តើផ្លូវរូងក្រោមដីនេះមានទីតាំងស្ថិតនៅក្នុងប្រទេសថៃមែនឬទេ?

ពេលនិយាយដល់ប្រទេសថៃនោះ យើងនឹងនឹកឃើញមុនគេគឺប្រទេសក្បែរខាងរបស់យើង ដែលមានតំបន់ទេសចរណ៍នៅតាមទីក្រុង កោះ ឆ្នេរសមុទ្រ និងជាពិសេសនោះគឺ ទេសភាពដ៏ស្រស់ត្រកាល និងវប្បធម៌ បានកំពុងតែទាក់ទាញភ្ញៀវទេសចរជាតិ និងបរទេសធ្វើដំណើរមកកាន់ប្រទេសនេះជាច្រើន។

ក្នុងចំណោមនោះ រូបថតមួយសន្លឹក បង្ហាញអំពីទិដ្ឋភាពផ្លូវរូងភ្នំមួយកន្លែង ត្រូវបានបង្ហោះដោយទំព័រហ្វេសប៊ុកមួយ។ ទំព័រហ្វេសប៊ុកនេះ បានអះអាងថាផ្លូវរូងឆ្លងកាត់ភ្នំនេះ គឺមានទីតាំងស្ថិតនៅក្នុងប្រទេសថៃ។ ការអះអាងនេះ ទទួលបានការចែកចាយតៗគ្នា និងប្រតិកម្មចម្រុះពីសំណាក់អ្នកប្រើប្រាស់យ៉ាងផុសផុល។

ទោះជាយ៉ាងណា ការត្រួតពិនិត្យការពិតរបស់ Fact Crescendo Cambodia បានរកឃើញថា រូបថតដែលទំព័រហ្វេសប៊ុកបង្ហោះ និងចែកចាយនៅលើបណ្តាញសង្គមនោះ គឺមិនត្រឹមត្រូវនោះឡើយ។

ការអះអាងលើបណ្តាញសង្គម

កាលពីថ្ងៃទី២២ ខែកុម្ភៈ ឆ្នាំ២០២២ថ្មីៗកន្លងទៅនេះ ទំព័រហ្វេសប៊ុកមួយមានឈ្មោះថា Dream UPSC បានបង្ហោះរូបថតមួយសន្លឹក បង្ហាញអំពីទិដ្ឋភាពរូងផ្លូវឆ្លងកាត់ភ្នំមួយកន្លែង។ ទិដ្ឋភាពមួយនេះ ត្រូវបានគេអះអាងថា មានទីតាំងស្ថិតនៅក្នុងប្រទេសថៃ ដោយត្រូវបានចែករំលែកតៗគ្នាជាច្រើនដង ពីសំណាក់អ្នកប្រើប្រាស់ហ្វេសប៊ុក។ ទំព័រហ្វេសប៊ុកខាងលើ ពុំបានបញ្ជាក់លម្អិតអំពីទីតាំងច្បាស់លាស់ បន្ថែមនោះឡើយ។ ប្រទេសថៃ ជាប្រទេសដែលមានព្រំដែនខាងកើតជាប់នឹងប្រទេសឡាវ និងប្រទេសកម្ពុជា ខាងត្បូងជាប់ប្រទេសម៉ាឡេស៊ី និងឈូងសមុទ្រថៃ ខាងលិចជាប់នឹងប្រទេសភូមា។

ខាងក្រោមនេះ គឺជារូបភាពផ្ដាមចេញពីទំព័រហ្វេសប៊ុក បានសរសេររៀបរាប់ជាភាសាអង់គ្លេសថា «Tunnel In Thailand. This is how they are doing developmental works without damaging the nature» ឬប្រែសម្រួលជាភាសាខ្មែរមានន័យថា «ផ្លូវរូងក្រោមដីនៅប្រទេសថៃ។ នេះជារបៀបដែលពួកគេកំពុងធ្វើកិច្ចការអភិវឌ្ឍន៍ ដោយមិនចាំបាច់បំផ្លាញធម្មជាតិ»។

Facebook Post | Archived Link

ការត្រួតពិនិត្យការពិត

Fact Crescendo Cambodia បានចាប់ផ្ដើមត្រួតពិនិត្យ និងផ្ទៀងផ្ទាល់លើរូបភាពនេះតាមរយៈការដំណើរការ កម្មវិធីស្វែងរករូបថតរបស់ក្រុមហ៊ុន Google ដែលនាំឱ្យយើងជួបប្រទះនូវប្រភព និងខ្លឹមសាររូបថតនៃច្បាប់ដើមមួយចំនួន។

