ការអះអាងមិនត្រឹមត្រូវ មេដឹកនាំអ៊ីស្រាអែលរត់គេចពីគ្រាប់ផ្លោងអ៊ីរ៉ង់
ក្រោយពីការវាយប្រហារដោយគ្រាប់រ៉ុក្កែតដ៏ច្រើនរបស់អ៊ីរ៉ង់ទៅលើអ៊ីស្រាអែលកាលពីដើមសប្ដាហ៍នេះ វីដេអូឃ្លីបមួយដែលបង្ហាញនាយករដ្ឋមន្ត្រីអ៊ីស្រាអែល លោក បេនចាមីនណេតាន់យ៉ាហ៊ូ (Bejamine Netanyahu) រត់នៅក្នុងអគារមួយ ត្រូវបានគេបង្ហោះនៅលើបណ្ដាញសង្គមជាមួយការអះអាងថា មេដឹកនាំអ៊ីស្រាអែលរូបនេះបានរត់ចូលលេនដ្ឋានរបស់លោក។ វីដេអូជាមួយសំណេរបែបនេះត្រូវបានចែករំលែកព្រោងព្រាតលើបណ្ដាញសង្គម។ ទោះជាយ៉ាងណា យើងរកឃើញថាការផ្សព្វផ្សាយវីដេអូនេះ មិនត្រឹមត្រូវនោះឡើយ។
ការអះអាងលើបណ្ដាញសង្គម
កាលពីថ្ងៃទី០២ខែតុលា ឆ្នាំ២០២៤កន្លងទៅនេះ អ្នកប្រើប្រាស់ហ្វេសប៊ុកម្នាក់ បានបង្ហោះវីដេអូឃ្លីបមួយ បង្ហាញទិដ្ឋភាពលោកបេនចាមីន ណេតាន់យ៉ាហ៊ូ ដែលត្រូវបានគេស្គាល់ថា គឺជាមេដឹកនាំរបស់អ៊ីស្រាអែលបានរត់គេចភៀសខ្លួន អំឡុងពេលអ៊ីរ៉ង់កំពុងតែបើកវាយប្រហារដោយរ៉ុក្កែតជាច្រើនគ្រាប់។
អ្នកប្រើប្រាស់ដដែលនេះពុំបានបញ្ជាក់ព័ត៌មានលម្អិតអំពីទីតាំង និងពេលវេលានៃហេតុការណ៌នោះឡើយ។វីដេអូឃ្លីបខាងលើនេះ ត្រូវបានប្រតិកម្ម និងតាមដានយ៉ាងផុសផុលពីសំណាក់អ្នកប្រើប្រាស់។
ខាងក្រោមនេះគឺជាវីដេអូផ្ដាមចេញពីការអះអាងនៅលើបណ្ដាញសង្គមនាពេលថ្មីៗនេះ បន្ទាប់ពីអ៊ីរ៉ង់បានបាញ់គ្រាប់រ៉ុក្កែតជាច្រើនមកកាន់អ៊ីស្រាអែល។
វីដេអូដូចគ្នានេះក៏ត្រូវបានបង្ហោះ និងចែករំលែកនៅលើបណ្ដាញសង្គមដោយអ្នកប្រើប្រាស់ដទៃទៀតផងដែរ។
ខាងក្រោមនេះគឺជាវីដេអូដែលបង្ហោះនៅលើបណ្ដាញសង្គម កាលពីថ្ងៃទី០២ ខែតុលា ឆ្នាំ២០២៤ជាមួយសំណេររៀបរាប់ថា «បែកធ្លាយវីដេអូ មេដឹកនាំអ៊ីស្រាអែលលោក ណេតាន់យ៉ាហ៊ូ រត់ទៅកាន់លេនដ្ឋាននុយក្លេអ៊ែរប្រធានាធិបតី»។
ខាងក្រោមនេះគឺជាវីដេអូឃ្លីប និងខ្លឹមសារអះអាងទាំងស្រុង ដែលបានបង្ហោះ និងចែកចាយដោយអ្នកប្រើប្រាស់បណ្ដាញសង្គមវីដេអូTikTok ដទៃទៀតផងដែរ។
ការត្រួតពិនិត្យការពិត
Fact Crescendo Cambodia បានចាប់ផ្ដើមត្រួតពិនិត្យ និងផ្ទៀងផ្ទាត់ទៅលើការអះអាងខាងលើនេះតាមរយៈការរកមើលប្រភពដើមនៃវីដេអូ ដែលនាំឱ្យយើងរកឃើញការពិតដូចខាងក្រោមនេះ។
វីដេអូឃ្លីបដែលមានទិដ្ឋភាពនិងសណ្ឋានដូចគ្នាទាំងស្រុង ត្រូវបានរកឃើញ និងផ្សព្វផ្សាយនៅបណ្ដាញសង្គមX របស់មេដឹកនាំអ៊ីស្រាអែលលោក បេនចាមីន ណេតាន់យ៉ាហ៊ូ បង្ហោះកាលពីថ្ងៃទី១៤ខែធ្នូ ឆ្នាំ២០២១កន្លងទៅ។
នៅក្នុងសំណេររបស់លោកដោយភ្ជាប់ទៅនឹងវីដេអូខាងលើ បានបញ្ជាក់ថា «ខ្ញុំតែងតែមានមោទនភាពក្នុងការរត់សម្រាប់អ្នកវាត្រូវបានថតទុកកាលពីកន្លះម៉ោងមុននៅក្នុងការិយាល័យ Knesset»។
វីដេអូដូចគ្នានេះ ក៏ត្រូវបានរកឃើញ និងបង្ហោះនៅលើបណ្ដាញសង្គមហ្វេសប៊ុកផងដែរកាលពីខែធ្នូ ឆ្នាំ២០២១ អំឡុងពេលដែលលោក បេនចាមីន ណេតាន់យ៉ាហ៊ូ បានរត់ចេញពីការិយាល័យKneseet របស់លោក ដើម្បីទៅបោះឆ្នោត។
ខាងក្រោមនេះមិនមែនជាទិដ្ឋភាពថ្មីៗ ដែលលោកបានរត់គេចភៀសខ្លួនទៅបន្ទប់សុវត្ថិភាពអំឡុងពេលគ្រាប់ផ្លោងអ៊ីរ៉ង់នោះទេ។
Fact Crescendo Cambodia រកឃើញផងដែរថា ទិដ្ឋភាពនៃការរត់របស់លោក បេនចាមីន ណេតាន់យ៉ាហ៊ូក៏ត្រូវបានផ្សព្វផ្សាយ នៅលើគេហទំព័រសារព័ត៌មានជាតិ Israel National News (INN) កាលពីខែធ្នូ ឆ្នាំ២០២១កន្លងទៅ ដោយមិនបានបញ្ជាក់ថា ទិដ្ឋភាពនោះគឺជាការរត់គេចខ្លួន ក្នុងអំឡុងពេលអ៊ីរ៉ង់បានវាយប្រហារដោយគ្រាប់រ៉ុក្កែតនោះឡើយ។
Israel National News (INN) Link | Archived Link
ដើម្បីស្វែងរកព័ត៌មានពិត សូមតាមដានការផ្សាយរបស់យើងតាមរយៈប្រព័ន្ធដូចខាងក្រោម៖