ការបោះឆ្នោតជាតិសំខាន់ៗកាន់តែខិតជិតចូលមកដល់នៅក្នុងរយៈពេលពីរឆ្នាំខាងមុខទៀត ការរិះគន់ និងការវាយប្រហារគ្នាខាងនយោបាយ បានក្លាយទៅជាប្រធានបទមួយនៃការជជែកដេញដោល រវាងអ្នកប្រើប្រាស់ហ្វេសប៊ុក និងអ្នកគាំទ្រគ្រប់មជ្ឍដ្នានយ៉ាងផុសផុល។
ក្នុងចំណោមនោះ មានរូបថតមួយសន្លឹកបង្ហាញនូវទិដ្ឋភាពរូបលោក ខឹម វាសនា ជាមួយនឹងពាក្យស្លោកនៅលើផ្ទាំងបដាមួយកន្លែងត្រូវបានបង្ហោះ និងចែកចាយដោយអ្នកប្រើប្រាស់ម្នាក់។ រូបថតមួយសន្លឹកនេះ ត្រូវបានចែករំលែក និងមានប្រតិកម្មចម្រុះពីសំណាក់អ្នកប្រើប្រាស់ហ្វេសប៊ុក។
ទោះជាយ៉ាងណា ការត្រួតពិនិត្យ និងផ្ទៀងផ្ទាត់ការពិតរបស់ក្រុមការងារ Fact Crescendo Cambodia បានរកឃើញថា រូបថតដែលអ្នកប្រើប្រាស់បានបង្ហោះនៅលើបណ្តាញសង្គមនោះ គឺជារូបថតកែច្នៃ។
ការអះអាងលើបណ្តាញសង្គម
កាលពីថ្ងៃទី០៨ ខែវិច្ឆិកា ឆ្នាំ២០២១ កន្លងទៅថ្មីៗនេះ អ្នកប្រើប្រាស់ហ្វេសប៊ុកម្នាក់ បានបង្ហោះរូបថតមួយសន្លឹកដែលបានបង្ហាញអំពីទិដ្ឋភាពនៃការចងបដា ដោយមានរូបថតលោក ខឹម វាសនា ជាមួយនឹងពាក្សស្លោកសរសេររៀបរាប់ថា «ក្បាលដែកគោលសម័យថ្មី អត់ដឹងព្រំបោកម៉េចស្ទាវ»។ លោក ខឹម វាសនា គឺជាអ្នកនយោបាយកម្ពុជាមួយរូបដែលធ្លាប់ជាសមាជិកនៃគណបក្សសមរង្ស៊ី និងត្រូវបានគេបោះឆ្នោតតំណាងឲ្យខេត្តព្រៃវែងនៅក្នុងរដ្ឋសភាកម្ពុជានាឆ្នាំ២០០៣។ លោក ខឹម វាសនា បច្ចុប្បន្ន គឺជាប្រមុខ និងប្រធានគណបក្សសម្ព័ន្ធដើម្បីប្រជាធិបតេយ្យ។
រូបថតខាងលើនេះ អាចនឹងត្រូវបានអ្នកប្រើប្រាស់ហ្វេសប៊ុកមួយចំនួនជឿថា ជារូបថតពិតប្រាកដដោយមានអ្នកប្រើប្រាស់ហ្វេសប៊ុកជាច្រើនបានចែករំលែកបន្ត និងប្រតិកម្មចម្រុះ។
ខាងក្រោមនេះ គឺជារូបភាពផ្តាមចេញពីប៉ុស្តិ៍របស់អ្នកប្រើប្រាស់ដោយបានសរសេររៀបរាប់ថា «ពាក្យស្លោកថ្មីពិត»។
ការត្រួតពិនិត្យការពិត
Fact Crescendo Cambodia បានចាប់ផ្ដើមធ្វើការត្រួតពិនិត្យ និងផ្ទៀងផ្ទាត់លើរូបថតនេះតាមរយៈ ការដំណើរការកម្មវិធីស្វែងរករូបថតរបស់ក្រុមហ៊ុន Google ដែលនាំឱ្យយើងប្រទះនូវប្រភពមួយចំនួន។
