តើនេះគឺជាទិដ្ឋភាពនៃអគ្គិភ័យឆាបឆេះអាគារនៅក្នុងទីក្រុងហាណូយមែនឬ?

នាពេលថ្មីៗនេះ មានវីដេអូព័ត៌មានរាយការណ៍យ៉ាងផុសផុលមួយ បានបង្ហាញទិដ្ឋភាពនៃការឆាបឆេះយ៉ាងខ្លាំង ដោយភ្ជាប់នឹងការអះអាងនោះ គឺជាទិដ្ឋភាពនៃការឆេះនោះ បានកើតឡើងនៅក្នុងទីក្រុងហាណូយ ប្រទេសវៀតណាម ដែលមានមនុស្សជាច្រើន បានបាត់បង់ជីវិត និងរងរបួស។ ការអះអាងភ្ជាប់ដោយវីដេអូខាងលើ ត្រូវបានចែកចាយបន្ដជាច្រើនដង និងមានការបញ្ចេញមតិ និងប្រតិកម្មចម្រុះបែបផងដែរ។ ទោះជាយ៉ាងណា យើងរកឃើញថា វីដេអូនេះត្រូវបានភ្ជាប់ជាមួយព័ត៌មានមិនត្រឹមត្រូវនោះឡើយ។

ការអះអាងលើបណ្ដាញសង្គម

កាលពីថ្ងៃទី១៤ ខែកញ្ញា ឆ្នាំ២០២៣កន្លងទៅនេះ ទំព័រហ្វេសប៊ុកមួយឈ្មោះថា «7News Khmer» បានបង្ហោះវីដេអូឃ្លីបដែលបង្ហាញទិដ្ឋភាពនៃការឆេះអគារមួយកន្លែង ជាមួយការអះអាងថា នោះគឺជាទិដ្ឋភាពនៃអគ្គិភ័យឆាបឆេះអាគារនៅក្នុងទីក្រុងហាណូយ ប្រទេសវៀតណាមនាពេលថ្មីៗនេះ។

វីដេអូឃ្លីបដែលមានសំណេរខាងលើ ត្រូវបានចែករំលែកបន្ដជាច្រើនដង រួមជាមួយការបញ្ចេញមតិយោបល់ និងប្រតិកម្មចម្រុះបែបពីអ្នកប្រើប្រាស់បណ្ដាញសង្គមនិយាយភាសាខ្មែរ។

ខាងក្រោមនេះ គឺជាវីដេអូឃ្លីបទាំងស្រុង ត្រូវបានបង្ហោះនៅលើបណ្ដាញសង្គមជាមួយសំណេររៀបរាប់ថា «ម្នាក់ៗស្រែកយំបោកខ្លួននៅវៀតណាម ឆេះអគារ ១០ជាន់»។

Facebook Post | Archived Link

វីដេអូឃ្លីបភ្ជាប់ដោយការអះអាងបែបនេះ ត្រូវបានបង្ហោះ និងរកឃើញនៅលើបណ្ដាញសង្គមហ្វេសប៊ុក ជាច្រើនទៀតផងដែរ។ សូមមើលខ្លឹមសារអះអាងទាំងស្រុងតាមរយៈតំណភ្ជាប់មាននៅទីនេះ (archived link) និងតំណភ្ជាប់មួយទៀតនៅទីនេះ (archived link)។

ការត្រួតពិនិត្យការពិត

Fact Crescendo Cambodia បានត្រួតពិនិត្យ និងផ្ទៀងផ្ទាត់ទៅលើការអះអាងខាងលើនេះ តាមរយៈការដំណើរការកម្មវិធី Google Reverse Image Search ដែលនាំយើងរកឃើញការពិតដូចខាងក្រោម។

យើងបានរកឃើញវីដេអូឃ្លីបដូចគ្នាជាច្រើន បង្ហាញទិដ្ឋភាពនៃការឆេះអាគារយ៉ាងសន្ធោសន្ធៅមួយខាងលើនេះ ហើយត្រូវបានបង្ហោះនៅលើបណ្ដាគេហទំព័រ និងសារព័ត៌មានជាច្រើន។

ហេតុការណ៍នៃអគ្គិភ័យខាងលើ ត្រូវបានរកឃើញ និងផ្សព្វផ្សាយនៅលើគេហទំព័រ Daily Mail កាលពីខែកញ្ញា ឆ្នាំ២០២២មកម្ល៉េះ ដោយបញ្ជាក់ថា ការឆាបឆេះ និងមានកម្ទេចកម្ទីភ្លើងបានធ្លាក់ពីជាន់ខាងលើនេះ បានកើតឡើង និងលេបត្របាក់អាគារខ្ពស់មួយ នៅក្នុងទីក្រុង Changsha ភាគត្បូងប្រទេសចិន។

ខាងក្រោម គឺជារូបភាពផ្ដាមចេញពីគេហទំព័រខាងលើ ដែលបានបង្ហាញទិដ្ឋភាពផ្សែងអួរអាប់ ចេញពីអាគារដែលបានឆាបឆេះ។

Daily Mail News Report | Archived Link

ករណីហេតុការណ៍ខាងលើ ក៏ត្រូវបានផ្សព្វផ្សាយនៅលើគេហទំព័រសារព័ត៌មាន South China Morning Post ផងដែរ កាលពីថ្ងៃទី១៦ ខែកញ្ញា ឆ្នាំ២០២២កន្លងទៅនេះ។ គេហទំព័រដដែលខាងលើ បានបញ្ជាក់ថា ហេតុការណ៍នេះ បានកើតឡើងទៅលើអាគារកម្ពស់ប្រមាណ ២០០ម៉ែត្រនៅក្នុងទីក្រុង Changsha នៃខេត្តហៃណាន ភាគត្បូងប្រទេសចិន។

ទិដ្ឋភាពនៃការឆេះអាគារមួយនេះ ពុំបានកើតឡើងនៅទីក្រុងហាណូយ ប្រទេសវៀតណាម ដូចអ្នកប្រើប្រាស់មួយចំនួនបានអះអាងនោះឡើយ។

South China Morning Post | Archived Link

ខាងក្រោមនេះ គឺជាវីដេអូរាយការណ៍ព័ត៌មានមួយពី Hindustan Times កាលពីថ្ងៃទី១៦ ខែកញ្ញា ឆ្នាំ២០២២កន្លងទៅ ដែលបានបញ្ជាក់ថា ករណីមួយនេះបានកើតឡើងនៅប្រទេសចិន ដោយពុំបានកើតឡើងនៅក្នុងទីក្រុងហាណូយ ប្រទេសវៀតណាមនោះឡើយ។

YouTube Link | Archived Link

ដើម្បីស្វែងរកព័ត៌មានពិត សូមតាមដានការផ្សាយរបស់យើងតាមរយៈប្រព័ន្ធដូចខាងក្រោម៖

Facebook Twitter Telegram Google News TikTok

សន្និដ្ឋាន

Fact Crescendo Cambodia បានរកឃើញ ការអះអាងដូចដែលត្រូវបានរៀបរាប់ខាងលើនេះ មិនត្រឹមត្រូវនោះឡើយ។ វីដេអូឃ្លីបនេះ គឺជាទិដ្ឋភាពនៃការឆេះអាគារទូរគមនាគមន៍ ដែលមានកម្ពស់ ៤២ជាន់ នៅក្នុងទីក្រុង Changsha ប្រទេសចិន កាលពីថ្ងៃទី១៦ ខែកញ្ញា ឆ្នាំ២០២២កន្លងទៅ។