- >>
- FALSE
វីដេអូទំនប់ទឹកមួយនៅហ្វីលីពីន ត្រូវបានភ្ជាប់មិនត្រឹមត្រូវថានៅកម្ពុជា
វីដេអូមួយឃ្លីប ដែលបានបង្ហាញទិដ្ឋភាពដ៏ស្រស់ស្អាតមួយកន្លែង ត្រូវបានបង្ហោះនៅលើបណ្ដាញសង្គមកម្ពុជានាពេលថ្មីៗនេះ ជាមួយនឹងសំណេររៀបរាប់ថា វាជាទិដ្ឋភាពនៅក្នុងស្រុកបាធាយ ខេត្តកំពង់ចាម។ ការបង្ហោះខាងលើ ត្រូវបានអ្នកប្រើប្រាស់ចែកចាយ និងប្រតិកម្មចម្រុះជាច្រើនពាន់ដង។ ទោះជាយ៉ាងណា ការត្រួតពិនិត្យការពិតរបស់ Fact Crescendo Cambodia បានរកឃើញថា សំណេរខាងលើនេះ មិនត្រឹមត្រូវនោះឡើយ។
ការអះអាងលើបណ្ដាញសង្គម
កាលពីថ្ងៃទី២២ ខែមិថុនា ឆ្នាំ២០២៤កន្លងទៅនេះ មានទំព័រហ្វេសប៊ុកមួយ បានបង្ហោះវីដេអូឃ្លីប ដែលបង្ហាញទិដ្ឋភាពនៃតំបន់ទេសចរណ៍ទឹកស្លាយស្រស់ស្អាតមួយកន្លែង។ វីដេអូឃ្លីបខាងលើ ត្រូវបានភ្ជាប់នឹងការអះអាងថា វាមានទីតាំងស្ថិតនៅស្រុកបាធាយ ក្នុងទឹកដីខេត្តកំពង់ចាម។
ការលើកឡើងបែបនេះ ត្រូវបានអ្នកប្រើប្រាស់បណ្ដាញសង្គមចែករំលែកជាច្រើនពាន់ដង រួមជាមួយការបញ្ចេញមតិ និងប្រតិកម្មចម្រុះបែបផងដែរ។
ខាងក្រោមនេះ គឺជារូបភាពផ្ដាមចេញពីទំព័រហ្វេសប៊ុកខាងលើ ដែលបានរៀបរាប់ថា «ខាងលិចផ្សារផ្អាវ ស្រុកបាធាយ ខេត្តកំពង់ចាម យើងហ្នឹង»។
វីដេអូដែលភ្ជាប់នឹងការលើកឡើងបែបនេះ ក៏ទទួលបានការចែករំលែកជាច្រើនដង ខណៈដែលមានការបញ្ចេញមតិយោបល់ជាច្រើន និងប្រតិកម្មចម្រុះពីសំណាក់អ្នកប្រើប្រាស់ហ្វេសប៊ុកដទៃផងដែរ។
ការត្រួតពិនិត្យការពិត
Fact Crescendo Cambodia បានត្រួតពិនិត្យ និងផ្ទៀងផ្ទាត់ទៅលើការអះអាងខាងលើនេះ តាមរយៈការដំណើរការ Google Reverse Image Search ដែលនាំឱ្យយើងរកឃើញការពិតដូចខាងក្រោមនេះ។
វីដេអូឃ្លីបដែលមានទម្រង់ និងសណ្ឋានដូចគ្នាទាំងស្រុង ត្រូវបានបង្ហោះដោយទំព័រហ្វេសប៊ុកមួយ កាលពីថ្ងៃទី១៨ ខែឧសភា ឆ្នាំ២០២៤កន្លងទៅនេះ។ ទំព័រហ្វេសប៊ុកដដែលខាងលើ ក៏បានបញ្ជាក់នៅក្នុងសំណេររបស់ខ្លួនថា ទីតាំងមួយនេះ គឺស្ថិតនៅក្នុងខេត្ត Davao del Sur។
