- >>
- Social
Fact Check: រូបថតបង្ហាញ រ៉ាស្មាច់ សើចសប្បាយ គឺជារូបថតកាត់ត
នៅក្នុងទីក្រុងភ្នំពេញ កាលពីជាង២០ឆ្នាំមុន បណ្ដាអ្នកមាន និងឧកញ៉ាជាច្រើន មានការភ័យខ្លាចចំពោះមហាចោរ រ៉ាស្មាច់ យ៉ាងខ្លាំងដោយសារជំនាញប្លន់ និងចាប់ជំរិតកក្រើកក្រុង ហើយមានជនរងគ្រោះយ៉ាងហោចណាស់ក៏ជិត ២០នាក់ដែរ ត្រូវក្រុមចោររ៉ាស្មាច់ធ្វើសកម្មភាពបានសម្រេច។
ទន្ទឹមនឹងនេះ មានរូបថតចាស់មួយសន្លឹកដែលបានបង្ហោះនៅលើបណ្តាញសង្គមហ្វេសប៊ុកនាពេលថ្មីៗនេះ ដោយបានបង្ហាញអំពីទិដ្ឋភាពសើចញញឹមរបស់ជនចាប់ជំរិត និងប្លន់ដ៏ល្បីឈ្មោះម្នាក់កាលពីអំឡុងឆ្នាំ២០០០ ដែលត្រូវបានគេស្គាល់ថាជាលោក រ៉ាស្មាច់។ រូបថតនេះមានការចាប់អារម្មណ៍ និងចែកចាយតៗគ្នាជាច្រើនដង។
ទោះជាយ៉ាងណា ការត្រួតពិនិត្យការពិត និងផ្ទៀងផ្ទាត់របស់ក្រុមការងារ Fact Crescendo Cambodia បានរកឃើញថា រូបថតដែលអ្នកប្រើប្រាស់បានបង្ហោះនៅលើបណ្តាញសង្គមនោះ គឺជារូបថតកែច្នៃ។
ការអះអាងលើបណ្តាញសង្គម
កាលថ្ងៃទី២០ ខែកញ្ញា ឆ្នាំ២០២១កន្លងទៅថ្មីៗនេះ អ្នកប្រើប្រាស់បណ្តាញសង្គមហ្វេសប៊ុកម្នាក់ បានបង្ហោះនូវរូបថតដែលមានទម្រង់ចាស់មួយសន្លឹក បង្ហាញអំពីការសើចសប្បាយរបស់លោក រ៉ាស្មាច់ ដែលត្រូវបានគេស្គាល់ថាជាជនចាប់ជំរិត និងប្លន់ដ៏ល្បីឈ្មោះម្នាក់កាលពីអំឡុងឆ្នាំ២០០០។
រូបថតខាងលើនេះ អាចនឹងត្រូវបានអ្នកប្រើប្រាស់ហ្វេសប៊ុកមួយចំនួនជឿថា ជារូបថតពិតប្រាកដ ដោយមានអ្នកប្រើប្រាស់ហ្វេសប៊ុកជាច្រើនបានបញ្ចេញមតិ និងចែករំលែកបន្ត។
ខាងក្រោមនេះ គឺជារូបភាពផ្តាមចេញពីប៉ុស្តិ៍របស់អ្នកប្រើប្រាស់ដែលបានបង្ហាញអំពីរូបថតរបស់ រ៉ាស្មាច់ កំពុងតែសើចញញឹម។
ការត្រួតពិនិត្យការពិត
Fact Crescendo Cambodia បានចាប់ផ្ដើមត្រួតពិនិត្យ និងផ្ទៀងផ្ទាល់លើរូបថតមួយសន្លឹកនេះ តាមរយៈការដំណើរការកម្មវិធីស្វែងរករូបថតរបស់ក្រុមហ៊ុន Google ដែលនាំឱ្យយើងជួបប្រទះនូវប្រភព និងខ្លឹមសាររូបថតនៃច្បាប់ដើមមួយចំនួន។
រូបថតដែលមានទម្រង់ដូចគ្នានេះ ត្រូវបានរកឃើញឡើងនៅក្នុងគេហទំព័រសារព័ត៌មាន Freedom News ដែលបានចុះផ្សព្វផ្សាយនូវព័ត៌មានមួយដែលមានចំណងជើងថា «ព្រឺសប្បុរខ្ញាក់! ពេលដឹងពីកំពូលចោរ រ៉ាស្មាច់ ប្លន់ផ្អើលក្រុងភ្នំពេញ ប៉ូលីសតាមចាប់ច្រើនដងតែមិនបានព្រោះតែ វត្ថុសក្កសិទ្ធ គួរអោយ[ឲ្យ]ខ្លាចនេះសោះ»។
រូបភាពផ្តាមចេញពីគេហទំព័រសារព័ត៌មានបង្ហាញអំពីរូបថតដើមនៃលោក រ៉ាស្មាច់ ដែលពុំបានបង្ហាញនូវសភាពសើចញញឹមនោះឡើយ។
Freedom News Report Link | Archived Link
តាមរយៈគេហទំព័រសារព័ត៌មានមួយផ្សេងទៀត DNT News ដែលបានចុះផ្សព្វផ្សាយកាលពីថ្ងៃទី២៦ ខែឧសភា ឆ្នាំ២០២០កន្លងទៅនេះ ក៏បានបង្ហាញនូវរូបថតមួយសន្លឹកដែលមានរូបថតលោក រ៉ាស្មាច់ ដែលរូបថតនេះ ពុំបានបង្ហាញនូវសភាពសើចសប្បាយដូចទៅនឹងរូបថតដែលអ្នកប្រើប្រាស់ខាងលើយកមកបង្ហោះនោះឡើយ។
រូបភាពផ្តាមចេញពីគេហទំព័រសារព័ត៌មានដែលមានចំណងជើងថា «បើមិនជឿកុំប្រមាថ មន្តអាគម ឬអាថ័ន ត្រូវបានកំពូលចោរសង្គមងងឹតប្រើការពារខ្លួនយ៉ាងសាហាវ!»។
DNT News Report Link | Archived Link
ដើម្បីស្វែងរកព័ត៌មានពិត សូមតាមដានការផ្សាយរបស់យើងតាមរយៈប្រព័ន្ធដូចខាងក្រោម៖
Facebook Twitter Telegram Google News
សន្និដ្ឋាន
Fact Crescendo Cambodia បានរកឃើញថា រូបថតដែលបានបង្ហោះដោយអ្នកប្រើប្រាស់ខាងលើនោះ គឺពិតជាមិនត្រឹមត្រូវនោះឡើយ។ រូបថតមួយសន្លឹកនេះ ត្រូវបានកាត់តមុននឹងបង្ហោះនៅលើបណ្តាញសង្គម។ ការពិត ច្បាប់ដើមនៃរូបថតនេះ ពុំបានបង្ហាញនូវទិដ្ឋភាពលោក រ៉ាស្មាច់ សើចញញឹមឃើញធ្មេញនោះឡើយ ផ្ទុយទៅវិញរូបថតនេះ បានបង្ហាញនូវទិដ្ឋភាព និងទម្រង់មុខដ៏មាំរបស់លោកទៅវិញទេ។
Title:រូបថតបង្ហាញ រ៉ាស្មាច់ សើចសប្បាយ គឺជារូបថតកាត់ត
Fact Check By: Kakada SimResult: Altered