រូបថតដែលមានទម្រង់ និងសណ្ឋានដូចគ្នាទាំងស្រុងនេះ ត្រូវបានរកឃើញ និងផ្សព្វផ្សាយនៅលើ គេហទំព័រសារព័ត៌មានជាភាសាខ្មែរមួយកាលពីថ្ងៃទី០៦ ខែមិថុនា ឆ្នាំ២០១៨កន្លងទៅនេះ។ ខាងក្រោមនេះ គឺជារូបភាពផ្តាមចេញពីគេហទំព័រសារព័ត៌មានជាយក្រុង ដែលបានបង្ហាញនូវបដាពាក្យស្លោកបរិស្ថាន ដោយពុំបានបង្ហាញនូវទិដ្ឋភាពរូបលោក ខឹម វាសនា ដូចការបង្ហោះខាងលើនោះឡើយ។
Country Side News Report | Archived Link
ដូចគ្នានេះដែរ តាមរយៈគេហទំព័រផ្លូវការរបស់ក្រសួងបរិស្ថាន ចុះផ្សាយកាលពីថ្ងៃទី០៦ ខែមិថុនា ឆ្នាំ២០១៨ កន្លងទៅនេះ ក៏បានបង្ហាញនូវរូបថតដែលមានទម្រង់ដូចគ្នានេះផងដែរ។ គេហទំព័រនេះ ក៏បានបន្ថែមទៀតថា កាលពីថ្ងៃទី០៥ ខែមិថុនា ឆ្នាំ២០១៨ មន្ទីរបរិស្ថានរាជធានីភ្នំពេញបានចុះអប់រំ និងផ្សព្វផ្សាយការងារគ្រប់គ្រងបរិស្ថាន នៅតាមរោងចក្រ សហគ្រាស ទីផ្សារ ទីតាំងអាជីវកម្មនានា ដើម្បីអបអរសាទរទិវាបរិស្ថានជាតិ និងទិវាបរិស្ថានពិភពលោក ០៥ មិថុនា ដោយបានសហការជាមួយបណ្តាសហគ្រាស រោងចក្រ និងទីតាំងអាជីវកម្មទាំងនោះ ចងបដាពាក្យស្លោកបរិស្ថាន និងធ្វើការសម្អាតអនាម័យបរិស្ថានទៅតាមទីតាំងរបស់ខ្លួនរៀងៗខ្លួន។
ខាងក្រោមនេះ គឺជារូបភាពផ្តាមចេញពីគេហទំព័រក្រសួងបរិស្ថាន បង្ហាញនូវរូបថតនៃការរៀបចំចងបដា ដែលសរសេរថា «អនាម័យល្អ បរិស្ថានស្អាត នាំមកនូវសុខភាព បរិស្ថានស្អាតផ្តើមចេញពីយើងទាំងអស់គ្នា»។
Ministry of Environment | Archived Link
ដើម្បីស្វែងរកព័ត៌មានពិត សូមតាមដានការផ្សាយរបស់យើងតាមរយៈប្រព័ន្ធដូចខាងក្រោម៖
Facebook Twitter Telegram Google News
សន្និដ្ឋាន
Fact Crescendo Cambodia បានរកឃើញថា រូបថតដែលបានបង្ហោះដោយអ្នកប្រើប្រាស់ខាងលើនោះ គឺពិតជាមិនត្រឹមត្រូវនោះឡើយ។ រូបថតមួយសន្លឹកនេះ ត្រូវបានកាត់តមុននឹងបង្ហោះនៅលើបណ្តាញសង្គម។ ការពិតច្បាប់ដើមនៃរូបថតនេះ គឺជាបដាពាក្យស្លោកបរិស្ថានដែលមន្ត្រីជំនាញនៃមន្ទីរបរិស្ថានរាជធានីភ្នំពេញ បានសហការជាមួយបណ្តាសហគ្រាស រោងចក្រ ដោយបានចុះអប់រំ និងផ្សព្វផ្សាយការងារគ្រប់គ្រងបរិស្ថាន ដោយមានខ្លឹមសារថា «អនាម័យល្អ បរិស្ថានស្អាត នាំមកនូវសុខភាព បរិស្ថានស្អាតផ្តើមចេញពីយើងទាំងអស់គ្នា»។
Title:ផ្ទាំងបដាដែលមានរូបលោក ខឹម វាសនា ជារូបភាពកាត់ត
Fact Check By: Kakada SimResult: False