ខេត្ត Davao del Sur គឺជាខេត្តមួយនៅក្នុងប្រទេសហ្វីលីពីន ដែលមានទីក្រុងឈ្មោះ Digos។
ខាងក្រោមនេះ គឺជាវីដេអូឃ្លីបដើម ដែលទំព័រហ្វេសប៊ុកខាងលើ ដែលបានសរសេរថា «The largest & Longest River Water Slide in the Philippines» ឬមានអត្ថន័យជាភាសាខ្មែរ «ស្លាយទឹកធំជាងគេ និងវែងជាងគេនៅប្រទេសហ្វីលីពីន» និងពុំបានបញ្ជាក់ថា វាជាទិដ្ឋភាពនៅក្នុងស្រុកបាធាយ ខេត្តកំពង់ចាម ប្រទេសកម្ពុជាយើងនោះឡើយ។
វីដេអូបង្ហាញទិដ្ឋភាពស្រដៀងគ្នា ក៏ត្រូវបានផ្សព្វផ្សាយ និងបង្ហោះផងដែរ នៅលើបណ្ដាញសង្គមហ្វេសប៊ុក ដែលត្រូវបានគេស្គាល់ទីតាំងថា គឺជាតំបន់ទេសចរណ៍ទំនប់ទឹក Nia Dam ស្ថិតនៅក្នុងខេត្ត Davao del Sur ប្រទេសហ្វីលីពីន។
តើទំនប់ទឹកមួយនេះ មានទីតាំងស្ថិតនៅឯណា?
តំបន់ទេសចរណ៍ទំនប់ទឹក Nia Dam មួយនេះ មានទីតាំងស្ថិតនៅក្នុងស្រុក Bansalan ខេត្ត Davao del Sur ប្រទេសហ្វីលីពីន។ ខាងក្រោមនេះ គឺជារូបភាពផ្ដាម ចេញពីគេហទំព័រ Google Map ដែលបង្ហាញទិដ្ឋភាពដូចគ្នាទាំងស្រុងទៅនឹងវីដេអូឃ្លីប ដែលបានអះអាងខាងលើថា មានទីតាំងស្ថិតនៅភូមិសាស្រ្តខេត្តកំពង់ចាម។
ខាងក្រោមនេះ គឺជាវីដេអូឃ្លីប ទិដ្ឋភាពទូទៅនៃតំបន់ទេសចរណ៍ទំនប់ទឹក Nia Dam ដែលត្រូវបានថត និងបង្ហោះនៅលើគេហទំព័រវីដេអូ YouTube កាលពីពេលកន្លងទៅ។
ដើម្បីស្វែងរកព័ត៌មានពិត សូមតាមដានការផ្សាយរបស់យើងតាមរយៈប្រព័ន្ធដូចខាងក្រោម៖
Facebook Twitter Telegram Google News TikTok WhatsApp
សន្និដ្ឋាន
Fact Crescendo Cambodia បានរកឃើញថា ការអះអាងដោយភ្ជាប់ទៅនឹងរូបថតដូចដែលបានរៀបរាប់ខាងលើ គឺមិនត្រឹមត្រូវនោះទេ។ វីដេអូឃ្លីបខាងលើនេះ មិនមែនជាទិដ្ឋភាពនៅក្នុងស្រុកបាធាយ ខេត្តកំពង់ចាម ប្រទេសកម្ពុជានោះឡើយ។ ការពិតវីដេអូឃ្លីបនេះ គឺជាទំនប់ទឹក Nia Dam ដែលមានទីតាំងស្ថិតនៅក្នុងខេត្ត Davao del Sur ប្រទេសហ្វីលីពីន។
Title:វីដេអូទំនប់ទឹកមួយនៅហ្វីលីពីន ត្រូវបានភ្ជាប់មិនត្រឹមត្រូវថានៅកម្ពុជា
Written By: Kakada SimResult: False
