​មាន​ Aljazeera ​កាល​ពី​ថ្ងៃ​ទី​២៧​ ខែ​កញ្ញា​ ឆ្នាំ​២០១៧​។ សារព័ត៌មាន​មួយ​នេះ បាន​ឱ្យ​ដឹង​ថា កំសួល​ភ្លើង​នេះ គឺ​ជា​​ហេតុ​ការ​ណ៍​ផ្ទុះ​ឃ្លាំង​ផ្ទុក​គ្រាប់​រំសេស​នៅ​​ក្នុង​តំបន់ Vinnytsia ភាគ​កណ្ដាល​នៃ​ប្រទេស​អ៊ុយក្រែន កាល​ពី​ខែ​វិច្ឆិកា ឆ្នាំ​២០១៧​កន្លង​មក។

សារព័ត៌មាន​ដដែល​​នេះ​ បាន​បញ្ជាក់​អំពី​ហេតុ​ការណ៍​មួយ​នេះ​ថា​ បាន​កើត​ឡើង​នៅ​ក្បែរ​ទីក្រុង​កា​លី​នីវ​កា​ (Kalynivka) ដែល​មាន​ចម្ងាយ​ប្រមាណ​២០០​គីឡូម៉ែត្រ​ ពី​រដ្ឋ​ធានី​គៀវ​ (Kiev) និង​បាន​ធ្វើ​ឲ្យ​មាន​អ្នក​រង​របួស​ចំនួន​ពីរ​នាក់។​

Aljazeera News Report | Archived Link

Global News Report | Archived Link

ក្រុម​ការ​ងារ​ Fact Crescendo Cambodia ក៏​បាន​​ផ្ទៀង​ផ្ទាត់​ទៅ​លើ​​រូប​ថត​ដទៃ​ផ្សេង​ទៀត​​ ដោយ​ត្រូវ​បាន​រក​ឃើញ​ថា​ រូបថត​ទាំង​នោះ គឺ​ជា​ទិដ្ឋ​ភាព​ដែល​កំពុង​កើត​មាន​ឡើង​រវាង​អ៊ុយ​ក្រែន​ និង​រុស្ស៊ី​នា​ពេល​ថ្មី​ៗ​មែន​។​

ខាង​ក្រោម​នេះ​ គឺ​ជា​រូប​ថត​បង្ហាញ​​ស្ត្រី​ម្នាក់​រង​របួស​ម្នាក់​ពី​ការ​វាយ​ប្រហារ​តាម​អាកាស​ និង​បាន​បំផ្លាញ​អគារ​អាផាតមិន​មួយ​កន្លែង​នៅ​ខាង​ក្រៅ​ក្រុងខាគីវ​ (Kharkiv) កាល​ពី​ថ្ងៃ​ព្រហស្បតិ៍​សប្ដាហ៍​មុន​។​

The Guardian News Report | Archived Link

ដូច​គ្នា​ផង​ដែរ​ ខាង​ក្រោម​នេះ​ គឺ​ជា​រូប​ថត​បង្ហាញ​ទិដ្ឋ​ភាព​ការ​រង​ខូច​ខាត​នូវ​យាន​ជំនិះ​ និង​ប្រព័ន្ធ​រ៉ាដា​ នៅ​ឯ​មូល​ដ្ឋាន​យោធាអ៊ុយក្រែន​ ជាយ​ក្រុង​ម៉ារីប៉ូល​ (Mariupol) កាល​ពី​ថ្ងៃ​ទី​២៤​ ខែ​កុម្ភៈ​ ឆ្នាំ​២០២២​កន្លង​ទៅ​។​

USA Today Link | Archived Link

ខាង​ក្រោម​នេះ​ គឺ​ជា​រូប​ថត​បង្ហាញ​នូវ​ទិដ្ឋ​ភាព​អ្នក​ពន្លត់​អគ្គីភ័យ​នៅ​អគារ​មួយ​ ក្នុង​ទីក្រុង​ឈូ​ហ្គីវ​ (Chuguiv) ភាគ​ខាង​កើត​អ៊ុយ​ក្រែន​ កាល​ពី​ថ្ងៃ​ព្រហស្បតិ៍​ ទី​២៤​ ខែ​កុម្ភៈ​ ឆ្នាំ​២០២២​កន្លង​ទៅ​ថ្មី​ៗនេះ​ ខណៈ​ដែល​កង​កម្លាំង​ប្រដាប់​អាវុធ​រុស្ស៊ី​ព្យាយាម​លុក​លុយ​អ៊ុយ​ក្រែន​ពី​ទិស​ដៅ​ជា​ច្រើន​។​

Huffington Post Link | Archived Link

ដើម្បី​ស្វែង​រក​ព័ត៌​មាន​ពិត​ សូម​តាម​ដាន​ការ​ផ្សាយ​របស់​យើង​តាម​រយៈ​ប្រព័ន្ធ​ដូច​ខាង​ក្រោម​៖

Facebook Twitter  Telegram Google News

សន្និដ្ឋាន

Fact Crescendo Cambodia បាន​​រក​​ឃើញ​​ថា រូប​ថត និង​ការ​អះអាង​​ដោយ​អ្នក​ប្រើ​ប្រាស់​ហ្វេស​ប៊ុក​​ខាង​លើ​នោះ​ គឺ​ធ្វើឲ្យ​មាន​ការ​យល់​ច្រឡំ​។​ រូប​ថត​ពីរ​សន្លឹក​ខាង​លើ​នេះ​ មិន​មែន​ជា​ទិដ្ឋភាព​ពេល​រុស្ស៊ី​ឈ្លាន​ពាន​ចូល​អ៊ុយក្រែន​ ដែល​កំពុង​កើត​មាន​ឡើង​នា​ពេល​ថ្មី​ៗ​នេះ​ឡើយ​។ ការ​ពិត ​រូប​ថត​បង្ហា​​​បុរស​ម្នាក់​រង​របួស​ក្បាល​ឈរ​នៅ​មុខ​អគារ​បាក់​បែក​រលំ​នោះ​ ក្រោយ​ការ​វាយ​ប្រហារ​តាម​ផ្លូវ​អាកាស​​ពី​ក្រុម​បះ​បោរ​នៅ​ក្នុង​តំបន់ស្នៃហ្សិន​​ (Snizhne) នៃ​ប្រទេស​អ៊ុយ​ក្រែន កាល​ពី​ថ្ងៃ​ទី​១៥​ ខែ​កក្កដា​ ឆ្នាំ​២០១៤​​។​ ចំណែក​រូប​ថត​​ដែល​បង្ហាញ​កំសួល​ភ្លើង​ដ៏​ធំ​នោះ គឺ​ជា​ហេតុការណ៍​​ផ្ទុះ​ឃ្លាំង​អាវុធ​​នៅ​​ក្បែរ​ទីក្រុង​កា​លី​នីវ​កា​ (Kalynivka) ភាគ​កណ្ដាល​អ៊ុយក្រែន កាល​ពី​ថ្ងៃ​ទី​២៧​ ខែ​កញ្ញា​ ឆ្នាំ​២០១៧​​។​

Avatar

Title:រូប​ថត​២​សន្លឹក​ត្រូវ​បាន​ភ្ជាប់​ដោយ​មិន​ត្រឹម​ត្រូវ​នឹង​វិបត្តិ​អ៊ុយក្រែន-រុស្ស៊ីថ្មី​ៗ​នេះ​

Fact Check By: Kakada Sim 

Result: Misleading

Leave a Reply

Your email address will not be published.