រូបថតមើមឆៃថាវមានរូបរាងដូចជើងមនុស្ស ត្រូវបានបង្ហោះលើបណ្ដាញសង្គមព្រោងព្រាតកាលពីសប្ដាហ៍មុន ដែលនាំឱ្យអ្នកប្រើប្រាស់បណ្ដាញសង្គមជាច្រើនយល់ច្រឡំថា មើមឆៃថាវនោះពិតជាដំណាំពិតៗដែលដាំដុះដោយជនជាតិជប៉ុន។ ទោះជាយ៉ាងណា ការផ្ទៀងផ្ទាត់របស់យើង បានរកឃើញថា រូបថតមើមឆៃថាវនោះ គ្រាន់តែជាស្នាដៃសិល្បៈស្មូនរូបតែប៉ុណ្ណោះ។
ការអះអាងលើបណ្ដាញសង្គម
រូបថតពីរសន្លឹកដែលបង្ហាញឱ្យឃើញឆៃថាវមានរូបរាងដូចជើងមុនស្ស ត្រូវបានទំព័រហ្វេសប៊ុកសារព័ត៌មានឌីជីថលមួយចែករំលែកនៅលើបណ្ដាញសង្គមកាលពីសប្ដាហ៍មុន។
រូបថតនេះទទួលបានការចាប់អារម្មណ៍យ៉ាងច្រើនពីសំណាក់អ្នកប្រើប្រាស់បណ្ដាញសង្គមហ្វេសប៊ុក ដោយមានការចែករំលែករហូតដល់ជាង ៦០០ដង និងមានការបញ្ចេញមតិចម្រុះបែបពីអ្នកប្រើប្រាស់បណ្ដាញសង្គមហ្វេសប៊ុកនិយាយភាសាខ្មែរ។
ខាងក្រោមនេះ គឺជារូបភាពផ្ដាមចេញពីទំព័រហ្វេសប៊ុក TNAOT ដែលបង្ហោះសាររៀបរាប់កាលពីថ្ងៃព្រហស្បតិ៍សប្ដាហ៍មុនថា «ឆៃថាវចម្លែករាងដូចជើងមនុស្ស»។
រូបថតឆៃថាវរូបរាងដូចជើងមនុស្សនេះ ត្រូវបានចែករំលែកយ៉ាងព្រោងព្រាតនៅលើបណ្ដាញសង្គមហ្វេសប៊ុក និងបណ្ដាញសង្គមដទៃទៀត។ សូមមើលខ្លឹមសារតាមរយៈតំណភ្ជាប់នៃបណ្ដាញសង្គម Srok Kh, Davin Sapphire – ចៃកាមេរ៉ា, សង្ហារ លក់ដុំនិងរាយខោលីអូបុរសនារី។
ខាងក្រោមនេះ គឺជារូបភាពផ្ដាមចេញពីការបង្ហោះរូបថតឆៃថាវចម្លែកដោយទំព័រហ្វេសប៊ុក Sandra Shop Cambodia កាលពីសប្ដាហ៍មុន ដែលទទួលបានការចែករំលែកបន្តរហូតដល់ជាង ២ពាន់ដង។
តាមរយៈការពិនិត្យមើលមតិរបស់អ្នកប្រើប្រាស់បណ្ដាញសង្គម យើងមើលឃើញថា អ្នកប្រើប្រាស់បណ្ដាញសង្គមនិយាយភាសាខ្មែរជាច្រើន ហាក់ជឿជាក់ថា ឆៃថាវរូបរាងដូចជើងមនុស្សនេះ គឺជាឆៃថាវពិតៗដែលដាំដុះដោយជនជាតិជប៉ុន។
ការត្រួតពិនិត្យការពិត
Fact Crescendo Cambodia បានត្រួតពិនិត្យ និងផ្ទៀងផ្ទាត់ទៅលើរូបថតឆៃថាវទាំងពីរសន្លឹកនេះតាមរយៈការដំណើរការ Google Reverse Image Search ដែលនាំឱ្យយើងរកឃើញការពិតដូចខាងក្រោមនេះ។
បើតាមសំណេររបស់ខ្លួន ទំព័រហ្វេសប៊ុក TNAOT បានបញ្ជាក់ថា រូបថតឆៃថាវមានរូបរាងដូចជើងមនុស្សនេះ ត្រូវបានយកពីទំព័រហ្វេសប៊ុក Japan Moments ដែលបានបង្ហោះរូបថតឆៃថាវរូបរាងចម្លែកនេះនៅលើបណ្ដាញសង្គមកាលពីថ្ងៃទី១៧ ខែមីនា។
ទំព័រហ្វេសប៊ុក Japan Moments បានបញ្ជាក់ថា រូបថតទាំងពីរសន្លឹកនេះ ត្រូវបានយកពីគណនី Instagram របស់វិចិត្រករជប៉ុន Kenji Suetsugu ដែលបានបង្ហោះរូបថតទាំងពីរសន្លឹកនេះកាលពីដើមឆ្នាំ២០២២កន្លងមក។