រូបថតដូចគ្នាមួយសន្លឹកនេះ ត្រូវបានរកឃើញនៅក្នុងគេហទំព័រ Photo Rator ដោយបានសរសេររៀបរាប់ជា ភាសាអង់គ្លេសថា «A series of tunnels through Taiwan» ឬប្រែសម្រួលជាភាសាខ្មែរមានន័យថា «ផ្លូវរូងក្រោមដីជាបន្តបន្ទាប់ឆ្លងកាត់តៃវ៉ាន់»។ គេហទំព័រនេះ ពុំបានបញ្ជាក់ទិដ្ឋភាពផ្លូវរូងក្រោមដីនេះ មានទីតាំងស្ថិតនៅក្នុងប្រទេសថៃនោះទេ។

Photo Rator Link | Archived Link

ដូចគ្នានេះ តាមរយៈគេហទំព័រ Tech & Facts ផ្សព្វផ្សាយកាលពីថ្ងៃទី៣១ ខែតុលា ឆ្នាំ២០១៣កន្លងទៅ ក៏បានបង្ហាញនូវរូបថតមួយសន្លឹក មានទម្រង់ដូចគ្នានេះផងដែរ។ គេហទំព័រនេះ បានបញ្ជាក់អំពីឈ្មោះ និងទីតាំងរបស់ផ្លូវរូងកាត់ភ្នំនេះថា ជាផ្លូវរូងក្រោមដីស៊ួយហ្សិន (Hsuehshan Tunnel) ដែលមានទីតាំងពិតប្រាកដស្ថិតនៅកោះតៃវ៉ាន់។

ខាងក្រោមនេះ គឺជារូបភាពផ្តាមចេញពីគេហទំព័រខាងលើ បានសរសេររៀបរាប់ជាភាសាអង់គ្លេសថា «Hsuehshan Tunnel, Taiwan» ឬប្រែសម្រួលជាភាសាខ្មែរមានន័យថា «ផ្លូវរូងក្រោមដីស៊ួយហ្សិន កោះតៃវ៉ាន់»។

Tech & Facts Link | Archived Link

ផ្លូវរូងក្រោមដីមួយនេះ ត្រូវបានគេស្គាល់ឈ្មោះជាទូទៅថាជា ផ្លូវរូងក្រោមដីស៊ួយហ្សិន (Hsuehshan Tunnel) និងមានទីតាំងពិតប្រាកដស្ថិតនៅកោះតៃវ៉ាន់។ ផ្លូវមួយនេះ ត្រូវបានចាប់ផ្តើមសាងសង់នៅក្នុងឆ្នាំ១៩៩១ និងដាក់ឲ្យប្រើប្រាស់នៅថ្ងៃទី១៦ ខែមិថុនា ឆ្នាំ២០០៦ ដោយមានចំណុចចាប់ផ្តើមនៅត្រង់ឃុំពិញលិន ក្រុងតៃប៉ិថ្មី (Pinglin District, New Taipei City) រហូតដល់ក្រុងថាឆាំង (Toucheng) ដែលមានរយៈចម្ងាយប្រមាណជិត ១៣គីឡូម៉ែត្រ។

Tech & Facts Link | Archived Link

ដើម្បីស្វែងរកព័ត៌មានពិត សូមតាមដានការផ្សាយរបស់យើងតាមរយៈប្រព័ន្ធដូចខាងក្រោម៖

Facebook Twitter Telegram Google News

សន្និដ្ឋាន

Fact Crescendo Cambodia បានរកឃើញថា ការអះអាងដូចបានរៀបរាប់ខាងលេីនេះ គឺមិនត្រឹមត្រូវនោះឡើយ។ រូបថតមួយសន្លឹកនេះ មិនមែនជាទិដ្ឋភាពផ្លូវរូងក្រោមដី ដែលមានទីតាំងស្ថិតនៅក្នុងប្រទេសថៃនោះទេ។ ការពិតរូបថតមួយសន្លឹកនេះ គឺជាទិដ្ឋភាពផ្លូវរូងក្រោមដីស៊ួយហ្សិន (Hsuehshan Tunnel) ដែលមានទីតាំងស្ថិតនៅត្រង់ឃុំពិញលិន ក្រុងតៃប៉ិថ្មី កោះតៃវ៉ាន់។