គិតត្រឹមថ្ងៃទី១២ ខែមីនា ឆ្នាំ២០២១ កម្ពុជាបានរកឃើញមនុស្សដល់ទៅ ១,២២៥នាក់ហើយ បានឆ្លងវីរុសកូរ៉ូណា ក្នុងនោះមនុស្សដល់ទៅ ៧១២នាក់ បានឆ្លងវីរុសកូរ៉ូណា បន្ទាប់ពីពួកគេពាក់ព័ន្ធនឹងការឆ្លងសហគមន៍ ដែលរដ្ឋាភិបាលហៅថា «ព្រឹត្តិការណ៍សហគមន៍ ២០ កុម្ភៈ»។ ទន្ទឹមគ្នានេះ ក្រុមអ្នកប្រើប្រាស់បណ្ដាញសង្គមកម្ពុជា បានចែករំលែកតៗគ្នានូវសំឡេងលោកនាយករដ្ឋមន្ត្រី ហ៊ុន សែន ដែលបានណែនាំឱ្យបិទការធ្វើដំណើររបស់ប្រជាពលរដ្ឋឆ្លងពីខេត្តមួយទៅខេត្តមួយ និងពីស្រុកមួយទៅស្រុកមួយ។ ប៉ុន្តែ ការផ្ទៀងផ្ទាត់ការពិត បង្ហាញថា សារជាសំឡេងនេះ មិនត្រឹមត្រូវនឹងបរិបថនោះឡើយ។
ការអះអាងលើបណ្ដាញសង្គម
សារជាសំឡេងរបស់លោកនាយករដ្ឋមន្ត្រី ហ៊ុន សែន ត្រូវបានចែករំលែកចូលទៅក្នុងក្រុមនៃបណ្ដាញសង្គមតេឡេក្រាមកាលពីយប់ថ្ងៃទី១១ ខែមីនា ឆ្នាំ២០២១ ហើយក៏បានរំលែកបន្តទៀតចូលទៅប្រព័ន្ធផ្ញើសារ Messenger ផងដែរ។ សមាជិកមួយចំនួននៅក្នុងក្រុមតេឡេក្រាមដទៃទៀត បានចែករំលែកសារជាសំឡេងនេះ ជាមួយការចោទសួរថា តើសំឡេងនោះថ្មីៗ ឬក៏ចាស់ ហើយសមាជិកមួយចំនួនបានឆ្លើយតបថា ជាសំឡេងចាស់កាលពីមួយឆ្នាំមុន។
ក្នុងសារជាសំឡេងរយៈពេល ២នាទី ១១វិនាទី លោក ហ៊ុន សែន ថ្លែងថា៖ «ខ្ញុំសូមស្នើឱ្យមានការប្រជុំបន្ទាន់ដោយដឹកនាំដោយសម្ដេចក្រឡាហោម ខាងពាក់ព័ន្ធ និងរឿងសំខាន់ គិតថា ដោយសារតែមានបងប្អូនកម្មករមួយចំនួន គឺហាក់ដូចជាមិនយល់ស្រប។ អ៊ីចឹង ខ្ញុំចង់ចេញបទបញ្ជាតាមរបៀបមួយគឺថា ហាមឃាត់ការធ្វើដំណើរឆ្លងពីខេត្តមួយទៅកាន់ខេត្តមួយចាប់ពីថ្ងៃទី១២ ដល់ថ្ងៃទី១៦។ បើមិនអ៊ីចឹងទេ គឺថា កម្មកររបស់យើងនឹងធ្វើដំណើរដោយមិនព្រមស្ដាប់បង្គាប់។ អ៊ីចឹងទេគឺថា យកវិធានការបន្ទាន់ភ្លាម ដើម្បីនឹងធ្វើរឿងហ្នឹង និងជូនយោបល់ត្រឡប់មកខ្ញុំវិញ គឺនៅក្នុងគណៈកម្មការកូវីដ ដូចជា ខ្ញុំនឹងបញ្ជូនរឿងហ្នឹងទៅក្នុងគណៈអចិន្ត្រៃយ៍ដែរ ហើយសូមផ្ដល់យោបល់តាមអនឡាញត្រឡប់មកវិញ។ តើគួរចេញបទបញ្ជា ដើម្បីគិតថា ផ្អាកការធ្វើដំណើរឆ្លងខេត្ត ពីស្រុកមួយទៅស្រុកមួយ ពីខេត្តមួយទៅខេត្តមួយចាប់ពីថ្ងៃទី១២ ដល់ថ្ងៃទី១៦ គឺមិនឱ្យរថយន្តចេញតែម្ដង។ អ៊ីចឹង រឿងហ្នឹងសំខាន់ណាស់។ បើបងប្អូនមិនស្ដាប់អ៊ីចឹង យើងក៏មិនអាចធ្វើច្បាប់បន្ទាន់ដែរ។ អ៊ីចឹង សូមឱ្យយកចិត្តទុកដាក់ផ្ដល់យោបល់ឱ្យខ្ញុំវិញ ហើយបើផ្ដល់យោបល់បានហើយ សូមសម្ដេចក្រឡាហោម និងឯកឧត្ដម ប៊ិន ឈិន ធ្វើសេចក្ដីព្រាងឱ្យខ្ញុំ ដើម្បីហាមឃាត់ការធ្វើដំណើរចេញពីស្រុកមួយទៅកាន់ស្រុកមួយ ពីខេត្តមួយទៅកាន់ខេត្តមួយ ហើយរថយន្តឈ្នួលទាំងអស់មិនឱ្យធ្វើដំណើរក្នុងរយៈពេលហ្នឹង។ អាហ្នឹង យើងយកវិធានការមួយជាក់លាក់។ បើមិនអ៊ីចឹង គឺអន្តរាយស្រុកទេស»។
ការត្រួតពិនិត្យការពិត
យើងចាប់ផ្ដើមត្រួតពិនិត្យការពិតនៃសំឡេងដែលបានចែករំលែកតៗគ្នាពីក្រុមមួយទៅក្រុមមួយ និងពីប្រព័ន្ធទំនាក់ទំនងសង្គមមួយឆ្លងទៅប្រព័ន្ធទំនាក់ទំនងសង្គមមួយទៀត។ យើងត្រួតពិនិត្យមើលសារឆ្លើយតបរបស់សមាជិកមួយចំនួននៅក្នុងក្រុមប្រព័ន្ធទំនាក់ទំនងតេឡេក្រាម និងស្វែងរកមើលសារសំឡេងរបស់លោកនាយករដ្ឋមន្ត្រី ហ៊ុន សែន នៅលើប្រភពផ្លូវការរបស់លោក ឬប្រភពផ្លូវការរបស់រដ្ឋាភិបាល សារព័ត៌មានអនឡាញ ហ្វ្រេស ញូវស៍ (Fresh News) អគ្គនាយកដ្ឋានទូរទស្សន៍ និងវិទ្យុបាយ័ន ដែលសុទ្ធតែស្និទ្ធនឹងលោកនាយករដ្ឋមន្ត្រី។
តាមរយៈការពិនិត្យមើលសារឆ្លើយឆ្លងក្នុងបណ្ដាញតេឡេក្រាម យើងរកឃើញថា សមាជិកមួយចំនួនក្នុងតេឡេក្រាម បានអះអាងថា សារជាសំឡេងនោះ គឺជាសំឡេងរបស់លោកនាយករដ្ឋមន្ត្រី ហ៊ុន សែន ដែលបានចេញកាលពីថ្ងៃទី៩ ខែមេសា ឆ្នាំ២០២០។ លោក ហ៊ុន សែន បានផ្ញើសារជាសំឡេងនោះទៅសមាជិករដ្ឋាភិបាលរបស់លោក ដើម្បីដាក់ចេញនូវការហាមឃាត់ការធ្វើដំណើររបស់ប្រជាពលរដ្ឋអំឡុងបុណ្យចូលឆ្នាំថ្មីប្រពៃណីជាតិនៅចន្លោះថ្ងៃទី១២ ដល់ថ្ងៃទី១៦ ខែមេសា កាលពីឆ្នាំ២០២០។ មេដឹកនាំកម្ពុជារូបនេះ បានចេញនូវបម្រាមការធ្វើដំណើរបែបនេះចំពេលដែលមានក្ដីបារម្ភអំពីការឆ្លងរីករាលដាលកាន់តែច្រើននៃជំងឺកូវីដ១៩នាពេលនោះ។
តាមរយៈការពិនិត្យទៅលើសារព័ត៌មាន Fresh News ដែលតែងតែសម្ភាសផ្ដាច់មុខជាមួយលោក ហ៊ុន សែន នោះ យើងរកឃើញថា គ្មានសារសំឡេងដូចដែលបានចែករំលែកតៗគ្នានោះ ត្រូវបានផ្សាយដោយសារព័ត៌មានមួយនេះនោះឡើយនៅក្នុងសេចក្ដីរាយការណ៍សរុប ១០៤ នៅថ្ងៃទី១១ ខែមីនា ឆ្នាំ២០២១។
