បន្ទាប់ពីភ្លៀងធ្លាក់បានបង្កជាគ្រោះទឹកជំនន់វាយប្រហារប្រទេសអារ៉ាប់រួមនាពេលថ្មីៗ រូបថត និងវីដេអូឃ្លីបបង្ហាញផលប៉ះពាល់ជាច្រើន ត្រូវបានបង្ហោះឡើងដោយភ្ជាប់នឹងការអះអាងថា វាគឺជាជំនន់ទឹកភ្លៀងនៅក្នុងទីក្រុងឌូបៃរួមនាពេលថ្មីៗនេះ។ ការអះអាងភ្ជាប់ដោយវីដេអូខាងលើ ត្រូវបានចែកចាយបន្ដជាច្រើនដង និងមានការបញ្ចេញមតិ និងប្រតិកម្មចម្រុះបែបផងដែរ។ ទោះជាយ៉ាងណា យើងរកឃើញថា វីដេអូនេះត្រូវបានភ្ជាប់ជាមួយព័ត៌មានមិនត្រឹមត្រូវនោះឡើយ។
ការអះអាងលើបណ្ដាញសង្គម
កាលពីពេលថ្មីៗនេះ វីដេអូយ៉ាងផុសផុលមួយនៅលើបណ្ដាញសង្គម TikTok បានបង្ហាញទិដ្ឋភាពនៃការរងខូចខាត និងផលប៉ះពាល់ទៅលើអគារ និងផ្ទះប្រជាពលរដ្ឋជាច្រើន ជាមួយនឹងការអះអាងថា នោះគឺជាទិដ្ឋភាពនៃទឹកជំនន់នៅក្នុងទីក្រុងឌូបៃថ្ងៃនេះ។
ការបង្ហោះនេះ កើតឡើងក្រោយមានភ្លៀងធ្លាក់ខ្លាំង ដែលបណ្ដាលអ្នកបើកបរយានយន្តជាច្រើន ត្រូវបង្ខំចិត្តបោះបង់យានជំនិះនៅលើដងផ្លូវ នៅពេលទឹកជន់ឡើង និងមានការខូចខាតហេដ្ឋារចនាសម្ព័ន្ធនានា។
ខាងក្រោមនេះ គឺជាវីដេអូឃ្លីបទាំងស្រុង ត្រូវបានបង្ហោះនៅលើបណ្ដាញសង្គម TikTok ជាមួយសំណេររៀបរាប់ថា «ខ្យល់ព្យុះ និងភ្លៀងធ្លាក់ខ្លាំងនៅទីក្រុងឌូបៃថ្ងៃនេះ»។
https://vt.tiktok.com/ZSFW1rMEf
វីដេអូឃ្លីបដូចគ្នាខាងលើ ក៏ត្រូវបានរកឃើញ និងចែកចាយយ៉ាងផុសផុលនៅលើបណ្ដាញសង្គមហ្វេសប៊ុកផងដែរ កាលពីពេលថ្មីៗនេះ ជាមួយសំណេររៀបរាប់ថា «ឱព្រះជាម្ចាស់អើយ ថ្ងៃនេះខ្យល់ព្យុះ និងភ្លៀង»។
ការត្រួតពិនិត្យការពិត
Fact Crescendo Cambodia បានត្រួតពិនិត្យ និងផ្ទៀងផ្ទាត់ទៅលើការអះអាងខាងលើនេះ តាមរយៈការដំណើរការកម្មវិធី Google Reverse Image Search ដែលនាំយើងរកឃើញការពិតដូចខាងក្រោម។
តាមរយៈ Google Reverse Image Search យើងបានរកឃើញវីដេអូនៅលើបណ្ដាញ YouTube ដែលបង្ហាញព្យុះភ្លៀងវាយប្រហារដ៏ខ្លាំងក្លាវាយប្រហារលើអគារ និងដើមឈើនៃតំបន់មួយ។ វីដេអូឃ្លីបនេះ ត្រូវបានគេបង្ហោះតាំងពីឆ្នាំ២០១៩ ពោលគឺ ៤ឆ្នាំមុនហេតុការណ៍ជំនន់ទឹកភ្លៀងនៅក្នុងទីក្រុងឌូបៃនៅក្នុងខែមេសាឆ្នាំនេះ។
ខាងក្រោមនេះ គឺជាវីដេអូឃ្លីបទាំងស្រុង ដែលពុំបានពាក់ព័ន្ធទៅនឹងគ្រោះទឹកជំនន់នៅក្នុងទីក្រុងឌូបៃនាពេលថ្មីៗនោះឡើយ។
វីដេអូឃ្លីបបង្ហាញខ្យល់ព្យុះមួយផ្សេងទៀត ក៏ត្រូវបានរកឃើញផងដែរ ដែលបញ្ជាក់ថា នោះគឺជាខ្យល់ព្យុះកំបុតត្បូងនៅក្នុងប្រទេសគុយបា។
ខាងក្រោមនេះ គឺជាវីដេអូទាំងស្រុងដែលត្រូវបានបង្ហោះនៅលើបណ្ដាញ YouTube ដោយឆាណែលមួយកាលពីថ្ងៃទី៣១ ខែធ្នូ ឆ្នាំ២០២៣កន្លងមក។
វីដេអូឃ្លីបខាងលើនេះ ក៏ត្រូវបានផ្ទៀងផ្ទាត់ដោយក្រុមការងាររបស់យើងនៅក្នុងប្រទេសស្រីលង្កា (Fact Crescendo Sri Lanka) ផងដែរ កាលពីថ្ងៃទី២០ ខែមេសា ឆ្នាំ២០២៤កន្លងទៅ ដោយបានបង្ហាញថា វីដេអូឃ្លីបនោះ ត្រូវបានប្រមូលផ្ដុំនៃវីដេអូឃ្លីបចាស់ៗ ដែលបានកើតឡើង និងមិនបានពាក់ព័ន្ធទៅនឹងជំនន់ទឹកលិចនៅក្នុងទីក្រុងឌូបៃនាពេលថ្មីៗនេះឡើយ។
Fact Crescendo Sri Lanka News Report | Archived Link
ដើម្បីស្វែងរកព័ត៌មានពិត សូមតាមដានការផ្សាយរបស់យើងតាមរយៈប្រព័ន្ធដូចខាងក្រោម៖
Facebook Twitter Telegram Google News TikTok WhatsApp
សន្និដ្ឋាន
Fact Crescendo Cambodia បានរកឃើញ ការអះអាងដូចដែលត្រូវបានរៀបរាប់ខាងលើនេះ មិនត្រឹមត្រូវនោះឡើយ។ វីដេអូឃ្លីបនេះ គឺជាការប្រមូលផ្ដុំនៃវីដេអូឃ្លីបចាស់ៗ ដែលបានកើតឡើង និងមិនបានពាក់ព័ន្ធទៅនឹងជំនន់ទឹកលិចនៅក្នុងទីក្រុងឌូបៃនាពេលថ្មីៗនេះឡើយ។
Title: វីដេអូឃ្លីបចាស់ៗត្រូវបានចែករំលែកថាជាវីដេអូទឹកជំនន់ថ្មីៗនេះនៅក្នុងទីក្រុងឌូបៃ
Fact Check By: Kakada SimResult: Misleading
