រូបថត និងវីដេអូឃ្លីបព័ត៌មានជាច្រើន ត្រូវបានបង្ហោះនៅលើបណ្តាញសង្គមនានា ក្នុងនោះមានទាំងរូបថត និងវីដេអូក្លែងក្លាយផងដែរ។ ក្នុងចំណោមនោះ រូបថតបង្ហាញអំពីទិដ្ឋភាពជនសង្ស័យមានទម្រង់មុខក្មេង ត្រូវបានបង្ហោះយ៉ាងផុសផុលដោយអ្នកប្រើប្រាស់ និងទំព័រហ្វេសប៊ុកនានាជាច្រើន។ រូបថតនេះ បានចែកចាយតៗគ្នា ជាមួយនឹងប្រតិកម្មចម្រុះពីសំណាក់អ្នកប្រើប្រាស់ហ្វេសប៊ុករាប់ពាន់ដង។
ទោះជាយ៉ាងណា ការត្រួតពិនិត្យ និងផ្ទៀងផ្ទាត់ការពិតរបស់ក្រុមការងារ Fact Crescendo Cambodia រកឃើញថា រូបថតដែលអ្នកប្រើប្រាស់បង្ហោះនៅលើបណ្តាញសង្គមនោះ គឺជារូបថតកាត់ត។
ការអះអាងលើបណ្តាញសង្គម
កាលពីថ្ងៃទី៣០ ខែមេសា ឆ្នាំ២០២២កន្លងទៅ អ្នកប្រើប្រាស់ហ្វេសប៊ុកម្នាក់ បង្ហោះរូបថតចំនួន ៨សន្លឹកទៅក្នុងក្រុមហ្វេសប៊ុកមួយឈ្មោះថា «Hang Meas HDTV» ដោយបង្ហាញទិដ្ឋភាពជនសង្ស័យស្ថិតក្នុងទម្រង់មុខវ័យក្មេង។ ការបង្ហោះនេះ ត្រូវបានភ្ជាប់ជាមួយនឹងការសរសេរថា អ្នកស្រុកកោះធំ គឺស្អាត។
រូបថតទាំងឡាយនេះ ត្រូវបានចែកចាយរាប់ពាន់ដងពីសំណាក់អ្នកប្រើប្រាស់ហ្វេសប៊ុកនិយាយភាសាខ្មែរ ព្រមទាំងមានការបញ្ចេញមតិ និងប្រតិកម្មជាច្រើនផងដែរ។
ខាងក្រោមនេះ គឺជារូបភាពផ្តាមចេញពីប៉ុស្ដិ៍របស់អ្នកប្រើប្រាស់ខាងលើ បានសរសេររៀបរាប់ថា «អ្នកស្រុកកោះធំ cute cute ម៉េះ»។
ការត្រួតពិនិត្យការពិត
Fact Crescendo Cambodia បានចាប់ផ្ដើមធ្វើការត្រួតពិនិត្យ និងផ្ទៀងផ្ទាត់លើរូបថតនេះតាមរយៈ ការដំណើរការកម្មវិធីស្វែងរករូបថតរបស់ក្រុមហ៊ុន Google ដែលនាំឱ្យយើងប្រទះនូវប្រភពមួយចំនួន។
រូបថតមួយសន្លឹកមានទម្រង់ និងសណ្ឋានដូចគ្នាទាំងស្រុងនេះ ត្រូវបានរកឃើញនៅលើទំព័រហ្វេសប៊ុក អធិការដ្ឋាននគរបាលស្រុកកោះធំ – Police Inspectorate of Koh Thom District ផ្សព្វផ្សាយកាលពីថ្ងៃទី២១ ខែមីនា ឆ្នាំ២០២២កន្លងទៅ។ រូបថតខាងលើនេះ ពុំបានបង្ហាញទិដ្ឋភាពជនសង្ស័យ ស្ថិតក្នុងវ័យក្មេងនោះឡើយ។ ជនសង្ស័យម្នាក់នេះ ត្រូវបានស្គាល់ឈ្មោះថា បូ រ៉ាយុទ្ធ ជនជាតិខ្មែរ និងមានអាយុ ១៧ឆ្នាំ។
ដូចគ្នានេះ ទំព័រហ្វេសប៊ុកដដែល ក៏បានបង្ហាញនូវរូបថតមួយសន្លឹក ដែលមានទិដ្ឋភាព និងទម្រង់ដូចគ្នាផងដែរកាលពីថ្ងៃទី៣០ ខែមេសា ឆ្នាំ២០២១កន្លងទៅ។ ជនសង្ស័យម្នាក់នេះ ត្រូវបានស្គាល់ឈ្មោះថា មឿន ឆវី ជនជាតិខ្មែរ និងមានមុខរបរមិនពិតប្រាកដនោះទេ។
ដោយឡែក រូបថតរបស់ជនសង្ស័យភេទស្រីម្នាក់នេះ ក៏ត្រូវបានរកឃើញនៅក្នុងទំព័រហ្វេសប៊ុករបស់អធិការដ្ឋាននគរបាលស្រុកកោះធំផងដែរ ដែលបានផ្សព្វផ្សាយកាលពីថ្ងៃទី១៤ ខែធ្នូ ឆ្នាំ២០១៩កន្លងទៅ។ ជនសង្ស័យស្រីម្នាក់នេះ ត្រូវបានគេស្គាល់ឈ្មោះថា ជា ណារី ជនជាតិខ្មែរ និងមានមុខរបរជានារីខារ៉ាអូខេ។
ដើម្បីស្វែងរកព័ត៌មានពិត សូមតាមដានការផ្សាយរបស់យើងតាមរយៈប្រព័ន្ធដូចខាងក្រោម៖
Facebook Twitter Telegram Google News
សន្និដ្ឋាន
Fact Crescendo Cambodia រកឃើញថា រូបថតដែលបានបង្ហោះដោយអ្នកប្រើប្រាស់ខាងលើ គឺពិតជាមិនត្រឹមត្រូវឡើយ។ រូបថតទាំងឡាយនេះ ត្រូវបានកាត់តមុននឹងបង្ហោះនៅលើបណ្តាញសង្គម។ ការពិតច្បាប់ដើមនៃរូបថតនេះ ពុំបានបង្ហាញទិដ្ឋភាពជនសង្ស័យ មានទម្រង់មុខក្មេងដូចអ្នកប្រើប្រាស់បានបង្ហោះនោះឡើយ។
Title:រូបថតជនសង្ស័យត្រូវបានកែប្រែឱ្យទម្រង់មុខមើលទៅក្មេងជាងមុន
Fact Check By: Kakada SimResult: Altered