ការត្រួតពិនិត្យទៅលើទំព័រហ្វេសប៊ុកផ្លូវការរបស់លោកនាយករដ្ឋមន្ត្រី ហ៊ុន សែន យើងរកឃើញថា ទំព័រហ្វេសប៊ុកមួយនេះ មិនបានបង្ហោះសារជាសំឡេងអ្វីនោះឡើយនៅថ្ងៃទី១១ ខែមីនា ឆ្នាំ២០២១។ ទំព័រហ្វេសប៊ុកថ្នាក់ដឹកនាំកម្ពុជា បង្ហោះវីដេអូល្ខោនបាសាក់រយៈពេលប្រហែល ៦នាទី ដែលជំរុញការការពារ និងបង្ការខ្លួនពីការឆ្លងជំងឺកូវីដ១៩។
នៅក្នុងសេចក្ដីរាយការណ៍របស់ខ្លួន វិទ្យុសំឡេងសហរដ្ឋអាមេរិក VOA បានដកស្រង់សម្ដីមួយផ្នែកនៃសារជាសំឡេងរបស់លោក ហ៊ុន សែន ដែលបានដាក់ចេញនូវបទបញ្ជាហាមឃាត់ការធ្វើដំណើរឆ្លងពីខេត្តមួយទៅខេត្តមួយទៀតនៅអំឡុងពេលឈប់សម្រាកបុណ្យចូលឆ្នាំថ្មីប្រពៃណីជាតិខ្មែរនៅចន្លោះពីថ្ងៃទី១២ ដល់ថ្ងៃទី១៦ ខែមេសា ឆ្នាំ២០២០ ដើម្បីទប់ស្កាត់ការឆ្លងរីករាលដាលនៃជំំងឺកូវីដ១៩។
ក្នុងកិច្ចសម្ភាសតាមទូរស័ព្ទនៅថ្ងៃទី១៦ ខែមីនា លោក សេង ទៀង ជំនួយការផ្ទាល់របស់លោកនាយករដ្ឋមន្ត្រី ហ៊ុន សែន បានបញ្ជាក់ថា សំឡេងនោះ គឺជាសារចាស់របស់លោកនាយករដ្ឋមន្ត្រី ដែលបានណែនាំឱ្យហាមឃាត់ការធ្វើដំណើរឆ្លងខេត្តអំឡុងពេលបុណ្យឆ្នាំថ្មីប្រពៃណីខ្មែរកាលពីឆ្នាំមុន ខណៈករណីឆ្លងជំងឺកូវីដ១៩នៅកម្ពុជានាពេលនោះ កំពុងផ្ទុះឡើងច្រើនករណី។
សន្និដ្ឋាន
Fact Crescendo Cambodia រកឃើញថា សារជាសំឡេងចាស់របស់លោកនាយករដ្ឋមន្ត្រី ហ៊ុន សែន ដែលត្រូវបានចែករំលែកតៗគ្នាលើបណ្ដាញសង្គមនៅយប់ថ្ងៃទី១១ ខែមីនានោះ គឺជាសំឡេងចាស់របស់ប្រមុខរាជរដ្ឋាភិបាលកាលពីខែមេសាឆ្នាំមុន ហើយការចែករំលែកសំឡេងចាស់ឡើងវិញនេះ បាននាំឱ្យមានការភ័ន្តច្រឡំក្នុងចំណោមអ្នកប្រើប្រាស់បណ្ដាញសង្គមនៅកម្ពុជា។ ការពិត លោក ហ៊ុន សែន បានសម្រេចចេញបញ្ជាហាមឃាត់ការធ្វើដំណើរឆ្លងពីខេត្តមួយទៅខេត្តមួយរបស់ប្រជាពលរដ្ឋអំឡុងពេលឈប់សម្រាកបុណ្យចូលឆ្នាំថ្មីប្រពៃណីខ្មែរកាលពីឆ្នាំមុន ដើម្បីទប់ស្កាត់ការឆ្លងរីករាលដាលនៃជំងឺកូវីដ១៩។
Title:នាយករដ្ឋមន្ត្រី ហ៊ុន សែន មិនបានបញ្ជាឱ្យហាមឃាត់ការធ្វើដំណើរឆ្លងខេត្តនៅខែមីនាទេ
Fact Check By: Jay UdomResult: Misleading