ក្រៅពីរូបថតទាំងពីរសន្លឹកនេះ យើងក៏បានរកឃើញវីដេអូឃ្លីបខ្លីមួយផងដែរ ដែលបង្ហាញស្ត្រីម្នាក់ និងកុមារ ២នាក់ ដកឆៃថាវមានរូបរាងដូចជើងមនុស្ស។
នៅត្រង់ប្រអប់បញ្ចេញមតិឆ្លើយតបនឹងអ្នកប្រើប្រាស់បណ្ដាញសង្គម Instagram នោះ អ្នកប្រើប្រាស់បណ្ដាញសង្គម Instagram ម្នាក់ បានសាកសួរអំពីរបៀបធ្វើរូបសំណាកឆៃថាវមានរូបរាងជើងមនុស្សនេះ។
គណនី tsukurimono របស់វិចិត្រករ Kenji Suetsugu បានបញ្ជាក់ឆ្លើយតបទៅនឹងសំណួររបស់អ្នកប្រើប្រាស់បណ្ដាញសង្គមខាងលើ ដោយបញ្ជាក់ថា រូបសំណាកឆៃថាវមានរូបរាងជើងមនុស្សនេះ ត្រូវបានស្មូនចេញពីដីលាយប្រេងជាមួយជ័រស៊ីលីខន យកស្លឹកឆៃថាវពិតប្រាកដមកភ្ជាប់ពីខាងលើ និងចុងក្រោយយកទៅកប់នៅក្នុងដី។
ដូចនេះ ឆៃថាវមានរូបរាងដូចជើងមនុស្សនេះ មិនមែនជាឆៃថាវពិតប្រាកដនោះឡើយ ហើយផ្ទុយទៅវិញ វាគ្រាន់តែជាស្នាដៃសិល្បៈស្មូនរូបពីជ័រស៊ីលីខនរបស់វិចិត្រករជប៉ុន Kenji Suetsugu តែប៉ុណ្ណោះ។
Instagram Post | Archived Link
តើលោក Kenji Suetsugu ជានរណា?
នៅលើគណនី Instagram យើងបានរកឃើញព័ត៌មានបន្ថែម ដែលបានឱ្យដឹងថា លោក Kenji Suetsugu គឺជាវិចិត្រករស្មូនរូប និងសិល្បៈតុបតែងមុខមាត់ ឬរាងកាយ ដែលមានមូលដ្ឋាននៅទីក្រុង Fukuoka ប្រទេសជប៉ុន។
នៅក្នុងគេហទំព័រ tsukurimono យើងបានរកឃើញរូបថតស្នាដៃសិល្បៈតុបតែងមុខ និងរាងកាយ និងរូបស្មូនជាច្រើនរបស់លោក ក្នុងនោះមានទាំងឆៃថាវមានរូបរាងដូចជើងមនុស្សផងដែរ។
ខាងក្រោមនេះ គឺជាប្រវត្តិរូបរបស់វិចិត្រករស្មូនរូប និងតុបតែងមុខជនជាតិជប៉ុន លោក Kenji Suetsugu ដែលត្រូវបានរៀបរាប់នៅលើវេបសាយ tsukurimono ដែលជាហាងផលិតរូបស្មូនផ្សេងៗ។
ទស្សនាវដ្ដីជប៉ុនមួយឈ្មោះ sotokoto ក៏បានចុះផ្សាយពីប្រវត្តិរូប និងស្នាដៃសិល្បៈរបស់លោក Kenji Suetsugu ផងដែរ ដែលបញ្ជាក់ថា វិចិត្រករជប៉ុនរូបនេះជំនាញខាងស្មូនរូបសំណាក និងតុបតែងមុខមាត់។ សូមអានខ្លឹមសារលម្អិតនៅទីនេះ ឬតាមរយៈតំណភ្ជាប់ដែលត្រូវបានរក្សាទុកនៅទីនេះ។
សន្និដ្ឋាន
Fact Crescendo Cambodia បានរកឃើញថា ការអះអាងដូចរៀបរាប់ខាងលើនេះ មិនត្រឹមត្រូវនោះឡើយ។ រូបថតឆៃថាវមានរូបរាងដូចជើងមនុស្សនេះ មិនមែនជាឆៃថាវធម្មជាតិពិតប្រាកដដែលដាំដុះដោយប្រជាជនជប៉ុននោះឡើយ។ ឆៃថាវមានរូបរាងដូចជើងមនុស្សនេះ គ្រាន់តែជារូបស្មូនពីជ័រស៊ីលីខនដែលជាស្នាដៃសិល្បៈរបស់វិចិត្រករជប៉ុន លោក Kenji Suetsugu ដែលជំនាញខាងស្មូនរូប និងតុបតែងមុខមាត់។
Title: មើមឆៃថាវមានរូបរាងដូចជើងមនុស្សនៅជប៉ុន គ្រាន់តែជាស្នាដៃសិល្បៈស្មូនរូបប៉ុណ្ណោះ
Fact Check By: Jay UdomResult: Misleading
